ᑭᐢᑫᔨᐦᑖᑯᐦᑫᐃᐧᐣ 1 - ᑲᓈᒋ ᑭᐦᒋ ᒪᓯᓈᐦᐃᑲᐣ

¹ ᐅ ᑭᐢᑫᔨᐦᑖᑯᐦᑫᐃᐧᐣ ᒋᓴᐢ ᙭, ᑭᓭᒪᓂᑐᐊᐧ ᑳ ᑭ ᒥᔨᑯᐟ ᑭᑕ ᐋᐧᐸᐦᑕᐋᐟ ᐅᐟ ᐊᑐᐢᑫᔮᑲᓇ, ᐊᓂᐦᐃ ᐅᑎ ᐃᐧᐸᐨ ᑫ ᐊᔨᑭᑭ; ᐁᑯᓯ ᐅᑭᓯᑯᒪ ᐅᐦᒋ ᑭ ᐃᓯᑎᓴᐊᒼ ᒥᓇ ᑭ ᑭᐢᑫᔨᑕᒧᐁᐤ ᐅᐟ ᐊᑐᐢᑫᔮᑲᓇ ᒑᓇ;

² ᐁᐊᐧᑯ ᒫᑲ ᑭ ᐋᑐᑕᒼ ᐅᐟ ᐃᑌᐧᐃᐧᓂᔨᐤ ᑭᓭᒪᓂᑐᐊᐧ, ᒥᓇ ᐅᐟ ᐋᒋᒧᐃᐧᓂᔨᐤ ᒋᓴᐢ ᙭ᐊ, ᑲᐦᑭᔭᐤ ᐅᑎ ᑫᑲᐧᐩ ᑳ ᑭ ᐋᐧᐸᐦᑕᕽ.

³ ᓴᐁᐧᔨᑖᑯᓯᐤ ᐊᓇ ᑳ ᐊᔭᒥᑖᐟ ᒥᓇ ᐊᓂᑭ ᑳ ᐯᐦᑕᐦᑭᐠ ᐃᑌᐧᐃᐧᓇ ᐅᒪ ᑭᐢᑭᐁᐧᐦᐃᑫᐃᐧᐣ, ᒥᓇ ᑳ ᑲᓇᐁᐧᔨᐦᑕᐦᑭᐠ ᐊᓂᐦᐃ ᐁᑯᑕ ᑳ ᒪᓯᓇᐃᑳᑌᑭ; ᒋᑫᒫ ᑭᓯᐋᐧᐠ ᐁᑲᐧ ᑭᑕ ᐅᑎᐦᒋᐸᔨᐠ.

⁴ ᒑᐣ ᐁ ᒪᓯᓇᐦᐊᒪᐋᐧᐟ ᑌᐸᑯᑊ ᐊᔭᒥᐦᐁᐃᐧᑲᒥᑲᐧ ᐁᓯᔭᐃᕽ ᑳ ᐊᔮᑭ; ᑭᓭᐋᐧᑐᑖᑯᐃᐧᐣ ᒥᓇ ᐯᔭᑕᑫᔨᒧᐃᐧᐣ ᑭ ᑲ ᐃᐧ ᐅᐦᒋᐢᑕᒫᑯᐋᐧᐤ ᐊᓇ ᑳ ᐊᔮᐟ ᒥᓇ ᑳ ᑭ ᐊᔮᐟ ᒥᓇ ᑫ ᐊᔮᐟ; ᒥᓇ ᐊᓂᑭ ᑌᐸᑯᑊ ᐊᐦᒑᐦᑲᐧ ᑳ ᐅᑎᐢᑲᐃᐧᐢᑲᒥᔨᐟ ᐅ ᑭᐦᒋ ᐊᐱᐃᐧᐣ;

⁵ ᒥᓇ ᒋᓴᐢ ᙭ ᐅᐦᒋ ᐊᓇ ᑳ ᐊᔮᑳᐧᒥᓯᐟ ᐅᑖᒋᒧ, ᐊᓇ ᐅᓂᐢᑕᒥᓂᑖᐃᐧᑭᐤ ᓂᐳᐃᐧᓂᕽ ᐅᐦᒋ, ᒥᓇ ᑳ ᑎᐯᔨᒫᐟ ᑭᐦᒋ ᐅᑭᒫᐊᐧ ᐊᐢᑭᕽ ᑳ ᐊᔮᔨᐟ. ᐊᓇ ᑳ ᓵᑭᐦᐃᑯᔭᕽ ᒥᓇ ᐅ ᒥᐦᑯ ᑳ ᑭ ᐅᐦᒋ ᐋᐱᑯᓂᑯᔭᕽ ᐁᑳ ᑭᑕ ᒥᒋᒪᐱᑎᑯᔭᕽ ᒪᒋᑎᐃᐧᐣ,

⁶ ᐁᑯᓯ ᑳ ᑭ ᐃᓯᐃᑯᔭᕽ ᑭᑕ ᐅᑌᓇᐃᐧᑖᔭᕽ ᑭᑕ ᐊᔭᒥᐦᐁᐃᐧᔨᓂᐢᑖᒫᔭᕽ ᐅ ᑭᓭᒪᓂᑐᒪ ᒥᓇ ᐅᑖᐃᐧᔭ; ᐁᐊᐧᑯ ᑭᑕ ᐊᔮᐤ ᑭᐢᑌᔨᑖᑯᓯᐃᐧᐣ ᒥᓇ ᑎᐯᔨᐦᒋᑫᐃᐧᐣ ᑳᑭᑫ ᒥᓇ ᑳᑭᑫ. ᐋᒣᐣ.

⁷ ᒋᐢᐟ, ᐯ ᐃᑐᐦᑌᐤ ᐊᐧᐢᑯᕽ ᒥᓇ ᑲᐦᑭᔭᐤ ᒥᐢᑭᓯᐠ ᑭᑕ ᐋᐧᐸᒥᐠ, ᐊᓂᑭ ᒥᓇ ᑳ ᑭ ᑕᐦᑲᒫᒋᐠ; ᐁᑯᓯ ᑲᐦᑭᔭᐤ ᑳ ᐃᑕᑐᐢᑳᓀᓯᒋᐠ ᐊᔨᓯᔨᓂᐊᐧᐠ ᐊᐢᑭᕽ ᑭᑕ ᒫᑐᐊᐧᐠ ᐁᐊᐧᑯᓂ ᐅᐦᒋ. ᐁᑯᓵᓂ ᐃᓯ, ᐋᒣᐣ.

⁸ ᓂᔭ ᐊᓇ ᐋᓬᐹ ᒥᓇ ᐊᓇ ᐋᒥᑲ, ᐃᑌᐧᐤ ᑳ ᑎᐯᔨᐦᒋᑫᐟ ᑭᓭᒪᓂᑐ, ᑳ ᐊᔮᐟ ᑳ ᑭ ᐊᔮᐟ ᒥᓇ ᑫ ᐊᔮᐟ, ᒫᒪᐁᐧᔭᐢ ᓯᔪᑳᑎᓯᐟ.

⁹ ᓂᔭ ᒑᐣ, ᑭᒋᐋᐧᒥᐋᐧᐤ ᒥᓇ ᑳ ᐃᐧᒋ ᐊᔮᒥᑯᔦᐠ ᐋᔨᒥᓯᐃᐧᓂᕽ ᒥᓇ ᐅᑌᓇᐃᐧᐃᐧᓂᕽ ᒥᓇ ᓯᐯᔨᑕᒧᐃᐧᓂᕽ ᒋᓴᐢ ᐃᓯ, ᓂ ᑭ ᐊᔮᐣ ᒥᓂᐢᑎᑯᕽ ᐹᐟᒪᐢ ᑳ ᐃᓯᔨᐦᑳᑌᐠ, ᐅᐟ ᐃᑌᐧᐃᐧᐣ ᑭᓭᒪᓂᑐ ᐅᐦᒋ ᒥᓇ ᐅᐟ ᐋᒋᒧᐃᐧᐣ ᒋᓴᐢ.

¹⁰ ᐊᐦᒑᐦᑯᕽ ᓂ ᑭ ᐊᔮᐣ ᑳ ᑎᐯᔨᐦᒋᑫᐟ ᐅ ᑭᓯᑳᒥᕽ, ᐁᑯᓯ ᓂᐢᐱᐢᑲᐧᓂᕽ ᐃᓯ ᐳᑎ ᓂ ᐯᑌᐣ ᐁ ᑭᐦᒋ ᑭᓯᐁᐧᐠ ᐃᑌᐧᐃᐧᐣ ᑖᐱᐢᑯᐨ ᐱᐱᑲᐧᐣ

¹¹ ᐁ ᐃᑎᑯᔮᐣ, ᑫᑲᐧᐩ ᑳ ᐋᐧᐸᐦᑕᒪᐣ ᒪᓯᓇᐦᐊ ᒪᓯᓇᐦᐃᑲᓂᕽ, ᒥᓇ ᐃᓯᑎᓴᐊ ᑌᐸᑯᑊ ᐊᔭᒥᐦᐁᐃᐧᑲᒥᑯᕽ; ᐁᐱᓴᐢ, ᒥᓇ ᐃᐢᒪᕒᓇ, ᒥᓇ ᐸᕒᑲᒪᒼ, ᒥᓇ ᑖᐃᐊᑖᐃᕒᐊ, ᒥᓇ ᓵᕒᑎᐢ, ᒥᓇ ᐱᓬᐊᑌᓬᐱᔭ, ᒥᓇ ᓬᐁᐊᑎᓯᔭ.

¹² ᐁᑯᓯ ᓂ ᑫᐧᐢᑭᑳᐸᐃᐧᐣ ᑭᑕ ᐋᐧᐸᐦᑕᒫᐣ ᐊᓂᒪ ᐃᑌᐧᐃᐧᐣ ᑳ ᑭᑐᑎᑯᔮᐣ ᐁᑯᓯ ᐁ ᑭ ᑫᐧᐢᑭᑳᐸᐃᐧᔮᐣ ᐳᑎ ᓂ ᐋᐧᐸᑌᐣ ᑌᐸᑯᑊ ᐅᓵᐃᐧᓱᓂᔮᐃᐧ ᐋᐧᓴᐢᑯᑌᓂᑲᓈᑎᑲᐧ;

¹³ ᒣᑳᐧᐨ ᒫᑲ ᐋᐧᓴᐢᑯᑌᓂᑲᓈᑎᑯᕽ ᐊᐃᐧᔭᐠ ᑖᐱᐢᑯᐨ ᐊᔨᓯᔨᓂᐃᐧᑯᓯᓵᐣ, ᐁ ᑭᑲᓵᑫᐟ ᒥᐢᑯᑖᑲᐩ ᐅᓯᑎᕽ ᐁ ᐃᐢᑫᐃᑲᓂᔨᐠ ᒥᓇ ᐁ ᐸᑲᐧᑌᐦᐅᐟ ᐋᐧᐢᑭᑲᓂᕽ ᐅᓵᐃᐧᓱᓂᔮᐃᐧ ᐸᑲᐧᑌᐦᐅᐣ.

¹⁴ ᐁᑯᓯ ᐅᐢᑎᑳᐧᐣ ᒥᓇ ᐁᐧᐢᑕᑲᔭ ᑭ ᐋᐧᐱᐢᑳᔨᐊᐧ ᑖᐱᐢᑯᐨ ᐋᐧᐱᐢᑭ ᒫᔭᑎᐦᑯᐱᐊᐧᔭ, ᑖᐱᐢᑯᐨ ᑯᓇ; ᐁᑯᓯ ᐅᐢᑭᓯᑲᐧ ᑖᐱᐢᑯᐨ ᐁ ᑳᐧᑯᑌᐠ ᐃᐢᑯᑌᐤ;

¹⁵ ᐁᑯᓯ ᐅᓯᑕ ᑖᐱᐢᑯᐨ ᐁ ᑭ ᐋᐧᓯᑲᐧᑲᐃᑳᑌᐠ ᐅᓵᐋᐧᐱᐢᐠ, ᑖᐱᐢᑯᐨ ᐁ ᑭ ᒪᒥᑐᓂᒋᑳᑌᐠ ᑎᑳᐱᐢᑭᓯᑲᓂᕽ; ᐁᑯᓯ ᐅᐟ ᐃᑎᑖᑯᓯᐃᐧᐣ ᑖᐱᐢᑯᐨ ᐁ ᐯᑖᑲᐧᑭ ᒥᐦᒉᐟ ᓂᐱᔭ.

¹⁶ ᐅ ᑭᐦᒋᓂᐢᑭᕽ ᒫᑲ ᒥᒋᒥᓀᐤ ᑌᐸᑯᑊ ᐊᒐᐦᑯᓴ; ᐁᑯᓯ ᐅᑐᓂᕽ ᐅᐦᒋᐸᔨᔨᐤ ᐁ ᑳᓯᓯᓂᔨᐠ ᐁ ᓂᓵᐧᐱᑕᑳᔨᐠ ᐃᓴᐁᐧᐢᐠ; ᐅᑳᐧᑲᐣ ᒫᑲ ᑖᐱᐢᑯᐨ ᐱᓯᒼ ᐁ ᑭᐦᒋ ᐋᐧᓭᔮᓯᑫᐟ.

¹⁷ ᐃᐢᐱ ᒫᑲ ᐃᐧᔮᐸᒪᐠ ᓂ ᑭ ᐸᐦᑭᓯᓄᐋᐧᐣ ᐅᓯᑎᕽ ᑖᐱᐢᑯᐨ ᐊᐃᐧᔭᐠ ᐁ ᓂᐱᐟ. ᐁᑯᓯ ᒫᑲ ᐅ ᑭᐦᒋᓂᐢᐠ ᐅᐦᒋ ᓂ ᑭ ᓵᒥᓂᐠ ᐁ ᐃᑌᐧᐟ, ᐁᑳᐃᐧᔭ ᓭᑭᓯ; ᓂᔭ ᐊᓇ ᓂᐢᑕᒼ ᒥᓇ ᐊᓇ ᐃᐢᑳᐧᔮᐨ,

¹⁸ ᒥᓇ ᐊᓇ ᐅᐱᒫᑎᓯᐤ; ᐁᑯᓯ ᓂ ᑭ ᓂᐱᐣ ᒫᑲ ᒋᐢᐟ, ᓂ ᐱᒫᑎᓯᐣ ᓈᐢᐱᒋ ᒥᓇ ᓂᐟ ᐊᔮᐣ ᐋᐱᑯᑲᐃᑲᓇ ᓂᐳᐃᐧᓂᕽ ᒥᓇ ᐦᐁᑎᓯᕽ.

¹⁹ ᒪᓯᓇᐦᐊ ᒫᑲ ᐊᓂᐦᐃ ᑳ ᑭ ᐋᐧᐸᐦᑕᒪᐣ ᒥᓇ ᐊᓂᐦᐃ ᑳ ᐊᔮᑭ ᒥᓇ ᐊᓂᐦᐃ ᒣᐧᐢᑕᐢ ᐃᔨᑯᕽ ᑫ ᑎᐱᐸᔨᑭ;

²⁰ ᐊᓂᒪ ᒪᒫᑖᐤ ᑌᐸᑯᑊ ᐊᒐᐦᑯᓴᐠ ᑳ ᑭ ᐋᐧᐸᒪᒋᐠ ᓂ ᑭᐦᒋᓂᐢᑭᕽ, ᒥᓇ ᐊᓂᐦᐃ ᑌᐸᑯᑊ ᐅᓵᐃᐧᓱᓂᔮᐃᐧ ᐋᐧᓴᐢᑯᑌᓂᑲᓈᑎᑲᐧ. ᐊᓂᑭ ᑌᐸᑯᑊ ᐊᒐᐦᑯᓴᐠ ᐁᐊᐧᑯᓂ ᐅᑭᓯᑯᒥᐋᐧᐊᐧ ᐊᓂᐦᐃ ᑌᐸᑯᑊ ᐊᔭᒥᐦᐁᐃᐧᑲᒥᑲᐧ; ᐁᑯᓯ ᐊᓂᐦᐃ ᑌᐸᑯᑊ ᐋᐧᓴᐢᑯᑌᓂᑲᓈᑎᑲᐧ ᐁᐊᐧᑯᓂ ᑌᐸᑯᑊ ᐊᔭᒥᐦᐁᐃᐧᑲᒥᑲᐧ.