Jean 14 - Testament ke Siki 1960 (Kabba Laka)

¹ Aridjé mèsè sangesè ang, sésè woidjé mèsè té ke Allah, woidjé mèsè té sem to.

² Mè kei té lo Bòi loou kisi baya baya to. Tokou to ban ang, baa ma mpa maresè leo, mbata mao ta da loou karesè.

³ Tokou ma mao nda loou maresè, ma ma tél ta kotosè rom té, mbata loou ke ma méh kendé, sésè asidjé kéh nou to.

⁴ Sésè egeridjé loou ke ma mao, ke sésè egeridjé deoè.

⁵ Thomas pa arè, Mbaibé Seigneur, loou ke i ao kendé, djèdjè ngeré lé ang, djèdjè dja geré deoè to di wa?

⁶ Jésus pa arè, Mam nto deo, ke tar ke tokoro, ke tébe. Doou kada ao rò Bòi Allah té ang, sè deo té lom ndja.

⁷ Tokou sésè egeremdjé leo, a egeridjé Bòi to. Gè té loshénè, sésè egerèdjé ke woèdjé mbä.

⁸ Philippe pa arè, Mbaibé Seigneur, etòdjoudjè Bòi Allah, a yèn asedjè.

⁹ Jésus pa arè, Ma misi sei eo nya, a nai egerem ang bai wa, Philippe? Doou ke wom, wo Bòi Allah mbä. Mbata di a epana, Etòdjoudjè Bòi Allah wa?

¹⁰ I wo ang ke ma méh mè Bòi Allah té, ke Bòi Allah éh mem té wa? Tar ka ma mpa maresè, ma mpa tar ke mem té ndja ang, Bòi ke éh mem té nè nda koula la.

¹¹ Woidjé tar lom ke ma méh mè Bòi Allah té, ke Bòi Allah éh mem té, aséh woidjé tar lom mbata kouladjé nèn.

¹² Tokoro, tokoro, ma mpa maresè, doou ke wo mèa té sem, koula ke mam nda nè na da tokou ban tò, nè na da koula nya wota, mbata mao rò Bòi Allah té.

¹³ Né ke sésè a doudjidjé ke rim, ma ma da né nèn, baa ta kare Bòi Allah a kinga piti mè Ngonè té.

¹⁴ Tokou sésè a doudjidjé mare né ke rim, ma ma da né nèn.

¹⁵ Tokou sésè ndikimdjé, sésè a ngemidjé tar ke ma mpa.

¹⁶ Ma ma doudjou Bòi Allah, ke nè na karesè mare ndjè moso tar, mbata kare nè nisi kesè ke ndò ke ndò.

¹⁷ Nè nto Ndil tar ke tokoro, ke dooudjé ke nange nèn ase ta tèè ang, mbata dèdè doè aséh ngerè ang. Sésè egerèdjé, mbata nè nisi kesè a na kéh mèsè té.

¹⁸ Ma ma kïyasè to dangetédjé ang. Ma ma tél ròsè té bai.

¹⁹ Nai ngadji, dooudjé ke nange nèn a kom ang nga, a sésè a komdjé. Mbata ma méh ke tébe, sésè a kéhdjé ke tébe tò.

²⁰ Ndè té nou, sésè a geridjé ma méh mè Bòi té, ke sésè éhdjé mem té, ke ma méh mèsè té.

²¹ Doou ke éh ke tar ke ma mpa, a ngem, yèn to nè ke ndikim, Doou ke ndikim, Bai a ndikè, ke ma ma ndikè, ke ma ma tòdjè rom ndja.

²² Judas, ke to Iscariot ang, pa arè, Mbaibé Seigneur, tar nèn a téh to di wa, baa a tòdjoudjè ròi ndja, a etòdjou ròi dooudjé ke nange nèn ang wa?

²³ Jésus tél pa arè, Tokou doou ndikim, nè na ngem tar lom, Bòi a ndikè, ke djèdjè dja dé da loou kisi lodjè mèa té.

²⁴ Doou ke ndikim ang, ngem tar lom ang. Tar ke sésè woidjé to ngäm ang, to ngä Bòi Allah ke oulam.

²⁵ Tar nèn ma mpa maresè mbä, tokou mam nai kesè.

²⁶ Ndjè moso tar, Ndil ke madji toï, nè ke Bòi Allah a koulè ke rim, nè na tòdjousè né toï, ke na kolè mèsè do tar té toï ke ma mpa maresè leo.

²⁷ Ma mïya mè woul kesè. Ma maresè mè woul lom, ma maresè tokou dooudjé ke nange nèn ang. Aridjé mèsè sangesè ang, ke bel da mèsè ang.

²⁸ Sésè woidjé leo ma mpa maresè, ma mao, a ma ma tél ròsè té. Tokou sésè ndikimdjé, a kisidjé ke rònèl, mbata mao rò Bòi Allah té, mbata Bòi Allah boui wotam.

²⁹ Loshénè ma mpa maresè mbä dongor né téh, mbata tokou né téh, sésè asidjé ta ko mèsè té.

³⁰ Ma ma pa tar nya karesè ang nga, mbata mbai ke nange nèn ao dé, né la kada éh rom té ang.

³¹ Mbata dooudjé ke nange nèn ase geré mam ndiki Bòi Allah, mam nda deo kadaba tokou Bòi Allah pa tar arem. Ïdjé tarr, aredjè djao.