James 1 - ᑲᓈᒋ ᑭᐦᒋ ᒪᓯᓈᐦᐃᑲᐣ1 ᒉᒥᐢ ᐅᐟ ᐊᑐᐢᑫᔮᑲᓇ ᑭᓭᒪᓂᑐ ᒥᓇ ᑳ ᑎᐯᔨᐦᒋᑫᐟ ᒋᓴᐢ ᙭, ᐊᓂᑭ ᒥᑖᑕᐟ ᓂᓱᓵᑊ ᑳ ᐃᑕᑐᐢᑳᓀᓯᒋᐠ ᐸᐹᒥ ᑳ ᐊᔮᒋᐠ, ᐁ ᐊᑕᒥᐢᑲᐊᐧᑭᐠ. 2 ᒪᒪᐦᑖᑯᓯᐃᐧᐣ ᐃᑕᑭᑕᒧᐠ ᓂᒋᐋᐧᒥᑎᐠ ᓇᓈᑐᕽ ᑯᑌᔨᒥᑯᐃᐧᓂᕽ ᐁᓯ ᐸᐦᑭᓯᓂᔦᑯ; 3 ᐁ ᑭᐢᑫᔨᑕᒣᐠ ᐅᒪ ᐁ ᑯᑌᔨᑖᑲᐧᕽ ᑭ ᑖᐯᐧᔦᔨᑕᒧᐃᐧᓂᐋᐧᐤ ᐊᑐᐢᑳᑕᒧᒪᑲᐣ ᓯᐯᔨᑕᒧᐃᐧᐣ. 4 ᑭᔮᒼ ᒫᑲ ᓯᐯᔨᑕᒧᐃᐧᐣ ᒥᑐᓂ ᑭᑕ ᐊᑐᐢᑫᒪᑲᐣ ᑭᑕ ᒪᒥᑐᓂ ᐊᔮᔦᐠ ᒥᓇ ᑭᑕ ᑲᑭᓯᔦᐠ ᐁᑳ ᑫᑲᐧᐩ ᐁ ᑭᐧᑕᒫᔦᐠ. 5 ᒫᑲ ᑭᐢᐱᐣ ᐊᐃᐧᔭᐠ ᑭᔭᐋᐧᐤ ᑭᐧᑕᒫᒋ ᐃᔨᓂᓯᐃᐧᐣ ᑭᔮᒼ ᑭᑕ ᓇᑐᑕᒪᐁᐧᐤ ᑭᓭᒪᓂᑐᐊᐧ, ᐊᓇ ᑳ ᐁᐧᔪᒋ ᒥᔮᐟ ᑲᐦᑭᔭᐤ ᐊᐃᐧᔭ ᐁᑳ ᒫᑲ ᐁ ᐋᒋᐢᑕᐁᐧᔨᑕᕽ; ᐁᑯᓯ ᑭᑕ ᒥᔮᐤ. 6 ᒫᑲ ᑭᔮᒼ ᑭᑕ ᓇᑐᑕᒼ ᑖᐯᐧᔦᔨᑕᒧᐃᐧᓂᕽ ᐁᑳ ᐁ ᐊᓯᐁᐧᔨᑕᕽ; ᒋᑫᒫ ᐊᓇ ᑳ ᐊᓯᐁᐧᔨᑕᕽ ᐃᑌᔨᑖᑯᓯᐤ ᑖᐱᐢᑯᐨ ᐁ ᒥᑯᐢᑳᑖᑲᒫᐢᑳᐠ ᑭᐦᒋᑲᒥ ᐁ ᒥᐢᑕᐦᐃ ᔪᑎᕽ ᐁᑯᓯ ᐁ ᒫᒪᑳᐊᕽ. 7 ᒋᑫᒫ ᐁᑳᐃᐧᔭ ᐁᐊᐧᑯ ᐊᔨᓯᔨᓂᐤ ᑭᑕ ᐃᑌᔨᑕᒼ ᓈᐣᑕᐤ ᑫᑲᐧᐩ ᑭᑕ ᒥᔨᑯᐟ ᑳ ᑎᐯᔨᐦᒋᑫᔨᐟ; 8 ᓂᓴᐧᔭᐠ ᑳ ᐃᑌᔨᑕᕽ ᐊᔨᓯᔨᓂᐤ ᓇᒪᐃᐧᔭ ᐋᔮᑌᔨᑖᑯᓯᐤ ᓈᐣᑕᐤ ᐅᐟ ᐃᓯᐦᒋᑫᐃᐧᓂᕽ. 9 ᑭᔮᒼ ᒫᑲ ᐊᓇ ᐅᒋᐋᐧᒥᒫᐤ ᑳ ᑕᐸᑌᔨᑖᑯᓯᐟ ᑭᑕ ᒪᒪᐦᑖᑯᓯᐤ ᐁ ᑭᐢᑌᔨᑖᑯᓯᐟ; 10 ᐁᑯᓯ ᐊᓇ ᑳ ᐁᐧᔪᑎᓯᐟ ᐊᓂᒪ ᐁ ᑕᐸᑌᔨᑖᑯᐦᐃᐦᐟ; ᒋᑫᒫ ᑖᐱᐢᑯᐨ ᐋᐧᐱᑲᐧᓂᔭ ᒪᐢᑯᓯᕽ ᐁᑯᓯ ᑫ ᐃᓯ ᐳᓂ ᐃᑖᐟ. 11 ᒋᑫᒫ ᐱᓯᒼ ᐃᐢᐱᒥᕽ ᐁ ᐊᑎ ᐃᑖᐟ ᐊᓯᒋ ᐁ ᑭᓴᑖᒧᑌᐠ ᐁ ᔪᑎᕽ ᐊᑎ ᓂᐳᐃᐧ ᐊᔮᐤ ᒪᐢᑯᓯ; ᐁᑯᓯ ᐁ ᐋᐧᐱᑲᐧᓂᐊᐧᕽ ᐸᑭᐦᑎᐣ ᒥᓇ ᐁ ᐃᓯ ᑲᑕᐊᐧᓯᓯᐠ ᓂᓯᐊᐧᓈᑕᐣ; ᐁᑯᓯ ᐃᓯ ᒥᓇ ᑳ ᐁᐧᔪᑎᓯᐟ ᓈᐯᐤ ᑫ ᐃᓯ ᐊᑎ ᐳᓂ ᐃᑖᐟ ᐅᐟ ᐃᓯᐦᒋᑫᐃᐧᓂᕽ. 12 ᓴᐁᐧᔨᑖᑯᓯᐤ ᐊᓇ ᐊᔨᓯᔨᓂᐤ ᑳ ᓯᐯᔨᑕᕽ ᑯᑌᔨᒥᑯᐃᐧᐣ; ᒋᑫᒫ ᐃᐢᐱ ᑭ ᑯᑌᔨᒥᐦᒋ ᑭᑕ ᒥᔮᐤ ᐱᒫᑎᓯᐃᐧᓂ ᑭᐦᒋ ᐅᑭᒫᐊᐧᐢᑐᑎᐣ, ᑳ ᑎᐯᔨᐦᒋᑫᐟ ᑳ ᑭ ᐊᓱᑕᒪᐋᐧᐟ ᐊᓂᐦᐃ ᑳ ᓵᑭᐦᐃᑯᐟ. 13 ᐁᑳᐃᐧᔭ ᐊᐃᐧᔭ ᐊᔨᓯᔨᓂᐤ ᐃᐢᐱ ᐁ ᑯᑌᔨᒥᐦᐟ ᑭᑕ ᐃᑌᐧᐤ ᑭᓭᒪᓂᑐ ᓂ ᑯᑌᔨᒥᐠ; ᒋᑫᒫ ᓇᒪᐃᐧᔭ ᑭᓭᒪᓂᑐ ᑭᑕ ᑭ ᑯᑌᔨᒥᐁᐧᐟ ᒪᒋ ᑭᑲᐧᔭ ᐃᐧᔭ ᐅᐦᒋ, ᐁᑯᓯ ᐃᐧᔭ ᓇᒪᐃᐧᑳᐨ ᐊᐃᐧᔭ ᑯᑌᔨᒣᐤ; 14 ᒫᑲ ᑲᐦᑭᔭᐤ ᐊᔨᓯᔨᓂᐤ ᑯᑌᔨᒥᑯᐃᐧᓯᐤ ᑭᐢᐱᐣ ᐃᐧᔭ ᐅ ᒪᒋ ᒧᐢᑕᐁᐧᔨᑕᒧᐃᐧᐣ ᐁ ᐁᐧᐱᐃᑯᐟ ᐁᑯᓯ ᐁ ᓯᐦᑭᐃᐧᔨᑯᐟ. 15 ᐁᑲᐧ ᒫᑲ ᒪᒋ ᒧᐢᑕᐁᐧᔨᑕᒧᐃᐧᐣ ᑭᐢᐱᐣ ᐁ ᑭᑭᐢᑲᒧᒪᑲᕽ ᓂᐦᑖᐃᐧᑭᑖᒪᑲᐣ ᒪᒋᑎᐃᐧᐣ; ᐊᓂᒪ ᒫᑲ ᒪᒋᑎᐃᐧᐣ ᐁ ᑭᓯᓂᑖᐃᐧᑭᕽ ᓂᐦᑖᐃᐧᑭᑖᒪᑲᐣ ᓂᐳᐃᐧᐣ. 16 ᐁᑳᐃᐧᔭ ᑭ ᑲ ᐃᐧ ᐊᐧᔦᓯᐃᑲᐃᐧᓈᐋᐧᐤ ᑳ ᓵᑭᐦᐃᑕᑯᐠ ᓂᒋᐋᐧᒥᑎᐠ. 17 ᑲᐦᑭᔭᐤ ᒥᔪ ᒣᑭᐃᐧᐣ ᒥᓇ ᐁ ᒪᒥᑐᓂᒋᑳᑌᐠ ᒣᑭᐃᐧᐣ ᐃᐢᐱᒥᕽ ᐅᐦᒋᐸᔨᐤ ᐁ ᐯ ᔮᓯᑎᓴᐊᕽ ᐊᓇ ᑳ ᐅᑖᐃᐧᐢᑲᕽ ᐋᐧᐢᑌᐊᐧ, ᐊᓇ ᐁᑳ ᑳ ᑭᑭᐢᑳᑯᐟ ᐱᑐᐢ ᐃᓯ ᐊᔮᐃᐧᐣ ᐊᐦᐳ ᐁ ᒋᑳᐢᑌᑎᕽ ᑫᐧᐢᑭᐃᐧᐣ. 18 ᐃᐧᔭ ᐅᐟ ᐃᑌᔨᑕᒧᐃᐧᐣ ᐅᐦᒋ ᑭ ᑭ ᓂᐦᑖᐃᐧᑭᐃᑯᓇᐤ ᑖᐯᐧᐃᐧᓂ ᐃᑌᐧᐃᐧᐣ ᐅᐦᒋ ᑭᔮᓇᐤ ᑭᑕ ᐃᓯ ᐊᔮᔭᕽ ᑖᐱᐢᑯᐨ ᓂᐢᑕᒼ ᐁ ᒥᓂᓯᐃᐧᔨᐟ ᐅᓯᐦᒋᑲᓇ. 19 ᐅᒪ ᑭ ᑭᐢᑫᔨᑌᓈᐋᐧᐤ ᑳ ᓵᑭᐦᐃᑕᑯᐠ ᓂᒋᐋᐧᒥᑎᐠ. ᒫᑲ ᑭᔮᒼ ᑲᐦᑭᔭᐤ ᐊᔨᓯᔨᓂᐤ ᑭᑕ ᑭᓯᐢᑳᔦᔨᑕᒼ ᑭᑕ ᓇᑐᐦᑕᕽ, ᑭᑕ ᐯᑭᑳᑎᓯᐤ ᑭᑕ ᐱᑭᐢᑫᐧᐟ, ᑭᑕ ᐯᑭᑳᑎᓯᐤ ᑭᑕ ᑭᓯᐋᐧᓯᐟ; 20 ᒋᑫᒫ ᐅ ᑭᓯᐋᐧᓯᐃᐧᐣ ᐊᔨᓯᔨᓂᐤ ᓇᒪᐃᐧᔭ ᐊᑐᐢᑳᑕᒧᒪᑲᓂᔨᐤ ᐅ ᑲᐧᔭᐢᑭᑖᑎᓯᐃᐧᐣ ᑭᓭᒪᓂᑐ. 21 ᐁᑯᓯ ᒫᑲ ᐅᐦᐱᒣ ᐁ ᐊᐢᑖᔦᐠ ᑲᐦᑭᔭᐤ ᑳ ᐃᐧᓀᔨᑖᑲᐧᕽ ᒥᓇ ᑳ ᐊᔨᐋᐧᑫᔨᑖᑲᐧᕽ ᒪᒋᑎᐃᐧᐣ, ᐅᑎᓇᒧᐠ ᔪᐢᑳᑎᓯᐃᐧᓂᕽ ᐊᓂᒪ ᑳ ᓂᐦᑖᐃᐧᑭᕽ ᐃᑌᐧᐃᐧᐣ ᐊᓂᒪ ᑫ ᑭ ᐱᒫᒋᐃᑯᔦᐠ ᑭᐟ ᐊᐦᒑᐦᑯᐋᐧᕽ. 22 ᒫᑲ ᐃᑐᑕᒧᐠ ᐃᑌᐧᐃᐧᐣ ᐁᑳᐃᐧᔭ ᐱᑯ ᓇᑐᐦᑕᒧᐠ ᐁ ᐊᐧᔦᓯᐦᐃᓱᔦᐠ. 23 ᒋᑫᒫ ᑭᐢᐱᐣ ᐊᐃᐧᔭᐠ ᓇᑐᐦᑕᐦᑭ ᐃᑌᐧᐃᐧᐣ ᐁᑳ ᒫᑲ ᐃᑐᑕᐦᑭ ᐃᓯᓈᑯᒋᑫᐤ ᑖᐱᐢᑯᐨ ᐊᔨᓯᔨᓂᐤ ᐁ ᑲᓇᐋᐧᐸᒥᓱᐟ ᐅᑳᐧᑲᓂᕽ ᐋᐧᐸᒧᓂᕽ; 24 ᒋᑫᒫ ᑲᓄᐋᐧᐸᒥᓱ ᐁᑯᓯ ᓯᐯᐧᑌᐤ ᓭᒫᐠ ᐊᐧᓂᑭᐢᑭᓯᐤ ᑖᓂᓯ ᑳ ᐃᓯᓈᑯᓯᐟ. 25 ᒫᑲ ᐊᓇ ᑳ ᑲᓇᐋᐧᐸᐦᑕᕽ ᑳ ᒪᒥᑐᓂᒪᑲᕽ ᐅᔭᓱᐁᐧᐃᐧᐣ, ᐊᓂᒪ ᑎᐯᔨᒥᓱᐃᐧ ᐅᔭᓱᐁᐧᐃᐧᐣ, ᐁᑯᓯ ᒫᑲ ᐃᓯ ᐱᒥᑎᓴᐦᐊᑭ ᐁᐊᐧᑯ ᑳ ᓇᑐᐦᑕᐦᑭ ᐁᑳ ᑳ ᐊᐧᓂᑭᐢᑭᓯᐟ ᒫᑲ ᐁ ᐃᑐᑕᕽ ᐊᑐᐢᑫᐃᐧᓂᕽ, ᐁᐊᐧᑯ ᐊᐊᐧ ᐊᔨᓯᔨᓂᐤ ᑭᑕ ᒥᔭᐧᑭᒫᐤ ᐅᐟ ᐃᑐᑕᒧᐃᐧᓂᕽ. 26 ᑭᐢᐱᐣ ᐊᐃᐧᔭᐠ ᐊᔨᓯᔨᓂᐤ ᓂᐟ ᐊᔭᒥᐦᐋᐋᐧᑎᓯᐣ ᐃᑌᔨᑕᑭ ᐁᑯᓯ ᐁᑳ ᐁ ᑭᑌᔨᑕᕽ ᐅᑌᔭᓂ ᒫᑲ ᐁ ᑲᔦᓯᑖᐟ ᐅᑌᐦ ᐊᐊᐧ ᐊᔨᓯᔨᓂᐤ ᐅᐟ ᐊᔭᒥᐦᐋᐃᐧᐣ ᐱᑯᓇᑕ ᐃᑌᔨᑖᑲᐧᓂᔨᐤ. 27 ᐁ ᐯᑲᕽ ᐊᔭᒥᐦᐋᐃᐧᐣ ᒥᓇ ᐁᑳ ᐁ ᐃᐧᔨᐱᑖᕽ ᐁ ᐃᓯ ᑭᑖᐸᑕᕽ ᑭ ᑭᓭᒪᓂᑐᒥᓇᐤ ᒥᓇ ᑯᑖᐃᐧᓇᐤ ᐁᐊᐧᑯᒪ, ᑭᑕ ᑭᐅᑳᐦᒋᐠ ᑳ ᑭᐋᐧᑎᓯᒋᐠ ᒥᓇ ᓯᑳᐃᐧᐢᑫᐧᐊᐧᐠ ᐅᐟ ᐊᔨᒥᓯᐃᐧᓂᐋᐧᕽ ᒥᓇ ᑭᑕ ᑲᓇᐁᐧᔨᒥᓱᕽ ᐁᑳ ᑭᑕ ᐃᐧᔨᐱᐃᐁᐧᐠ ᐊᐢᑭ. |
This Bible text is a corrected edition of the 1908 Western Cree Bible; it is in the public domain.
Canadian Bible Society