aysāya 1 - ᑲᓈᒋ ᑭᐦᒋ ᒪᓯᓈᐦᐃᑲᐣ1 ᐅᐟ ᐃᓯᓇᒧᐃᐧᐣ ᐊᐩᓵᔭ ᐅᑯᓯᓴ ᐁᒫᐢ, ᑳ ᑭ ᐋᐧᐸᐦᑕᕽ ᑳ ᐊᔨᑭᕽ ᒍᑕ ᒥᓇ ᒉᕒᐅᓴᓬᐊᒼ ᐁ ᒣᑳᐧ ᐅ ᑭᓯᑳᒥᒋᐠ ᐊᓵᔭ, ᒑᐦᑖᒼ, ᐁᐦᐋᐢ, ᒥᓇ ᐦᐁᓯᑳᔭ, ᒍᑕ ᑭᐦᒋ ᐅᑭᒫᐊᐧᐠ. 2 ᓇᑐᐦᑕᒧᐠ ᑭᔭᐋᐧᐤ ᑭᓯᑲᐧ, ᒥᓇ ᐯᐦᑕ ᑭᔭ ᐊᐢᑭ, ᒋᑫᒫ ᑳ ᑎᐯᔨᐦᒋᑫᐟ ᑭ ᐱᑭᐢᑫᐧᐤ; ᓂ ᑭ ᐅᐦᑖᐸᓂᐋᐊᐧᐠ ᒥᓇ ᓂ ᑭ ᐅᐦᐱᑭᐋᐊᐧᐠ ᐊᐋᐧᓯᓴᐠ, ᒫᑲ ᓂ ᑭ ᐁᐧᐱᓂᑲᐧᐠ. 3 ᒧᐢᑐᐢ ᑭᐢᑫᔨᒣᐤ ᑳ ᑎᐯᔨᒥᑯᐟ, ᒥᓇ ᓱᓱᐃᐧᒥᐢᑕᑎᒼ ᐅᐟ ᐅᑭᒫᒪ ᐃᑕ ᐁ ᐊᓴᒥᑯᐟ; ᒫᑲ ᐃᐢᕒᐁᐃᓬ ᓇᒪᐃᐧᔭ ᑭᐢᑫᔨᑕᒪᐧᐠ, ᓂᐟ ᐊᔨᓯᔨᓂᒪᐠ ᓇᒪᐃᐧᔭ ᒫᒥᑐᓀᔨᑕᒪᐧᐠ. 4 ᐋᐦ ᑳ ᒪᒑᔨᐃᐧᒋᐠ ᐁ ᐃᑕᐢᑳᓀᓯᒋᐠ, ᐊᔨᓯᔨᓂᐊᐧᐠ ᑳ ᐹᐧᐊᐧᑌᒋᐠ ᒪᒋᐃᑎᐃᐧᐣ, ᑳ ᐅᐟ ᐊᐋᐧᓯᒥᓯᒥᑯᒋᐠ ᐅᒪᒋᑐᑕᒧᐢᑲ, ᐊᐋᐧᓯᓴᐠ ᑳ ᓂᓯᐊᐧᓈᒋᐃᓱᐢᑭᒋᐠ; ᑭ ᐁᐧᐱᓀᐊᐧᐠ ᑳ ᑎᐯᔨᐦᒋᑫᔨᐟ, ᑭ ᑭᓯᐋᐧᐁᐊᐧᐠ ᐅᑲᓈᑎᓯᒥᔨᐊᐧ ᐃᐢᕒᐁᐃᓬᐊ, ᑳᐃᐧ ᑭᐁᐧᐊᐧᐠ. 5 ᑖᓀᐦᑭ ᑫᔮᐱᐨ ᑫ ᐋᔨᒥᐃᑲᐃᐧᔦᐠ? ᐋᐦᒋᐱᑯ ᑭ ᐃᐧ ᐁᐧᐱᓂᓈᐋᐧᐤ; ᒥᓯᐁᐧ ᒥᐢᑎᑳᐧᐣ ᐋᐦᑯᓯᒪᑲᐣ, ᒥᓇ ᒥᓯᐁᐧ ᒥᑌᐦ ᓀᓱᐊᐧᐣ. 6 ᒪᔭᑳᐢᑭᓯᑖᓂᕽ ᐅᐦᒋ ᐱᔨᐢ ᒥᐢᑎᑳᐧᓂᕽ ᓇᒪ ᓈᐣᑕᐤ ᒥᓯᐁᐧᔮᐤ ᒫᑲ ᒥᓵᐧᑲᓂᐃᐧᐣ, ᒥᓇ ᐋᔦᑎᓯᐃᐧᓇ, ᒥᓇ ᐁ ᐱᑭᐢᑲᑕᑎᑭ ᐅᒥᑭᐃᐧᓇ; ᓇᒪᐃᐧᔭ ᑭᐸᐦᐃᑳᑌᐊᐧ, ᐊᐦᐳ ᑕᐦᑯᐱᑌᐊᐧ, ᐊᐦᐳ ᔪᐢᑲᐦᐃᑳᑌᐊᐧ ᐱᒥ ᐅᐦᒋ. 7 ᑭᐟ ᐊᐢᑭᐋᐧᐤ ᑭᐋᐧᑕᐣ; ᑭᐟ ᐅᑌᓈᐋᐧᐊᐧ ᓴᐢᑭᑌᐊᐧ ᐃᐢᑯᑌᐤ ᐅᐦᒋ; ᑭᐟ ᐊᐢᑭᐋᐧᐤ, ᒫᓂᑌᐊᐧᐠ ᑭᑖᐊᐧᐠ ᐁ ᐋᐧᐸᒫᔦᑯᐠ, ᒥᓇ ᑭᐋᐧᑕᐣ, ᒪᓇ ᐱᑯ ᐁ ᑭ ᓂᓯᐊᐧᓈᒋᐦᑖᒋᐠ ᒫᓂᑌᐊᐧᐠ. 8 ᐅᑖᓂᓯᒫᐤ ᓵᔭᓂᕽ ᓇᑲᑖᐤ ᑖᐱᐢᑯᐨ ᓱᒥᓂᑭᐢᑎᑳᓂᑲᒥᐠ, ᑖᐱᐢᑯᐨ ᑯᑲᒼᐸᕒ ᓂᐦᑖᐃᐧᑭᒋᑲᓂᕽ, ᑖᐱᐢᑯᐨ ᑳ ᒪᐃᐧᓀᐊᒥᕽ ᐅᑌᓇᐤ. 9 ᑭᐢᐱᐣ ᐁᑳ ᑳ ᑎᐯᔨᐦᒋᑫᐟ ᒥᓯᐁᐧ ᓯᔪᑳᑎᓯᐟ ᓈᐢᐱᐨ ᒐᑲᐋᐧᓯᐢ ᑭ ᐃᐢᑯᓂᑯᔭᕽ, ᑭ ᑲ ᑭ ᐃᓯᓈᑯᓯᑖᓇᐤ ᑖᐱᐢᑯᐨ ᓵᑕᒼ, ᒥᓇ ᑭ ᑲ ᑭ ᐃᓯᓈᑯᒋᑳᑖᓇᐤ ᑖᐱᐢᑯᐨ ᑲᒫᕒᐊ. 10 ᓇᑐᐦᑕᒧᐠ ᐅᐟ ᐃᑌᐧᐃᐧᐣ ᑳ ᑎᐯᔨᐦᒋᑫᐟ ᑭᔭᐋᐧᐤ ᓵᑕᒼ ᑌᐯᔨᑕᒣᐠ; ᐱᓯᒋᑕᒫᐧᕽ ᐅᐟ ᐃᑕᓱᐁᐧᐃᐧᐣ ᑭ ᑭᓭᒪᓂᑐᒥᓇᐤ ᑭᔭᐋᐧᐤ ᑲᒫᕒᐊ ᐊᔨᓯᔨᓂᐊᐧᐟ. 11 ᑖᓂᓯ ᐁᑖᐸᑕᑭ ᑳ ᐅᓵᒣᔭᑎᑭ ᑳ ᐁᐧᐱᓈᓱᐢᑕᐃᐧᔦᐠ? ᐃᑌᐧᐤ ᑳ ᑎᐯᔨᐦᒋᑫᐟ; ᓂ ᓵᑲᐢᑭᓀᐢᑳᑯᐣ ᑳ ᒪᒍᐢᑌᐊᒪᐃᐧᔦᐠ ᔮᐯᒫᔭᑎᑲᐧᐠ, ᒥᓇ ᐅ ᐃᐧᔨᓄᐋᐧᐤ ᑳ ᑖᐦᒋᐳᐃᐦᒋᐠ ᐱᓯᐢᑭᐊᐧᐠ; ᓇᒪᐃᐧᔭ ᒫᑲ ᓂ ᒥᔦᐧᔨᑌᐣ ᐅ ᒥᐦᑯᐋᐧᐤ ᔮᐯᒧᐢᑐᓴᐧᐠ, ᐊᐦᐳ ᒫᔭᑎᐦᑯᓴᐠ, ᐊᐦᐳ ᔮᐯᐋᐸᑎᑲᐧᐠ. 12 ᐃᐢᐱ ᐱᔦᓇᑕᐃᐧ ᐅᐦᑎᐢᑲᐃᐧᐢᑕᐃᐧᔦᑯ, ᐊᐁᐧᓇ ᐅᒪ ᑳ ᓇᑕᐁᐧᔨᑕᒫᑯᔦᐠ, ᑭᑕ ᑕᐦᑯᐢᑫᔦᐠ ᓂ ᒫᐊᐧᒋᐦᐃᑐᐃᐧᑲᒥᑯᕽ? 13 ᐁᑳᐃᐧᔭ ᒥᓇ ᐯᑖᐠ ᐱᑯᓇᑕ ᐸᑭᑎᓈᓱᐃᐧᓇ; ᐃᐧᑭᒫᓯᑲᐣ ᓂ ᐸᑲᐧᑌᐣ; ᐁ ᐅᐢᑲᑯᒋᕽ ᐱᓯᒼ ᒥᓇ ᐁ ᐊᔦᐧᐱᐃᐧᑭᓯᑳᐠ, ᑭ ᓇᑐᐦᑫᒧᐃᐧᓂᐋᐧᐤ, ᓇᒪᐃᐧᔭ ᓂ ᑭ ᓇᐃᐢᑳᑯᐣ, ᒪᒑᔨᐊᐧᐣ ᐊᐦᐳ ᑳ ᑯᓯᑫᐧᔨᑖᑲᐧᕽ ᑭ ᒫᐊᐧᒋᐦᐃᑐᐃᐧᓂᐋᐧᐤ. 14 ᑳ ᐅᐢᑲᑯᒋᑭᐠ ᐱᓯᒪᐧᐠ ᒥᓇ ᑳ ᐅᔭᑭᑕᒣᐠ ᑭ ᐃᐦᑯᑐᐃᐧᓂᐋᐧᐊᐧ ᐸᑳᐧᑕᒼ ᓂᐟ ᐊᐦᒑᕽ; ᓂ ᒥᑯᐢᑳᑌᔨᑕᒥᐃᑯᐣ; ᓂᐟ ᐊᔦᐢᑯᐃᑯᐣ ᑭᑕ ᓇᔭᑕᒫᐣ. 15 ᐃᐢᐱ ᒫᑲ ᓱᐃᐧᓂᐢᑫᐢᑕᐃᐧᔦᑯ, ᑭ ᑲ ᑳᓱᐢᑖᑎᓈᐋᐧᐤ; ᐁᐦᐁ, ᐃᐢᐱ ᒥᐦᒉᐟ ᐊᔭᒥᐦᐋᐃᐧᓇ ᐁᐧᓯᑖᔦᑯ, ᓇᒪᐃᐧᔭ ᓂ ᑲ ᓇᑐᐦᑌᐣ; ᑭᒋᐦᒋᐋᐧᐊᐧ ᒧᐢᑭᓀᐊᐧ ᒥᐦᑯ. 16 ᑭᒋᐢᑖᐹᐊᐧᔪᐠ, ᐯᐦᑭᐃᓱᐠ; ᐃᑲᑌᓇᒧᐠ ᑳ ᒪᒑᔨᐊᐧᑭ ᑭᐟ ᐃᐦᑐᑕᒧᐃᐧᓂᐋᐧᐊᐧ ᐁᑳ ᑭᑕ ᐋᐧᐸᐦᑕᒫᐣ; ᐳᓂᑖᐠ ᒪᒋᑐᑕᒧᐃᐧᐣ; 17 ᑲᑫᐧ ᒥᔪᑐᑕᒧᐠ; ᓇᑐᓇᒧᐠ ᐅᔭᓱᐋᐧᓯᐁᐧᐃᐧᐣ, ᓂᓱᑲᒫᑯᐠ ᑳ ᑭᑎᒪᐦᐃᐦᒋᐠ, ᐅᔭᓱᐋᐧᑎᑯᐠ ᑳ ᑭᐋᐧᑎᓯᒋ, ᐱᑭᐢᑫᐧᐢᑕᒫᕽ ᓯᑳᐃᐧᐢᑫᐧᐤ. 18 ᐋᐢᑕᒥᑎᐠ ᐁᑲᐧ, ᒫᐦᑎ ᒫᒪᐃᐧ ᓈᓈᑲᓱᐁᐧᑖᐠ ᐃᑌᐧᐤ ᑳ ᑎᐯᔨᐦᒋᑫᐟ; ᐋᑕ ᒥᐦᑫᐧᑭᐣ ᐃᓯᓈᑲᐧᑳᐧᐃᐧ ᑭ ᒪᒋᐃᑎᐃᐧᓂᐋᐧᐃᐧ, ᑭᑕ ᐋᐧᐱᐢᑳᐊᐧ ᑖᐱᐢᑯᐨ ᑯᓇ; ᐋᑕ ᐸᑲᐢᑭᒥᐦᑳᐧᑳᐧᐃᐧ, ᒫᔭᑎᐦᑯᐱᐋᐧᕽ ᑭᑕ ᐃᓯᓈᑲᐧᓇᐧ. 19 ᑭᐢᐱᐣ ᐃᑌᔨᑕᒣᑯ ᒥᓇ ᓇᓇᐃᑕᒣᑯ, ᑭ ᑲ ᒥᒋᓈᐋᐧᐤ ᑳ ᒥᔮᐧᓯᐠ ᐊᐢᑭᕽ ᐅᐦᒋ; 20 ᒫᑲ ᑭᐢᐱᐣ ᐋᓀᑕᒣᑯ ᒥᓇ ᒫᔭᑲᒥᑭᓯᔦᑯ, ᑭ ᑲ ᓂᓯᐊᐧᓈᒋᐃᑲᐃᐧᓈᐋᐧᐤ ᐃᓴᐁᐧᐢᐠ ᐅᐦᒋ; ᒋᑫᒫ ᐅᑐᓂᕽ ᑳ ᑎᐯᔨᐦᒋᑫᐟ ᑭ ᐃᐧᐦᑕᒼ. 21 ᑖᓂᓯ ᐊᔮᑲᐧᒥᓯᐃᐧ ᐅᑌᓇᐤ ᐁᓯ ᐱᓯᑳᐧᑎᓯᐢᑫᐧᐊᐧᕽ! ᑭ ᑌᐱᐢᑲᒧᒪᑲᐣ ᐅᔭᓱᐊᐧᓯᐁᐧᐃᐧᐣ! ᑲᐧᔭᐢᑭᑕᑎᓯᐃᐧᐣ ᑭ ᐅᐟ ᐃᐦᑕᐃᐧᓂᐊᐧᐣ, ᒫᑲ ᐁᑲᐧ ᐅᓂᐸᑖᑫᐢᑲᐠ. 22 ᑭ ᐋᐧᐱᐢᑭᓱᓂᔮᒼ ᐊᑎ ᓯᑲᐁᐧᔮᐱᐢᑭᓱ, ᑭ ᓱᒥᓈᐳᒼ ᓂᐱᑲᐦᑌᐤ. 23 ᑯᑭᒫᒪᐠ ᒫᔭᑲᒥᑭᓯᐢᑭᐊᐧᐠ, ᒥᓇ ᐅ ᐃᐧᒉᐋᐧᑲᓂᐊᐧᐠ ᑭᒧᑎᐢᑲ; ᑳ ᐃᐦᑕᓯᒋᐠ ᓵᑭᐦᑖᐊᐧᐠ ᒣᑭᐃᐧᓇ, ᒥᓇ ᐱᒥᑎᓴᐦᐊᒪᐧᐠ ᑎᐸᐦᐊᒫᑫᐃᐧᓇ; ᓇᒪᐃᐧᔭ ᐅᔭᓱᐋᐧᑌᐊᐧᐠ ᐅᑭᐋᐧᑎᓴ, ᒥᓇ ᓇᒪᐃᐧᔭ ᐅᑎᐦᑎᑲᐧᐠ ᐁ ᐃᓯ ᐊᔮᔨᐟ ᓯᑳᐃᐧᐢᑫᐧᐊᐧ. 24 ᐁᐊᐧᑯ ᐅᐦᒋ ᑳ ᐃᑌᐧᐟ ᑳ ᑎᐯᔨᐦᒋᑫᐟ ᑳ ᑎᐯᔨᐦᒋᑫᐟ ᒥᓯᐁᐧ ᓯᔪᑳᑎᓯᐟ, ᐅ ᑭᐦᒑᔨᒪ ᐃᐢᕒᐁᐃᓬ, ᐋᐦ, ᓂ ᑲ ᑭᓯᔪᐣ ᑳ ᐸᑳᐧᓯᒋᐠ, ᒥᓇ ᓂ ᑲ ᐋᐯᐦᐅᐣ ᓂ ᓄᑎᓈᑲᓇᐠ; 25 ᑭ ᑲ ᑫᐧᐢᑭᓇᒫᑎᐣ ᒫᑲ ᓂᒋᐦᒋ, ᒥᓇ ᒥᑐᓂ ᓂ ᑲ ᑭᒋᐢᑎᓀᐣ ᑭ ᐱᐋᐧᐱᐢᑭᓱᐃᐧᐣ, ᒥᓇ ᓂ ᑲ ᐃᑲᑌᓀᐣ ᑲᐦᑭᔭᐤ ᑭ ᐋᐧᐱᑲᐧᑯᒼ; 26 ᑳᐃᐧ ᒫᑲ ᓂ ᑲ ᐸᑭᑎᓈᐊᐧᐠ ᑯᔭᓱᐁᐧᐃᐧᑭᒫᒪᐠ ᑖᐱᐢᑯᐨ ᓂᐢᑕᒼ, ᒥᓇ ᑯᔭᓱᐁᐧᐃᐧᔨᓂᒪᐠ ᑖᐱᐢᑯᐨ ᐅᐢᑲᐨ; ᒣᐧᐢᑕᐢ ᐃᔨᑯᕽ ᒫᑲ ᑭ ᑲ ᐃᑎᑲᐃᐧᐣ ᑲᐧᔭᐢᑭᓯᐁᐧᐱᓯᐃᐧ ᐅᑌᓇᐤ, ᐊᔮᑳᐧᒥᓯᐃᐧ ᐅᑌᓇᐤ. 27 ᓵᔭᐣ ᑭᑕ ᑭᐢᐱᓇᒋᑳᑌᐤ ᐅᔭᓱᐋᐧᓯᐁᐧᐃᐧᐣ ᐅᐦᒋ, ᒥᓇ ᐅ ᑫᐧᐢᑳᑎᓯᒪ ᑲᐧᔭᐢᑭᑖᑎᓯᐃᐧᐣ ᐅᐦᒋ. 28 ᐅ ᓂᓯᐊᐧᓈᑎᓯᐃᐧᓂᐋᐧᐤ ᒫᑲ ᐅᐋᓂᑐᑕᒧᐢᑲᐠ ᒥᓇ ᐅᒪᒑᑎᓴᐠ ᑭᑕ ᒫᒪᐊᐧᓂᔨᐤ; ᒥᓇ ᐊᓂᑭ ᑳ ᐁᐧᐱᓇᒋᐠ ᑳ ᑎᐯᔨᐦᒋᑫᔨᐟ ᑭᑕ ᒣᐦᒋᐋᐊᐧᐠ. 29 ᒋᑫᒫ ᑭᑕ ᓇᓀᐯᐃᐧᐦᐃᑲᐧᐠ ᒪᐢᑲᐋᐧᑎᑲᐧ ᑳ ᑭ ᓇᑕᐁᐧᔨᒥᒫᔦᐠ, ᒥᓇ ᑭ ᑲ ᐊᐧᐋᐧᓀᔨᑌᓈᐋᐧᐤ ᑭᐢᑎᑳᓇ ᐅᐦᒋ ᑳ ᑭ ᓇᐊᐧᓱᓇᒣᐠ. 30 ᒋᑫᒫ ᑭ ᑲ ᐃᓯ ᐊᔮᓈᐋᐧᐤ ᑖᐱᐢᑯᐨ ᒪᐢᑲᐋᐧᑎᐠ ᐅ ᓂᐱᒼ ᑳ ᐊᐧᐸᐃᑌᔨᐠ ᒥᓇ ᑖᐱᐢᑯᐨ ᑭᐢᑎᑳᐣ ᐁᑳ ᑳ ᓂᐱᐊᐧᕽ. 31 ᑳ ᒪᐢᑲᐃᐧᓯᐟ ᒫᑲ ᑭᑕ ᐃᓯᐊᔮᐤ ᑖᐱᐢᑯᐨ ᐱᓭᐧᐱᒋᑲᐣ, ᒥᓇ ᐅᐟ ᐊᑐᐢᑫᐃᐧᐣ ᑖᐱᐢᑯᐨ ᑳ ᐸᐢᑭᑌᐠ; ᑭᑕ ᒫᒪᐃᐧ ᑳᐧᑯᓱᐊᐧᐠ ᒫᑲ, ᐁᑯᓯ ᓇᒪ ᐊᐃᐧᔭ ᑭᑕ ᐋᐢᑕᐁᐧᐅᑲᐧᐠ. |
This Bible text is a corrected edition of the 1908 Western Cree Bible; it is in the public domain.
Canadian Bible Society