ᐹᐃᓬᐃᒪᐣ 1 - ᑲᓈᒋ ᑭᐦᒋ ᒪᓯᓈᐦᐃᑲᐣ

¹ ᐹᓬ ᑳ ᑭᐸᐦᐅᑲᐃᐧᔮᐣ ᙭ ᒋᓴᐢ ᐅᐦᒋ, ᒥᓇ ᑎᒪᑏ ᑭᒋᐋᐧᒥᓇᐤ ᐁ ᒪᓯᓇᐦᐊᒫᑖᕽ ᐹᐃᓬᐃᒪᐣ ᑳ ᓵᑭᐦᐃᑖᕽ ᓂ ᐃᐧᒋ ᐊᑐᐢᑫᒫᑲᓂᓈ,

² ᒥᓇ ᐋᐹᔭ ᓂᑕᐁᐧᒫᓈᐣ, ᒥᓇ ᐋᕒᑭᐸᐢ ᓂ ᐃᐧᒋ ᓄᑎᓂᑫᒫᑲᓂᓈᐣ, ᒥᓇ ᐅᑕᔭᒥᐦᐋᐊᐧᐠ ᑭᑭᕽ ᑳ ᐊᔮᒋᐠ;

³ ᑭᓭᐋᐧᑐᑖᑯᐃᐧᐣ ᒥᓇ ᐯᔭᑕᑫᔨᒧᐃᐧᐣ ᑭ ᑲ ᐃᐧ ᐅᐦᒋᐢᑕᒫᑯᐋᐧᐤ ᑭᓭᒪᓂᑐ ᑯᑖᐃᐧᓇᐤ ᒥᓇ ᑳ ᑎᐯᔨᐦᒋᑫᐟ ᒋᓴᐢ ᙭.

⁴ ᓂ ᓇᓈᐢᑯᒪᐤ ᓂ ᑭᓭᒪᓂᑐᒼ ᑳᑭᑫ ᐁ ᒫᒥᐢᑯᒥᑖᐣ ᓂᐟ ᐊᔭᒥᐦᐋᐃᐧᓂᕽ,

⁵ ᐁ ᐯᑕᒫᐣ ᐁ ᐋᑐᑖᑲᐧᕽ ᑭ ᓵᑭᐦᐃᐁᐧᐃᐧᐣ ᒥᓇ ᑭ ᑖᐯᐧᔦᔨᑕᒧᐃᐧᐣ ᑳ ᐃᓯ ᐋᐧᐸᐦᑕᐊᐟ ᑳ ᑎᐯᔨᐦᒋᑫᐟ ᒋᓴᐢ ᒥᓇ ᑳ ᐃᓯ ᐋᐧᐸᐦᑕᐊᒋᐠ ᑲᐦᑭᔭᐤ ᐅᑲᓈᑎᓯᐊᐧᐠ;

⁶ ᐊᓂᒪ ᐁ ᐃᓯ ᐅ ᐃᐧᒉᐋᐧᑲᓂᑐᕽ ᑭ ᑖᐯᐧᔦᔨᑕᒧᐃᐧᓂᕽ ᑭᑕ ᑭ ᑲᐢᑭᐃᐁᐧᐠ, ᐁ ᑭᐢᑫᔨᑖᑲᐧᕽ ᑲᐦᑭᔭᐤ ᒥᔪ ᑫᑲᐧᐩ ᑳ ᑭᑭᐢᑳᑯᔭᐣ, ᙭ ᐃᓯ.

⁷ ᒋᑫᒫ ᒥᐢᑕᐦᐃ ᒪᒪᐦᑖᑯᓯᐃᐧᐣ ᒥᓇ ᒥᔪᑎᐁᐃᐧᐣ ᓂ ᑭ ᐊᔮᐣ ᑭ ᓵᑭᐦᐃᐁᐧᐃᐧᐣ ᐅᐦᒋ ᒋᑫᒫ ᐅᑌᐦᐃᐋᐧᐊᐧ ᐅᑲᓈᑎᓯᐊᐧᐠ ᑭ ᑭ ᒥᓇᐃᐧ ᒪᐢᑲᐃᐧᓯᑖᐋᐧᐣ ᓂᒋᐋᐧ.

⁸ ᐁᑯᓯ ᒫᑲ ᐋᑕ ᐁ ᐊᔮᔮᐣ ᐁᑯᔨᑯᕽ ᓱᑫᔨᒧᐃᐧᐣ ᙭ ᐃᓯ ᑭᑕ ᓯᑭᒥᑖᐣ ᐊᓂᒪ ᑳ ᓇᐃᐸᔨᐠ,

⁹ ᐁᔨᐁᐧᕽ ᓵᑭᐦᐃᐁᐧᐃᐧᐣ ᐅᐦᒋ ᓇᐊᐧᐨ ᑭ ᑳᑭᓯᒧᑐᑖᑎᐣ ᒋᑫᒫ ᓂᔭ ᐹᓬ ᐁ ᑭᓭᔨᓂᐃᐧᔮᐣ ᒥᓇ ᐁᑲᐧ ᐁ ᑭᐸᐃᑳᓱᔮᐣ ᙭ ᒋᓴᐢ ᐅᐦᒋ;

¹⁰ ᑭ ᑳᑭᓯᒧᑐᑖᑎᐣ ᓂᐟ ᐊᐋᐧᓯᒥᐢ ᐅᐦᒋ ᑳ ᑭ ᓂᐦᑖᐃᐧᑭᐊᐠ ᐁ ᒣᑳᐧ ᒪᒫᒋᑲᐧᐱᓱᔮᐣ, ᐋᓀᓯᒪᐢ,

¹¹ ᐊᓇ ᑲᔮᐢ ᐁᑳ ᓈᐣᑕᐤ ᑳ ᑭ ᐃᑖᐸᒋᐃᐢᐠ ᒫᑲ ᐁᑲᐧ ᑳ ᐋᐸᒋᐃᑯᔭᕽ ᑖᐱᐢᑯᐨ ᑭᔭ ᒥᓇ ᓂᔭ;

¹² ᐊᓇ ᑳ ᓯᐯᐧᑎᓴᐊᐧᐠ ᑳᐃᐧ ᑭᑕ ᓈᑎᐢᐠ ᐃᐧᔭ ᑫᐦᒋᐋᐧᐠ ᐁᐊᐧᑯ ᒣᐧᒧᐦᐨ ᓂᑌᐦ;

¹³ ᐁᐊᐧᑯ ᓂ ᑭ ᓄᐦᑌ ᑲᓇᐁᐧᔨᒫᐤ ᑭᑕ ᐊᑐᐢᑫᐢᑕᒫᐢᐠ ᐁ ᐸᒥᐃᐟ ᐅᒪ ᒪᒫᒋᑲᐧᐱᓱᐃᐧᓂᕽ ᒥᔮᐧᒋᒧᐃᐧᐣ ᐅᐦᒋ:

¹⁴ ᒫᑲ ᓇᒪᐃᐧᔭ ᑫᑲᐧᐩ ᓂ ᐃᐧ ᐃᑐᑌᐣ ᐁᑳ ᑭᔭ ᐁ ᑭᐢᑫᔨᑕᒪᐣ; ᑭ ᒥᔪᑐᑕᒧᐃᐧᐣ ᐁᑳ ᑭᑕ ᐃᓯᓈᑲᐧᕽ ᑖᐱᐢᑯᐨ ᐊᔨᓵᐨ, ᒫᑲ ᒥᑐᓂ ᑌᐯᔨᒧᐃᐧᓂᕽ.

¹⁵ ᒋᑫᒫ ᒫᐢᑯᐨ ᐁᐊᐧᑯ ᐅᐦᒋ ᐊᒋᔭᐤ ᑳ ᑭ ᐸᐢᑫᐃᐧᔨᐢᐠ ᑭᑕ ᐊᔮᐊᐧᐟ ᑳᑭᑫ;

¹⁶ ᓇᒪᐃᐧᔭ ᒫᑲ ᐁᑲᐧ ᑖᐱᐢᑯᐨ ᐊᑐᐢᑫᔮᑲᐣ ᒫᑲ ᐊᔨᐋᐧᐠ ᐃᔨᑯᕽ ᐃᐧᔭ ᐊᑐᐢᑫᔮᑲᐣ, ᐁ ᐅᒋᐋᐧᒥᕽ ᑳ ᓵᑭᐦᐃᐦᐟ, ᓂᔭ ᐅᑎ ᐅᓵᒼ, ᒫᑲ ᐋᐧᐃᐧᐢ ᑭᔭ ᐃᐧᔮᓯᕽ ᐃᓯ ᒥᓇ ᑳ ᑎᐯᔨᐦᒋᑫᐟ ᐃᓯ.

¹⁷ ᑭᐢᐱᐣ ᒫᑲ ᓂ ᐃᐧᒉᐋᐧᑲᐣ ᑭᐟ ᐃᑕᑭᒥᐣ, ᐅᑎᐣ ᑖᐱᐢᑯᐨ ᓂᔭ ᐁ ᐅᑎᓂᔭᐣ.

¹⁸ ᒫᑲ ᑭᐢᐱᐣ ᓈᐣᑕᐤ ᑭ ᑭ ᐃᓯ ᐊᐧᓂᑐᑖᐠ ᐊᐦᐳ ᓈᐣᑕᐤ ᑫᑲᐧᐩ ᑭ ᒪᓯᓇᐦᐊᒫᐠ ᓂᔭ ᐁᐊᐧᑯ ᐊᑭᑕᒪᐃᐧᐣ;

¹⁹ ᓂᔭ ᐹᓬ ᓂ ᒪᓯᓇᐦᐁᐣ ᓂᒋᐦᒋ ᐅᐦᒋ, ᓂ ᑲ ᑎᐸᐁᐣ; ᐋᑕᐃᐧᔭ ᒫᑲ ᑭᑕ ᑭ ᐃᑌᐧᔮᐣ ᑭᔭ ᑭ ᒪᓯᓇᐦᐊᒪᐃᐧᐣ ᑭᔭ ᑫᐦᒋᐋᐧᐠ ᑳ ᐃᓯ ᐊᔮᔭᐣ.

²⁰ ᐁᐦᐁ ᓂᒋᐋᐧ, ᑭᔮᒼ ᒪᒪᑖᑯᐦᐃᐣ ᑳ ᑎᐯᔨᐦᒋᑫᐟ ᐃᓯ; ᒥᔪᑌᐦᐁᐦᐃᐣ ᙭ ᐃᓯ.

²¹ ᐁᑳ ᐁ ᐊᓯᐁᐧᔨᑕᒫᐣ ᑭ ᓇᓇᐃᑕᒧᐃᐧᐣ ᑭ ᒪᓯᓇᐦᐊᒫᑎᐣ ᐁ ᑭᐢᑫᔨᑕᒫᐣ ᑭᑕ ᐃᑐᑕᒪᐣ ᐊᔨᐋᐧᐠ ᐃᔨᑯᕽ ᐊᓂᒪ ᑳ ᐃᑌᐧᔮᐣ.

²² ᒫᑲ ᒥᓇ ᑲᐧᔮᒋᑕᒪᐃᐣ ᐃᑕ ᑭᑕ ᐃᐧᑭᔮᐣ; ᒋᑫᒫ ᓂᐟ ᐃᓯ ᐸᑯᓭᔨᒧᐣ ᑭᐟ ᐊᔭᒥᐦᐋᐃᐧᓂᐋᐧᐊᐧ ᐅᐦᒋ ᑭᑕ ᐸᑭᑎᓂᑲᐃᐧᔮᐣ ᑭᑕ ᐋᐧᐸᒥᑕᑯᐠ.

²³ ᐁᐸᑊᕒᐋᐢ ᑳ ᑭᑭ ᑭᐸᐃᑳᓱᔮᐣ ᙭ ᒋᓴᐢ ᐃᓯ ᑭᐟ ᐊᑕᒥᐢᑳᐠ;

²⁴ ᐁᑯᓯ ᒥᓇ ᒫᕒᐠ, ᐋᕒᐃᐢᑖᕒᑲᐢ, ᑎᒫᐢ, ᓬᐅᐠ, ᓂ ᐃᐧᒋ ᐊᑐᐢᑫᒫᑲᓇᐠ.

²⁵ ᐅ ᑭᓭᐋᐧᑎᓯᐃᐧᐣ ᑳ ᑎᐯᔨᒥᑯᔭᕽ ᒋᓴᐢ ᙭ ᑭ ᑲ ᐃᐧ ᐃᐧᒉᐃᑯᐋᐧᐣ ᑭᐟ ᐊᐦᒑᐦᑯᕽ. ᐋᒣᐣ.