nihimāya 1 - ᑲᓈᒋ ᑭᐦᒋ ᒪᓯᓈᐦᐃᑲᐣ1 ᐅᐟ ᐃᑌᐧᐃᐧᓇ ᓂᐦᐃᒫᔭ ᐅᑯᓯᓴ ᐦᐋᑲᓬᐋᔭ. ᑭ ᐊᔨᐢᐸᔨᐤ ᒫᑲ ᒣᑳᐧᐨ ᑭᐢᓬᐁᑊ ᐱᓯᒼ, ᓂᓯᑕᓇᐤ ᑕᐦᑐ ᐊᐢᑭ ᐊᑎ, ᐁ ᐊᔮᔮᐣ ᐁᑯᑕ ᓱᓵᐣ ᐊᓂᒪ ᑭᐦᒋ ᐅᑭᒫᐃᐧᑲᒥᐠ, 2 ᐦᐁᓇᓇᐩ ᐯᔭᐠ ᓂᒋᐋᐧᒼ, ᑭ ᑕᑯᓯᐣ, ᐃᐧᔭ ᒥᓇ ᐋᑎᐦᐟ ᓈᐯᐊᐧᐠ ᒍᑕ ᐅᐦᒋ; ᓂ ᑭ ᑲᑫᐧᒋᒫᐊᐧᐠ ᒫᑲ ᐁ ᐃᓯ ᐊᔮᔨᐟ ᐊᓂᐦᐃ ᒍᐊᐧ ᑳ ᑭ ᐸᐢᐱᔨᐟ, ᑳ ᐃᐢᑯᐃᐦᒋᐠ ᐊᐊᐧᑳᑎᑯᐃᐧᓂᕽ, ᒥᓇ ᐁ ᐃᓯ ᐊᔮᐠ ᒉᕒᐅᓴᓬᐊᒼ. 3 ᓂ ᑭ ᐃᑎᑲᐧᐠ ᒫᑲ, ᑳ ᑭ ᐃᐢᑯᐃᐦᒋᐠ ᐊᐊᐧᑳᑎᑯᐃᐧᓂᕽ ᐅᐦᒋ ᑳ ᐊᔮᒋᐠ ᐁᑯᑕ ᐁ ᐱᐢᑭᑕᑭᑌᐠ ᐊᐢᑭ ᒥᐢᑕᐦᐃ ᑯᑕᑭᑖᐊᐧᐠ ᒥᓇ ᑭᑎᒪᐋᐊᐧᐠ; ᒣᓂᐢᑭᑫᐃᐧᐣ ᒥᓇ ᒉᕒᐅᓴᓬᐊᒥᕽ ᐱᑯᓂᑳᑌᐤ, ᒥᓇ ᑭᐦᒋᐃᐢᑳᐧᑌᒪ ᐁᑯᑕ ᒣᐢᑎᑲᑌᐊᐧ ᐃᐢᑯᑌᐤ ᐅᐦᒋ. 4 ᑭ ᐊᔨᐢᐸᔨᐤ ᒫᑲ ᐃᐢᐱ ᐁ ᐯᑕᒫᐣ ᐅᐦᐃ ᐃᑌᐧᐃᐧᓇ, ᓂ ᑭ ᓇᐦᐊᐱᐣ ᐁ ᑭ ᒫᑐᔮᐣ, ᒥᓇ ᓂ ᑭ ᐱᑫᐧᔨᑕᒥᐃᑯᐣ ᑖᐣᑕᐦᑐ ᑭᓯᑳᐤ; ᐁᑯᓯ ᓂ ᑭ ᐃᔨᐊᐧᓂᓯᐃᓱᐣ ᒥᓇ ᓂ ᑭ ᐊᔭᒥᐦᐁᐢᑕᐋᐧᐤ ᑭᓭᒪᓂᑐ ᑭᐦᒋᑭᓯᑯᕽ ᐁᔮᐟ, 5 ᐅᒥᓯ ᐁ ᑭ ᐃᑌᐧᔮᐣ, ᑭ ᐸᑯᓭᔨᒥᑎᐣ ᑌᐯᔨᐦᒋᑫᔭᐣ, ᑭᓭᒪᓂᑐ ᑭᐦᒋᑭᓯᑯᕽ ᑳ ᐊᔮᔭᐣ, ᑳ ᑭᐦᒑᔨᐃᐧᔭᐣ ᒥᓇ ᑳ ᑯᐢᑖᑌᔨᑖᑯᓯᔭᐣ ᑭᓭᒪᓂᑐ, ᑳ ᑎᐱᑐᑕᒪᐋᐧᐟ ᐊᓱᑕᒫᑫᐃᐧᐣ ᒥᓇ ᑭᓭᐋᐧᑎᓯᐃᐧᐣ ᐊᓂᐦᐃ ᑳ ᓵᑭᐦᐃᑯᐟ ᒥᓇ ᑳ ᒥᑎᒣᔨᐟ ᐅᔭᓱᐁᐧᐃᐧᓇ; 6 ᑭᔮᒼ ᑭᐦᑕᐊᐧᑲᐩ ᐁᑲᐧ ᑭᑕ ᓇᑐᐦᑕᒧᒪᑲᐣ, ᒥᓇ ᑐᐦᑳᐱ, ᑭᑕ ᐯᑕᒪᐧᐟ ᐅᐟ ᐊᔭᒥᐦᐋᐃᐧᐣ ᑭᐟ ᐊᑐᐢᑫᔮᑲᐣ, ᑳ ᐃᓯ ᐊᔭᒥᐦᐁᐢᑖᑖᐣ ᐊᓄᐦᐨ ᐅᒪ, ᐁ ᑭᓯᑳᐠ ᒥᓇ ᐁ ᑎᐱᐢᑳᐠ, ᐁ ᐊᔭᒥᐦᐁᐢᑕᒪᐊᐧᑭᐠ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭᐟ ᐊᑐᐢᑫᔮᑲᓇᐠ, ᐊᓯᒋ ᐁ ᐋᑐᑕᒪᐧᐠ ᐅ ᒪᒋᐃᑎᐃᐧᓂᐋᐧᐊᐧ ᐃᐢᕒᐁᐃᓬ ᐅᐟ ᐊᐋᐧᓯᒥᓴ, ᑳ ᑭ ᐊᐧᓂᑐᑖᑖᕽ; ᐁᐦᐁ, ᓂᔭ ᒥᓇ ᓄᑖᐃᐧ ᐅ ᐋᐧᐢᑳᐦᐃᑲᓂᕽ ᓂ ᑭ ᐊᐧᓂᑐᑌᓈᐣ. 7 ᒥᐢᑕᐦᐃ ᑭ ᑭ ᓂᓯᐊᐧᓈᒋᑐᑖᑎᓈᐣ, ᒥᓇ ᓇᒪᐃᐧᔭ ᓄᐦ ᒥᑎᒫᓈᐣ ᐊᓂᐦᐃ ᐅᔭᓱᐁᐧᐃᐧᓇ, ᒥᓇ ᑲᑫᐢᑫᐧᐃᐧᓇ, ᒥᓇ ᐅᔭᓱᐋᐧᓯᐁᐧᐃᐧᓇ, ᑳ ᑭ ᐃᑕᓱᐋᐧᑕᐟ ᑭᐟ ᐊᑐᐢᑫᔮᑲᐣ ᒧᓯᐢ. 8 ᑲᓄᑭᐢᑭᓯ ᑭ ᐸᑯᓭᔨᒥᑎᐣ, ᐊᓂᒪ ᐃᑌᐧᐃᐧᐣ ᑳ ᑭ ᐃᑕᓱᐋᐧᑕᐟ ᑭᐟ ᐊᑐᐢᑫᔮᑲᐣ ᒧᓯᐢ, ᐁ ᐃᑌᐧᔭᐣ, ᑭᐢᐱᐣ ᐊᐧᓂᑐᑕᒣᑯ ᑭ ᑲ ᐱᐋᐧᒧᑳᑎᑎᓈᐋᐧᐤ ᓇᓈᑐᕽ ᐊᔨᓯᔨᓂᓈᕽ; 9 ᒫᑲ ᑭᐢᐱᐣ ᑫᐧᐢᑭᐢᑕᐃᐧᔦᑯ, ᒥᓇ ᒥᑎᒣᔦᑯ ᓄᔭᓱᐁᐧᐃᐧᓇ ᒥᓇ ᐃᑐᑕᒣᑯ, ᐋᑕ ᐊᐃᐧᔭᐠ ᑭᔭᐋᐧᐤ ᐅᐦᒋ ᐊᐧᔭᐃᐧᐁᐧᐱᓂᐦᒋᐠ ᑭᓯᐱᑮᓯᑯᕽ ᐃᓯ, ᐁᔨᐁᐧᕽ ᐁᑯᑕ ᐅᐦᒋ ᓂ ᑲ ᒫᐊᐧᓴᑯᓈᐊᐧᐠ, ᒥᓇ ᓂ ᑲ ᐯᓯᐋᐧᐊᐧᐠ ᐃᑕ ᑳ ᑭ ᓇᐊᐧᓱᓇᒫᐣ ᓂ ᐃᐧᔪᐃᐧᐣ ᐁᑯᑕ ᑭᑕ ᐊᔮᐠ. 10 ᐁᐊᐧᑯᓂᐠ ᒫᑲ ᐅᑯ ᑭᐟ ᐊᑐᐢᑫᔮᑲᓇᐠ ᒥᓇ ᑭᐟ ᐊᔨᓯᔨᓂᒪᐠ ᑳ ᑭ ᑭᐢᐱᓇᑕᒋᐠ ᑭ ᑭᐦᒋᒪᐢᑲᐃᐧᓯᐃᐧᐣ ᐅᐦᒋ ᒥᓇ ᑭ ᒪᐢᑲᐃᐧᒋᐦᒉᐃᐧᐣ. 11 ᑌᐯᔨᐦᒋᑫᔭᐣ, ᑭ ᐸᑯᓭᔨᒥᑎᐣ ᑭᔮᒼ ᐁᑲᐧ ᓇᑐᐦᑕᒼ ᐅᐟ ᐊᔭᒥᐦᐋᐃᐧᐣ ᑭᐟ ᐊᑐᐢᑫᔮᑲᐣ. ᒥᓇ ᐅᐟ ᐊᔭᒥᐦᐋᐃᐧᓂᐋᐧᐤ ᑭᐟ ᐊᑐᐢᑫᔮᑲᓇᐠ ᑳ ᒥᔦᐧᔨᑕᐦᑭᐠ ᑭᑕ ᑯᓯᑫᐧᔨᑕᐦᑭᐠ ᑭ ᐃᐧᔪᐃᐧᐣ; ᒥᓇ ᓇᓇᐦᐃᐸᔨᐦ, ᑭ ᓇᑐᑕᒫᑎᐣ, ᑭᐟ ᐊᑐᐢᑫᔮᑲᐣ ᐊᓄᐦᐨ ᑳ ᑭᓯᑳᐠ, ᒥᓇ ᐸᑭᑌᔨᑕᒪᐤ ᑭᑕ ᑭᑎᒫᑭᓇᑯᐟ ᐅᐦᐃ ᓈᐯᐊᐧ. (ᓂᔭ ᒫᑲ ᑳ ᑕᐦᑯᓇᒪᐧᐠ ᑭᐦᒋ ᐅᑭᒫᐤ ᐅ ᒥᓂᑳᐧᑲᐣ.) |
This Bible text is a corrected edition of the 1908 Western Cree Bible; it is in the public domain.
Canadian Bible Society