cērimāya 1 - ᑲᓈᒋ ᑭᐦᒋ ᒪᓯᓈᐦᐃᑲᐣ

¹ ᐅᐟ ᐃᑌᐧᐃᐧᓇ ᒉᕒᐃᒫᔭ ᐅᑯᓯᓴ ᐦᐃᓬᑳᔭ, ᐊᔭᒥᐦᐁᐃᐧᔨᓂᐊᐧᐠ ᐅᐦᒋ ᐊᓂᑕ ᐋᓇᑖᐦᐟ ᑳ ᐊᔮᒋᐠ ᐯᐣᒋᒪᐣ ᐊᐢᑭᕽ;

² ᑳ ᑭ ᐅᑎᐦᑎᑯᐟ ᐅᐟ ᐃᑌᐧᐃᐧᓂᔨᐤ ᑳ ᑎᐯᔨᐦᒋᑫᔨᐟ ᒣᑳᐧᐨ ᐁ ᐊᔮᐟ ᒑᓵᔭ ᐅᑯᓯᓴ ᐋᒪᐣ, ᒍᑕ ᑭᐦᒋ ᐅᑭᒫᐤ, ᒥᑖᑕᐦᐟ ᓂᐢᑐᓵᑊ ᑕᐦᑐ ᐊᐢᑭ ᐁ ᐊᑎ ᑭᐦᒋ ᐅᑭᒫᐃᐧᐟ.

³ ᑭ ᐅᑎᐦᑎᐠ ᒥᓇ ᒣᑳᐧᐨ ᐁ ᐊᔮᔨᐟ ᒋᐦᐋᔭᑭᒼ ᐅᑯᓯᓴ ᒑᓵᔭ, ᒍᑕ ᑭᐦᒋ ᐅᑭᒫᐤ; ᐱᔨᐢ ᐃᐢᐱ ᑳ ᓯᐯᐧᑕᐃᐦᒋᐠ ᒉᕒᐅᓴᓬᐊᒼ ᐊᐊᐧᑳᑎᑯᐃᐧᓂᕽ ᓂᔮᓇᐣ ᐱᓯᒼ ᐁ ᐊᑭᒥᐦᐟ.

⁴ ᑳ ᑎᐯᔨᐦᒋᑫᐟ ᒫᑲ ᐅᐟ ᐃᑌᐧᐃᐧᐣ ᓂ ᑭ ᐅᑎᐦᑎᑯᐣ, ᐁ ᐃᑎᑯᔮᐣ,

⁵ ᒪᐧᔦᐢ ᑭᓯᐃᑖᐣ ᒫᑖᕽ ᑭ ᑭ ᑭᐢᑫᔨᒥᑎᐣ, ᒥᓇ ᒪᐧᔦᐢ ᐯ ᐊᐧᔭᐃᐧᔭᐣ ᑭ ᑭ ᑲᓈᒋᐃᑎᐣ; ᑭ ᑭ ᐅᔭᑭᒥᑎᐣ ᑭᑕ ᑭᐢᑭᐁᐧᐦᐃᑫᐃᐧᔨᓂᑲᑕᐊᐧᒋᐠ ᓇᓈᑐᑯᐢᑳᐣ ᐊᔨᓯᔨᓂᐊᐧᐠ.

⁶ ᐁᑲᐧ ᓂ ᑭ ᐃᑖᐧᐣ, ᐋᐦ, ᑳ ᑎᐯᔨᐦᒋᑫᔭᐣ ᑭᓭᒪᓂᑐ! ᒫᑎᑲ, ᓇᒪᐃᐧᔭ ᓂ ᑭ ᐱᑭᐢᑳᐧᐣ, ᒋᑫᒫ ᓂᐟ ᐊᐋᐧᓯᓯᐃᐧᐣ.

⁷ ᒫᑲ ᑳ ᑎᐯᔨᐦᒋᑫᐟ ᓂ ᑭ ᐃᑎᐠ, ᐁᑳᐃᐧᔭ ᐃᑌᐧ, ᓂᐟ ᐊᐋᐧᓯᓯᐃᐧᐣ; ᒋᑫᒫ ᐱᑯ ᐋᐃᐧᔭᐠ ᑫ ᐃᓯᑎᓴᐦᐅᑖᐣ ᑭᑕ ᓈᑕᐟ ᑭ ᑲ ᐃᑐᐦᑖᐣ, ᒥᓇ ᐱᑯ ᑫᑲᐧᐩ ᑫ ᐃᑕᓱᐋᐧᑎᑖᐣ ᐁᐊᐧᑯ ᑫ ᐃᑌᐧᔭᐣ.

⁸ ᐁᑳᐃᐧᔭ ᑭ ᑲ ᑯᐢᑖᐊᐧᐠ; ᒋᑫᒫ ᑭ ᐃᐧᒉᐃᐧᑎᐣ ᑭᑕ ᐸᐢᐱᐦᐃᑖᐣ, ᐃᑌᐧᐤ ᑳ ᑎᐯᔨᐦᒋᑫᐟ.

⁹ ᐁᑲᐧ ᑳ ᑎᐯᔨᐦᒋᑫᐟ ᑭ ᐃᓯᒋᐦᒉᔨᐤ, ᒥᓇ ᑭ ᓵᒥᓇᒼ ᓂᑐᐣ; ᑳ ᑎᐯᔨᐦᒋᑫᐟ ᒫᑲ ᓂ ᑭ ᐃᑎᐠ, ᒫᑎᑲ, ᓂ ᑭ ᐊᐢᑖᐣ ᓂᐟ ᐃᑌᐧᐃᐧᓇ ᑭᑐᓂᕽ;

¹⁰ ᐋᐧᐸᐦᑕ, ᐊᓄᐦᐨ ᑳ ᑭᓯᑳᐠ ᑭ ᑭ ᑎᐯᔨᐦᑕᒧᐃᑎᐣ ᓇᓈᑐᑯᐢᑳᐣ ᐊᔨᓯᔨᓂᐊᐧᐠ ᒥᓇ ᑭᐦᒋ ᐅᑭᒫᐃᐧᐃᐧᓇ, ᑭᑕ ᒪᓂᐱᑕᒪᐣ, ᒥᓇ ᑭᑕ ᐱᑯᓇᒪᐣ, ᒥᓇ ᑭᑕ ᓂᓯᐊᐧᓈᒋᐦᑖᔭᐣ, ᒥᓇ ᑭᑕ ᓂᐦᒋᐁᐧᐸᐊᒪᐣ; ᑭᑕ ᐅᓯᐦᑖᔭᐣ, ᒥᓇ ᑭᑕ ᑭᐢᑎᑳᑕᒪᐣ.

¹¹ ᒥᓇ ᒫᑲ ᑳ ᑎᐯᔨᐦᒋᑫᐟ ᐅᐟ ᐃᑌᐧᐃᐧᐣ ᓂ ᑭ ᐅᑎᐦᑎᑯᐣ, ᐁ ᐃᓯᐟ, ᒉᕒᐃᒫᔭ, ᑫᑲᐧᐩ ᐃᐧᔮᐸᐦᑕᒪᐣ? ᓂ ᑭ ᐃᑖᐧᐣ ᒫᑲ, ᓂ ᐋᐧᐸᒫᐤ ᒥᐢᑎᐠ ᐸᑫᓵᓂᒥᓈᑎᐠ.

¹² ᐁᑲᐧ ᑳ ᑎᐯᔨᐦᒋᑫᐟ ᓂ ᑭ ᐃᑎᐠ, ᑲᐧᔭᐢᐠ ᑳ ᐃᓯ ᐋᐧᐸᐦᑕᒪᐣ; ᒋᑫᒫ ᓂ ᑭᑌᔨᑌᐣ ᓂᐟ ᐃᑌᐧᐃᐧᐣ ᑭᑕ ᑎᐱᑐᑕᒫᐣ.

¹³ ᐅᐟ ᐃᑌᐧᐃᐧᐣ ᒫᑲ ᑳ ᑎᐯᔨᐦᒋᑫᐟ ᓂ ᑭ ᐅᑎᐦᑎᑯᐣ ᐁᑲᐧ ᑭᐦᑖᐧᒼ, ᐁ ᐃᓯᐟ, ᑫᑲᐧᐩ ᐃᐧᔮᐸᐦᑕᒪᐣ? ᓂ ᑭ ᐃᑖᐧᐣ ᒫᑲ, ᓂ ᐋᐧᐸᒫᐤ ᒥᐢᑕᐢᑭᕽ ᐁᑯᓯ ᑭᐁᐧᑎᓄᕽ ᐅᐦᒋ ᑭᐱᐸᔨᐤ.

¹⁴ ᐁᑲᐧ ᑳ ᑎᐯᔨᐦᒋᑫᐟ ᓂ ᑭ ᐃᑎᐠ, ᑭᐁᐧᑎᓄᕽ ᐅᐦᒋ ᒫᔨᑫᑲᐧᐩ ᑭᑕ ᒧᐢᑭᐢᑖᑲᐧᐠ ᑲᐦᑭᔭᐤ ᑳ ᐅᐟ ᐃᐦᑖᐃᐧᓂᒋᐠ ᐊᐢᑭᕽ.

¹⁵ ᒋᑫᒫ, ᒫᑎᑲ, ᓂ ᑲ ᓇᑐᒫᐊᐧᐠ ᑲᐦᑭᔭᐤ ᑳ ᑕᐦᑐᐢᑳᓀᔮᑭ ᑭᐦᒋ ᐅᑭᒫᐃᐧᐃᐧᓇ ᑭᐁᐧᑎᓄᕽ, ᐃᑌᐧᐤ ᑳ ᑎᐯᔨᐦᒋᑫᐟ; ᑭᑕ ᐯ ᐃᑐᐦᑌᐊᐧᐠ ᒫᑲ, ᐁᑯᓯ ᑭᑕ ᐊᐢᑖᐊᐧᐠ ᑲᐦᑭᔭᐤ ᐅ ᑭᐦᒋ ᐅᑭᒫᐊᐧᐱᐃᐧᓂᐋᐧᐊᐧ ᐁ ᐊᑎ ᐱᐦᑐᑫᕽ ᒉᕒᐅᓴᓬᐊᒼ ᑭᐦᒋᐃᐢᑳᐧᑌᒼ, ᒥᓇ ᐅᐦᑎᐢᑲᐤ ᑲᐦᑭᔭᐤ ᒣᓂᐢᑭᑫᐃᐧᓇ ᐁᑯᑕ ᐋᐧᐢᑳ, ᒥᓇ ᐅᐦᑎᐢᑲᐤ ᑲᐦᑭᔭᐤ ᒍᑕ ᐅᑌᓇᐊᐧ.

¹⁶ ᓂ ᑲ ᐃᐧᐦᑕᒪᐋᐧᐊᐧᐠ ᒫᑲ ᓄᔭᓱᐋᐧᓯᐁᐧᐃᐧᓇ ᑲᐦᑭᔭᐤ ᐅ ᒪᒑᔨᐃᐧᓂᐋᐧᐤ ᐅᐦᒋ; ᐊᓂᒪ ᐁ ᑭ ᓇᑲᓯᒋᐠ, ᒥᓇ ᐁ ᑭ ᒪᒍᐢᑌᐊᒪᐋᐧᒋᐠ ᐃᐧᑭᒫᓯᑲᐣ ᑯᑕᑲ ᒪᓂᑐᐊᐧ, ᒥᓇ ᐁ ᑭ ᐊᔮᒥᐋᐃᐧ ᐊᑐᐢᑳᑕᐦᑭᐠ ᐅᓯᐦᒋᑲᓇ ᐃᐧᔭᐋᐧᐤ ᐅᒋᐦᒋᐋᐧᕽ ᐅᐦᒋ.

¹⁷ ᑭᔭ ᒫᑲ ᐸᑲᐧᑌᐦᐅ, ᐁᑯᓯ ᐸᓯᑯ, ᒥᓇ ᐃᐧᐦᑕᒪᐃᐧᐠ ᑲᐦᑭᔭᐤ ᑳ ᐃᑕᓱᐋᐧᑎᑖᐣ; ᐁᑳᐃᐧᔭ ᑯᓯᐠ, ᐁᑳ ᓂᔭ ᑭᑕ ᓭᑭᐃᑖᐣ ᐁ ᑲᓇᐋᐧᐸᒥᐢᑭᐠ.

¹⁸ ᒋᑫᒫ, ᒫᑎᑲ, ᑭ ᑭ ᐃᓯᐦᐃᑎᐣ ᐊᓄᐦᐨ ᑳ ᑭᓯᑳᐠ ᑳ ᐊᓱᐃᐧᓂᑲᑌᐠ ᐅᑌᓇᐤ, ᒥᓇ ᐱᐋᐧᐱᐢᑯ ᒋᒪᒋᑲᐣ, ᒥᓇ ᐅᓵᐋᐧᐱᐢᑯ ᒣᓂᐢᑭᑫᐃᐧᓇ, ᐁ ᐊᓭᔨᒪᑭᐠ ᒥᓯᐁᐧ ᐁᐢᐱᒑᐠ ᐅᒪ ᐊᐢᑭ, ᒍᑕ ᑭᐦᒋ ᐅᑭᒫᐊᐧᐠ, ᒥᓇ ᑳ ᐅᑭᒫᑲᑕᑭᐠ ᐁᑯᑕ, ᐊᔭᒥᐦᐁᐃᐧᔨᓂᐊᐧᐠ ᐁᑯᑕ, ᒥᓇ ᐊᔨᓯᔨᓂᐊᐧᐠ ᐁᑯᑕ ᑳ ᐅᐟ ᐊᐢᑭᒋᐠ.

¹⁹ ᑭ ᑲ ᓄᑎᓂᑲᐧᐠ ᒫᑲ; ᐁᑯᓯ ᓇᒪᐃᐧᔭ ᑭ ᑲ ᑭ ᓵᑯᒋᐦᐃᑲᐧᐠ; ᒋᑫᒫ ᑭ ᐃᐧᒉᐃᐧᑎᐣ ᐃᑌᐧᐤ ᑳ ᑎᐯᔨᐦᒋᑫᐟ, ᑭᑕ ᐸᐢᐱᐦᐃᑖᐣ.