ᑲᓬᐋᓯᔭᓇ 1 - ᑲᓈᒋ ᑭᐦᒋ ᒪᓯᓈᐦᐃᑲᐣ

¹ ᐹᓬ, ᐅᐟ ᐊᐹᐢᑎᓬᐃᒪ ᙭ ᒋᓴᐢ ᐅᐟ ᐃᑌᔨᑕᒧᐃᐧᐣ ᐅᐦᒋ ᑭᓭᒪᓂᑐ, ᒥᓇ ᑎᒪᑏ ᑭᒋᐋᐧᒥᓇᐤ,

² ᐁ ᒪᓯᓇᐦᐊᒪᐋᐧᒋᐠ ᐅᑲᓈᑎᓯᐊᐧ ᒥᓇ ᑳ ᐊᔮᑳᐧᒥᓯᔨᐟ ᐅᒋᐋᐧᒥᒫᐊᐧ ᙭ ᐃᓯ ᑲᓬᐋᓯ ᑳ ᐊᔮᒋᐠ: ᑭᓭᐋᐧᑐᑖᑯᐃᐧᐣ ᒥᓇ ᐯᔭᑕᑫᔨᒧᐃᐧᐣ ᑭ ᑲ ᐃᐧ ᐅᒋᐢᑕᒫᑯᐋᐧᐤ ᑭᓭᒪᓂᑐ ᑯᑖᐃᐧᓇᐤ.

³ ᓂ ᓇᓈᐢᑯᒫᓈᐣ ᑭᓭᒪᓂᑐ ᐅᑖᐃᐧᔭ ᑳ ᑎᐯᔨᒥᑯᔭᕽ ᒋᓴᐢ ᙭, ᒧᓴᐠ ᐁ ᐊᔭᒥᐦᐁᐢᑕᒫᑖᕽ,

⁴ ᐁ ᑭ ᐯᑕᒫᕽ ᐁ ᐃᓯ ᑖᐯᐧᔦᔨᒫᔦᐠ ᙭ ᒋᓴᐢ, ᒥᓇ ᐁ ᐃᓯ ᓵᑭᐦᐋᔦᑳᐧᐤ ᑲᐦᑭᔭᐤ ᐅᑲᓈᑎᓯᐊᐧᐠ,

⁵ ᐊᓂᒪ ᐁ ᐃᑕᑌᔨᑕᒣᐠ ᑳ ᑲᐧᔮᑕᐢᑕᒫᑲᐃᐧᔦᐠ ᑭᐦᒋ ᑭᓯᑯᕽ, ᑳ ᑭ ᐯᐦᑕᒣᐠ ᑲᔭᑌ ᐁ ᑖᐯᐧᒪᑲᕽ ᐃᑌᐧᐃᐧᐣ ᒥᔮᐧᒋᒧᐃᐧᓂᕽ,

⁶ ᑭᔭᐋᐧᐤ ᑳ ᐅᑎᐦᑎᑯᔦᐠ; ᑳ ᐃᓯ ᐅᑎᐦᑎᑯᒋᐠ ᒥᓯᐁᐧᐢᑲᒥᐠ ᐁ ᒥᓂᓯᐋᐧᕽ ᒥᓇ ᐁ ᔭᑭᐅᒪᑲᕽ, ᑖᐱᐢᑯᐨ ᑳ ᐃᑭᕽ ᑭᔭᐋᐧᐤ ᒥᓇ, ᐊᐢᐱᐣ ᐊᓂᒪ ᐁ ᑭᓯᑳᐠ ᑳ ᑭ ᐯᐦᑕᒣᐠ ᒥᓇ ᑳ ᑭᐢᑫᔨᑕᒣᐠ ᑖᐯᐧ ᐅ ᑭᓭᐋᐧᑎᓯᐃᐧᐣ ᑭᓭᒪᓂᑐ;

⁷ ᑖᐱᐢᑯᐨ ᑳ ᑭ ᐃᓯ ᑭᐢᑫᔨᑕᒧᐃᑯᔦᐠ ᐁᐸᑊᕒᐋᐢ ᑳ ᓵᑭᐦᐋᔮᕽ ᓂ ᐃᐧᒋ ᐊᑐᐢᑫᒫᑲᓂᓈᐣ, ᑭᔮᓇᐤ ᒫᑲ ᐃᐧᔭ ᐅᐦᒋ ᐁ ᐊᔮᑳᐧᒥᓯᔨᐟ ᙭ ᐅᐸᒥᐢᑖᑫᒪ,

⁸ ᑳ ᑭ ᒥᓇ ᐃᐧᐦᑕᒫᑯᔮᕽ ᑭ ᓵᑭᐦᐃᐁᐧᐃᐧᓂᐋᐧᐤ ᐊᐦᒑᐦᑯᕽ.

⁹ ᐁᐊᐧᑯ ᐅᒪ ᒫᑲ ᐅᐦᒋ ᓂᔭᓈᐣ ᒥᓇ, ᐊᐢᐱᐣ ᐊᓂᒪ ᐁ ᑭᓯᑳᐠ ᑳ ᑭ ᐯᑕᒫᕽ, ᓇᒪᐃᐧᔭ ᓂ ᐳᓂᑖᓈᐣ ᐁ ᐊᔭᒥᐦᐁᐢᑕᒫᑖᕽ ᒥᓇ ᓇᑐᑌᐢᑕᒫᑖᕽ, ᑭᑕ ᒧᐢᑭᓀᐢᑳᑯᔦᐠ ᐁ ᑭᐢᑫᔨᑕᒫᐧᔦᐠ ᐅᐟ ᐃᑌᔨᑕᒧᐃᐧᐣ ᒥᓯᐁᐧ ᐊᐦᒑᐦᑯᐃᐧ ᐃᔨᓂᓯᐃᐧᓂᕽ ᒥᓇ ᓂᓯᑐᐦᑕᒧᐃᐧᓂᕽ,

¹⁰ ᐁ ᐃᓯ ᐱᒧᐦᑌᔦᐠ ᑭᑕ ᑌᐸᑫᔨᑖᑯᓯᐢᑕᐋᐧᔦᐠ ᑳ ᑎᐯᔨᐦᒋᑫᐟ ᒥᓯᐁᐧ ᐃᓯ ᐁ ᓇᐦᐃᔭᐁᐧᐋᔦᐠ, ᑭᑕ ᒥᓂᓯᐃᐧᔦᐠ ᑲᐦᑭᔭᐤ ᒥᔪ ᐊᑐᐢᑫᐃᐧᓂᕽ, ᒥᓇ ᐁ ᔭᐦᑭ ᑭᐢᑫᔨᒫᔦᐠ ᑭᓭᒪᓂᑐ;

¹¹ ᑭᑕ ᒪᐢᑲᐃᐧᓯᐢᑳᑯᔦᐠ ᑲᐦᑭᔭᐤ ᑲᐢᑭᐦᐁᐃᐧᓯᐃᐧᐣ, ᐁ ᐃᓯ ᓱᑳᔭᐊᐧᓂᔨᐠ ᐅ ᑭᐢᑌᔨᑖᑯᓯᐃᐧᐣ, ᒥᓯᐁᐧ ᓯᐱᔭᐁᐧᓯᐃᐧᓂᕽ ᒥᓇ ᓯᐯᔨᑕᒧᐃᐧᓂᕽ ᑭᑭ ᒪᒪᐦᑖᑯᓯᐃᐧᓂᕽ;

¹² ᐁ ᓇᓈᐢᑯᒫᔦᐠ ᐁᐧᔪᑖᐃᐧᕽ, ᑳ ᑭ ᐃᓯᐃᑯᔭᕽ ᑭᑕ ᐃᐧᒋ ᑎᐯᔨᑕᒧᒫᔭᑯᐠ ᐅᑲᓈᑎᓯᐊᐧᐠ ᐋᐧᐢᑌᕽ;

¹³ ᑳ ᑭ ᐸᐢᐱᐃᑯᔭᕽ ᐁ ᒪᐢᑲᐃᐧ ᒥᒋᒥᓂᑯᔭᕽ ᐊᐧᓂᑎᐱᐢᑳᐤ, ᐁᑯᓯ ᐁ ᑭ ᐊᐦᒋᐸᑭᑎᓂᑯᔭᕽ ᐅᐟ ᐅᑌᓇᐃᐧᐃᐧᓂᔨᕽ ᐅᑯᓯᓴ ᑳ ᓵᑭᐦᐋᐟ;

¹⁴ ᐊᓇ ᑳ ᐅᐦᒋ ᐊᔮᔭᕽ ᑭ ᐱᒫᒋᐃᑯᐃᐧᓂᓇᐤ, ᐁ ᐳᓀᔨᑕᒫᑲᐃᐧᔭᕽ ᑭ ᒪᒋᐃᑎᐃᐧᓂᓇᐊᐧ:

¹⁵ ᐊᓇ ᑳ ᐊᔮᐟ ᐅᐟ ᐃᓯᓈᑯᓯᐃᐧᓂᔨᐤ ᐁᑳ ᑳ ᓄᑯᓯᔨᐟ ᑭᓭᒪᓂᑐᐊᐧ, ᑳ ᓂᐢᑕᒼ ᓂᐦᑖᐃᐧᑭᐟ ᑲᐦᑭᔭᐤ ᐅᓯᐦᒋᑲᐣ;

¹⁶ ᒋᑫᒫ ᐃᐧᔭ ᐅᐦᒋ ᑲᐦᑭᔭᐤ ᑫᑲᐧᐩ ᑭ ᐅᓯᒋᑳᑌᐤ, ᐊᓂᐦᐃ ᑭᓯᑯᕽ ᑳ ᐊᔮᑭ ᒥᓇ ᐊᐧᐢᑭᑕᐢᑲᒥᐠ ᑳ ᐊᔮᑭ, ᐊᓂᐦᐃ ᑳ ᓄᑲᐧᑭ ᒥᓇ ᐁᑳ ᑳ ᓄᑲᐧᑭ, ᑭᐢᐱᐣ ᑭᐦᒋ ᐅᑭᒫᐊᐧᐱᐃᐧᓇ ᐊᐦᐳ ᑎᐯᔨᐦᒋᑫᐃᐧᓇ ᐊᐦᐳ ᐅᑭᒫᐃᐧᐃᐧᓇ ᐊᐦᐳ ᑲᐢᑭᐦᐁᐃᐧᓯᐃᐧᓇ; ᑲᐦᑭᔭᐤ ᑫᑲᐧᐩ ᐃᐧᔭ ᐅᐦᒋ ᑭ ᐅᓯᒋᑳᑌᐊᐧ, ᒥᓇ ᐃᐧᔭ ᐃᓯ;

¹⁷ ᐁᑯᓯ ᐃᐧᔭ ᓂᑳᓂᐢᑲᒼ ᑲᐦᑭᔭᐤ ᑫᑲᐧᔭ, ᒥᓇ ᐃᐧᔭ ᑳ ᐅᐦᒋ ᐃᐦᑕᑲᐧᓂᔨᑭ.

¹⁸ ᐃᐧᔭ ᒫᑲ ᑳ ᐅᐢᑎᑳᐧᓂᐢᑲᕽ ᒥᔭᐤ, ᐊᔭᒥᐦᐁᐃᐧᑲᒥᐠ ᐅᑎ: ᐊᓇ ᒥᒋᒫᐨ ᐅᐦᒋ ᑳ ᐊᔮᐟ, ᑳ ᓂᐢᑕᒥ ᓂᐦᑖᐃᐧᑭᐟ ᓂᐳᐃᐧᓂᕽ ᐅᐦᒋ; ᒥᓯᐁᐧ ᐃᓯ ᑭᑕ ᐊᔨᐋᐧᑫᔨᑖᑯᓯᐟ.

¹⁹ ᒋᑫᒫ ᑭ ᒥᔪ ᐃᑌᔨᑕᒼ ᐁᐧᔪᑖᐃᐧᕽ ᑲᐦᑭᔭᐤ ᒫᒪᐁᐧᔨᑖᑯᓯᐃᐧᐣ ᑭᑕ ᑭᑭᐢᑳᑯᔨᐟ;

²⁰ ᐁᑯᓯ ᐁᐊᐧᑯᓂ ᐅᐦᒋ ᑭᑕ ᐃᐧᒉᐋᐧᑲᓂᑕᕽ ᑲᐦᑭᔭᐤ ᑫᑲᐧᔭ, ᐁ ᑭ ᐅᓯᑖᔨᐟ ᐃᐧᑕᐢᑭᑐᐃᐧᐣ ᐅ ᒥᐦᑯ ᐅᐦᒋ ᐱᒥᑖᐢᑯᐃᑲᓂᕽ; ᐁᐊᐧᑯᓂ ᐅᐦᒋ, ᓂᐟ ᐃᑖᐧᐣ, ᑭᐢᐱᐣ ᐊᓂᐦᐃ ᐊᐢᑭᕽ ᑳ ᐊᔮᑭ, ᐊᐦᐳ ᐊᓂᐦᐃ ᑭᓯᑯᕽ ᑳ ᐊᔮᑭ.

²¹ ᑭᔭᐋᐧᐤ ᒫᑲ, ᐁ ᑭ ᐯ ᐱᑐᓯᓯᔦᐠ ᒥᓇ ᐁ ᑭ ᐸᑳᐧᑖᔦᐠ ᑭ ᒥᑐᓀᔨᒋᑲᓂᐋᐧᕽ ᑭ ᒪᒋ ᐃᓯᐦᒋᑫᐃᐧᓂᐋᐧᕽ, ᐁᔨᐁᐧᕽ ᐁᑲᐧ ᑭ ᐃᐧᒉᐋᐧᑲᓂᑕᐃᑯᐋᐧᐤ

²² ᐃᐧᔭᐃᐧᕽ ᐅ ᐃᐧᔮᓯᕽ ᓂᐳᐃᐧᐣ ᐅᐦᒋ, ᑲᓈᑎᓯᐃᐧᓂᕽ ᒥᓇ ᒪᒥᑐᓂᐃᐧᓂᕽ ᒥᓇ ᐁᑳ ᐁ ᐋᓀᐧᔨᑖᑯᓯᔦᐠ ᑭᑕ ᐅᑎᐢᑲᐤ ᐊᔨᑲᐃᐧᔦᐠ:

²³ ᑭᐢᐱᐣ ᑕᐦᑭ ᑖᐯᐧᔦᔨᑕᒧᐃᐧᓂᕽ ᑭᐟ ᐊᔮᓈᐋᐧᐤ, ᐁ ᐋᔮᒋ ᐊᔮᔦᐠ ᒥᓇ ᐁ ᒪᐢᑲᐃᐧ ᐊᔮᔦᐠ, ᐁᑳ ᐅᐦᐱᒣ ᐁ ᐃᑐᑕᐃᑲᐃᐧᔦᐠ, ᐁ ᐃᓯ ᐊᐢᐯᔨᒧᐃᐁᐧᐠ ᒥᔮᒋᒧᐃᐧᐣ ᑳ ᑭ ᐯᐦᑕᒣᐠ, ᑳ ᑭ ᐃᐧᐦᑕᒫᐦᐟ ᑲᐦᑭᔭᐤ ᐊᐃᐧᔭᐠ ᑳ ᑭ ᐅᓯᐃᐦᐟ ᓯᐹ ᑭᓯᑯᕽ; ᐁᐊᐧᑯ ᓂᔭ ᐹᓬ ᐅᐸᒥᐢᑖᑫᐤ ᑳ ᑭ ᐅᐦᒋ ᐃᓯᐃᑲᐃᐧᔮᐣ.

²⁴ ᐁᑲᐧ ᒫᑲ ᓂ ᒪᒪᐦᑖᑯᓯᐣ ᓂ ᑯᑕᑭᑖᐃᐧᓂᕽ ᑭᔭᐋᐧᐤ ᐅᐦᒋ, ᐁᑯᓯ ᓂ ᑎᐸᐢᑭᓇᑖᐣ ᓂᔭ ᐊᓂᐦᐃ ᑳ ᓄᑌᐸᔨᑭ ᐅ ᑯᑕᑭᑖᐃᐧᓇ ᓂ ᐃᐧᔮᓯᕽ ᐃᐧᔭᐤ ᐅᐦᒋ, ᐁᐊᐧᑯ ᐊᔭᒥᐦᐁᐃᐧᑲᒥᐠ;

²⁵ ᐃᑕ ᐅᐸᒥᐢᑖᑫᐤ ᑳ ᐃᑕᔨᑲᐃᐧᔮᐣ, ᐁ ᐃᑕᐢᑌᔨᐠ ᐅ ᐸᒥᓂᑫᐃᐁᐧᐃᐧᐣ ᑭᓭᒪᓂᑐ ᑳ ᑭ ᒥᔨᑲᐃᐧᔮᐣ ᑭᔭᐋᐧᐤ ᐅᐦᒋ, ᑭᑕ ᑎᐱᐸᔨᑖᔮᐣ ᑭᓭᒪᓂᑐ ᐅᐟ ᐃᑌᐧᐃᐧᐣ,

²⁶ ᐊᓂᒪ ᐅᑎ ᑳ ᒪᒫᑖᐊᐧᕽ ᐁᑳ ᑳ ᑭ ᓄᑲᐧᕽ ᐁ ᐯ ᐊᐢᑭᐊᐧᕽ ᒥᓇ ᐁ ᐯ ᐋᔮᓂᐢᑫ ᐱᒫᑎᓯᕽ: ᒫᑲ ᐁᑲᐧ ᑳ ᑭ ᓄᑯᑖᐧᒥᐦᐟ ᐅᑲᓈᑎᓯᒪ,

²⁷ ᐊᓂᐦᐃ ᑭᓭᒪᓂᑐ ᑳ ᑭ ᐃᓯ ᒥᔦᐧᔨᑕᕽ ᑭᑕ ᑭᐢᑫᔨᑕᒧᐋᐟ ᐁ ᐃᓯ ᐁᐧᔪᑕᕽ ᐁ ᑭᐢᑌᔨᑖᑲᐧᕽ ᐅᒪ ᑳ ᒪᒫᑖᐊᐧᕽ ᒣᑳᐧᐨ ᒉᐣᑕᐃᓬᐃᓇᕽ, ᐁᐊᐧᑯ ᙭ ᐁ ᑭᑭᐢᑳᑯᔦᐠ, ᐁ ᐃᑕᑌᔨᑕᒫᓱᕽ ᑭᐢᑌᔨᑖᑯᓯᐃᐧᐣ:

²⁸ ᐊᓇ ᑳ ᐋᒋᒫᔮᕽ, ᐁ ᓯᑭᒫᔮᕽ ᒥᓇ ᐁ ᑭᐢᑭᓄᐦᐊᒪᐋᐧᔮᕽ ᑲᐦᑭᔭᐤ ᐊᔨᓯᔨᓂᐤ ᒥᓯᐁᐧ ᐃᔨᓂᓯᐃᐧᓂᕽ, ᑭᑕ ᑭ ᐸᑭᑎᓈᔮᕽ ᑲᐦᑭᔭᐤ ᐊᔨᓯᔨᓂᐤ ᐁ ᒪᒥᑐᓂᐟ ᙭ ᐃᓯ;

²⁹ ᐁᑯᑌ ᒫᑲ ᓂᐢᑕ ᑳ ᐃᓯ ᐊᑐᐢᑫᔮᐣ, ᐁ ᐃᐧᑯᔮᐣ ᐅᐟ ᐊᑐᐢᑫᐃᐁᐧᐃᐧᓂᕽ, ᑳ ᒪᐢᑲᐃᐧ ᐊᑐᐢᑫᐃᑯᔮᐣ.