sēpanāya 1 - ᑲᓈᒋ ᑭᐦᒋ ᒪᓯᓈᐦᐃᑲᐣ

¹ ᐅᐟ ᐃᑌᐧᐃᐧᐣ ᑳ ᑎᐯᔨᐦᒋᑫᐟ ᑳ ᑭ ᐅᑎᐦᑎᑯᐟ ᓭᐦᐸᓈᔭ ᐅᑯᓯᓴ ᑲᓴᐩ, ᐅᑯᓯᓴ ᑫᑕᓬᐋᔭ, ᐅᑯᓯᓴ ᐋᒪᕒᐋᔭ, ᐅᑯᓯᓴ ᐦᐁᓯᑳᔭ, ᒣᑳᐧᐨ ᐁ ᐊᔮᐟ ᒑᓵᔭ ᐅᑯᓯᓴ ᐋᒪᐣ ᒍᑕ ᑭᐦᒋ ᐅᑭᒫᐤ.

² ᒥᑐᓂ ᑲᐦᑭᔭᐤ ᑫᑲᐧᐩ ᓂ ᑲ ᓂᓯᐊᐧᓈᒋᐦᑖᐣ ᐊᐧᐢᑭᑕᐢᑲᒥᐠ ᐅᐦᒋ, ᐃᑌᐧᐤ ᑳ ᑎᐯᔨᐦᒋᑫᐟ.

³ ᓂ ᑲ ᓂᓯᐊᐧᓈᒋᐦᐋᐤ ᐊᔨᓯᔨᓂᐤ ᒥᓇ ᐱᓯᐢᑭᐤ; ᓂ ᑲ ᓂᓯᐊᐧᓈᒋᐦᐋᐊᐧᐠ ᑳ ᐸᐹᒥᔮᒋᐠ ᓇᔦᐊᐧᒋᑭᓯᑯᕽ, ᒥᓇ ᑭᓄᓭᐊᐧᐠ ᑭᐦᒋᑲᒥᕽ, ᒥᓇ ᐱᓱᑫᓯᓄᐃᐧᓇ ᑭᑭ ᑳ ᒪᒑᔨᐃᐧᒋᐠ; ᒥᓇ ᐊᔨᓯᔨᓂᐤ ᓂ ᑲ ᓂᓯᐊᐧᓈᒋᐦᐋᐤ ᐊᐧᐢᑭᑕᐢᑲᒥᐠ ᐅᐦᒋ, ᐃᑌᐧᐤ ᑳ ᑎᐯᔨᐦᒋᑫᐟ.

⁴ ᓂ ᑲ ᓱᐃᐧᓂᐢᑫᔨᐢᑕᐋᐧᐤ ᒫᑲ ᒍᑕ, ᒥᓇ ᑲᐦᑭᔭᐤ ᑳ ᐅᐟ ᐃᐦᑖᐃᐧᓂᒋᐠ ᒉᕒᐅᓴᓬᐊᒥᕽ; ᒥᓇ ᓂ ᑲ ᑭᐢᑭᐁᐧᐸᐋᐧᐤ ᑕᐦᑐ ᑳ ᐃᐢᑯᓂᐦᐟ ᐯᐊᓬ ᐅᑕ ᐅᐦᒋ, ᒥᓇ ᐅ ᐃᐧᔪᐃᐧᓂᐋᐧᐤ ᐊᓂᑭ ᑫᒪᕒᐃᒼ ᐊᓯᒋ ᐊᔭᒥᐦᐁᐃᐧᔨᓂᐊᐧᐠ;

⁵ ᒥᓇ ᐊᓂᑭ ᑳ ᐊᔭᒥᐦᐁᐢᑕᐋᐧᒋᐠ ᑳ ᐅᓵᒣᔭᑎᔨᐟ ᑭᓯᑯᕽ ᑕᑯᐦᐨ ᐋᐧᐢᑳᐦᐃᑲᓂᕽ; ᒥᓇ ᐊᓂᑭ ᑳ ᐊᔭᒥᐦᐋᐃᐧ ᐊᑐᐢᑲᐋᐧᒋᐠ, ᑳ ᑭᐦᒋᐃᑖᒋᐠ ᑳ ᑎᐯᔨᐦᒋᑫᔨᐟ ᐁᑯᓯ ᒫᓬᑳᒼ ᑳ ᐊᐢᐱᒧᒋᐠ;

⁶ ᒥᓇ ᐊᓂᑭ ᑳ ᑫᐧᐢᑭᒋᐠ ᐁ ᐋᑕ ᑭ ᐱᒥᑎᓴᐋᐧᒋᐠ ᑳ ᑎᐯᔨᐦᒋᑫᔨᐟ; ᒥᓇ ᐊᓂᑭ ᐁᑳ ᑳ ᑭ ᐅᐦᒋ ᓇᑐᓇᐋᐧᒋᐠ ᑳ ᑎᐯᔨᐦᒋᑫᔨᐟ, ᐊᐦᐳ ᐁᑳ ᑳ ᑲᑫᐧᒋᑫᒧᒋᐠ ᐁᐊᐧᑯᓂ ᐅᐦᒋ.

⁷ ᑭᐱᑐᐁᐧ ᐁ ᓄᑯᓯᐟ ᑳ ᑎᐯᔨᐦᒋᑫᐟ ᑭᓭᒪᓂᑐ; ᒋᑫᒫ ᐅ ᑭᓯᑳᒼ ᑳ ᑎᐯᔨᐦᒋᑫᐟ ᐯᓱᓈᑲᐧᓂᔨᐤ; ᒋᑫᒫ ᑳ ᑎᐯᔨᐦᒋᑫᐟ ᑭ ᐊᐧᐁᐧᔨᑖᐤ ᐸᑭᑎᓂᑫᐃᐧᐣ, ᑭ ᑲᓈᒋᐁᐤ ᐅ ᐃᐧᐦᑯᒫᑲᓇ.

⁸ ᑭᑕ ᐊᔨᐢᐸᔨᐤ ᒫᑲ ᐁᐊᐧᑳᐧᓂᒪ ᐁ ᑭᓯᑳᐠ ᑳ ᑎᐯᔨᐦᒋᑫᐟ ᑫ ᐸᑭᑎᓈᓱᐟ, ᓂ ᑲ ᑲᑫᐢᑭᒧᐋᐊᐧᐠ ᑳ ᐅᑭᒫᑲᑕᑭᐠ, ᒥᓇ ᑭᐦᒋ ᐅᑭᒫᐤ ᐅᑯᓯᓴ, ᒥᓇ ᑲᐦᑭᔭᐤ ᑕᐦᑐ ᑳ ᑭᑭᐢᑲᐦᑭᐠ ᒪᔭᑭ ᑭᑭᐢᑳᒋᑲᓇ.

⁹ ᐁᐊᐧᑳᐧᓂᒪ ᑭᓯᑳᑭ ᒫᑲ ᓂ ᑲ ᑲᑫᐢᑭᒧᐋᐊᐧᐠ ᑲᐦᑭᔭᐤ ᐊᓂᑭ ᑳ ᐱᐦᑐᑫᑳᐧᐢᑯᑎᒋᐠ ᐋᐧᐢᑳᐦᐃᑲᓂᕽ, ᑳ ᒧᐢᑭᓇᑖᐊᐧᒋᐠ ᐅᑭᒪᒥᐋᐧᐊᐧ ᐅ ᐋᐧᐢᑳᐦᐃᑲᓂᔨᐤ ᒪᐢᑲᑌᐧᐃᐧᐣ ᒥᓇ ᑲᑲᔦᔨᓯᐃᐧᐣ.

¹⁰ ᐁᐊᐧᑳᐧᓂᒪ ᒫᑲ ᑭᓯᑳᑭ, ᐃᑌᐧᐤ ᑳ ᑎᐯᔨᐦᒋᑫᐟ, ᑭᑕ ᒪᑌᐧ ᐯᐦᑖᑲᐧᐣ ᒪᐃᐧᒧᑫᐃᐧᐣ ᑭᓄᓭᐃᐧ ᑭᐦᒋᐃᐢᑳᐧᑌᒥᕽ, ᒥᓇ ᓇᓀᑳᑌᐧᐃᐧᑕᒧᐃᐧᐣ ᑭᐦᑖᐧᒼ ᑳ ᐊᑎ ᐊᔮᐠ, ᒥᓇ ᑭᑕ ᒪᑌᐧ ᑭᐦᒋᑳᐢᐯᐧᐤ ᐊᐧᒋᕽ ᐅᐦᒋ.

¹¹ ᓇᓀᑳᑌᐧᐃᐧᑕᒧᐠ, ᑭᔭᐋᐧᐤ ᑳ ᐅᐟ ᐃᐦᑖᐃᐧᓂᔦᐠ ᒫᐠᑎᐢ, ᒋᑫᒫ ᑲᐦᑭᔭᐤ ᑫᓇᐣ ᐊᔨᓯᔨᓂᐊᐧᐠ ᓂᓯᐊᐧᓈᑎᓯᐊᐧᐠ; ᑲᐦᑭᔭᐤ ᑳ ᑭ ᓇᔮᒋᐠ ᐋᐧᐱᐢᑭᓱᓂᔮᐊᐧ ᑭᐢᑭᐁᐧᐸᐋᐧᐊᐧᐠ.

¹² ᐁᑯᓯ ᑭᑕ ᐃᐦᑭᐣ ᐁᑯᐢᐱ ᐊᓂᒪ, ᓂ ᑲ ᓇᓈᑐᓂᑳᐣ ᒉᕒᐅᓴᓬᐊᒥᕽ ᐋᐧᓴᐢᑯᑌᓂᑲᓇ ᐁ ᐋᐸᒋᐦᑖᔮᐣ; ᒥᓇ ᓂ ᑲ ᑲᑫᐢᑭᒧᐋᐧᐊᐧᐠ ᐊᓂᑭ ᐊᔨᓯᔨᓂᐊᐧᐠ ᐁᑳ ᑫᑲᐧᐩ ᑳ ᐊᐢᑖᐃᑯᒋᐠ, ᑳ ᐃᑌᐧᒋᐠ ᐅᑌᐦᐃᐋᐧᕽ, ᑳ ᑎᐯᔨᐦᒋᑫᐟ ᓇᒪᐃᐧᔭ ᑭᑕ ᒥᔪᑐᑕᒼ, ᒥᓇ ᓇᒪᐃᐧᔭ ᑭᑕ ᒪᒋᑐᑕᒼ.

¹³ ᐁᑯᓯ ᐅ ᐁᐧᔪᑎᓯᐃᐧᓂᐋᐧᐤ ᑭᑕ ᒪᓂᐊᐧᑌᐋᐧᐣ, ᒥᓇ ᐅ ᐋᐧᐢᑳᐦᐃᑲᓂᐋᐧᐊᐧ ᑭᑕ ᓯᑲᐊᐧᐢᑲᒋᑳᑌᐊᐧ; ᐁᐦᐁ; ᑭᑕ ᐅᓯᐦᑖᐊᐧᐠ ᐋᐧᐢᑳᐦᐃᑲᓇ, ᒫᑲ ᓇᒪᐃᐧᔭ ᑭᑕ ᐊᐱᐢᑕᒪᐧᐠ; ᒥᓇ ᑭᑕ ᑭᐢᑎᑫᐊᐧᐠ ᓱᒥᓂᑭᐢᑎᑳᓇ, ᒫᑲ ᓇᒪᐃᐧᔭ ᑭᑕ ᒥᓂᐦᑫᐧᐊᐧᐠ ᓱᒥᓈᐳ ᐁᑯᑕ ᐅᐦᒋ.

¹⁴ ᐅ ᑭᐦᒋᑭᓯᑳᒼ ᑳ ᑎᐯᔨᐦᒋᑫᐟ ᓵᓴᐩ ᑭᓯᐋᐧᐠ ᐃᐦᑕᑲᐧᓂᔨᐤ, ᑭᓯᐋᐧᐠ ᐊᔮᐤ ᒥᓇ ᐯ ᑭᓯᐢᑳᐸᔨᐤ, ᐊᓂᒪ ᐅᑎ ᐁ ᐯᑖᑲᐧᓂᔨᐠ ᐅ ᑭᓯᑳᒼ ᑳ ᑎᐯᔨᐦᒋᑫᐟ; ᑳ ᓱᑳᔭᐃᐧᓯᐟ ᓈᐯᐤ ᒥᐢᑕᐦᐃ ᐁᑯᑕ ᒫᑐ.

¹⁵ ᐁᐊᐧᑳᐧᓂᒪ ᑭᓯᑳᐤ ᑭᓯᐋᐧᓯᐃᐧ ᑭᓯᑳᐤ, ᑭᓯᑳᐤ ᑭᑕ ᐋᔨᒥᓯᕽ ᒥᓇ ᑭᑕ ᑲᑳᐧᑕᑫᔨᒧᕽ, ᑭᓯᑳᐤ ᑫ ᐱᑲᐧᑌᔨᑖᑲᐧᕽ ᒥᓇ ᑫ ᑭᐋᐧᑌᔨᑖᑲᐧᕽ, ᑭᓯᑳᐤ ᐁ ᐊᐧᓂᑎᐱᐢᑳᐠ ᒥᓇ ᑫ ᐋᑲᐊᐧᐢᑫᐧᐠ, ᑭᓯᑳᐤ ᐁ ᔨᑲᐧᐢᑲᐧᕽ ᒥᓇ ᐁ ᐸᓴᑯᐊᐧᓂᑎᐱᐢᑳᐠ,

¹⁶ ᑭᓯᑳᐤ ᐁ ᑭᑐᑕᕽ ᐱᐱᑲᐧᐣ ᒥᓇ ᐁ ᐊᐢᑖᐃᐁᐧᐠ, ᐁ ᒪᐃᐧᓀᐢᑲᒥᕽ ᑳ ᒣᓂᐢᑭᑲᑌᑭ ᐅᑌᓇᐊᐧ, ᒥᓇ ᑳ ᐊᔨᐢᐹᑭ ᓱᑳᔭᐃᐧᑲᒥᑲᐧ.

¹⁷ ᑲᑳᐧᑕᑫᔨᒧᐃᐧᐣ ᓂ ᑲ ᐃᐢᐸᔨᑐᐋᐧᐊᐧᐠ ᐊᔨᓯᔨᓂᐊᐧᐠ, ᐁᑯᓯ ᑭᑕ ᐱᒧᐦᑌᐊᐧᐠ ᑖᐱᐢᑯᐨ ᐊᔨᓯᔨᓂᐊᐧᐠ ᐁᑳ ᐁ ᐋᐧᐱᒋᐠ, ᒋᑫᒫ ᐁ ᑭ ᐊᐧᓂᑐᑕᐋᐧᒋᐠ ᑳ ᑎᐯᔨᐦᒋᑫᔨᐟ; ᐁᑯᓯ ᐅ ᒥᐦᑯᐋᐧᐤ ᑭᑕ ᓯᑭᓇᒫᐧᐣ ᑖᐱᐢᑯᐨ ᔦᑲᐤ, ᒥᓇ ᐅ ᐃᐧᔮᓯᐋᐧᐤ ᑖᐱᐢᑯᐨ ᒪᒋᑲᐧᓈᓴ.

¹⁸ ᓇᒪᐋᐧᐨ ᐅ ᐋᐧᐱᐢᑭᓱᓂᔮᒥᐋᐧᐊᐧ ᐊᐦᐳ ᐅᓵᐃᐧᓱᓂᔮᒥᐋᐧᐊᐧ ᑭᑕ ᑭ ᐸᐢᐱᐦᐃᑲᐧᐠ ᐊᓂᒪ ᑭᓯᑳᑭ ᑳ ᑎᐯᔨᐦᒋᑫᐟ ᐅ ᑭᓯᐋᐧᓯᐃᐧᐣ ᐅᑎᐦᑎᑯᑖᐧᐃᐧ; ᒫᑲ ᒥᓯᐁᐧ ᐊᐢᑭ ᑭᑕ ᓴᐢᑭᑌᐤ ᐁ ᑳᐧᑯᑌᔨᐠ ᐅᐦᑌᔨᑕᒧᐃᐧᐣ; ᒋᑫᒫ ᑭᑕ ᑮᓯᔪ, ᐁᐦᐁ, ᑯᐢᑖᑎᑲᐧᐣ ᑫ ᐃᓯ ᑮᓯᔪᐟ, ᑲᐦᑭᔭᐤ ᐊᓂᐦᐃ ᐊᐢᑭᕽ ᑳ ᐊᔮᔨᐟ.