Koula 27 - Testament ke Siki 1960 (Kabba Laka)

¹ Tokou dèdè ndiki gè ta karedjè djao ke to ke Italie té, dèdè dare Paul ke mare ndjè kei kouladjé dji ndjè ngem ndjè pouroudjé té ke to ngä Auguste, ria na Julius.

² Tokou djèdjè djao mè to té lo Adramytte, ke ata ndja do man té ta kao béh kada kada kongo té ke Asie, djèdjè djao tokou man té. Aristarque doou ke Macédoine ke Thessalonique ao kedjè.

³ Gè té ndò kada djèdjè ntéh Sidon té. Julius da mè madji ke Paul, nè narè nao rò ndjè bokoradjé té la, mbata karedè nda sa.

⁴ Tokou djèdjè djï nou, djèdjè djao do man té ngosiba ke nange té ke Chypre mbata lél tò deo lodjè.

⁵ Tokou djèdjè ndja do man té ke to ngosiba ke Cilicie ke Pamphylie, djèdjè ntéh Myra té, béh ke Lycie.

⁶ Ndjè ngem ndjè pouroudjé wo mare to lo Alexandrie nou ke ata kao Italie té. Nè naredjè djao mè té.

⁷ Djèdjè djao do man té djan djan ndò baya, to ngeng nya ta kao nderèng ngosiba ke Cnide. Mbata lél òkoudjè ta karedjè djao, djèdjè ndja do man té mbòr kongo té ke Crète, ngosiba ke Salmone.

⁸ Tokou djèdjè djao mbòr kongo té ke nèn, loou ngeng nya, djèdjè ndé loou kada ke ria na Beaux-Ports ke to ngosiba ke béh ke Lasée.

⁹ Mbata ndò baya baya ndai ase, ke ta ndja do man té to madjang nya, mbata nai ta kïya mourou ndai mbä tò, Paul ndedjidè,

¹⁰ Mpana, Dooudjé, ma mo deo ta ndja do man té a karedjè né ke to ngosi ke yo, ke mare nédjé nya a nai, to to né koto ke to ke kadè ke nai ang, a djèdjè ndja ke ròdjè tò.

¹¹ A ndjè ngem ndjè pouroudjé wo tar lo doou ke ndjè lél to ke doou ke ndjè to wota tar lo Paul.

¹² Mbata mbòr man béh té nèn to madji ta kisi kendé nai koul té ang, mare dooudjé wota ndiki gè ta ndja do tòkou man té, dèdè dedji dase ta téh Phénix té, ke mbòr man nange té ke Crète ke wo loou ke ber ke kade na té, ke loou ke tarr ke kade na té, ta kisi nou nai koul té.

¹³ Tokou lél ke loou té ke ber oula pèpè ba, dèdè dedji dinga né tokou dèdè ndiki, dèdè doun narè tò to, dao do man té ke mbòr Crète ngosiba ke kongo.

¹⁴ Gè té ngadji lél bourä ke ria na Euraquilon ï er nange té oula dodè té.

¹⁵ Tokou lél tò deo lo to, ke to ase ta kao kem lél té ang, djèdjè djïya ta kare to ao mè lél té ba.

¹⁶ Tokou djèdjè djao ngosiba ke kongo nange té ke man ïya dana ke ria na Claude, nai ngadji djèdjè djase ta lél to pi.

¹⁷ Tokou dèdè dwaa ke tarr, dèdè nto mare né ko to té ta ngemè, mbata bel dadè dedji na to lél a kiladè bwoul man Syrte té, dèdè ntoutou koulaa ke koubou ke dò to té, dare to ao mè lél té ba.

¹⁸ Tokou lél yè to madjang nya, ke sindò dèdè dounkotè ta kongou né koto mè man té.

¹⁹ Ndò ke mouta dèdè ntila né ke mè to té mè tokou man té ke djidè ndja.

²⁰ Tokou ban, tokou kade aséh ndètélendè ntéh ang mbata ndò baya nya, ke lél yè to nya, mè ngebe mbata ngem ròdjè goto toï nga.

²¹ Tokou dèdè dön mourou ang ndò baya, Paul ï arr horodè té pana, Dooudjé, ase kare sésè woidjé tar lom leo, mbata mpa maresè ta kïya Crète ang, bana a kingaidjé né ke madjang tokou bé ang.

²² Ma mpa maresè loshénè, aridjé mèsè isi dèkèkè, mbata doou kada horosè té a kwoei ang, sè to kadaba a toudjou.

²³ Tilti ke nèn ndja, ange lo Allah kada arr mbòr ròm té, nè ke mam nto ngë, ke nè ke mam nwalè.

²⁴ Nè mpa narem, Are bel dai ang Paul, i ase ta karr no César té, ke wo, Allah ari dèdè toï ke ndja dò man té sei.

²⁵ Bana dooudjé, aridjé mèsè isi dèkèkè, ma mo mem té ke Allah, ke né toï a dé tokou nè mpa narem mbä.

²⁶ A djèdjè djase ta kao dò mare nange té ke man ïya dana.

²⁷ Ke tilti dòkou gérè sò ke lél oula kaidjè dang dang dò tokou man té Adratique, ngosiba ke loou oso kon yènènè, mè dooudjé ke ndjè lél to edji dèdè ndé ngosiba ke nange.

²⁸ Tokou dèdè nnaa man, dèdè do man ourou ase ninga dòdjo, goukoudang ngadji dèdè nnaa man bai, dèdè do man ourou ase ninga dòkou gérè mi.

²⁹ Mbata bel dadè na to a kounda err ke bo, dèdè dila bouka koulaa narè sò ke ngem to ke to koutou to té mè man té, dèdè ndiki nya ta kare loou arè.

³⁰ Tokou ndjè lel to sange ta téh daka ke to, dèdè dila to ke ngadji dò man té, dèdè nda tokou dèdè ndiki ta toutou mare narè ta ngem to, ke to oum to té.

³¹ Paul pa are ndjè ngem ndjè pouroudjé ke ndjè pouroudjé pana, Tokou dooudjé nèn isi mè to té ang, sésè a kingaidjé kadji ang.

³² Tokou ban ndjè pouroudjé oudja koulaa ngon to gange, dare to ao ke kadè.

³³ Tokou loou ata karè, Paul doudjoudè toï nya ta kare dön mourou ngadji, pana, Bokonè to to ndò dòkou gérè sò ke sésè oundaidjé mèsè ba ke öndjé mourou kada ang.

³⁴ Tokou ban mam ndoudjousè nya ta kön mourou ngadji, nè na karesè singa, mbata bi dòsè kada a kòrou dòsè té kada ang.

³⁵ Tokou nè mpa ban mbä, nè noun mourou nè nda woio Allah nodè té toï, nè noukou mourou nao nön.

³⁶ Tokou ban mèdè toï isi dèkèkè, dèdè ndja dön mare mourou ngadji tò.

³⁷ Djèdjè toï mè to té, djase dooudjé ke kòr djo gérè dòshiri ke misä.

³⁸ Tokou dèdè dön mourou asedè, dèdè dongou kandé mourou mè tòkou man té ta kare to oi ang.

³⁹ Tokou loou arè mbä, dèdè ngeré nange nèn ang, dèdè do mare loou ke kongo madji, ke dèdè dedji tokou dèdè dase da ban ta kare to téh nange ke loou té nou.

⁴⁰ Tokou ban dèdè ntoutou narè ngem to, dïya ke mè tòkou man té, dèdè ntoutou koulaa ke tò hai tò, bana dèdè ntò koubou ke nò to té ke tarr, mbata kare lél oula mè té are dao, dèdè dao ta téh kongo té.

⁴¹ Mbata dèdè ndé loou té ke tòkou man djo ongou naaté, dèdè nlél to dò nange té. Oum to oso nange ngeng, yè ang, koutou to ao tete mbata man oula ngeng.

⁴² Ndjè pouroudjé edji ta tòl ndjè kei kouladjé, mbata dedji na maredjé a kalè man ta kaïn.

⁴³ Ndjè ngem ndjè pouroudjé tò deo aredè, mbata nè ndiki ta kadji Paul, dèdè dase ta da tokou mèdè edji ang. Nè noula tar mpana, dèdè ke ngeré ta kalè man doso mè man té dongor, ta kalè man ta téh daka.

⁴⁴ Maredjé ke nai, daredè dao ke kake aséh mare né to ke tete. To tokou ban ke dèdè toï ntéh nange té.