ᑲᑫᐦᑖᐁᐧᐃᐧᓇ 1 - ᑲᓈᒋ ᑭᐦᒋ ᒪᓯᓈᐦᐃᑲᐣ1 ᐅ ᑲᑫᑖᐁᐧᐃᐧᓇ ᓵᓬᐊᒪᐣ ᐅᑯᓯᓴ ᑌᐱᐟ, ᐃᐢᕒᐁᐃᓬ ᑭᐦᒋ ᐅᑭᒫᐤ; 2 ᑭᑕ ᑭᐢᑫᔨᑕᒥᕽ ᐃᔨᓂᓯᐃᐧᐣ ᒥᓇ ᑭᐢᑭᓄᐦᐊᒫᑐᐃᐧᐣ; ᑭᑕ ᓂᓯᑕᐃᐧᓇᒥᕽ ᓂᓯᑐᐦᑕᒧᐃᐧ ᐃᑌᐧᐃᐧᓇ; 3 ᑭᑕ ᐅᑎᓇᒥᕽ ᑭᐢᑭᓄᐦᐊᒫᑐᐃᐧᐣ ᐃᔨᓂᓯᐃᐧ ᐃᓯᐦᒋᑫᐃᐧᓂᕽ, ᑲᐧᔭᐢᑭᑖᑎᓯᐃᐧᓂᕽ, ᒥᓇ ᑲᐧᔭᐢᐠ ᒥᑐᓀᔨᒋᑲᓂᕽ ᒥᓇ ᑲᐧᔭᐢᑭᑎᐃᐧᓂᕽ; 4 ᑭᑕ ᒥᔨᑯᐟ ᐃᔨᓂᓯᐃᐧᐣ ᐊᓇ ᑳ ᐁᐧᒋᐦᐅᐟ, ᐅᐢᑭᓂᑭᐤ ᑭᐢᑫᔨᑕᒧᐃᐧᐣ ᒥᓇ ᐊᔮᑳᐧᒥᓯᐃᐧᐣ; 5 ᑳ ᐃᔨᓂᓯᐟ ᐊᔨᓯᔨᓂᐤ ᑭᑕ ᐯᐦᑕᕽ ᐁᑯᓯ ᑭᑕ ᔭᐦᑭ ᑭᐢᑭᓄᐦᐊᒫᑯᐃᐧᓯᐟ ᒥᓇ ᐊᔨᓯᔨᓂᐤ ᑳ ᐅ ᓂᓯᑐᐦᑕᒧᐃᐧᓂᐟ ᑭᑕ ᐅᑎᑕᕽ ᑳ ᓱᑲᐢᑌᑭ ᒫᒥᓄᒥᐁᐧᐃᐧᓇ; 6 ᑭᑕ ᓂᓯᑐᐦᑕᒥᕽ ᑲᑫᑖᐁᐧᐃᐧᐣ, ᒥᓇ ᐁ ᐃᑌᐧᒪᑲᕽ; ᐅᐟ ᐊᔭᒥᐃᐧᓂᐋᐧᐊᐧ ᑳ ᐃᔨᓂᓯᒋᐠ, ᒥᓇ ᑳ ᐋᑲᐋᐧᔨᑭ ᐅᐟ ᐃᑌᐧᐃᐧᓂᐋᐧᐊᐧ. 7 ᑳ ᑯᓯᑫᐧᔨᒥᐦᐟ ᑳ ᑎᐯᔨᐦᒋᑫᐟ ᐁᐊᐧᑯ ᐁ ᒫᒋᐸᔨᐠ ᑭᐢᑫᔨᑕᒧᐃᐧᐣ; ᒫᑲ ᐁᑳ ᑳ ᐃᔨᓂᓯᐟ ᐋᑕᐁᐧᔨᑕᒼ ᐃᔨᓂᓯᐃᐧᐣ ᒥᓇ ᑭᐢᑭᓄᐦᐊᒫᑫᐃᐧᐣ. 8 ᓂᑯᓭ, ᓇᑐᐦᑕᒼ ᐅ ᑭᐢᑭᓄᐦᐊᒫᑫᐃᐧᐣ ᑯᑖᐃᐧ, ᒥᓇ ᐁᑳᐃᐧᔭ ᓇᑲᑕᒼ ᐅᔭᓱᐁᐧᐃᐧᐣ ᑭᑳᐃᐧ; 9 ᒋᑫᒫ ᑭ ᑲ ᒥᔪ ᐊᐧᐁᐧᓯᐅᐋᐧᑳᐣ ᑭᐢᑎᑳᐧᓂᕽ, ᒥᓇ ᑭᑲᐧᔮᕽ ᑖᐱᐢᑳᑲᓀᔮᐱᓴ. 10 ᓂᑯᓭ, ᑭᐢᐱᐣ ᐅᒪᒑᑎᓯᐊᐧᐠ ᐃᐧᓵᒥᐢᑳᐧᐃᐧ, ᐁᑳᐃᐧᔭ ᓇᐢᑯᒧ. 11 ᑭᐢᐱᐣ ᐃᑌᐧᑖᐧᐃᐧ, ᐯ ᐃᐧᒉᐃᐧᓈᐣ, ᒫᐦᑎ ᐊᓱᐊᑖᐠ ᒥᐦᑯ, ᑭᒧᒋ ᐊᐢᑲᒪᐋᐧᑕᐠ ᑳ ᒥᔮᐧᑎᓯᐟ ᐱᑯᓇᑕ; 12 ᐁ ᒣᑳᐧ ᐱᒫᑎᓯᒋᐠ ᑯᐦᒋᐸᔨᐋᑖᓂᐠ ᑖᐱᐢᑯᐨ ᒋᐸᔭᐢᑭ, ᒥᓇ ᒥᓯᐁᐧ, ᑖᐱᐢᑯᐨ ᐋᐧᑎᑳᓂᕽ ᑳ ᐃᑐᐦᑌᒋᐠ; 13 ᑭ ᑲ ᒥᐢᑫᓈᓇᐤ ᑲᐦᑭᔭᐤ ᑳ ᐊᔨᐋᐧᑫᔨᑖᑲᐧᐦᑭ ᑫᑲᐧᔭ, ᑭ ᑲ ᒧᐢᑭᓇᑖᓈᓇᐤ ᑭᑭᓇᐊᐧ ᒪᓂᐊᐧᑌᐃᐧᐣ; 14 ᑭ ᑲ ᐅ ᐃᐧᒉᐋᐧᑲᓂᑐᓈᓇᐤ; ᑭᑕ ᐯᔭᑲᐧᐣ ᑭ ᓱᓂᔮᐃᐧᐊᐧᑎᓇᐤ; 15 ᓂᑯᓭ, ᐁᑳᐃᐧᔭ ᐃᐧᒉᐃᐧᐠ ᒣᐢᑲᓈᕽ; ᐁᑳᐃᐧᔭ ᐱᒧᑖᑐᑕᒼ ᐅ ᒣᐢᑲᓈᐋᐧᐤ; 16 ᒋᑫᒫ ᒪᒑᔨᐃᐧᓂᕽ ᐃᐢᐸᑖᐊᐧᐠ, ᒥᓇ ᑲᑫᐧᔮᐦᐅᐊᐧᐠ ᑭᑕ ᓯᑭᓇᑭᐠ ᒥᐦᑯ. 17 ᒋᑫᒫ ᐱᑯᓇᑕ ᐊᔭᐱ ᑳ ᑕᓭᐧᑳᑯᑎᐦᐟ ᐁ ᐋᐧᐸᐦᑕᕽ ᐱᑳᐧᓇ ᐱᔦᓯᐢ; 18 ᐅᑯ ᒫᑲ ᐃᐧᔭᐋᐧᐤ ᐅ ᒥᐦᑯᐋᐧᐤ ᑳ ᐊᓱᐊᑭᐠ, ᑭᒧᒋ ᐊᐢᑲᒪᐋᐧᑕᒪᐧᐠ ᐃᐧᔭᐋᐧᐤ ᐅ ᐱᒫᑎᓯᐃᐧᓂᐋᐧᐤ. 19 ᐁᑯᓯ ᐁᓯᐁᐧᐱᓯᐟ ᑲᐦᑭᔭᐤ ᐊᐃᐧᔭᐠ ᑳ ᑳᓴᑳᑎᓯᐟ ᑲᐢᑭᒋᑫᐃᐧᐣ; ᑳ ᐅᑎᓇᒫᐧᐟ ᐅ ᐱᒫᑎᓯᐃᐧᓂᔨᐤ ᐊᓂᐦᐃ ᑳ ᐊᔮᔨᐟ. 20 ᐃᔨᓂᓯᐃᐧᐣ ᑌᐯᐧᐤ ᐱᒧᐦᑌᐢᑲᓈᕽ, ᐯᐦᑖᑯᓯᐤ ᐃᑕ ᐁ ᑌᓂᓴᐃᐧ ᐊᔮᐠ; 21 ᑌᐯᐧᐤ ᐃᑕ ᑭᐦᒋ ᑳ ᒫᐊᐧᒋᐦᐃᑐᕽ; ᐁ ᐊᑎ ᐱᐦᑐᑫᕽ ᑭᐦᒋᐃᐢᑳᐧᑌᒥᕽ, ᐅᑌᓈᕽ, ᐯᐦᑖᑯᑖᐤ ᐅᐟ ᐃᑌᐧᐃᐧᓇ; 22 ᑖᓂᔨᑯᕽ ᑭᓀᐧᐢ, ᑭᔭᐋᐧᐤ ᑳ ᐁᐧᒋᐦᐅᔦᐠ ᑫ ᓵᑭᐦᑖᔦᐠ ᐁᐧᒋᐦᐅᐃᐧᐣ? ᒥᓇ ᒫᔦᔨᐦᒋᑫᐢᑲᐠ ᑫ ᒥᔦᐧᔨᑕᐦᑭᐠ ᒫᔦᔨᐦᒋᑫᐃᐧᐣ, ᒥᓇ ᐁᑳ ᑳ ᐃᔨᓂᓯᒋᐠ ᑫ ᐸᑳᐧᑕᑭᐠ ᑭᐢᑫᔨᑕᒧᐃᐧᐣ? 23 ᑫᐧᐢᑭᐠ ᐁ ᑭᑐᑎᑕᑯᐠ; ᒫᑎᑲ, ᑭ ᑲ ᓯᑭᓇᒫᑎᓈᐋᐧᐤ ᓂᐟ ᐊᐦᒑᕽ, ᑭ ᑲ ᑭᐢᑫᔨᑕᒧᐃᑎᓈᐋᐧᐤ ᓂᐟ ᐃᑌᐧᐃᐧᓇ. 24 ᒋᑫᒫ ᐁ ᑭ ᑌᐯᐧᔮᐣ, ᐁᑯᓯ ᐁᑳ ᐁ ᑖᐯᐧᑕᒣᐠ; ᐁ ᑭ ᓱᐃᐧᓂᐢᑫᔨᔮᐣ ᐁᑳ ᒫᑲ ᐊᐃᐧᔭᐠ ᐁ ᓈᑲᑐᑫᐟ; 25 ᒫᑲ ᐁ ᑭ ᒫᔦᔨᑕᒣᐠ ᓂ ᒫᒥᓄᒥᐁᐧᐃᐧᐣ, ᒥᓇ ᐁ ᐋᑕᐁᐧᔨᑕᒣᐠ ᓂ ᑲᑫᑕᐊᒫᑫᐃᐧᐣ; 26 ᓂᔭ ᒥᓇ ᓂ ᑲ ᐹᐦᐱᐣ ᑭ ᓂᓯᐊᐧᓈᒋᐦᐅᐃᐧᓂᐋᐧᕽ; ᓂ ᑲ ᒣᑕᐋᐧᑳᑌᐣ ᑭ ᓭᑭᓯᐃᐧᓂᐋᐧᐤ ᑕᑯᐸᔨᑭ; 27 ᐃᐢᐱ ᑭ ᓭᑭᓯᐃᐧᓂᐋᐧᐤ ᑕᑯᐸᔨᑭ ᑖᐱᐢᑯᐨ ᐁ ᑭᐢᑎᕽ, ᒥᓇ ᑭ ᓂᓯᐊᐧᓈᒋᐦᐅᐃᐧᓂᐋᐧᐤ ᑕᑯᐸᔨᑭ ᑖᐱᐢᑯᐨ ᐁ ᐱᓯᒍᓯᐊᐧᕽ; ᐃᐢᐱ ᐊᐧᐋᐧᓀᔨᑕᒧᐃᐧᐣ ᒥᓇ ᑯᑕᑭᑖᐃᐧᐣ ᐅᑎᐦᑎᑯᔦᑯ. 28 ᐁᑲᐧ ᑫ ᒪᐃᐧᒧᐢᑕᐃᐧᒋᐠ, ᒫᑲ ᓇᒪᐃᐧᔭ ᓂ ᑲ ᓇᐢᑫᐧᐊᐧᓯᒫᐊᐧᐠ; ᓂ ᑲ ᐋᐦᑲᒥ ᓇᓈᑐᓈᑲᐧᐠ ᒫᑲ ᓇᒪᐃᐧᔭ ᓂ ᑲ ᒥᐢᑳᑲᐧᐠ; 29 ᒋᑫᒫ ᐁ ᑭ ᐸᑳᐧᑕᑭᐠ ᑭᐢᑫᔨᑕᒧᐃᐧᐣ, ᒥᓇ ᐁᑳ ᐁ ᓇᐊᐧᓱᓇᑭᐠ ᐅ ᑯᓯᑫᐧᔨᒥᑯᐃᐧᓂᔨᐤ ᑳ ᑎᐯᔨᐦᒋᑫᔨᐟ; 30 ᓇᒪᐃᐧᔭ ᑭ ᓇᑕᐁᐧᔨᑕᒪᐧᐠ ᓂ ᒫᒥᓄᒥᐁᐧᐃᐧᐣ; ᑭ ᐋᑕᐁᐧᔨᑕᒪᐧᐠ ᑲᐦᑭᔭᐤ ᓂ ᑲᑫᑕᐊᒫᑫᐃᐧᐣ. 31 ᐁᐊᐧᑯ ᐅᐦᒋ ᑭᑕ ᒥᒋᐊᐧᐠ ᐁ ᐃᓯ ᒥᓂᓯᐊᐧᓂᔨᐠ ᐃᐧᔭᐋᐧᐤ ᐅᐟ ᐃᑖᑎᓯᐃᐧᓂᐋᐧᐤ, ᒥᓇ ᑭᑕ ᑭᐢᐳᑐᑕᒪᐧᐠ ᐃᐧᔭᐋᐧᐤ ᐅᐟ ᐃᓯᐦᒋᑫᐃᐧᓂᐋᐧᐊᐧ. 32 ᒋᑫᒫ ᐅᐟ ᐊᓭᐸᔨᐃᐧᓂᔨᐤ ᐅᐁᐧᒋᐦᐅᐊᐧ ᑭᑕ ᓂᐸᐃᑲᐧᐠ, ᒥᓇ ᐅ ᓇᓇᐦᐃᐸᔨᐃᐧᓂᔨᐤ ᐁᑳ ᑳ ᐃᔨᓂᓯᔨᐟ ᑭᑕ ᓂᓯᐊᐧᓈᒋᐃᑲᐧᐠ. 33 ᒫᑲ ᐊᐃᐧᔭᐠ ᓇᑐᐦᑕᐃᐧᒋ ᓇᒪ ᑫᑲᐧᐩ ᑭᑕ ᐊᐢᑖᐦᐃᐠ, ᒥᓇ ᑭᑕ ᐯᔭᑕᑭ ᐊᔮᐤ ᐁᑳ ᒫᔨᑫᑲᐧᐩ ᐁ ᐊᐢᑖᐦᐃᑯᐟ. |
This Bible text is a corrected edition of the 1908 Western Cree Bible; it is in the public domain.
Canadian Bible Society