ēksatas 1 - ᑲᓈᒋ ᑭᐦᒋ ᒪᓯᓈᐦᐃᑲᐣ1 ᐁᐊᐧᑯᓂ ᐅᐦᐃ ᐅ ᐃᐧᔪᐃᐧᓂᐋᐧᐊᐧ ᐅᑯᓯᓴ ᐃᐢᕒᐁᐃᓬ, ᐊᓂᑭ ᐃᒋᑊᑎᕽ ᑳ ᑭ ᑕᑯᓯᐦᑭᐠ; ᑲᐦᑭᔭᐤ ᐅᑭ ᓈᐯᐊᐧᐠ ᒥᓇ ᐃᐧᑭᐋᐧᕽ ᑳ ᐊᔮᔨᐟ ᑭ ᐯ ᐃᐧᒉᐁᐧᐊᐧᐠ ᒉᑲᐸ. 2 ᕒᐅᐱᐣ, ᓯᒥᔭᐣ, ᓬᐃᐸᐩ, ᒥᓇ ᒍᑕ; 3 ᐃᓵᑲᕒ, ᓭᑊᔪᓬᐊᐣ, ᒥᓇ ᐯᐣᒋᒪᐣ; 4 ᑖᐣ ᒥᓇ ᓈᑊᑕᓬᐊᐩ, ᑳᐟ ᒥᓇ ᐋᓴᕒ. 5 ᑲᐦᑭᔭᐤ ᒫᑲ ᐊᐦᒑᐦᑲᐧᐠ ᒉᑲᑊ ᐃᐧᔭᐃᐧᕽ ᑳ ᑭ ᐅᐦᒋᔨᐟ ᑌᐸᑯᐦᐳᒥᑕᓇᐤ ᑭ ᐃᐦᑕᓯᐊᐧᐠ; ᒍᓯᑊ ᒫᑲ ᐃᐧᔭ ᓵᓴᐩ ᐃᒋᑊᑎᕽ ᑭ ᐊᔮᐤ. 6 ᐁᑯᓯ ᒍᓯᑊ ᑭ ᐳᓂ ᐱᒫᑎᓯᐤ, ᒥᓇ ᑲᐦᑭᔭᐤ ᐅᒋᐋᐧᒪ, ᒥᓇ ᑲᐦᑭᔭᐤ ᐁᐊᐧᑯᓂᐠ ᑳ ᐃᐧᒋᐦᐃᐢᐱᑎᓯᒥᑐᒋᐠ. 7 ᐊᓂᑭ ᒫᑲ ᐃᐢᕒᐁᐃᓬ ᐅᐟ ᐊᐋᐧᓯᒥᓴ ᑭ ᓂᐦᑖᐃᐧᑭᐊᐧᐠ, ᒥᓇ ᐋᑳᐧᐢᑲᒼ ᑭ ᐊᑎ ᒥᐦᒉᑎᐊᐧᐠ, ᒥᓇ ᐁ ᑭ ᐊᑎ ᐅᓵᒣᔭᑎᒋᐠ, ᒥᓇ ᐋᑳᐧᐢᑲᒼ ᑭ ᐊᑎ ᓱᑫᔨᑖᑯᓯᐊᐧᐠ; ᑭ ᑌᐱᐢᑲᒫᑐᐊᐧᐠ ᒫᑲ ᐊᐢᑭ. 8 ᐅᐢᑭ ᑭᐦᒋ ᐅᑭᒫᐤ ᒫᑲ ᐁᑲᐧ ᑭ ᑎᐯᔨᐦᑕᒼ ᐃᒋᑊᐟ, ᐁᑳ ᐁ ᑭᐢᑫᔨᒫᐟ ᒍᓯᐸ. 9 ᐅᒥᓯ ᒫᑲ ᑭ ᐃᑌᐤ ᐅᐟ ᐃᔨᓂᒪ, ᒫᑎᑲ, ᐊᓂᑭ ᐊᔨᓯᔨᓂᐊᐧ ᐃᐢᕒᐁᐃᓬ ᐅᐟ ᐊᐋᐧᓯᒥᓴ, ᐊᐊᐧᓯᒣ ᒥᐦᒉᑎᐊᐧᐠ, ᒥᓇ ᐊᔨᐋᐧᐠ ᓱᑫᔨᑖᑯᓯᐊᐧᐠ ᐃᔨᑯᕽ ᑭᔮᓇᐤ. 10 ᐦᐊᐤ ᒫᐦᑎ ᐃᔨᓂᓯᑲᑕᐋᐧᑖᓂᐠ; ᐁᑳ ᐊᐊᐧᓯᒣ ᑭᑕ ᐊᑎ ᒥᐦᒉᑎᒋᐠ, ᐁᑯᓯ ᓈᐣᑕᐤ ᐊᔨᑭᐦᑭ, ᓇᑐᐸᔨᐃᐧᐣ ᐃᐢᐸᔨᑭ, ᑭᑕ ᐃᐧᒋᐁᐊᐧᐠ ᑭ ᓄᑎᓈᑲᓂᓇᐊᐧ, ᒥᓇ ᑭᑕ ᓄᑎᓂᑯᔭᑯᐠ, ᐁᑯᓯ ᑭᑕ ᓇᑲᑕᐦᑭᐠ ᐅᒪ ᐊᐢᑭ. 11 ᐁᐊᐧᑯ ᐅᐦᒋ ᒫᑲ ᑭ ᐅᔭᑭᑕᒪᐁᐧᐊᐧᐠ ᐅᑕᑐᐢᑫᐃᐁᐧᐊᐧ ᑭᑕ ᑯᑕᑭᐦᐃᑯᔨᐟ ᓇᔭᒋᑫᐃᐧᐣ ᐅᐦᒋ. ᑭ ᐅᓯᐦᑕᒪᐁᐧᐊᐧᐠ ᒫᑲ ᐯᕒᐅᐊᐧ ᐊᐢᑖᓱᐃᐧᓂ ᐅᑌᓇᐊᐧ, ᐸᐃᑕᒼ ᒥᓇ ᕒᐁᐋᒼᓯᐢ. 12 ᒫᑲ ᐊᐊᐧᓯᒣ ᐁ ᐊᑎ ᑯᑕᑯᐋᒋᐠ ᐊᐊᐧᓯᒣ ᑭ ᐊᑎ ᒥᐦᒉᑎᔨᐊᐧ ᒥᓇ ᑭ ᔭᐦᑭᐊᔮᔨᐊᐧ. ᑭ ᒥᐦᒋᔭᐁᐧᓯᐊᐧᐠ ᒫᑲ ᐃᐢᕒᐁᐃᓬ ᐅᐟ ᐊᐋᐧᓯᒥᓵ ᐅᐦᒋ. 13 ᐊᓂᑭ ᒫᑲ ᐃᒋᑊᐟ ᐊᔨᓯᔨᓂᐊᐧᐠ ᑭ ᑯᑕᑭ ᐊᑐᐢᑲᐁᐊᐧᐠ ᐃᐢᕒᐁᐃᓬ ᐅᐟ ᐊᐋᐧᓯᒥᓴ. 14 ᑭ ᐋᑯᑖᐁᐧᐊᐧᐠ ᒫᑲ ᐅ ᐱᒫᑎᓯᐃᐧᓂᔨᐤ ᐁ ᓱᐦᑲᑐᐢᑲᐦᐋᒋᐠ, ᑲᐢᑳᐸᑐᓂᐢᑲᐦᐃᑲᓇ, ᒥᓇ ᐸᓴᑳᐧᐱᐢᐠ, ᒥᓇ ᓇᓈᑐᕽ ᐃᓯ ᐊᑐᐢᑫᐃᐧᐣ ᑭᐢᑎᑳᓂᕽ; ᑲᐦᑭᔭᐤ ᐊᓂᒪ ᑳ ᐃᓯ ᐊᑐᐢᑲᐋᐧᒋᐠ ᑭ ᑯᑕᑭ ᐊᑐᐢᑲᐁᐊᐧᐠ. 15 ᐃᒋᑊᐟ ᑭᐦᒋ ᐅᑭᒫᐤ ᒫᑲ ᑭ ᑭᑐᑌᐤ ᐦᐃᐸᕒᐅᐃᐧ ᐅᑲᓇᐁᐧᔨᒥᐁᐧᐊᐧ, ᐯᔭᐠ ᐊᓇ ᓯᑊᕒᐊ ᑭ ᐃᓯᔨᐦᑳᓱ, ᐁᑯᓯ ᐊᓇ ᑯᑕᐠ ᐱᐊᐧ. 16 ᑭ ᐃᑌᐤ ᒫᑲ, ᐃᐢᐱ ᐁᑐᑕᒣᑯ ᐊᑐᐢᑫᐃᐧᐣ ᐁ ᑲᓇᐁᐧᔨ ᒫᔦᑯᐠ ᐦᐃᐸᕒᐅᐃᐧ ᐃᐢᑫᐧᐊᐧᐠ, ᒥᓇ ᐃᐧᔮᐸᒫᔦᑳᐧᐃᐧ ᓂᐦᑖᐃᐧᑭᐋᐊᐧᓱᑖᐧᐃᐧ, ᑭᐢᐱᐣ ᓂᔮᐯᐃᐧᒋ ᐁᑯᓯ ᑫ ᓂᐸᐦᐋᔦᐠ; ᒫᑲ ᑭᐢᐱᐣ ᐃᐢᑫᐧᐃᐧᒋ ᑭ ᑲ ᐱᒫᒋᐦᐋᐋᐧᐤ. 17 ᒫᑲ ᐊᓂᑭ ᐅᑲᓇᐁᐧᔨᒥᐁᐧᐊᐧᐠ ᑭ ᑯᐢᑌᐊᐧᐠ ᑭᓭᒪᓂᑐᐊᐧ ᒥᓇ ᓇᒪᐃᐧᔭ ᑭ ᐃᑐᑕᒪᐧᐠ ᑳ ᐃᑕᓱᐋᐧᑎᑯᒋᐠ ᑭᐦᒋ ᐅᑭᒫᐊᐧ, ᒫᑲ ᑭ ᐱᒫᒋᐦᐁᐊᐧᐠ ᐊᓂᐦᐃ ᐁ ᓈᐯᐃᐧᔨᐟ ᐊᐋᐧᓯᓴ. 18 ᐊᓇ ᒫᑲ ᐃᒋᑊᐟ ᑭᐦᒋ ᐅᑭᒫᐤ ᑭ ᓇᑐᒣᐤ ᐊᓂᐦᐃ ᐅᑲᓇᐁᐧᔨᒥᐁᐧᐊᐧ ᐅᒥᓯ ᐁ ᑭ ᐃᑖᐟ, ᑖᓀᐦᑭ ᐅᒪ ᑳ ᑭ ᐃᑐᑕᒣᐠ, ᐁ ᑭ ᐱᒫᒋᐦᐋᔦᑯᐠ ᑳ ᓈᐯᐃᐧᒋᐠ ᐊᐋᐧᓯᓴᐠ? 19 ᐊᓂᑭ ᒫᑲ ᐅᑲᓇᐁᐧᔨᒥᐁᐧᐊᐧᐠ ᐅᒥᓯ ᑭ ᐃᑌᐊᐧᐠ ᐯᕒᐅᐊᐧ, ᒋᑫᒫ ᐦᐃᐸᕒᐅᐃᐧ ᐃᐢᑫᐧᐊᐧᐠ ᓇᒪᐃᐧᔭ ᐃᐦᑎᐊᐧᐠ ᑖᐱᐢᑯᐨ ᐃᒋᑊᐟ ᐃᐢᑫᐧᐊᐧᐠ ᑳ ᐃᐦᑎᒋᐠ, ᒫᑲ ᑲᑳᔭᐃᐧᓯᐊᐧᐠ, ᒥᓇ ᓂᐦᑖᐃᐧᑭᐦᐋᐊᐧᓱᐊᐧᐠ ᒪᐧᔦᐢ ᐱᐦᑐᑫᔨᐟ ᐅᑲᓇᐁᐧᔨᒥᐁᐧᐊᐧ. 20 ᐁᐊᐧᑯ ᒫᑲ ᐅᐦᒋ ᑭᓭᒪᓂᑐ ᑭ ᒪᒥᔪ ᐊᔨᑐᑕᐁᐧᐤ ᐅᑲᓇᐁᐧᔨᒥᐁᐧᐊᐧ; ᐊᓂᑭ ᒫᑲ ᐊᔨᓯᔨᓂᐊᐧᐠ ᑭ ᐊᑎ ᒥᐦᒉᑎᐊᐧᐠ ᒥᓇ ᐋᑐᐢᑫᒼ ᓈᐢᐱᐨ ᑭ ᐊᑎ ᓱᑫᔨᑖᑯᓯᐊᐧᐠ. 21 ᑭ ᐊᔨᑭᐣ ᒫᑲ, ᒋᑫᒫ ᐊᓂᑭ ᐅᑲᓇᐁᐧᔨᒥᐁᐧᐊᐧᐠ ᐁ ᑯᓯᑫᐧᔨᒫᒋᐠ ᑭᓭᒪᓂᑐᐊᐧ, ᑭ ᐅᐃᐧᑭᑫᒧᐃᐧᓂᑲᐁᐧᐤ. 22 ᐯᕒᐅ ᒫᑲ ᑭ ᐊᔮᑳᐧᒥᒣᐤ ᑲᐦᑭᔭᐤ ᐅᐟ ᐊᔨᓯᔨᓂᒪ, ᐅᒥᓯ ᐁ ᐃᑌᐧᐟ, ᑕᐦᑐ ᓈᐯᓯᐢ ᑫ ᓂᐦᑖᐃᐧᑭᐟ ᑭ ᑲ ᐸᑲᐢᑕᐁᐧᐁᐧᐱᓈᐋᐧᐤ ᓯᐱᕽ, ᑲᐦᑭᔭᐤ ᒫᑲ ᐃᐧᔭ ᐁ ᐃᐢᑫᐧᓯᓯᐃᐧᒋᐠ ᑭ ᑲ ᐱᒫᒋᐦᐋᐋᐧᐊᐧᐠ. |
This Bible text is a corrected edition of the 1908 Western Cree Bible; it is in the public domain.
Canadian Bible Society