ᐁᐢᕒᐊ 1 - ᑲᓈᒋ ᑭᐦᒋ ᒪᓯᓈᐦᐃᑲᐣ1 ᐁᑲᐧ ᒫᑲ ᓂᐢᑕᒼ ᐁ ᐊᐢᑭᐊᐧᕽ ᐁ ᐊᔮᐟ ᓴᐃᕒᐊᐢ ᐸᕒᓯᔭ ᑭᐦᒋ ᐅᑭᒫᐤ, ᐅᐟ ᐃᑌᐧᐃᐧᐣ ᑳ ᑎᐯᔨᐦᒋᑫᐟ ᑳ ᑭ ᐃᑌᐧᐦᐋᐟ ᒉᕒᐃᒫᔭᐊᐧ ᑭᑕ ᑎᐱᐸᔨᑭ, ᑳ ᑎᐯᔨᐦᒋᑫᐟ ᑭ ᐋᑲᒣᔨᑕᒥᐁᐤ ᓴᐃᕒᐊᓴ ᐸᕒᓯᔭ ᑭᐦᒋ ᐅᑭᒫᐊᐧ, ᐁᑯᓯ ᑭ ᑌᐹᐧᑕᒼ ᒥᓯᐁᐧ ᐅ ᑭᐦᒋ ᐅᑭᒫᐃᐧᐃᐧᓂᕽ ᒥᓇ ᑭ ᐊᐢᑖᐤ ᒪᓯᓇᐦᐃᑲᓂᕽ ᐁ ᐃᑌᐧᐟ, 2 ᐅᒥᓯ ᐃᑌᐧᐤ ᓴᐃᕒᐊᐢ ᐸᕒᓯᔭ ᑭᐦᒋ ᐅᑭᒫᐤ, ᑲᐦᑭᔭᐤ ᑭᐦᒋ ᐅᑭᒫᐃᐧᐃᐧᓇ ᐊᐢᑭᕽ ᑳ ᑎᐯᔨᐦᒋᑫᐟ, ᑳ ᑭᓭᒪᓂᑐᐃᐧᐟ ᑭᐦᒋᑭᓯᑯᕽ, ᓂ ᑭ ᒥᔨᐠ; ᓂ ᑭ ᐊᔮᑳᐧᒥᒥᐠ ᒫᑲ ᑭᑕ ᐋᐧᐢᑳᐦᐃᑲᓂᑲᐊᐧᐠ ᒉᕒᐅᓴᓬᐊᒥᕽ, ᒍᑕᐃᕽ ᑳ ᐊᔭᐠ. 3 ᐱᑯ ᐊᐃᐧᔭᐠ ᒫᑲ ᑭᔭᐋᐧᐤ ᐅᐦᒋ ᑲᐦᑭᔭᐤ ᐅᐟ ᐊᔨᓯᔨᓂᒪ, ᐅ ᑭᓭᒪᓂᑐᒪ ᑭᑕ ᐃᐧ ᐃᐧᒉᐃᐧᐠ, ᑭᔮᒼ ᒫᑲ ᑭᑕ ᐃᑐᐦᑌᐤ ᒉᕒᐅᓴᓬᐊᒥᕽ, ᒍᑕᐃᕽ ᑳ ᐊᔮᐠ, ᒥᓇ ᑭᑕ ᐅᓯᐦᑖᐤ ᐅ ᐋᐧᐢᑳᐦᐃᑲᓂᔨᐤ ᑳ ᑎᐯᔨᐦᒋᑫᔨᐟ ᐅ ᑭᓭᒪᓂᑐᒪ ᐃᐢᕒᐁᐃᓬ, (ᐁᐊᐧᑯ ᑭᓭᒪᓂᑐ), ᒉᕒᐅᓴᓬᐊᒥᕽ ᑳ ᐊᔮᐠ. 4 ᐱᑯ ᐊᐃᐧᔭᐠ ᒫᑲ ᐁᔮᑫᐧ ᓈᐣᑕᐤ ᐃᑕ ᐁ ᐊᔭᔮᐟ, ᑭᔮᒼ ᐊᔨᓯᔨᓂᐊᐧ ᐁᑯᑕ ᑳ ᐃᐧᒋᐊᔮᒫᐟ ᑭᑕ ᐃᐧᒋᐦᐃᐠ ᐋᐧᐱᐢᑭᓱᓂᔮᐊᐧ ᐅᐦᒋ, ᒥᓇ ᐅᓴᐃᐧᓱᓂᔮᐊᐧ, ᒥᓇ ᐊᔪᐃᐧᓂᓴ, ᒥᓇ ᐱᓯᐢᑭᐊᐧ, ᐋᑕᐃᐧᔭ ᒥᓇ ᐊᓂᒪ ᑌᐯᔨᒧᐃᐧ ᐸᑭᑎᓈᓱᐃᐧᐣ ᐅ ᐋᐧᐢᑳᐦᐃᑲᐣ ᑭᓭᒪᓂᑐ ᐅᐦᒋ ᒉᕒᐅᓴᓬᐊᒥᕽ ᑳ ᐊᔮᐠ. 5 ᐁᑲᐧ ᑭ ᐸᓯᑯᐊᐧᐠ ᑳ ᓂᑳᓀᔨᑖᑯᓯᒋᐠ ᐅᑕᐃᐧᒫᐊᐧᐠ ᒍᑕ ᒥᓇ ᐯᐣᒋᒪᐣ, ᒥᓇ ᐊᔭᒥᐦᐁᐃᐧᔨᓂᐊᐧᐠ, ᒥᓇ ᓬᐃᐸᐃᑕᐠ, ᑲᐦᑭᔭᐤ ᐅᑎ ᐅᐟ ᐊᐦᒑᐦᑯᐋᐧᕽ ᑭᓭᒪᓂᑐᐊᐧ ᑳ ᐋᑲᒣᔨᑕᒥᐦᐃᑯᒋᐠ ᑭᑕ ᓇᑕᐃᐧ ᐅᓯᐦᑖᒋᐠ ᐅ ᐋᐧᐢᑳᐦᐃᑲᓂᔨᐤ ᑳ ᑎᐯᔨᐦᒋᑫᔨᐟ ᑳ ᐊᔮᔨᐠ ᒉᕒᐅᓴᓬᐊᒥᕽ. 6 ᑲᐦᑭᔭᐤ ᒫᑲ ᐊᐧᐢᑳ ᑳ ᐊᔭᔨᐟ ᑭ ᒪᐢᑲᐃᐧᓂᐢᑫᐃᑲᐧᐠ ᐁ ᒥᔨᑯᒋᐠ ᐋᐧᐱᐢᑭᓱᓂᔮᐤ ᐊᓯᐊᐧᒋᑲᓇ, ᐅᓵᐃᐧᓱᓂᔮᐊᐧ, ᐊᔪᐃᐧᓂᓴ, ᒥᓇ ᐱᓯᐢᑭᐊᐧ, ᒥᓇ ᑳ ᒥᔮᐧᓯᑭ ᑫᑲᐧᔭ, ᐋᑕᐃᐧᔭ ᒥᓇ ᑳ ᒧᐦᒋ ᐸᑭᑎᓂᑳᑌᔨᑭ. 7 ᐁᑯᓯ ᒥᓇ ᓴᐃᕒᐊᐢ ᑭᐦᒋ ᐅᑭᒫᐤ ᑭ ᐯᑖᐤ ᐊᓯᐊᐧᒋᑲᓇ ᐅ ᐋᐧᐢᑳᐦᐃᑲᓂᔨᕽ ᑳ ᑎᐯᔨᐦᒋᑫᐟ ᑳ ᑭ ᐊᔮᑭ, ᐊᓂᐦᐃ ᓀᑊᔪᑳᐟᓀᓴᕒ ᒉᕒᐅᓴᓬᐊᒥᕽ ᑳ ᑭ ᐯ ᐅᐦᑐᑕᑖᐟ, ᒥᓇ ᑳ ᑭ ᐊᐢᑖᐟ ᐅ ᐋᐧᐢᑳᐦᐃᑲᓂᔨᕽ ᐅ ᒪᓂᑐᒪ; 8 ᐁᐊᐧᑯᓂ ᐅᐦᐃ ᓴᐃᕒᐊᐢ ᐸᕒᓯᔭ ᑭᐦᒋ ᐅᑭᒫᐤ ᑭ ᐯ ᐊᐧᔭᐃᐧᑕᑖᐤ ᐅᒋᐦᒋᔨᕽ ᐅᐦᒋ ᒥᑕᕒᐃᑖᐦᐟ ᐅᑲᓇᐃᐧᓱᓂᔮᐁᐧᐊᐧ, ᒥᓇ ᑭ ᐊᑭᐦᑕᒪᐁᐧᐤ ᓭᐢᐹᓴᕒᐊ ᑳ ᐅᑭᒫᑲᑕᐋᐧᔨᐟ ᒍᑕᐊᐧ. 9 ᐁᑯ ᑕᐦᑐ ᒫᑲ ᐅᒪ; ᓂᐢᑐᒥᑕᓇᐤ ᐅᓴᐃᐧᓱᓂᔮᐤ ᐅᔮᑲᓇ, ᑭᐦᒋ ᒥᑖᑕᐦᑐᒥᑕᓇᐤ ᐋᐧᐱᐢᑭᓱᓂᔮᐤ ᐅᔮᑲᓇ, ᑫᑳᐟ ᓂᐢᑐᒥᑕᓇᐤ ᒧᑯᒫᓇ; 10 ᓂᐢᑐᒥᑕᓇᐤ ᐅᓵᐃᐧᓱᓂᔮᐤ ᒥᓂᑳᐧᑲᓇ, ᐋᐧᐱᐢᑭᓱᓂᔮᐤ ᒥᓂᑳᐧᑲᓇ ᓄᐦᑕᐤ ᑳ ᐃᓯ ᐊᔮᑭ ᓀᐋᐧᐤ ᒥᑖᑕᐦᑐᒥᑕᓇᐤ ᒥᑖᑕᐦᐟ ᐊᔨᐋᐧᐠ, ᐁᑯᓯ ᑯᑕᑲ ᐊᓯᐊᐧᒋᑲᓇ ᑭᐦᒋ ᒥᑖᑕᐦᑐᒥᑕᓇᐤ. 11 ᑲᐦᑭᔭᐤ ᐅᓵᐃᐧᓱᓂᔮᐤ ᒥᓇ ᐋᐧᐱᐢᑭᓱᓂᔮᐤ ᐊᓯᐊᐧᒋᑲᓇ ᓂᔮᓇᓈᐧᐤ ᑭᐦᒋ ᒥᑖᑕᐦᑐᒥᑕᓇᐤ ᓀᐋᐧᐤ ᒥᑖᑕᐦᑐᒥᑕᓇᐤ ᐊᔨᐋᐧᐠ. ᑲᐦᑭᔭᐤ ᐅᐦᐃ ᓭᐢᐹᓴᕒ ᑭ ᐯᑕᐤ, ᐃᐢᐱ ᐊᓂᑭ ᑳ ᑭ ᒪᓇᐊᐧᑳᑎᐦᒋᐠ ᑳ ᐯ ᑭᐁᐧᒋᐠ ᒉᕒᐅᓴᓬᐊᒥᕽ ᐹᐱᓬᐊᓂᕽ ᐅᐦᒋ. |
This Bible text is a corrected edition of the 1908 Western Cree Bible; it is in the public domain.
Canadian Bible Society