tāniēl 1 - ᑲᓈᒋ ᑭᐦᒋ ᒪᓯᓈᐦᐃᑲᐣ

¹ ᓂᐢᑐ ᐊᐢᑭ ᐊᑎ ᐁ ᑭᐦᒋ ᐅᑭᒫᐃᐧᐟ ᒋᐦᐋᔭᑭᒼ ᒍᑕ ᑭᐦᒋ ᐅᑭᒫᐤ ᑭ ᐯ ᐃᑐᐦᑌᐤ ᓀᑊᔪᑳᐟᓀᓴᕒ ᐹᐱᓬᐊᐣ ᑭᐦᒋ ᐅᑭᒫᐤ ᒉᕒᐅᓴᓬᐊᒥᕽ, ᒥᓇ ᑭ ᑭᐳᑌᐁᐧᐢᑲᒼ.

² ᑳ ᑎᐯᔨᐦᒋᑫᐟ ᒫᑲ ᑭ ᐸᑭᑎᓀᐤ ᒋᐦᐋᔭᑭᒪ ᒍᑕ ᑭᐦᒋ ᐅᑭᒫᐊᐧ ᐅᒋᐦᒋᔨᕽ, ᐊᓯᒋ ᐋᑎᐦᐟ ᐊᓯᐊᐧᒋᑲᓇ ᐅ ᐋᐧᐢᑳᐦᐃᑲᓂᕽ ᑭᓭᒪᓂᑐ; ᑭ ᐃᑐᑕᑖᐤ ᒫᑲ ᓵᐃᓇᕒ ᐊᐢᑭᕽ ᐅ ᐋᐧᐢᑳᐦᐃᑲᓂᔨᕽ ᐅ ᒪᓂᑐᒪ ᐁᑯᓯ ᑭ ᐱᑐᑲᑖᐤ ᐊᓂᐦᐃ ᐊᓯᐊᐧᒋᑲᓇ ᐅ ᒫᐊᐧᒋᓱᓂᔮᐁᐧᐃᐧᑲᒥᑯᔨᕽ ᐅ ᒪᓂᑐᒪ.

³ ᐁᑯᓯ ᒫᑲ ᑭᐦᒋ ᐅᑭᒫᐤ ᑭ ᐊᔭᒥᐦᐁᐤ ᐋᐢᐱᓈᓴ ᑳ ᑎᐯᔨᒫᔨᐟ ᔪᓇᑲ, ᑭᑕ ᐱᑐᑲᐋᐟ ᐋᑎᐦᐟ ᐃᐢᕒᐁᐃᓬ ᐅᐟ ᐊᐋᐧᓯᒥᓴ, ᐊᓂᐦᐃ ᐅᑎ ᑭᐦᒋ ᐅᑭᒫᐃᐧᑯᓯᓵᓇ ᒥᓇ ᐅᑭᒫᐊᐧ ᐅᐦᒋ;

⁴ ᐅᐢᑭᓂᑭᓴᐠ ᐁᑳ ᓈᐣᑕᐤ ᐁ ᐃᓯ ᓇᔦᐦᑖᐃᐧ ᐊᔮᒋᐠ, ᒫᑲ ᐁ ᒥᔪᓈᑯᓯᒋᐠ, ᒥᓇ ᐁ ᓇᐦᐃᒋᐠ ᑲᐦᑭᔭᐤ ᐃᔨᓂᓯᐃᐧᓂᕽ, ᒥᓇ ᐁ ᑲᑫᑖᓯᒋᐠ ᑭᐢᑫᔨᑕᒧᐃᐧᓂᕽ, ᒥᓇ ᐁ ᓂᓯᑐᐦᑕᒥᔨᐟ ᑭᐢᑭᓄᐦᐊᒫᑫᐃᐧᓇ, ᐊᓂᐦᐃ ᑐᐊᐧ ᑫ ᑲᐢᑭᑖᔨᐟ ᑭᑕ ᓂᐸᐃᐧᔨᐟ ᑭᐦᒋ ᐅᑭᒫᐃᐧᑲᒥᑯᕽ; ᒥᓇ ᑭᑕ ᑭᐢᑭᓄᐦᐊᒪᐋᐧᐟ ᐅ ᑭᐢᑭᓄᐦᐊᒫᑫᐃᐧᓂᔨᐤ ᒥᓇ ᐅ ᐱᑭᐢᑫᐧᐃᐧᓂᔨᐤ ᑳᓬᑎᔭᓇ.

⁵ ᑭᐦᒋ ᐅᑭᒫᐤ ᒫᑲ ᑭ ᐅᔭᑭᑕᒪᐁᐧᐤ ᑕᐦᑐᑭᓯᑳᐤ ᑫ ᒥᒋᔨᐟ ᑭᐦᒋ ᐅᑭᒫᐤ ᐅ ᒥᒋᐃᐧᐣ ᐅᐦᒋ, ᒥᓇ ᐊᓂᒪ ᓱᒥᓈᐳ ᑳ ᒥᓂᐦᑫᐧᐟ, ᐁᑯᓯ ᓂᐢᑐ ᐊᐢᑭ ᑭᑕ ᑲᓇᐁᐧᔨᒥᐦᒋᐠ; ᐁᐊᐧᑯ ᐁ ᐳᓂᐸᔨᐠ ᑭᑕ ᐅᐦᑎᐢᑲᐃᐧᑳᐸᐃᐧᐢᑕᐋᐧᒋᐠ ᑭᐦᒋ ᐅᑭᒫᐊᐧ.

⁶ ᐁᑯᑕ ᒫᑲ ᑭ ᐃᐧᒋᐦᐃᐁᐧᐊᐧᐠ ᐅᐟ ᐊᐋᐧᓯᒥᓴ ᒍᑕ ᐅᐦᒋ, ᑖᓂᐁᓬ, ᐦᐁᓈᓈᔭ, ᒥᓭᐃᓬ, ᒥᓇ ᐋᓴᕒᐋᔭ.

⁷ ᐁᐊᐧᑯᓂ ᒫᑲ ᐊᓂᑭ ᔪᓇᑲᐠ ᐅᑭᒫᒥᐋᐧᐊᐧ ᑭ ᐃᐧᔦᐤ; ᑖᓂᐁᓬᐊ ᐯᓬᑎᓵᓴᕒ ᑭ ᐃᓯ ᐃᐧᔦᐤ; ᒥᓇ ᐦᐁᓈᓈᔭᐊᐧ ᓭᑕᕒᐋᐠ; ᒥᓇ ᒥᓭᐃᓬᐊ ᒥᓵᐠ; ᒥᓇ ᐋᓴᕒᐋᔭᐊᐧ ᐊᐯᐟᓂᑯ.

⁸ ᒫᑲ ᐃᐧᔭ ᑖᓂᐁᓬ ᑭ ᑭᓭᔨᑕᒼ ᐅᑌᐦᐃᕽ ᐁᑳ ᑭᑕ ᐃᐧᔨᐱᐃᓱᐟ ᑭᐦᒋ ᐅᑭᒫᐊᐧ ᐅ ᒥᒋᐃᐧᓂᔨᐤ ᐅᐦᒋ, ᐊᐦᐳ ᐊᓂᒪ ᓱᒥᓈᐳ ᑳ ᒥᓂᐦᑫᐧᔨᐟ; ᐁᐊᐧᑯ ᐅᐦᒋ ᑭ ᑲᑫᐧᒋᒣᐤ ᐊᓂᐦᐃ ᑳ ᑎᐯᔨᒫᔨᐟ ᔪᓇᑲ ᐁᑳ ᑭᑕ ᐃᐧᔨᐱᐃᓱᐟ.

⁹ ᑭᓭᒪᓂᑐᐊᐧ ᒫᑲ ᑭ ᐃᓯ ᒥᔨᐠ ᐊᐊᐧ ᑖᓂᐁᓬ ᑭᑕ ᒥᔪᑲᓇᐋᐧᐸᒥᑯᐟ ᒥᓇ ᑭᑕ ᑭᑎᒫᑭᓈᑯᐟ ᐊᓂᐦᐃ ᑳ ᑎᐯᔨᒫᔨᐟ ᔪᓇᑲ.

¹⁰ ᐁᑯᓯ ᐊᓇ ᑳ ᑎᐯᔨᒫᐟ ᔪᓇᑲ ᑭ ᐃᑌᐤ ᑖᓂᐁᓬᐊ, ᓂ ᑯᐢᑖᐤ ᓂᐟ ᐅᑭᒫᒼ ᑭᐦᒋ ᐅᑭᒫᐤ, ᑳ ᑭ ᐅᔭᑭᑕᕽ ᑭ ᒥᒋᐃᐧᓂᐋᐧᐤ ᒥᓇ ᑭ ᒥᓂᐦᑫᐧᐃᐧᓂᐋᐧᐤ; ᒋᑫᒫ ᑫᑲᐧᐩ ᐅᐦᒋ ᑫ ᐱᑐᑖᐱᓯᕽ ᑭᐦᒋ ᐅᑭᒫᐤ ᑭᔭᐋᐧᐤ ᐁ ᐃᓯᓈᑯᓯᔦᐠ ᒥᓇ ᐁ ᐃᓯᓈᑯᓯᒋᐠ ᑳ ᐃᐧᒋᐦᐃᐢᐱᑎᓯᒫᔦᑯᐠ? ᐁᑯᓯ ᑫ ᐃᓯ ᒪᒥᓯᑖᔦᐠ ᓂᐢᑎᑳᐧᐣ ᑭᐦᒋ ᐅᑭᒫᓈᕽ.

¹¹ ᐁᑲᐧ ᑖᓂᐁᓬ ᑭ ᐃᑌᐤ ᐅᐸᒥᑖᓱᐊᐧ, ᐊᓂᐦᐃ ᑳ ᑎᐯᔨᒫᔨᐟ ᔪᓇᑲ ᑳ ᑭ ᐅᔭᑭᒫᔨᐟ ᑭᑕ ᐸᒥᐃᑯᒋᐠ ᑖᓂᐁᓬ, ᐦᐁᓈᓈᔭ, ᒥᓭᐃᓬ, ᒥᓇ ᐋᓴᕒᐋᔭ;

¹² ᒫᐦᑎ ᑭᔮᒼ ᑯᒋᐃᐠ ᑭᐟ ᐊᑐᐢᑫᔮᑲᓇᐠ ᒥᑖᐦᑐᑭᓯᑳᐤ; ᑭᔮᒼ ᒫᑲ ᓂ ᑲ ᒥᔨᑯᓇᓇᐠ ᑳ ᓂᐦᑖᐃᐧᑭᑭ ᑭᑕ ᒥᒋᔮᕽ, ᒥᓇ ᓂᐱ ᑭᑕ ᒥᓂᐦᑫᐧᔮᕽ.

¹³ ᐁᑲᐧ ᒫᑲ ᑭᔮᒼ ᑭ ᑲ ᐋᐧᐸᒥᓈᐣ, ᑫ ᐃᓯᓈᑯᓯᔮᕽ, ᒥᓇ ᑫ ᐃᓯᓈᑯᓯᒋᐠ ᐊᓂᑭ ᑫ ᒥᒋᒋᐠ ᑭᐦᒋ ᐅᑭᒫᐊᐧ ᐅ ᒥᒋᐃᐧᓂᔨᐤ; ᐁ ᐃᓯ ᐋᐧᐸᐦᑕᒪᐣ ᒫᑲ ᑭ ᑲ ᐃᑐᑕᐋᐧᐊᐧᐠ ᑭᐟ ᐊᑐᐢᑫᔮᑲᓇᐠ.

¹⁴ ᐁᑯᓯ ᒫᑲ ᑭ ᓇᐢᑯᒣᐤ ᐅᒪ ᑳ ᐃᓯ ᓇᑕᐁᐧᔨᑕᒫᑯᐟ, ᒥᓇ ᑭ ᑯᒋᐦᐁᐤ ᒥᑖᐦᑐᑭᓯᑳᐤ.

¹⁵ ᐁ ᐳᓂ ᒥᑖᐦᑐᑭᓯᑳᔨᐠ ᒫᑲ ᐊᔨᐋᐧᐠ ᐃᐧᔭᐋᐧᐤ ᑭ ᒥᔪᓈᑯᓯᐊᐧᐠ, ᒥᓇ ᑭ ᑖᐦᒋᐳᐊᐧᐠ ᐃᔨᑯᕽ ᑲᐦᑭᔭᐤ ᐊᓂᑭ ᐅᐢᑭᓂᑭᓴ ᑳ ᒥᒋᔨᐟ ᑭᐦᒋ ᐅᑭᒫᐊᐧ ᐅ ᒥᒋᐃᐧᓂᔨᐤ.

¹⁶ ᐁᑯᓯ ᐊᓇ ᐅᐸᒥᑖᓱ ᑭ ᐅᑎᓇᒼ ᐊᓂᒪ ᐅ ᒥᒋᐃᐧᓂᔨᐤ ᒥᓇ ᐊᓂᒪ ᓱᒥᓈᐳ ᑭᑕ ᑭ ᒥᓂᐦᑫᐧᔨᐟ, ᐁᑯᓯ ᑭ ᒥᔦᐤ ᑳ ᓂᐦᑖᐃᐧᑭᓂᔨᑭ.

¹⁷ ᒫᑲ ᐃᐧᔭ ᐅᑭ ᓀᐤ ᐅᐢᑭᓂᑭᓴᐠ, ᑭᓭᒪᓂᑐᐊᐧ ᑭ ᒥᔨᑲᐧᐠ ᑭᐢᑫᔨᑕᒧᐃᐧᐣ ᒥᓇ ᓇᐦᐃᐃᐧᐣ ᑲᐦᑭᔭᐤ ᑭᐢᑭᓄᐦᐊᒫᑐᐃᐧᓂᕽ ᒥᓇ ᐃᔨᓂᓯᐃᐧᓂᕽ; ᐁᑯᓯ ᑖᓂᐁᓬ ᑭ ᓂᓯᑐᐦᑕᒼ ᑲᐦᑭᔭᐤ ᐃᓯᓇᒧᐃᐧᓇ ᒥᓇ ᐸᐋᐧᒥᐃᐧᓇ.

¹⁸ ᐃᐢᐱ ᒫᑲ ᐁ ᐳᓂᐸᔨᑭ ᑭᓯᑳᐊᐧ ᑭᐦᒋ ᐅᑭᒫᐤ ᑳ ᑭ ᐅᔭᑭᑖᕽ ᑭᑕ ᐱᐦᑐᑲᐦᐃᐦᒋᐠ, ᐊᓇ ᑳ ᑎᐯᔨᒫᐟ ᔪᓇᑲ ᑭ ᐱᐦᑐᑲᐦᐁᐤ ᑭᑕ ᐅᐦᑎᐢᑲᐃᐧᐢᑲᐋᐧᔨᐟ ᓀᑊᔪᑳᐟᓀᓴᕒ.

¹⁹ ᐁᑯᓯ ᑭᐦᒋ ᐅᑭᒫᐤ ᑭ ᐊᔭᔭᒥᐁᐤ; ᓇᒪᐋᐧᐨ ᒫᑲ ᐁ ᐃᐦᑕᓯᔨᐟ ᑭ ᒥᐢᑲᐁᐧᐤ ᑖᐱᐢᑯᐨ ᑖᓂᐁᓬ, ᐦᐁᓈᓈᔭ, ᒥᓭᐃᓬ, ᒥᓇ ᐋᓴᕒᐋᔭ; ᐁᐊᐧᑯ ᐅᐦᒋ ᑭ ᐅᐦᑎᐢᑲᐃᐧᑳᐸᐃᐧᐢᑕᐁᐧᐊᐧᐠ ᑭᐦᒋ ᐅᑭᒫᐊᐧ.

²⁰ ᑲᐦᑭᔭᐤ ᒫᑲ ᑫᑲᐧᐩ ᐃᔨᓂᓯᐃᐧᐣ ᒥᓇ ᓂᓯᑐᐦᑕᒧᐃᐧᐣ ᑭᐦᒋ ᐅᑭᒫᐤ ᑳ ᑲᑫᐧᒋᒫᐟ, ᒥᐢᑲᒼ ᒥᑖᑕᑖᐧᐤ ᐃᔨᑯᕽ ᐊᐊᐧᓯᒣ ᐁ ᑭᐢᑫᔨᑕᒥᔨᐟ ᐃᐢᐱᐨ ᑲᐦᑭᔭᐤ ᐊᓂᐦᐃ ᐅᑯᓵᐸᑕᒧᐊᐧ ᒥᓇ ᑳ ᒪᒫᑖᐃᐧᓯᑳᓱᔨᐟ ᑳ ᐊᔮᔨᐟ ᒥᓯᐁᐧ ᐅᐟ ᐊᐢᑭᕽ.

²¹ ᑖᓂᐁᓬ ᒫᑲ ᑭ ᐊᔮᐤ ᐱᔨᐢ ᐊᓂᒪ ᓂᐢᑕᒼ ᐊᐢᑭ ᑳ ᐊᑎ ᑎᐯᔨᐦᑕᕽ ᑭᐦᒋ ᐅᑭᒫᐤ ᓴᐃᕒᐊᐢ.