2 Timoce 4 - Testament ke Siki 1960 (Kabba Laka)

¹ Mam ndedji no Allah té ke Christ Jésus, nè ke na gange saria lo dooudjé ke kem, ke lo ndjè ke woei, ke deo téh té la ke béh ko la.

² Etòdjou tar ndja, ndedji ke nai ke madji ke nai ke madjang, etòdjou madjang lo dooudjé ke daka, ndange, ndedji, éh ke mè ke enge ang, ke eo ta tòdjou tar ang.

³ Mbata ndò a dé ke dooudjé a ndiki ta ko tar ke madji ang, a mbata mbidè ndödè da bar ndjè tòdjou tardjé kare mbona kedè deo boo té lodè ndja.

⁴ A da tourou mbidè ta kïya ta ko tar ke tokoro, da tourou ròdè go tar kòrou sou té.

⁵ A mbata i, ngem madji né toï, waa ngeng mè né ongou té, eda koula pa tar ke madji eda koula loi toï ase.

⁶ Mbata dongoum loshénè mbä to né polo kòr, ndò kao lom téh mbä.

⁷ Mam nda doo ke madji, mam ntéh ke gelè mbä, mam ngem ko mè té ndja.

⁸ Gè té loshénè, ngem djòkedò ke gaté gaté dao ngebem né, ke Mbaibé Seigneur ndjè gange saria gaté gaté a karem ndò té ke nou, ke ma ke kadam ang, a dèdè toï ke ndiki téh la to.

⁹ Esange deo ta dé rom té ndjange.

¹⁰ Mbata Démas ïyam, mbata nè ndiki nange nèn ke loshénè, nè nao Thessalonique té, Crescens ao Galatie té, Tite ao Dalmatie té.

¹¹ Sè Luc ke kadèba nai sem. Ebar Marc arè ndé sei, mbata moè madji ta koumam koula té lom.

¹² Ma moula Tychique Ephèse té.

¹³ Tokou i ao dé, edé ke koubou koul ke mïya Troas kei té lo Carpus, ke maketourou tò, a maketourou ke mam ndiki wota to maketourou ndar.

¹⁴ Alexandre ndjè da kòrou, dam madjang nya, Mbaibé Seigneur a koukè ase koula la.

¹⁵ Ngem ròi madji mbata la tò, mbata nè mbeté tar lodjè ngeng.

¹⁶ Tokou ma mpa tar nadji ngem ròm ke dongor, doou kada arr sem ang, a dèdè toï dïyam, mam ndiki ta kare ntoura tar nèn dodè té ang.

¹⁷ A Mbaibé Seigneur arr mbòrem té, nè narem singa ta pa tar ndja ase toï, ta kare Gentildjé toï wo. Tokou ban dòroum ta nam té mbä.

¹⁸ Mbaibé Seigneur a kòroum né té ke madjang toï, nè na kadjim mbata karem ntéh béh ko té la ke dara. Ndokoo to la ke ndò ke ndò. Amen.

¹⁹ Eda laphia Prisca ke Aquilas, ke ndjè ke kei lo Onésiphore.

²⁰ Eraste nai Corinthe té, a mïya Trophime Milet té ke rò too.

²¹ Esange deo ndjange ta dé dongor baa nai koul dé. Eubulus, Pudens, Linus, Claudia, ke ngaködjèdjè toï ndai laphia.

²² Mbaibé Seigneur éh ke ndii loi. Tokou mè madji éh sei.