ᓃᓵᐧᐤ ᑎᒪᑏ 1 - ᑲᓈᒋ ᑭᐦᒋ ᒪᓯᓈᐦᐃᑲᐣ1 ᐹᓬ ᐅᐟ ᐊᐹᐢᑎᓬᐃᒪ ᒋᓴᐢ ᙭ ᐁ ᐃᑌᔨᑕᕽ ᑭᓭᒪᓂᑐ ᐁ ᐃᓯ ᐊᓱᑕᒫᑲᐃᐧᔭᕽ ᐊᓂᒪ ᐱᒫᑎᓯᐃᐧᐣ ᙭ ᒋᓴᐢ ᑳ ᐊᔮᐟ, 2 ᐁ ᒪᓯᓇᐦᐊᒫᑖᐣ ᑎᒪᑏ ᑳ ᓵᑭᐦᐃᑖᐣ ᓂᑯᓯᐢ; ᑭᓭᐋᐧᑐᑖᑯᐃᐧᐣ ᑭᑎᒫᑭᓈᑯᐃᐧᐣ ᒦᓇ ᐯᔭᑕᑫᔨᒧᐃᐧᐣ ᑭ ᑲ ᐃᐧ ᐅᐦᒋᐢᑕᒫᐠ ᑭᓭᒪᓂᑐ ᐁᐧᔪᑖᐃᐧᕽ ᒥᓇ ᙭ ᒋᓴᐢ ᑳ ᑎᐯᔨᒥᑯᔭᕽ. 3 ᓂ ᓇᓈᐢᑯᒫᐤ ᑭᓭᒪᓂᑐ ᑳ ᐊᑐᐢᑲᐊᐧᐠ ᑲᔮᐢ ᓄᑖᐃᐧᔭᐠ ᐅᐦᒋ ᐯᐦᑭ ᑭᐢᑫᔨᒥᓱᐃᐧᓂᕽ ᑖᓂᔨᑯᕽ ᐁᑳ ᐁ ᐳᓂ ᑭᐢᑭᓯᑐᑖᑖᐣ ᓂ ᒪᐃᐧᒧᐢᒋᑫᐃᐧᓂᕽ ᐁ ᑎᐱᐢᑳᐠ ᒥᓇ ᐁ ᑭᓯᑳᐠ 4 ᐁ ᓄᑌ ᐋᐧᐸᒥᑖᐣ ᐁ ᑭᐢᑭᓯᑐᑕᒫᐣ ᑯᒋᑲᐋᐧᐱᐃᐧᓇ ᑭᑕ ᑭ ᒧᐢᑭᓀᐢᑳᑯᔮᐣ ᒪᒪᐦᑖᑯᓯᐃᐧᐣ; 5 ᐁ ᑭ ᒥᐢᑲᐋᐧᓱᒥᑲᐃᐧᔮᐣ ᐁᑳ ᑳ ᑲᔦᓴᕽ ᑖᐯᐧᔦᔨᑕᒧᐃᐧᐣ ᑳ ᑭᑭᐢᑳᑯᔭᐣ; ᓂᑳᐣ ᑳ ᑭ ᑭᑭᐢᑳᑯᐟ ᑯᐦᑯᒼ ᕒᐋᐃᐢ ᒥᓇ ᑭᑳᐃᐧ ᔪᓂᓯ; ᐁᑯᓯ ᓂᐟ ᐃᓯ ᑫᒋᓈᐅᐣ ᑭᐢᑕ ᐁ ᑭᑭᐢᑳᑯᔭᐣ. 6 ᐁᐊᐧᑯ ᐅᐦᒋ ᒫᑲ ᑭ ᒥᐢᑲᐋᐧᓱᒥᑎᐣ ᑭᑕ ᐋᑲᒥᑖᔭᐣ ᐅ ᒣᑭᐃᐧᐣ ᑭᓭᒪᓂᑐ ᑳ ᑭᑭᐢᑳᑯᔭᐣ ᓂ ᓵᒥᓂᐁᐧᐃᐧᐣ ᐅᐦᒋ. 7 ᒋᑫᒫ ᑭᓭᒪᓂᑐ ᑭ ᑭ ᒥᔨᑯᓇᐤ ᓇᒪᐃᐧᔭ ᐊᐢᑖᓯᐃᐧ ᐊᐦᒑᐦᑲᐧ; ᒫᑲ ᒪᐢᑲᐃᐧᓯᐃᐧᐣ ᒥᓇ ᓵᑭᐦᐃᐁᐧᐃᐧᐣ ᒥᓇ ᐊᔮᑳᐧᒥᓯᐃᐧᐣ. 8 ᐁᑳᐃᐧᔭ ᒫᑲ ᑭ ᑲ ᐃᐧ ᓇᓀᐯᐃᐧᐃᑯᐣ ᐅᐟ ᐋᒋᒧᐃᐧᐣ ᑳ ᑎᐯᔨᒥᑯᔭᕽ ᐊᐦᐳ ᓂᔭ ᑳ ᑭᐸᐃᑳᓱᔮᐣ ᐃᐧᔭ ᐅᐦᒋ; ᒫᑲ ᑭᐢᑕ ᑯᑌᔨᑕ ᑯᑕᑭᑖᐃᐧᓇ ᒥᔮᐧᒋᒧᐃᐧᓂᕽ ᐁ ᐃᑕᐢᑌᔨᐠ ᐅ ᑲᐢᑭᐦᐁᐃᐧᓯᐃᐧᐣ ᑭᓭᒪᓂᑐ; 9 ᑳ ᑭ ᐱᒫᒋᐃᑯᔭᕽ ᒥᓇ ᑳ ᑭ ᓇᑐᒥᑯᔭᕽ ᑲᓈᒋ ᓇᑐᑫᒧᐃᐧᓂᕽ ᓇᒪᐃᐧᔭ ᐁ ᐃᑕᐢᑌᑭ ᑭᐟ ᐃᓯᐦᒋᑫᐃᐧᓂᓇᐊᐧ ᒫᑲ ᐁ ᐃᑕᐢᑌᔨᐠ ᐃᐧᔭ ᐅ ᐊᐧᐁᐧᔦᔨᑕᒧᐃᐧᐣ ᒥᓇ ᐅ ᑭᓭᐋᐧᑎᓯᐃᐧᐣ ᑳ ᑭ ᐃᓯ ᒥᔨᑲᐃᐧᔭᕽ ᙭ ᒋᓴᐢ ᐃᓯ ᒥᒋᒫᐨ ᐅᐦᒋ, 10 ᒫᑲ ᐁᑲᐧ ᑳ ᑭ ᓄᑯᑖᓂᐊᐧᕽ ᐁ ᑭ ᓄᑯᓯᐟ ᑯᐱᒫᒋᐦᐃᐁᐧᒥᓇᐤ ᙭ ᒋᓴᐢ ᑳ ᑭ ᒣᐦᒋᑖᐟ ᓂᐳᐃᐧᐣ ᒥᓇ ᑳ ᑭ ᐋᐧᓴᐢᑯᑌᓇᕽ ᐱᒫᑎᓯᐃᐧᐣ ᒥᓇ ᑳᑭᑫ ᐱᒫᑎᓯᐃᐧᐣ ᒥᔮᐧᒋᒧᐃᐧᐣ ᐅᐦᒋ, 11 ᐁᐊᐧᑯ ᑳ ᑭ ᐅᔭᑭᒥᑲᐃᐧᔮᐣ ᑭᑕ ᑲᑫᐢᑭᑫᒧᔮᐣ ᒥᓇ ᑭᑕ ᐊᐹᐢᑎᓬᐃᐃᐧᔮᐣ ᒥᓇ ᑭᑕ ᑭᐢᑭᓄᐦᐊᒫᑫᔮᐣ. 12 ᐁᐊᐧᑯ ᐅᐦᒋ ᐅᒪ ᑳ ᐃᓯ ᑯᑕᑭᑖᔮᐣ; ᒫᑲ ᓇᒪᐃᐧᔭ ᓂ ᓇᓀᐯᐃᐧᓯᐣ; ᒋᑫᒫ ᓂ ᑭᐢᑫᔨᒫᐤ ᐊᓇ ᑳ ᑭ ᑖᐯᐧᑕᐊᐧᐠ ᒥᓇ ᓂ ᑫᒋᓈᐅᐣ ᐁ ᑲᐢᑭᑖᐟ ᑭᑕ ᑲᓇᐁᐧᔨᑕᕽ ᐊᓂᒪ ᑳ ᑭ ᑲᓇᐁᐧᔨᑕᒧᐊᐠ ᐱᔨᐢ ᐁᐊᐧᑯ ᑭᓯᑳᑭ. 13 ᒥᒋᒥᓇ ᐁ ᐃᓯ ᐋᐧᐸᐦᑕᐦᐃᐁᐧᑭ ᑳ ᐱᒫᑎᓯᐢᑳᑫᑭ ᐃᑌᐧᐃᐧᓇ ᑳ ᑭ ᐯᑕᒪᐣ ᐁ ᐃᐧᐦᑕᒫᐣ ᑖᐯᐧᔦᔨᑕᒧᐃᐧᓂᕽ ᒥᓇ ᓵᑭᐦᐃᐁᐧᐃᐧᓂᕽ ᑳ ᐊᔮᐟ ᙭ ᒋᓴᐢ. 14 ᐊᓂᒪ ᒥᔪ ᑫᑲᐧᐩ ᑳ ᑭ ᐸᑭᑎᓇᒫᑲᐃᐧᔭᐣ ᑲᓇᐁᐧᔨᑕ ᑳ ᑲᓈᑎᓯᐟ ᐊᐦᒑᕽ ᐅᐦᒋ ᑳ ᑭᑭᐢᑳᑯᔭᐠ. 15 ᐅᒪ ᑭ ᑭᐢᑫᔨᑌᐣ ᑲᐦᑭᔭᐤ ᐊᓂᑭ ᐁᓯᔭᐃᕽ ᑳ ᐊᔮᒋᐠ ᓂ ᑭ ᓇᑲᑎᑲᐧᐠ; ᐁᐊᐧᑯᓂᐠ ᐅᐦᒋ ᐱᒉᓬᐊᐢ ᒥᓇ ᐦᐊᕒᒫᒋᓂᐢ. 16 ᑳ ᑎᐯᔨᐦᒋᑫᐟ ᑭᑕ ᐃᐧ ᑭᑎᒫᑭᓇᐁᐧᐤ ᐁ ᐃᐦᑕᓯᔨᐟ ᐃᐧᑭᕽ ᐋᓀᓯᐹᕒᐊᐢ; ᒋᑫᒫ ᒥᒉᑖᐧᐤ ᓂ ᑭ ᐃᐧᒋᐃᐠ ᒥᓇ ᓇᒪᐃᐧᔭ ᐅᐦᒋ ᓇᓀᐯᐃᐧᐃᐠ ᓂ ᑕᑯᐱᓱᐃᐧᓈᐢᐠ; 17 ᒫᑲ ᒣᑳᐧᐨ ᕒᐅᒥᕽ ᐁ ᐊᔮᐟ ᑭ ᐋᑲᒣᔨᒧ ᐁ ᓇᑐᓇᐃᐧᐟ ᒥᓇ ᓂ ᑭ ᒥᐢᑳᐠ 18 (ᑳ ᑎᐯᔨᐦᒋᑫᔨᐟ ᑭᑕ ᐃᐧ ᐸᑭᑌᔨᑕᒫᐠ ᑭᑕ ᑭᑎᒫᑭᓇᑯᐟ ᑳ ᑎᐯᔨᐦᒋᑫᔨᐟ ᐁᐊᐧᑯ ᑭᓯᑳᑭ); ᒥᓇ ᑖᓇ ᑕᐦᑐ ᑫᑲᐧᐩ ᑳ ᑭ ᐃᓯ ᐸᒥᐦᐃᐁᐧᐟ ᐁᐱᓴᓯᕽ ᒥᑐᓂ ᑭ ᑭᐢᑫᔨᑌᐣ. |
This Bible text is a corrected edition of the 1908 Western Cree Bible; it is in the public domain.
Canadian Bible Society