ᒍᐟ 1 - ᑲᓈᒋ ᑭᐦᒋ ᒪᓯᓈᐦᐃᑲᐣ

¹ ᒍᑕᐢ, ᐅ ᐊᑐᐢᑫᔮᑳᓇ ᒋᓴᐢ ᙭ ᒥᓇ ᐅᒋᐋᐧᒪ ᒉᒥᐢ, ᐁ ᒪᓯᓇᐦᐊᒪᐊᐧᑭᐠ ᐊᓂᑭ ᑳ ᓇᑐᒥᐦᒋᐠ, ᓵᑭᐦᐋᑲᓇᐠ ᑭᓭᒪᓂᑐᕽ ᐁᐧᔪᑖᐃᐧᕽ, ᒥᓇ ᑳ ᑲᓇᐁᐧᔨᑕᒫᐦᐟ ᒋᓴᐢ ᙭;

² ᑭᓭᐋᐧᑐᑖᑯᐃᐧᐣ ᒥᓇ ᐯᔭᑕᑫᔨᒧᐃᐧᐣ ᒥᓇ ᓵᑭᐦᐃᐁᐧᐃᐧᐣ ᑭ ᑲ ᐃᐧ ᔭᑭᑖᐧᑲᐃᐧᓈᐋᐧᐤ.

³ ᓯᔮᑭᐦᐃᑕᑯᐠ, ᐁ ᒣᑲᐧ ᐋᑲᒣᔨᒧᔮᐣ ᑭᑕ ᒪᓯᓇᐦᐊᒫᑕᑯᐠ ᐅᒪ ᒫᒪᐃᐧ ᑭ ᐱᒫᒋᐦᐅᐃᐧᓂᓇᐤ ᐅᐦᒋ, ᓂ ᑭ ᓰᑭᐢᑳᑯᐃᐧᓯᐣ ᑭᑕ ᒪᓯᓇᐦᐊᒫᑕᑯᐠ ᐁ ᐊᔮᑳᐧᒥᒥᑕᑯᐠ ᑭᑕ ᐋᑲᒥ ᓄᑎᓂᑫᐢᑕᒣᐠ ᐊᓂᒪ ᑖᐯᐧᔦᔨᑕᒧᐃᐧᐣ ᐯᔭᑳᐧᐤ ᒫᒪᐃᐧ ᑳ ᑭ ᐸᑭᑎᓇᒫᐦᒋᐠ ᐅᑲᓈᑎᓯᐊᐧᐠ.

⁴ ᒋᑫᒫ ᐃᐦᑖᐊᐧᐠ ᐋᑎᐦᐟ ᐊᔨᓯᔨᓂᐊᐧᐠ ᑭᒧᐨ ᐁ ᑭ ᐱᐦᑐᑫᑖᒋᒧᒋᐠ, ᐊᓂᑭ ᐅᑎ ᑲᔮᐢ ᐅᐦᒋ ᑳ ᑭ ᐃᑕᓱᐋᐧᑎᐦᒋᐠ ᐅᒪ ᓈᓂᐳᒥᐁᐧᐃᐧᐣ, ᐁᑳ ᐁ ᒪᓂᑐᐋᐧᑎᓯᒋᐠ ᐊᔨᓯᔨᓂᐊᐧᐠ, ᑭᐢᑫᐧᔮᑎᓯᐃᐧᓂᕽ ᐁ ᐃᓯ ᑫᐧᐢᑭᓇᐦᑭᐠ ᐅ ᑭᓭᐋᐧᑎᓯᐃᐧᓂᔨᐤ ᑭ ᑭᓭᒪᓂᑐᒥᓇᐊᐧ, ᒥᓇ ᐁ ᐋᓀᐧᑕᐋᐧᒋᐠ ᑳ ᐯᔭᑯᔨᐟ ᑯᑭᒫᒥᓇᐊᐧ ᒥᓇ ᑳ ᑎᐯᔨᒥᑯᔭᕽ ᒋᓴᐢ ᙭.

⁵ ᐁᑲᐧ ᒫᑲ ᑭ ᐃᐧ ᒥᐢᑲᐋᐧᓱᒥᑎᓈᐋᐧᐤ, ᐋᑕᐃᐧᔭ ᐁ ᑭᐢᑫᔨᑕᒣᐠ ᑲᐦᑭᔭᐤ ᑫᑲᐧᐩ ᐯᔭᑳᐧᐤ ᒫᒪᐃᐧ ᑖᓂᓯ ᐃᓯ ᑳ ᑎᐯᔨᐦᒋᑫᐟ, ᐁ ᑭ ᐱᒫᒋᐦᐋᐟ ᐊᔨᓯᔨᓂᐊᐧ ᐃᒋᑊᐟ ᐊᐢᑭᕽ ᐅᐦᒋ, ᒣᐧᐢᑕᐢ ᐃᔨᑯᕽ ᑳ ᑭ ᓂᓯᐊᐧᓈᒋᐦᐋᐟ ᐊᓂᐦᐃ ᐁᑳ ᑳ ᑖᐯᐧᑕᒥᔨᐟ.

⁶ ᒥᓇ ᐅᑭᓯᑯᐊᐧᐠ ᐁᑳ ᑳ ᑭ ᑲᓇᐁᐧᔨᐦᑕᐦᑭᐠ ᐃᐧᔭᐋᐧᐤ ᐅ ᑭᐦᒑᔨᐃᐧᓂᐋᐧᐤ, ᒫᑲ ᑳ ᑭ ᓇᑲᑕᐦᑭᐠ ᐃᑕ ᑲᐧᔭᐢᐠ ᐁ ᐅᐟ ᐃᑖᐃᐧᓂᒋᐠ, ᑭ ᑲᓇᐁᐧᔨᒣᐤ ᑳᑭᑫ ᒪᒫᐦᒋᑲᐧᐦᐱᓱᐃᐧᓂᕽ ᐊᐧᓂᑎᐱᐢᑳᕽ ᐱᔨᐢ ᐅᔭᓱᐁᐧᐃᐧᓂᕽ ᐊᓂᒪ ᑭᐦᒋ ᑭᓯᑳᑭ.

⁷ ᑖᐱᐢᑯᐨ ᓵᑕᒼ ᒥᓇ ᑲᒫᕒᐊ ᒥᓇ ᐅᑌᓇᐊᐧ ᐁᑯᑕ ᑭᓯᐋᐧᐠ ᑳ ᑭ ᐊᔮᑭ ᐁᑯᓯ ᐃᓯ ᐃᐧᐢᑕᐋᐧᐤ ᐊᓯᒋ ᐅᐦᐃ ᐁ ᑭ ᐸᑭᑎᓂᓱᒋᐠ ᐱᓯᑳᐧᑎᓯᐃᐧᓂᕽ, ᒥᓇ ᐁ ᑭ ᐱᒥᑎᓴᐦᐊᐦᑭᐠ ᐱᑐᓯ ᐃᐧᔮᓯᐃᐧᐃᐧᐣ, ᐅᔭᐢᑌᐊᐧ ᑭᑕ ᒥᐢᑲᐋᐧᓱᒥᑯᔭᕽ ᐁ ᑯᑕᑭᑖᒋᐠ ᑲᑫᐢᑭᒧᐦᐃᑯᐃᐧᓂᕽ ᑳᑭᑫ ᐃᐢᑯᑌᕽ.

⁸ ᐁᔨᐁᐧᕽ ᐁᑯᓯ ᐃᓯ ᐅᑭ ᒥᓇ ᐅ ᐸᐋᐧᒧᐃᐧᓂᐋᐧᕽ ᐃᐧᔨᐱᑖᐊᐧᐠ ᐃᐧᔮᓯᐃᐧᐃᐧᐣ ᒥᓇ ᒫᔦᔨᑕᒪᐧᐠ ᑎᐯᔨᐦᒋᑫᐃᐧᐣ, ᒥᓇ ᐱᐃᐧᑭᓵᐧᑕᒪᐧᐠ ᑭᐦᒑᔨᐃᐧᐃᐧᓇ.

⁹ ᒫᑲ ᒫᐃᑫᓬ ᐊᓇ ᑭᐦᒋ ᐅᑭᓯᑯ, ᐁ ᓇᑳᐢᑲᐋᐧᐟ ᒪᒑᔭ ᑳ ᑭ ᐅᐦᒋᓀᑐᒋᐠ ᒧᓯᓴ ᐃᐧᔭᐃᐧᔨᐤ, ᓇᒪᐃᐧᔭ ᑭ ᐅᔭᓱᐋᐧᑌᐤ ᐱᐃᐧᑭᓵᐧᓯᐁᐧᐃᐧᓂᕽ ᒫᑲ ᑭ ᐃᑌᐤ, ᑳ ᑎᐯᔨᐦᒋᑫᐟ ᑭ ᑲ ᑭᑐᑎᐠ.

¹⁰ ᒫᑲ ᐅᑭ ᐱᐃᐧᑭᓵᐧᑕᒪᐧᐠ ᐱᑯ ᑫᑲᐧᐩ ᐁᑳ ᐁ ᑭᐢᑫᔨᑕᐦᑭᐠ; ᒥᓇ ᐊᓂᐦᐃ ᑳ ᓂᓯᑐᐦᑕᐦᑭᐠ ᐁ ᐃᓯᐃᑯᐃᐧᓯᒋᐠ ᑖᐱᐢᑯᐨ ᐅᓯᐦᒋᑲᓇᐠ ᐁᑳ ᑳ ᐅ ᒥᑐᓀᔨᒋᑲᓀᒋᐠ, ᐁᐊᐧᑯᓂ ᐃᑕ ᑳ ᓂᓯᐊᐧᓈᒋᐦᐅᒋᐠ.

¹¹ ᑯᑕᑭᐦᐃᑯᐃᐧᓯᐊᐧᐠ! ᒋᑫᒫ ᑭ ᐱᒧᐦᑌᐊᐧᐠ ᐅ ᒣᐢᑲᓈᔨᕽ ᑫᓇ, ᒥᓇ ᑳᓴᑳᑎᓯᐃᐧᓂᕽ ᑭ ᐱᒥᑎᓴᐦᐊᒪᐧᐠ ᐅ ᐊᐧᓂᓯᓄᐃᐧᓂᔨᐤ ᐯᓬᐊᒪ ᑭᑕ ᐅᐦᑎᓯᒋᐠ, ᐁᑯᓯ ᑭ ᓂᓯᐊᐧᓈᒋᐦᐅᐊᐧᐠ ᐅᐟ ᐋᓀᐧᑕᒧᐃᐧᓂᔨᕽ ᑳᕒᐊᐊᐧ.

¹² ᐁᐊᐧᑯᓂᐠ ᐅᑭ ᐁᑳ ᐁ ᓄᑯᓯᒋᐠ ᐊᓯᓂᔭᐠ ᑭ ᓵᑭᐦᐃᑐᐃᐧ ᐃᐧᐦᑯᐦᑐᐃᐧᓂᐋᐧᕽ ᐃᐢᐱ ᐃᐧᔨᒋ ᐃᐧᐦᑯᐦᑐᒥᑯᔦᑳᐧᐃᐧ, ᐅᑲᓇᐃᐧᒫᔭᑎᐦᑫᐧᐊᐧᐠ ᐁᑳ ᐁ ᐊᐢᑖᓯᒋᐠ ᐁ ᐊᓴᒥᓱᒋᐠ; ᐊᐧᐢᑯ ᐁᑳ ᓂᐱ ᐁ ᐊᔮᑭ, ᐁ ᐱᒥ ᐁᐧᐸᐢᑕᑭ, ᑕᑳᐧᑭᓄᐃᐧ ᒥᓂᓵᑎᑲᐧᐠ ᐁᑳ ᐁ ᒥᓂᓯᐃᐧᒋᐠ, ᓂᓵᐧᐤ ᐁ ᓂᐳᐋᐧᑎᑯᓯᒋᐠ, ᐁ ᒪᓂᒉᐱᑭᐱᑎᒋᐠ;

¹³ ᐁ ᑯᐢᑖᒥᑲᐧᑭ ᒫᒪᑳᐊᓇᐧ ᑭᐦᒋᑲᒥᕽ, ᐁ ᐸᑭᑕᑖᒧᑐᑕᐦᑭᐠ ᐃᐧᔭᐋᐧᐤ ᐅ ᓇᓀᐯᐃᐧᓯᐃᐧᓂᐋᐧᐤ; ᐁ ᐸᐹᒥᐸᔨᒋᐠ ᐊᒐᐦᑯᓴᐠ, ᐊᓂᑭ ᐁ ᑲᐢᑭᑌᐊᐧᐠ ᐊᐧᓂᑎᐱᐢᑳᐤ ᑳ ᑭ ᐊᐢᑖᐧᐦᒋᐠ ᑳᑭᑫ.

¹⁴ ᐅᑭ ᒫᑲ ᐃᓈᐠ ᒥᓇ, ᐁᐊᐧᑯ ᑌᐸᑯᑊ ᐋᓂᐢᑫ ᐁ ᐊᐢᑯᐋᐧᐟ ᐋᑕᒪ, ᑭ ᑭᐢᑭᐁᐧᐦᐃᑫᐤ ᐁ ᐃᑌᐧᐟ, ᒋᐢᐟ, ᑳ ᑎᐯᔨᐦᒋᑫᐟ ᐯ ᐃᑐᐦᑌᐤ ᑭᑭ ᒥᑖᑕᑖᐧᐤ ᑭᐦᒋ ᒥᑖᑕᐦᑐᒥᑕᓇᐤ ᐅ ᑲᓈᑎᓯᒪ,

¹⁵ ᑭᑕ ᐅᔭᓱᐋᐧᑖᐟ ᑲᐦᑭᔭᐤ ᒥᓇ ᑭᑕ ᑖᐯᐧᒫᐟ ᑲᐦᑭᔭᐤ ᐁᑳ ᑳ ᒪᓂᑐᐋᐧᑎᓯᔨᐟ ᑲᐦᑭᔭᐤ ᐁᑳ ᑳ ᒪᓂᑐᐋᐧᑎᓯᐊᐧᓂᔨᑭ ᐅᐟ ᐃᓯᐦᒋᑫᐃᐧᓂᐋᐧᐊᐧ ᑳ ᑭ ᐊᑐᐢᑳᑕᐦᑭᐠ ᐁᑳ ᐁ ᒪᓂᑐᐋᐧᑎᓯᒋᐠ, ᒥᓇ ᑲᐦᑭᔭᐤ ᑳ ᐋᔨᒪᓂᔨᑭ ᐅ ᐱᑭᐢᑫᐧᐃᐧᓂᔨᐊᐧ ᐁᑳ ᑳ ᒪᓂᑐᐋᐧᑎᓯᔨᐟ ᐅᒪᒑᑎᓯᐊᐧ ᑳ ᑭ ᒫᔨ ᐃᑎᑯᐟ.

¹⁶ ᐁᐊᐧᑯᓂᐠ ᐅᑭ ᐅᓇᔦᑖᐃᐧᐱᑭᐢᑫᐧᐊᐧᐠ, ᐅᒥᑕᐁᐧᑖᑯᓯᐊᐧᐠ, ᐁ ᐱᒧᑖᑐᑕᑭᐠ ᑎᐱᔭᐤ ᐅ ᒪᒋ ᒧᐢᑕᐁᐧᔨᑕᒧᐃᐧᓂᐋᐧᐊᐧ (ᒥᓇ ᐅᑐᓂᐋᐧᕽ ᐅᐦᒋ ᐱᑭᐢᑫᐧᐊᐧᐠ ᒥᓯ ᑲᑭᐦᒋᒧᐃᐧᓇ), ᐁ ᑲᑫᑭᓈᒋᐠ ᐊᔨᓯᔨᓂᐊᐧ ᑭᑕ ᐅᐦᑎᓯᒋᐠ.

¹⁷ ᒫᑲ ᑭᔭᐋᐧᐤ ᓯᔮᑭᐦᐃᑕᑯᐠ, ᑲᓄᑭᐢᑭᓯᐠ ᐃᑌᐧᐃᐧᓇ ᑳ ᑭ ᐃᐧᐦᑕᒥᔨᐟ ᓂᔮᐠ ᐅᐟ ᐊᐹᐢᑎᓬᐃᒪ ᑳ ᑎᐯᔨᒥᑯᔭᕽ ᒋᓴᐢ ᙭;

¹⁸ ᑖᓂᓯ ᑳ ᑭ ᐃᑎᑯᔦᑯᐠ, ᐃᐢᑳᐧᔮᐨ ᐊᑎ ᑳᑭᓯᑳᑭ ᐅᐹᐱᓄᑖᑫᐢᑲᐠ ᑭᑕ ᐃᐦᑖᐊᐧᐠ ᐁ ᐱᒧᑖᑐᑕᑭᐠ ᐃᐧᔭᐋᐧᐤ ᐁᑳ ᐁ ᒪᓂᑐᐋᐧᑕᓂᔨᑭ ᐅ ᒧᐢᑕᐁᐧᔨᑕᒧᐃᐧᓂᐋᐧᐊᐧ.

¹⁹ ᐁᐊᐧᑯᓂᐠ ᐅᑭ ᑳ ᐹᐸᑳᓂᐦᐃᐁᐧᒋᐠ, ᐅᑎᓯᐃᑯᐃᐧᓯᐊᐧᐠ, ᐁᑳ ᐁ ᐊᔮᐋᐧᒋᐠ ᐊᐦᒑᐦᑲᐧ.

²⁰ ᒫᑲ ᑭᔭᐋᐧᐤ ᓯᔮᑭᐦᐃᑕᑯᐠ, ᐁ ᔭᑭᓯᐦᐃᓱᔦᐠ ᐊᔨᐋᐧᐠ ᑳ ᑲᓈᑕᕽ ᑭ ᑖᐯᐧᔦᔨᑕᒧᐃᐧᓂᐋᐧᕽ, ᐁ ᐊᔭᒥᐦᐋᔦᐠ ᑳ ᑲᓈᑎᓯᐟ ᐊᐦᒑᐦᑯᕽ,

²¹ ᑲᓇᐁᐧᔨᒥᓱᐠ ᐅ ᓵᑭᐦᐃᐁᐧᐃᐧᓂᕽ ᑭᓭᒪᓂᑐ, ᐁ ᐊᓴᐋᐧᐸᐦᑕᒣᐠ ᐅ ᑭᓭᐋᐧᑎᓯᐃᐧᐣ ᑳ ᑎᐯᔨᒥᑯᔭᕽ ᒋᓴᐢ ᙭ ᑳᑭᑫ ᐱᒫᑎᓯᐃᐧᓂᕽ.

²² ᐋᑎᐦᐟ ᒫᑲ ᑭᑎᒫᑭᓈᐦᑯᐠ ᐁ ᐊᐧᐋᐧᓀᔨᑕᐦᑭᐠ;

²³ ᐁᑯᓯ ᐋᑎᐦᐟ ᐱᒫᒋᐦᐃᐦᑯᐠ, ᐁ ᓇᐊᐧᒋᐱᑖᔦᑯᐠ ᐃᐢᑯᑌᕽ ᐅᐦᒋ; ᐋᑎᐦᐟ ᒥᓇ ᑭᑎᒫᑭᓈᐦᑯᐠ ᐁ ᐊᐢᑖᓯᔦᐠ; ᐁ ᐸᑳᐧᑕᒣᐠ ᐊᐦᐳ ᑭᑭᐢᑳᒋᑲᐣ ᐃᐧᔮᓯᐃᐧᐃᐧᓂᕽ ᐁ ᐅᐦᒋ ᐃᐧᔨᐱᓈᑲᐧᕽ.

²⁴ ᐁᑲᐧ ᒫᑲ ᐊᓇ ᑳ ᑲᐢᑭᑖᐟ ᑭᑕ ᑲᓇᐁᐧᔨᒥᑯᔦᐠ ᐁᑳ ᑭᑕ ᐸᐦᑭᓯᓂᔦᐠ ᒥᓇ ᑭᑕ ᐅᔭᐦᔨᑯᔦᐠ ᐃᑕ ᐁ ᓄᑲᐧᓂᔨᐠ ᐅ ᑭᐢᑌᔨᑖᑯᓯᐃᐧᐣ ᐁᑳ ᑭᑕ ᐊᑖᒣᔨᑖᑯᓯᔦᐠ ᑭᐦᒋ ᒪᒪᐦᑖᑯᓯᐃᐧᓂᕽ,

²⁵ ᐊᓇ ᐱᑯ ᑭᓭᒪᓂᑐ ᑯᐱᒫᒋᐦᐃᐁᐧᒥᓇᐤ ᐃᐧᔭ ᐅᐦᒋ ᒋᓴᐢ ᙭ ᑳ ᑎᐯᔨᒥᑯᔭᕽ, ᑭᑕ ᐊᔮᐤ ᑭᐢᑌᔨᑖᑯᓯᐃᐧᐣ, ᑭᐦᒑᔨᐃᐧᐃᐧᐣ, ᑎᐯᔨᐦᒋᑫᐃᐧᐣ ᒥᓇ ᑲᐢᑭᐦᐁᐃᐧᓯᐃᐧᐣ, ᒪᐧᔦᐢ ᑫᑲᐧᐩ ᐊᔮᐠ, ᒥᓇ ᐊᓄᐦᐨ ᒣᑳᐧᐨ, ᒥᓇ ᑳᑭᑫ. ᐋᒣᐣ.