Ruth 1 - ᑲᓈᒋ ᑭᐦᒋ ᒪᓯᓈᐦᐃᑲᐣ

¹ ᑭ ᐊᔨᑭᐣ ᒫᑲ ᐁᑯᐢᐱ ᐁ ᑲᑭᓯᑳᐠ ᒣᑳᐧᐨ ᐅᔭᓱᐁᐧᐃᐧᔨᓂᐊᐧᐠ ᐁ ᐅᔭᓱᐁᐧᒋᐠ, ᓄᐦᑌᑲᑌᐃᐧᐣ ᑭ ᐊᔮᐤ ᐊᐢᑭᕽ. ᐁᑯᓯ ᐯᔭᐠ ᓈᐯᐤ ᐯᐟᓬᐃᐊᒼ ᒍᑕ ᐅᐦᒋ ᑭ ᓇᑕᐃᐧ ᐊᔮᐤ ᒧᐋᑊ ᐊᐢᑭᕽ, ᐃᐧᔭ, ᒥᓇ ᐃᐧᐊᐧ ᒥᓇ ᐁ ᐃᓯ ᓂᓯᔨᐟ ᐅᑯᓯᓴ.

² ᐊᓇ ᒫᑲ ᓈᐯᐤ ᐃᓬᐃᒥᓬᐃᐠ ᑭ ᐃᓯᔨᐦᑳᓱ, ᐊᓂᐦᐃ ᐃᐧᐊᐧ ᒫᑲ ᓀᐅᒪᐩ ᑭ ᐃᓯᔨᐦᑳᓱᔨᐊᐧ, ᐁᑯᓯ ᐊᓂᐦᐃ ᐁ ᓂᓯᔨᐟ ᐅᑯᓯᓴ ᒫᓬᐊᐣ ᒥᓇ ᑭᓬᐃᔭᐣ ᑭ ᐃᓯᔨᐦᑳᓱᔨᐊᐧ, ᐁᐸᕒᐊᑕᐃᑕᐠ ᐯᐟᓬᐃᐊᒼ ᒍᑕ ᐅᐦᒋ. ᑭ ᐯ ᐃᑐᐦᑌᐊᐧᐠ ᒫᑲ ᒧᐋᑊ ᐊᐢᑭᕽ ᐁᑯᑕ ᒫᑲ ᑭ ᐊᔮᐊᐧᐠ.

³ ᐃᓬᐃᒥᓬᐃᐠ ᒫᑲ ᓀᐅᒪᐩ ᐅ ᓈᐯᒪ ᑭ ᐳᓂ ᐱᒫᑎᓯᔨᐊᐧ; ᐁᑯᓯ ᐃᓯ ᑭ ᓇᑲᑖᐤ, ᒥᓇ ᐁ ᓂᓯᔨᐟ ᐅᑯᓯᓴ.

⁴ ᑭ ᐅᑎᓀᐊᐧᐠ ᒫᑲ ᑭᑕ ᐃᐧᐃᐧᒋᐠ ᒧᐋᑊ ᐃᐢᑫᐧᐊᐧ; ᐯᔭᐠ ᐊᓇ ᐋᕒᐸ ᑭ ᐃᓯᔨᐦᑳᓱ ᐁᑯᓯ ᐊᓇ ᑯᑕᐠ ᕒᐅᐦᐟ ᑭ ᐃᓯᔨᐦᑳᓱ; ᐁᑯᑕ ᒫᑲ ᑭ ᐊᔮᐊᐧᐠ ᓈᐣᑕᐤ ᒥᑖᑕᐦᐟ ᐊᐢᑭ.

⁵ ᒫᓬᐊᐣ ᒫᑲ ᒥᓇ ᑭᓬᐃᔭᐣ ᑖᐱᐢᑯᐨ ᑭ ᐳᓂ ᐱᒫᑎᓯᐊᐧᐠ; ᐁᑯᓯ ᐊᓇ ᐃᐢᑫᐧᐤ ᑭ ᓇᑲᑎᐠ ᐁ ᓂᓯᔨᐟ ᐅᐟ ᐊᐋᐧᓯᒥᓴ ᒥᓇ ᐅᓈᐯᒪ.

⁶ ᐁᑲᐧ ᒫᑲ ᑭ ᐸᓯᑯ ᐊᓯᒋ ᐅᐢᑎᒪ ᑭᑕ ᑭᐁᐧᐟ ᒧᐋᑊ ᐊᐢᑭᕽ ᐅᐦᒋ; ᒋᑫᒫ ᑭ ᐯᐦᑕᒼ ᒧᐋᑊ ᐊᐢᑭᕽ ᑳ ᑎᐯᔨᐦᒋᑫᐟ ᐁ ᑭ ᐃᓯ ᓇᑕᐊᐧᐯᓇᐊᐧᐟ ᐅᐟ ᐊᔨᓯᔨᓂᒪ ᐁ ᒥᔮᐟ ᐸᐦᑫᐧᓯᑲᓇ.

⁷ ᑭ ᓯᐯᐧᑌᐤ ᒫᑲ ᐃᑕ ᐊᓂᒪ ᑳ ᑭ ᐊᔮᐟ, ᐁᑯᓯ ᐁ ᓂᓯᔨᐟ ᐅᐢᑎᒪ ᐁ ᐃᐧᒉᐃᐧᑯᐟ; ᑭ ᐊᑎ ᐱᒧᐦᑌᐊᐧᐠ ᒫᑲ ᐁ ᐃᐧ ᐃᓯ ᑭᐁᐧᒋᐠ ᒍᑕ ᐊᐢᑭᕽ.

⁸ ᐁᑯᓯ ᓀᐅᒪᐩ ᑭ ᐃᑌᐤ ᐁ ᐃᓯ ᓂᓯᔨᐟ ᐅᐢᑎᒪ, ᓂᔮᐠ, ᑭᔮᒼ ᑭᑳᐃᐧᐋᐧᐊᐧᐠ ᐃᐧᑭᐋᐧᕽ ᑭᐁᐧᐠ; ᑳ ᑎᐯᔨᐦᒋᑫᐟ ᑭ ᑲ ᐃᐧ ᐃᓯ ᑭᓭᐋᐧᑐᑖᑯᐋᐧᐤ ᑳ ᑭ ᐃᓯ ᒥᔪᑐᑕᐋᐧᔦᑯᐠ ᑳ ᑭ ᐳᓂ ᐱᒫᑎᓯᒋᐠ ᒥᓇ ᓂᔭ.

⁹ ᑳ ᑎᐯᔨᐦᒋᑫᐟ ᑭ ᑲ ᐃᐧ ᐃᓯ ᐸᑭᑌᔨᑕᒫᑯᐋᐧᐤ ᑭᑕ ᒥᐢᑲᒣᐠ ᐯᔭᑕᑭᐊᔮᐃᐧᐣ, ᐁ ᐃᓯ ᓂᓯᔦᐠ ᐅ ᐋᐧᐢᑳᐦᐃᑲᓂᔨᕽ ᐅ ᓈᐯᒪ. ᐁᑲᐧ ᒫᑲ ᑭ ᐊᐧᔪᒉᒣᐤ; ᑭ ᐯᐦᑖᑯᓯᐊᐧᐠ ᒫᑲ ᐁ ᒫᑐᒋᐠ.

¹⁰ ᑭ ᐃᑎᐠ ᒫᑲ, ᓇᒪᐃᐧᔭ, ᑭᔮᒼ ᑭ ᑲ ᑭᐁᐧ ᐃᐧᒉᐃᐧᑎᓈᐣ ᐃᑕ ᐁ ᐊᔮᒋᐠ ᑭᐟ ᐊᔨᓯᔨᓂᒪᐠ.

¹¹ ᓀᐅᒪᐩ ᒫᑲ ᑭ ᐃᑌᐧᐤ, ᑭᐁᐧᐠ ᓂᑖᓂᓯᑎᐠ; ᑫᑲᐧᐩ ᐅᐦᒋ ᑫ ᐃᐧᒉᐃᐧᔦᐠ? ᑫᔮᐱᐨ ᒋ ᑭᑕ ᐅᑯᓯᓯᔮᐣ ᓂ ᑭᑭᐢᑲᐋᐧᐊᐧᐠ ᑭᑕ ᐅᓈᐯᒥᔦᐠ?

¹² ᑭᐁᐧᐠ ᑳᐃᐧ ᓂᑖᓂᓯᑎᐠ, ᓯᐯᐧᑌᐠ; ᒋᑫᒫ ᐅᓵᒼ ᓂ ᑭᓭᔨᓂᐃᐧᐣ ᑭᑕ ᑭ ᐅᓈᐯᒥᔮᐣ. ᑭᐢᐱᐣ ᐃᑌᐧᔮᐣ, ᑫᔮᐱᐨ ᓂᐟ ᐃᑕᑌᔨᑌᐣ, ᑭᐢᐱᐣ ᐊᐦᐳ ᐅᓈᐯᒥᔮᐣ ᐊᓄᐦᐨ ᑳ ᑎᐱᐢᑳᐠ, ᒥᓇ ᑭᐢᐱᐣ ᐅᑯᓯᓯᔮᐣ;

¹³ ᑭ ᑲ ᑭ ᐯᐦᐅᓈᐋᐧᐤ ᒋ ᐃᔨᑯᕽ ᑭᑕ ᑭᓯᓂᑖᐃᐧᑭᒋᐠ? ᑭ ᑲ ᓇᑭᓈᐋᐧᐤ ᒋ ᑭᑕ ᐅᓈᐯᒥᔦᐠ? ᓇᒪᐃᐧᔭ, ᓂᑖᓂᓯᑎᐠ; ᒋᑫᒫ ᒥᐢᑕᐦᐃ ᓂ ᒥᐦᑖᑌᐣ ᑭᔭᐋᐧᐤ ᐅᐦᒋ, ᐊᔨᐢ ᒫᑲ ᐅᒋᐦᒋ ᑳ ᑎᐯᔨᐦᒋᑫᐟ ᓂᐟ ᐃᑐᑖᑯᐋᐧᐣ.

¹⁴ ᐁᑯᓯ ᑭ ᐯᐦᑖᑯᓯᐊᐧᐠ ᒥᓇ ᐁ ᒫᑐᒋᐠ; ᐋᕒᐸ ᒫᑲ ᑭ ᐅᒉᒣᐤ ᐅᓯᑯᓴ; ᒫᑲ ᕒᐅᐦᐟ ᑭ ᒥᒋᒥᓀᐤ.

¹⁵ ᑭ ᐃᑌᐤ ᒫᑲ, ᒫᑎᑲ, ᑭᒋᐋᐧᒥᐢᑫᐧᒼ ᑭᐁᐧᐤ ᐃᑕ ᐁ ᐊᔮᔨᐟ ᐅᐟ ᐊᔨᓯᔨᓂᒪ ᒥᓇ ᐅ ᒪᓂᑐᒪ; ᑭᐢᑕ ᑭᐁᐧ ᐱᒥᑎᓴ ᑭᒋᐋᐧᒥᐢᑫᐧᒼ.

¹⁶ ᒫᑲ ᕒᐅᐦᐟ ᑭ ᐃᑌᐧᐤ, ᐁᑳᐃᐧᔭ ᑭᐦᑭᒥᐣ ᑭᑕ ᓇᑲᑎᑖᐣ, ᒥᓇ ᑭᑕ ᐳᓂ ᐱᒥᑎᓴᐅᑖᐣ; ᒋᑫᒫ ᐱᑯ ᐃᑌ ᐁ ᐃᑐᐦᑌᔭᐣ ᓂᐢᑕ ᓂ ᑲ ᐃᑐᐦᑖᐣ; ᒥᓇ ᐃᑕ ᐁ ᐅᐟ ᐃᐦᑖᐃᐧᓂᔭᐣ ᓂᐢᑕ ᓂ ᑲ ᐅᐟ ᐃᐦᑖᐃᐧᓂᐣ; ᑭᐟ ᐊᔨᓯᔨᓂᒪᐠ ᓂ ᑲ ᐅᐟ ᐊᔨᓯᔨᓂᒥᐣ, ᒥᓇ ᑭ ᒪᓂᑐᒼ ᓂ ᑲ ᐅ ᒪᓂᑐᒥᐣ;

¹⁷ ᐃᑕ ᐁ ᐳᓂ ᐱᒫᑌᓯᔭᐣ ᓂ ᑲ ᐳᓂ ᐱᒫᑎᓯᐣ, ᒥᓇ ᐁᑯᑕ ᓂ ᑲ ᓇᐃᓂᑲᐃᐧᐣ; ᑳ ᑎᐯᔨᐦᒋᑫᐟ ᐁᑯᓯ ᓂ ᑲ ᐃᐧ ᐃᑐᑖᐠ ᒥᓇ ᐊᔨᐋᐧᐠ ᐊᐦᐳ, ᑭᐢᐱᐣ ᓈᐣᑕᐤ ᑫᑲᐧᐩ ᐱᑯ ᓂᐳᐃᐧᐣ ᐅᐦᒋ ᐸᐢᑫᐃᐧᔨᑖᓂ.

¹⁸ ᐃᐢᐱ ᒫᑲ ᐃᐧᔮᐸᐦᑕᕽ ᐁ ᐋᔮᑌᔨᑕᒥᔨᐟ ᐁ ᐃᐧ ᐃᐧᒉᐃᐧᑯᐟ ᑭ ᐳᓂ ᐱᑭᐢᑳᐧᑌᐤ.

¹⁹ ᐁᑯᓯ ᐁ ᐃᓯ ᓂᓯᒋᐠ ᑭ ᐊᑎ ᐱᒧᐦᑌᐊᐧᐠ ᐱᔨᐢ ᐁ ᑕᑯᓯᐦᑭᐠ ᐯᐟᓬᐃᐊᒥᕽ. ᑭ ᐃᐦᑭᐣ ᒫᑲ ᐃᐢᐱ ᑌᑯᓯᑭᐠ ᐯᐟᓬᐃᐊᒥᕽ, ᒥᓯᐁᐧ ᐅᑌᓇᐤ ᑭ ᐊᐧᐢᑲᐃᐧᒪᑲᐣ ᐃᐧᔭᐋᐧᐤ ᐅᐦᒋ, ᐁᑯᓯ ᐃᐢᑫᐧᐊᐧᐠ ᑭ ᐃᑌᐧᐊᐧᐠ, ᐁᐊᐧᑯ ᒋ ᐊᐊᐧ ᓀᐅᒪᐩ?

²⁰ ᑭ ᐃᑌᐧᐤ ᒫᑲ, ᐁᑳᐃᐧᔭ ᓀᐅᒪᐩ ᐃᓯᔨᐦᑳᓯᐠ, ᒫᕒᐊ ᐃᓯᔨᐦᑳᓯᐠ; ᒋᑫᒫ ᒫᒪᐁᐧᔭᐢ ᓯᔪᑳᑎᓯᐟ ᓈᐢᐱᐨ ᓂ ᑭ ᐃᐧᓴᑲᐦᐅᐠ.

²¹ ᓂ ᑭ ᒧᐢᑭᓈᐣ ᑳ ᓯᐯᐧᑌᔮᐣ, ᐁᑯᓯ ᐁ ᐱᓯᓯᑯᓯᔮᐣ ᑳ ᑎᐯᔨᐦᒋᑫᐟ ᑳ ᐯ ᑭᐁᐧᑕᐃᐟ; ᑖᓀᐦᑭ ᓀᐅᒪᐩ ᑳ ᐃᓯᔨᐦᑳᓯᔦᐠ, ᐃᐧᔭ ᒥᔮᒫᐩ ᑳ ᑎᐯᔨᐦᒋᑫᐟ ᐁ ᑭ ᐋᒋᒥᐟ, ᒥᓇ ᒫᒪᐁᐧᔭᐢ ᓯᔪᑳᑎᓯᐟ ᐁ ᑭ ᑯᑕᑭᐦᐃᐟ?

²² ᐁᑯᓯ ᓀᐅᒪᐩ ᑭ ᐃᓯ ᐯ ᑭᐁᐧᐤ, ᒥᓇ ᕒᐅᐦᐟ ᐊᓇ ᒧᐋᑊ ᐃᐢᑫᐧᐤ, ᐅᐢᑎᒪ, ᐁ ᐃᐧᒉᐃᐧᑯᐟ, ᑳ ᑭ ᐯ ᐃᐧᒉᐃᐧᑯᐟ ᒧᐋᑊ ᐊᐢᑭᕽ ᐅᐦᒋ; ᑭ ᑕᑯᓯᓇᐧᐠ ᒫᑲ ᐯᐟᓬᐃᐊᒥᕽ ᒣᑳᐧᐨ ᐁ ᒫᒋ ᒪᓂᓯᑫᕽ ᐃᐢᑫᐧᓯᓯᑳᐣ.