2 Timoce 2 - Testament ke Siki 1960 (Kabba Laka)

¹ Tokou ban ngonem, edé ngeng ke tokou mè madji ke éh mè Christ Jésus té.

² Ke né ke i wo tarn té horo ndjè tar nadjidjé té nya, are tar nèn ndjè ke éh ke mè ndaa kaï, dèdè ke dase tòdjou tar mare dooudjé tò.

³ Ndiki gè ta kinga né ongou ase loi tokou ndjè pourou ke madji lo Christ Jésus.

⁴ Doou ke ao dòò tokou ndjè pourou, ounda mèa do né tébe té ke béh ang, mbata nè ndiki ta kare koukou doou ke barè pourou té.

⁵ Ke tokou doou ke da ndam, da karè djòkedò ang tokou nè ntana ke deoè ang.

⁶ Ase kare doou ke ndjè ndòò ke da koula nya inga kandé ko ke dongor.

⁷ Ounda mei tar té ke ma mpa mari, mbata Mbaibé Seigneur a kari kemkarè né geré toï.

⁸ Ounda mei dò Jésus Christ té, ke ï mè bwa yo té mbä, doou ke gel David té, deo kadaba ke tar ke madji ke ma mpa.

⁹ Ke mbata tar ke madji nèn, ma minga ndoo né ongou, ke koulaa tòm tokou doou ke da madjang, a nto tar lo Allah ang.

¹⁰ Mbata yèn ma mourè wouroum ngeng né té toï mbata dèdè ke Allah bardè ke daka, ta kare dèdè dase kinga kadji ke éh mè Christ Jésus té, ke ndokoo ke ke ndò ke ndò naaté sa to.

¹¹ To tar ke tokoro, Tokou djèdjè djoei sa mbä, Dja kéh ke tébe sa to.

¹² Tokou djèdjè djwaa ngeng, dja kö béh sa tò. Tokou djèdjè mbetè, nè na mbetédjè tò.

¹³ Tokou djèdjè djo mèdjè té ang, nè nai ke mè ndaa kaï, mbata nè nase mbeté rè ndja ang.

¹⁴ I olè mèdè tar té nèn, ke ndedjidè kem Allah té, dèdè nkòlna mbata tar ang, yèn da madji kada ang, a ntoudjou dooudjé ke wo kòl nèn ba.

¹⁵ Esange deo ndjange ta kare ròi Allah tokou doou ke ase madji, ndjè koula ke ase da ròkoul ang, ke nkai tar ke tokoro ke deoè gaté gaté.

¹⁶ A mbeté tar kòrou sou ke ba ke tar ke gatang, mbata da kare dooudjé bar nya ke tar ke mbeté Allah.

¹⁷ Ke tar lodè a kousa tokou doo ke eo ang, Hyménée ke Philète déh horo dooudjé tén.

¹⁸ Dèdè ke ndja gatang deo tar té ke tokoro, mbata dèdè mpana ndò kï lo dooudjé mè bwa yo té ndai mbä. Dèdè dake ko mè té lo maredjé.

¹⁹ A gòl ke ngeng lo Allah arr tarr, ke tar la to né ke rëté, Mbaibé Seigneur geré dèdè ke nto ngë, ke, Ase kare dèdè ke mmar ri Mbaibé Seigneur dïya né ke madjang.

²⁰ Mè tòkou kei té, sè djo lor ke djo argent to kadaba ang, a djo kake ke djo andji to to, ke marè ke wal ke marè ke wal ang.

²¹ Tokou ban, tokou doou ngem rè ndja, ke nïya yéh nèn ke wal ang, nè na dé to djo ke wal, nè ntéh daka ndé madji ase koula lo doou ke ndjè kei, nè nase mbata koula ke madji toï.

²² A mbeté boo koura, ndja go gaté gaté té, ko mè té, ndiki, mè woul, deo kadaba ke dèdè ke ndoudjou Mbaibé Seigneur ke mè ke éh ke madjang kada ang.

²³ A mbeté doudjou tar mbe ke ba, mbata i geré yèn téh kòl nya.

²⁴ Ase kare ngonlokisi lo Mbaibé Seigneur kòl ang, a ta da madji ke dooudjé toï, ndjè ke geré tòdjou tar dooudjé ke mè ke enge ang.

²⁵ Ke mè ke to dèkèkè, nè mpa tar ke gaté gaté nare dèdè ke mbeté tar. Tokou ban dòmadjang a Allah a da ta kare dèdè mbeté kedji né da ke madjang, ke da dé ta geré tar ke tokoro.

²⁶ Ta karedè dase kaïn koulaa lo Satan ta téh ke kedji ke madji, mbata nè nwaadè ta da né ke nè ndiki.