ēstar 1 - ᑲᓈᒋ ᑭᐦᒋ ᒪᓯᓈᐦᐃᑲᐣ

¹ ᑭ ᐊᔨᐢᐸᔨᐤ ᒫᑲ ᒣᑳᐧᐨ ᐁᐦᐋᐢᔪᐃᕒᐊᐢ ᑳ ᑎᐯᔨᐦᑕᕽ (ᐁᐊᐧᑯ ᐊᐊᐧ ᐁᐦᐋᐢᔪᐃᕒᐊᐢ ᑳ ᑭ ᑭᐦᒋ ᐅᑭᒫᐃᐧᐟ, ᐃᐣᑎᔭ ᐅᐦᒋ ᐃᐦᑎᔮᐱᔭ ᐃᐢᑯ, ᐁ ᑎᐯᔨᐦᑕᕽ ᒥᑖᑕᐦᑐᒥᑕᓇᐤ ᐊᔨᐋᐧᐠ ᓂᓯᑕᓇᐤ ᑌᐸᑯᓵᑊ ᐁ ᐸᐯᐢᑭᑕᑭᑌᐠ ᐊᐢᑭ);

² ᐁᐊᐧᑳᓂᒪ ᐁ ᑲᑭᓯᑳᐠ, ᑭᐦᒋ ᐅᑭᒫᐤ ᐁᐦᐋᐢᔪᐃᕒᐊᐢ ᐁ ᐊᐱᐟ ᑭᐦᒋ ᐅᑭᒫᐊᐧᐱᐃᐧᓂᕽ ᐅ ᑭᐦᒋ ᐅᑭᒫᐃᐧᐃᐧᓂᕽ, ᐁᑯᑕ ᓱᓵᐣ ᑭᐦᒋ ᐅᑭᒫᐃᐧᑲᒥᑯᕽ,

³ ᓂᐢᑐ ᐊᐢᑭ ᐊᑎ ᐁ ᑭᐦᒋᐅᑭᒪᐃᐧᐟ, ᑭ ᐃᐧᐦᑯᒣᐤ ᑲᐦᑭᔭᐤ ᐅᑭᒫᒪ ᒥᓇ ᐅᐟ ᐊᑐᐢᑫᔮᑲᓇ; ᑳ ᓱᑫᔨᑖᑯᓯᒋᐠ ᐸᕒᓯᔭᐃᕽ ᒥᓇ ᒥᑎᔭᐃᕽ, ᑳ ᑭᐢᑌᔨᑖᑯᓯᒋᐠ ᒥᓇ ᑳ ᐅᑭᒫᑲᑕᑭᐠ ᐁ ᐸᐯᐢᑭᑕᑭᑌᐠ ᐊᐢᑭ, ᐁ ᐋᐧᐸᒫᐟ;

⁴ ᐁᑯᐢᐱ ᑭ ᓄᑯᑖᐤ ᐁᓯ ᐁᐧᔪᑕᓂᔨᐠ ᐅ ᑭᐦᒋᑎᐯᔨᐦᒋᑫᐃᐧᐣ, ᒥᓇ ᐁ ᐃᓯ ᑭᐢᑌᔨᑖᑲᐧᓂᔨᐠ ᐅ ᑭᐦᒋ ᐅᑭᒫᐃᐧᐃᐧᐣ ᒥᐦᒉᑐᑭᓯᑳᐤ, ᒥᑖᑕᐦᑐᒥᑕᓇᐤ ᐊᔨᓈᓀᒥᑕᓇᐤ ᐊᔨᐋᐧᐠ ᑕᐦᑐ ᑭᓯᑳᐤ.

⁵ ᐃᐢᐱ ᒫᑲ ᐁᐊᐧᑯᓂᐃ ᑭᓯᑳᐊᐧ ᐁ ᑎᐱᐸᔨᑭ, ᑭᐦᒋ ᐅᑭᒫᐤ ᑭ ᐃᐧᐦᑯᒣᐤ ᑲᐦᑭᔭᐤ ᐊᔨᓯᔨᓂᐊᐧ ᑳ ᐊᔮᔨᐟ ᐁᑯᑕ ᓱᓵᓂᕽ ᑭᐦᒋ ᐅᑭᒫᐃᐧᑲᒥᑯᕽ, ᑳ ᑭᐦᒉᔨᑖᑯᓯᔨᐠ ᒥᓇ ᑳ ᐊᐱᐢᑌᔨᑖᑯᓯᔨᐟ, ᑌᐸᑯᑊ ᑭᓯᑳᐤ, ᐱᐦᒋ ᐋᐧᐢᑳᐦᐃᑲᐃᐧᓂᕽ ᑭᐢᑎᑳᓂᕽ ᑭᐦᒋ ᐅᑭᒫᐃᐧᑲᒥᑯᕽ;

⁶ ᑭ ᐊᔭᑯᑌᐤ ᐋᐧᐱᐢᑫᑭᐣ ᒥᓇ ᐊᐢᑭᑕᑫᐧᑭᐣ, ᒥᓇ ᒋᐯᑕᑫᐧᑭᐣ, ᑳ ᒥᔮᐧᓯᐠ ᐋᐧᐱᐢᑫᑭᐣ ᒥᓇ ᒋᐯᑕᑫᐧᑭᐣ ᐁ ᐱᒪᐢᑌᐃᑳᑌᐠ ᐁᐊᐧᑯ ᐁ ᐅᐦᒋ ᓴᑲᐱᑌᐠ ᐋᐧᐱᐢᑭᓱᓂᔮᐃᐧ ᓵᐳᑕᐁᐧᔮᐱᐢᑯᕽ ᒥᓇ ᒪᐢᑲᐊᐧᓯᓂᐃᐧ ᒋᒪᒋᑲᓂᕽ; ᐊᐱᐃᐧᓇ ᑭ ᐅᓵᐃᐧᓱᓂᔮᐊᐧᓇᐧ ᒥᓇ ᐋᐧᐱᐢᑭᓱᓂᔮᐤ, ᐊᓈᐢᑲᓂᕽ ᐁ ᒥᐦᑯᓯᐟ, ᒥᓇ ᐁ ᐋᐧᐱᐢᑭᓯᐟ, ᒥᓇ ᐁ ᐅᓵᐃᐧᓯᐟ, ᒥᓇ ᐁ ᑲᐢᑭᑌᓯᐟ ᒪᐢᑲᐊᐧᓯᓂ.

⁷ ᑭ ᒥᓇᐁᐊᐧᐠ ᒫᑲ ᐅᓵᐃᐧᓱᓂᔮᐃᐧ ᒥᓂᑳᐧᑲᓂᕽ (ᐊᓂᐦᐃ ᒥᓂᑳᐧᑲᓇ ᐁ ᐸᐱᑐᓯᓈᑲᐧᑭ), ᐁᑯᓯ ᑭᐦᒋ ᐅᑭᒫᐃᐧ ᓱᒥᓈᐳ ᒥᓴᑲᒥᐠ, ᐁ ᐃᓯ ᐁᐧᔪᒋᐦᑖᐟ ᑭᐦᒋ ᐅᑭᒫᐤ.

⁸ ᑭ ᒥᓂᑳᐧᓂᐊᐧᐣ ᒫᑲ ᐁ ᐃᑕᐢᑌᐠ ᐅᔭᓱᐁᐧᐃᐧᐣ; ᓇᒪᐃᐧᔭ ᐊᐃᐧᔭᐠ ᐊᔨᓵᐨ; ᒋᑫᒫ ᐁᑯᓯ ᑭᐦᒋ ᐅᑭᒫᐤ ᑳ ᐃᑕᓱᐋᐧᑖᐟ ᑲᐦᑭᔭᐤ ᑳ ᐸᒥᐦᐃᐁᐧᔨᐟ ᐅ ᐋᐧᐢᑲᐦᐃᑲᓂᕽ, ᑭᑕ ᐃᑐᑕᐦᑭᐠ ᑲᐦᑭᔭᐤ ᐊᐃᐧᔭ ᐁ ᐃᓯ ᓇᑕᐁᐧᔨᑕᒥᔨᐟ.

⁹ ᐁᑯᓯ ᒥᓇ ᐹᐢᑕᐩ ᑭᐦᒋ ᐅᑭᒫᐢᑫᐧᐤ ᑭ ᐃᐧᐦᑯᒣᐤ ᐃᐢᑫᐧᐊᐧ ᑭᐦᒋ ᐅᑭᒫᐃᐧᑲᒥᑯᕽ ᑳ ᐊᔮᔨᐟ ᑭᐦᒋ ᐅᑭᒫᐊᐧ ᐁᐦᐋᐢᔪᐃᕒᐊᐢ.

¹⁰ ᑌᐸᑯᑊ ᐁ ᐊᑎ ᑕᐦᑐᑭᓯᑳᐠ, ᐁ ᒥᔭᐋᐧᑎᑯᑌᐦᐁᐟ ᑭᐦᒋ ᐅᑭᒫᐤ ᓱᒥᓈᐳ ᐅᐦᒋ, ᑭ ᐃᑕᓱᐋᐧᑌᐤ ᒥᐦᐊᒫᐣ, ᐱᐢᑕ, ᐦᐋᕒᐹᓇ, ᐱᐠᑕ, ᒥᓇ ᐋᐹᐠᑕ, ᓯᐦᑖᕒ, ᒥᓇ ᑳᕒᑳᐢ, ᐊᓂᐦᐃ ᑌᐸᑯᑊ ᓂᐯᐃᐧᓂᑲᒥᑯᐃᐧᔨᓂᐊᐧ ᑳ ᐸᒥᐦᐃᑯᐟ ᐁᐦᐋᐢᔪᐃᕒᐊᐢ ᑭᐦᒋ ᐅᑭᒫᐤ,

¹¹ ᑭᑕ ᐯᓯᐋᐧᔨᐟ ᐹᐢᑕᐩ ᑭᐦᒋ ᐅᑭᒫᐢᑫᐧᐊᐧ ᐅᐦᑎᐢᑲᐤ ᑭᐦᒋ ᐅᑭᒫᐊᐧ, ᐁ ᑭᑭᐢᑲᒥᔨᐟ ᑭᐦᒋ ᐅᑭᒫᐢᑫᐧᐊᐧᐢᑐᑎᐣ, ᑭᑕ ᐋᐧᐸᐦᑕᐋᐟ ᐊᔨᓯᔨᓂᐊᐧ ᒥᓇ ᐅᑭᒫᐊᐧ ᐁ ᐃᓯ ᑲᑕᐊᐧᓯᓯᔨᐟ; ᒋᑫᒫ ᑭ ᒥᔪᓈᑯᓯᐤ.

¹² ᒫᑲ ᑭᐦᒋ ᐅᑭᒫᐢᑫᐧᐤ ᐹᐢᑕᐩ ᑭ ᐋᓀᐧᑕᒼ ᑭᑕ ᐯ ᐃᑐᐦᑌᐟ ᑭᐦᒋ ᐅᑭᒫᐊᐧ ᐁ ᓇᑐᒥᑯᐟ ᐊᓂᐦᐃ ᓂᐯᐃᐧᓂᑲᒥᑯᐃᐧᔨᓂᐊᐧ ᐅᐦᒋ; ᐁᐊᐧᑯ ᐅᐦᒋ ᑭ ᒥᐢᑕᐦᐃ ᑭᓯᐋᐧᓯᐤ ᑭᐦᒋ ᐅᑭᒫᐤ, ᒥᓇ ᐅ ᑭᓯᐋᐧᓯᐃᐧᐣ ᑭ ᐸᓯᔭᐁᐧᐢᑳᐠ.

¹³ ᐁᑲᐧ ᑭᐦᒋ ᐅᑭᒫᐤ ᑭ ᐃᑌᐤ ᑳ ᐃᔨᓂᓯᔨᐟ ᐊᔨᓯᔨᓂᐊᐧ, ᑳ ᑭᐢᑫᔨᑕᒥᔨᐟ ᐁ ᐋᔨᐢᐸᔨᔨᐠ (ᒋᑫᒫ ᐁᑯᓯ ᑭᐦᒋ ᐅᑭᒫᐤ ᑳ ᐊᔨᑐᑕᐋᐧᐟ ᑲᐦᑭᔭᐤ ᑳ ᑭᐢᑫᔨᑕᒥᔨᐟ ᐅᔭᓱᐁᐧᐃᐧᐣ ᒥᓇ ᐅᔭᓱᐋᐧᓯᐁᐧᐃᐧᐣ;

¹⁴ ᐊᓂᐦᐃ ᒫᑲ ᑳ ᐊᐢᑯᐃᐧᐢᑳᑯᐟ ᐁᐊᐧᑯᓂ ᑳᕒᓯᓇ, ᓯᐦᑖᕒ, ᐋᐟᒫᐦᑕ, ᑖᕒᓯᐢ, ᒥᕒᐃᐢ, ᒫᕒᓯᓇ, ᒥᓇ ᒣᒼᔪᑲᐣ, ᑌᐸᑯᑊ ᐅᑭᒫᐊᐧᐠ ᐸᕒᓯᔭ ᒥᓇ ᒥᑎᔭ ᐅᐦᒋ, ᑳ ᑲᓇᐋᐧᐸᒫᒋᐠ ᑭᐦᒋ ᐅᑭᒫᐊᐧ, ᒥᓇ ᑳ ᓂᐢᑕᒪᐱᒋᐠ ᑭᐦᒋ ᐅᑭᒫᐃᐧᐃᐧᓂᕽ;)

¹⁵ ᑖᓂᓯ ᑫ ᑐᑕᐋᐧᔭᕽ ᑭᐦᒋ ᐅᑭᒫᐢᑫᐧᐤ ᐹᐢᑕᐩ ᐁ ᐃᑕᐢᑌᐠ ᐅᔭᓱᐁᐧᐃᐧᐣ, ᐊᓂᒪ ᐁᑳ ᐁ ᑭ ᐅᐦᒋ ᐃᑐᑕᕽ ᑳ ᐃᑕᓱᐋᐧᑎᑯᐟ ᑭᐦᒋ ᐅᑭᒫᐊᐧ ᐁᐦᐋᐢᔪᐃᕒᐊᓴ ᐊᓂᐦᐃ ᓂᐯᐃᐧᓂᑲᒥᑯᐃᐧᔨᓂᐊᐧ ᐅᐦᒋ?

¹⁶ ᒣᒼᔪᑲᐣ ᒫᑲ ᑭ ᓇᐢᑫᐧᐊᐧᓯᒣᐤ ᑭᐦᒋ ᐅᑭᒫᐊᐧ ᒥᓇ ᐅᑭᒫᐊᐧ, ᐹᐢᑕᐩ ᑭᐦᒋ ᐅᑭᒫᐢᑫᐧᐤ ᓇᒪᐃᐧᔭ ᐱᑯ ᑭᐦᒋ ᐅᑭᒫᐊᐧ ᑳ ᐊᐧᓂᑐᑕᐋᐧᐟ, ᒫᑲ ᑲᐦᑭᔭᐤ ᐅᑭᒫᐊᐧ, ᒥᓇ ᑲᐦᑭᔭᐤ ᐊᔨᓯᔨᓂᐊᐧ ᑳ ᐊᔮᔨᐟ ᑲᐦᑭᔭᐤ ᐁ ᐃᓯ ᐸᐯᐢᑭᑕᑭᑌᔨᐠ ᐅᐟ ᐊᐢᑭ ᑭᐦᒋ ᐅᑭᒫᐤ ᐁᐦᐋᐢᔪᐃᕒᐊᐢ.

¹⁷ ᒋᑫᒫ ᐅᒪ ᐅᐟ ᐃᑐᑕᒧᐃᐧᐣ ᑭᐦᒋ ᐅᑭᒫᐢᑫᐧᐤ ᑭᑕ ᐋᒋᒧᐢᑕᐋᐧᐊᐧᐠ ᑲᐦᑭᔭᐤ ᐃᐢᑫᐧᐊᐧᐠ, ᑭᑕ ᐱᐁᐧᔨᒫᒋᐠ ᐅ ᓈᐯᒥᐋᐧᐊᐧ, ᐃᐢᐱ ᐋᑐᑕᑲᐧᑭ, ᑭᐦᒋ ᐅᑭᒫᐤ ᐁᐦᐋᐢᔪᐃᕒᐊᐢ ᑭ ᐃᑕᓱᐁᐧᐤ ᑭᐦᒋ ᐅᑭᒫᐢᑫᐧᐊᐧ ᐹᐢᑕᔭ ᑭᑕ ᐯ ᐱᐦᑐᑲᐦᐃᒥᐦᐟ ᑭᑕ ᐋᐧᐸᒫᐟ, ᒫᑲ ᓇᒪᐃᐧᔭ ᐯ ᐃᑐᐦᑌᔨᐊᐧ.

¹⁸ ᐁᑯᓯ ᐊᓄᐦᐨ ᑳ ᑭᓯᑳᐠ ᐅᑭᒫᐢᑫᐧᐊᐧᐠ ᐸᕒᓯᔭ ᒥᓇ ᒥᑎᔭ ᑳ ᑭ ᐯᐦᑕᐦᑭᐠ ᑳ ᐃᑐᑕᒥᔨᐟ ᑭᐦᒋ ᐅᑭᒫᐢᑫᐧᐊᐧ ᐁᑯᓯ ᑫ ᐃᑖᒋᐠ ᑲᐦᑭᔭᐤ ᑭᐦᒋ ᐅᑭᒫᐊᐧ ᐅᑭᒫᒥᔨᐊᐧ, ᐁᑯᓯ ᒫᑲ ᑫ ᐃᓯ ᐸᓯᑯᒪᑲᕽ ᒥᐢᑕᐦᐃ ᒫᔦᔨᐦᒋᑫᐃᐧᐣ ᒥᓇ ᑭᓯᐋᐧᓯᐃᐧᐣ.

¹⁹ ᑭᐢᐱᐣ ᓇᐦᐁᔨᑕᑭ ᑭᐦᒋ ᐅᑭᒫᐤ, ᑭᔮᒼ ᑭᐦᒋ ᐅᑭᒫᐃᐧ ᐅᔭᓱᐁᐧᐃᐧᐣ ᑭᑕ ᓯᐯᐧᑎᓴᐦᐊᒼ, ᒥᓇ ᑭᔮᒼ ᑭᑕ ᒪᓯᓇᐦᐃᑳᑌᐤ, ᐅᔭᓱᐁᐧᐃᐧᓂᐋᐧᕽ ᐸᕒᓯᔭᓇᐠ ᒥᓇ ᒥᑕᐠ, ᐁᑳ ᑭᑕ ᐋᐦᑕᐢᑖᕽ, ᐁᑳ ᒥᓇ ᐃᐧᑳᐨ ᐹᐢᑕᐩ ᑭᑕ ᐱᑐᑲᐋᐧᐟ ᑭᐦᒋ ᐅᑭᒫᐊᐧ ᐁᐦᐋᐢᔪᐃᕒᐊᓴ; ᑭᔮᒼ ᒫᑲ ᑭᐦᒋ ᐅᑭᒫᐤ ᑭᑕ ᒥᔦᐤ ᐅ ᑭᐦᒋ ᐅᑭᒫᐢᑫᐧᐃᐧᐃᐧᓂᔨᐤ ᑯᑕᑲ ᓇᐊᐧᐨ ᐁ ᒥᔮᐧᑎᓯᔨᐟ ᐃᔨᑯᕽ ᐃᐧᔭ.

²⁰ ᐃᐢᐱ ᒫᑲ ᐊᓂᒪ ᑭᐦᒋ ᐅᑭᒫᐤ ᐅᔭᓱᐁᐧᐃᐧᐣ ᑫ ᐅᓯᐦᑖᐟ ᒥᓯᐁᐧ ᐃᑌ ᐃᓯᑎᓴᐃᑳᑌᑭ ᐅ ᑭᐦᒋ ᐅᑭᒫᐃᐧᐃᐧᓂᕽ (ᒋᑫᒫ ᒥᓵᔨᐤ), ᑲᐦᑭᔭᐤ ᐃᐢᑫᐧᐊᐧᐠ ᑭᑕ ᑭᐢᑌᔨᒣᐊᐧᐠ ᐅ ᓈᐯᒥᐋᐧᐊᐧ, ᑳ ᑭᐦᒉᔨᑖᑯᓯᒋᐠ ᒥᓇ ᑳ ᐊᐱᐢᑌᔨᑖᑯᓯᒋᐠ.

²¹ ᑭ ᓇᐦᐃᒫᐊᐧᐠ ᒫᑲ ᑭᐦᒋᐅᑭᒪᐤ ᒥᓇ ᐅᑭᒫᐊᐧᐠ; ᐁᑯᓯ ᑭᐦᒋ ᐅᑭᒫᐤ ᑭ ᐃᑐᑕᒼ ᑳ ᑭ ᐃᑌᐧᔨᐟ ᒣᒼᔪᑲᓇ;

²² ᑭ ᐃᓯᑎᓴᐦᐊᒼ ᒫᑲ ᒪᓯᓇᐦᐊᒫᑐᐃᐧᓇ ᒥᓯᐁᐧ ᑭᐦᒋᐅᑭᒪᐤ ᐁ ᐸᐯᐢᑭᑕᑭᑌᔨᐠ ᐅᐟ ᐊᐢᑭ, ᑲᐦᑭᔭᐤ ᐁ ᐸᐯᐢᑭᑕᑭᑌᐠ ᐊᐢᑭ ᐁ ᐃᓯ ᒪᓯᓇᐦᐃᑫᕽ, ᒥᓇ ᑲᐦᑭᔭᐤ ᐊᔨᓯᔨᓂᐤ ᐁ ᐃᓯ ᐅ ᐱᑭᐢᑫᐧᐃᐧᓀᐟ, ᑲᐦᑭᔭᐤ ᓈᐯᐤ ᑭᑕ ᑎᐯᔨᐦᑕᕽ ᐃᐧᔭ ᐅ ᐋᐧᐢᑳᐦᐃᑲᐧᐣ, ᒥᓇ ᑭᑕ ᐃᐧᐦᒋᑳᑌᐠ ᑳ ᐊᔨᓯᑭᓭᐧᔨᐟ ᑲᐦᑭᔭᐤ ᐅᐟ ᐊᔨᓯᔨᓂᒪ.