ᓃᓵᐧᐤ ᓵᒼᔪᐃᓬ 1 - ᑲᓈᒋ ᑭᐦᒋ ᒪᓯᓈᐦᐃᑲᐣ1 ᑭ ᐊᔨᑭᐣ ᒫᑲ ᐃᐢᐱ ᐁ ᑭ ᓂᐱᐟ ᓵᓬ, ᑌᐱᐟ ᐁ ᑭ ᐯ ᑭᐁᐧᐟ ᐊᓂᒪ ᑳ ᑭ ᓂᐸᐦᐋᐟ ᐋᒪᓬᐃᑲᐃᑕ, ᐁᑯᓯ ᑌᐱᐟ ᐁ ᑭ ᐊᔮᐟ ᓂᓱ ᑭᓯᑳᐊᐧ ᓯᑲᓬᐋᑭᕽ: 2 ᑭ ᐊᔨᑭᐣ ᐊᓂᒪ ᐁ ᐊᑎ ᓂᐢᑐ ᑭᓯᑳᐠ, ᐳᑎ ᓈᐯᐤ ᑭ ᐯ ᐅᐦᑐᑌᐤ ᐅ ᑲᐯᓯᐃᐧᓂᔨᕽ ᓵᓬᐊ ᐁ ᑭ ᔮᔨᑭᐱᑕᕽ ᐅ ᑭᑭᐢᑳᒋᑲᓇ ᒥᓇ ᐊᓯᐢᑭ ᐅᐢᑎᑳᐧᓂᕽ ᐁ ᐊᔮᔨᐠ ᐁᑯᓯ ᒫᑲ ᑭ ᐃᐢᐸᔨᐤ, ᐃᐢᐱ ᐁᐧᑎᑖᐟ ᑌᐱᑕ, ᒧᐦᒋᕽ ᑭ ᐃᓯ ᑲᐃᐧᐸᔨᐦᐅ ᒥᓇ ᑭ ᐊᑕᒥᐢᑲᐁᐧᐤ. 3 ᑌᐱᐟ ᒫᑲ ᑭ ᐃᑌᐤ, ᑖᓂᑌ ᐁᐧᑐᑌᔭᐣ? ᑭ ᐃᑎᐠ ᒫᑲ, ᐅ ᑲᐯᓯᐃᐧᓂᕽ ᐃᐢᕒᐁᐃᓬ ᓂ ᐯ ᐅᐦᒋ ᐸᐢᐱᐣ. 4 ᑌᐱᐟ ᒫᑲ ᑭ ᐃᑌᐤ, ᑖᓂᓯ ᒫᑲ ᐁᐢᐸᔨᐠ? ᑭ ᐸᑯᓭᔨᒥᑎᐣ ᐃᐧᐦᑕᒪᐃᐧᐣ. ᑭ ᓇᐢᑫᐧᐊᐧᓯᒥᐠ ᒫᑲ, ᐊᔨᓯᔨᓂᐊᐧᐠ ᑕᐸᓯᐊᐧᐠ ᓄᑎᓂᑐᐃᐧᓂᕽ, ᒥᓇ ᒥᐦᒉᐟ ᐊᔨᓯᔨᓂᐊᐧᐠ ᐸᐦᑭᓯᓇᐧᐠ ᒥᓇ ᓂᐱᐊᐧᐠ; ᓵᓬ ᒫᑲ ᒥᓇ ᒑᓇᐦᑕᐣ ᐅᑯᓯᓴ ᓂᐱᐊᐧᐠ ᐊᓯᒋ. 5 ᑌᐱᐟ ᒫᑲ ᑭ ᐃᑌᐤ ᐊᓂᐦᐃ ᐅᐢᑭᓂᑭᐊᐧ ᑳ ᐃᐧᐦᑕᒫᑯᐟ, ᑖᓂᓯ ᐁᓯ ᑭᐢᑫᔨᑕᒪᐣ ᓵᓬ ᒥᓇ ᒑᓇᐦᑕᐣ ᐅᑯᓯᓴ ᐁ ᓂᐱᒋᐠ? 6 ᐁᑯᓯ ᐊᓂᐦᐃ ᐅᐢᑭᓂᑭᐊᐧ ᑳ ᐃᐧᐦᑕᒫᑯᐟ ᑭ ᐃᑎᐠ, ᓈᓇᐃᑖᐠ ᑭᓬᐳᐊ ᐊᐧᒋᕽ ᐁ ᐊᔮᔮᐣ, ᐳᑎ ᓵᓬ ᑭ ᓴᐢᑲᐅᑖᑫᐤ ᐅ ᑕᐦᑲᒋᑲᐣ; ᐁᑯᓯ ᒫᑎᑲ, ᑎᑎᐱᑖᐹᓈᐢᑲᐧ ᒥᓇ ᐅᑌᑕᐱᐊᐧ ᑭᓯᐋᐧᐠ ᑭ ᓇᐊᐧᓵᐧᑎᐠ. 7 ᐃᐢᐱ ᒫᑲ ᐃᔮᐸᓵᐱᐟ ᓂ ᐋᐧᐸᒥᐠ, ᐁᑯᓯ ᓂ ᑭ ᑌᐹᐧᑎᐠ, ᓂ ᑭ ᓇᐢᑫᐧᐊᐧᓯᒫᐤ ᒫᑲ, ᐅᑕ ᓂᐟ ᐊᔮᐣ. 8 ᐁᑯᓯ ᓂ ᑭ ᐃᑎᐠ, ᐊᐁᐧᓇ ᑭᔭ? ᓂ ᑭ ᓇᐢᑫᐧᐊᐧᓯᒫᐤ ᒫᑲ, ᐋᒪᓬᐃᑲᐃᐟ ᓂᔭ. 9 ᐁᑲᐧ ᒫᑲ ᓂ ᑭ ᐃᑎᐠ, ᐯ ᑕᑯᑳᐸᐃᐧᐢᑕᐃᐧᐣ ᑭ ᐸᑯᓭᔨᒥᑎᐣ ᒥᓇ ᓂᐸᐃᐣ, ᒋᑫᒫ ᑯᑕᑭᑖᐃᐧᐣ ᓄᑎᑎᓂᑯᐣ; ᐃᐧᔭ ᑫᔭᐱ ᓂ ᐱᒫᑎᓯᐃᐧᐣ ᐁ ᑭᑭᐢᑳᑯᔮᐣ. 10 ᐁᑯᓯ ᒫᑲ ᓂ ᑭ ᑕᑯᑳᐸᐃᐧᐢᑕᐋᐤ ᒥᓇ ᓂ ᑭ ᓂᐸᐦᐋᐤ, ᒋᑫᒫ ᐁ ᑫᐦᒋᓈᐅᔮᐣ ᐁᑳ ᒥᓴᐋᐧᐨ ᑭᑕ ᑭ ᐱᒫᑎᓯᐟ ᐃᐧᔭ ᓵᓴᐩ ᐁ ᑭ ᐸᐦᑭᓯᕽ: ᐁᑯᓯ ᓂ ᑭ ᐅᑎᓇᒫᐧᐣ ᑭᐦᒋ ᐅᑭᒫᐊᐧᐢᑐᑎᐣ ᑳ ᑭᑭᐢᑲᕽ ᐅᐢᑎᑳᐧᓂᕽ ᒥᓇ ᐊᐧᐁᐧᓯᐅᓈᐱᐢᑲᐧ ᐅᐢᐱᑐᓂᕽ ᑳ ᐊᔮᔨᐟ, ᐁᑯᓯ ᓂ ᑭ ᐯᑕᒪᐋᐧᐤ ᐅᑕ ᓂᐟ ᐅᑭᒫᒼ. 11 ᐁᑲᐧ ᑌᐱᐟ ᑭ ᐅᑎᑎᓇᒼ ᐅ ᑭᑭᐢᑳᒋᑲᓇ ᒥᓇ ᑭ ᔮᔨᑭᐱᑕᒼ; ᐁᑯᓯ ᒥᓇ ᑭ ᐃᑐᑕᒥᔨᐊᐧ ᑲᐦᑭᔭᐤ ᓈᐯᐊᐧ ᑳ ᐃᐧᒉᐃᐧᑯᐟ; 12 ᑭ ᑳᒫᐧᑎᓯᐊᐧᐠ ᒫᑲ ᒥᓇ ᑭ ᒫᑐᐊᐧᐠ, ᐁᑯᓯ ᑭ ᐃᔨᐊᐧᓂᓯᐃᓱᐊᐧᐠ ᐃᐢᑯ ᐁ ᐅᑖᑯᓯᓂᔨᐠ, ᓵᓬ ᐅᐦᒋ ᒥᓇ ᒑᓇᐦᑕᐣ ᐅᑯᓯᓴ, ᒥᓇ ᑳ ᑎᐯᔨᐦᒋᑫᐟ ᐅᐟ ᐊᔨᓯᔨᓂᒪ, ᒥᓇ ᐅ ᐋᐧᐢᑳᐦᐃᑲᐣ ᐃᐢᕒᐁᐃᓬ; ᒋᑫᒫ ᐁ ᑭ ᐸᐦᑭᓯᓂᔨᐟ ᐃᓴᐁᐧᐢᐠ ᐅᐦᒋ. 13 ᐁᑲᐧ ᑌᐱᐟ ᑭ ᐃᑌᐤ ᐊᓂᐦᐃ ᐅᐢᑭᓂᑭᐊᐧ ᑳ ᑭ ᐋᒋᒧᐢᑖᑯᐟ, ᑖᓂᑌ ᐁᐧᐦᒋᔭᐣ? ᑭ ᓇᐢᑫᐧᐊᐧᓯᒥᐠ, ᓂᔭ ᒫᓂᑌᐤ ᐅᑯᓯᓴ, ᐋᒪᓬᐃᑲᐃᐟ. 14 ᑌᐱᐟ ᒫᑲ ᑭ ᐃᑌᐤ, ᑖᓂᓯ ᐅᒪ ᐁᑳ ᑳ ᑯᐢᑕᒪᐣ ᑭᑕ ᐃᓯᓂᐢᑫᔨᔭᐣ ᑭᑕ ᓂᓯᐊᐧᓈᒋᐃᒪᐟ ᑳ ᑎᐯᔨᐦᒋᑫᐟ ᐅ ᑐᒥᓈᑲᓇ? 15 ᑌᐱᐟ ᒫᑲ ᑭ ᓇᑐᒣᐤ ᐯᔭᐠ ᐅᐢᑭᓂᑭᒪ, ᒥᓇ ᑭ ᐃᑌᐤ, ᑭᓯᐋᐧᐠ ᐃᑐᐦᑌ ᒥᓇ ᐸᑲᒪᐤ. ᑭ ᐸᑲᒪᐁᐧᐤ ᒫᑲ ᐁᑯᓯ ᑭ ᓂᐱᔨᐊᐧ. 16 ᑌᐱᐟ ᒫᑲ ᑭ ᐃᑌᐤ, ᑭ ᒥᐦᑯ ᑭᐢᑎᑲᐧᓂᕽ ᑭᑕ ᐊᔮᐤ; ᒋᑫᒫ ᑭᑐᐣ ᑭ ᑭ ᐋᒋᒥᑯᐣ ᐁ ᐃᑌᐧᔭᐣ, ᓂ ᑭ ᓂᐸᐃᒫᐊᐧ ᑳ ᑎᐯᔨᐦᒋᑫᐟ ᐅ ᑐᒥᓈᑲᓇ. 17 ᑌᐱᐟ ᒫᑲ ᐅᒪ ᒥᐦᑖᑌᐧᐃᐧᐣ ᑭ ᐅᐦᒋ ᒥᐦᑖᑌᐧᐁᐧᒣᐤ ᓵᓬᐊ ᒥᓇ ᒑᓇᐦᑕᓇ ᐅᑯᓯᓯᔨᐊᐧ; 18 ᐁᑯᓯ ᑭ ᓯᑭᑫᒧ ᑭᑕ ᑭᐢᑭᓄᐦᐊᒫᒥᐦᐟ ᒍᑕ ᐅᐟ ᐊᐋᐧᓯᒥᓴ ᐊᐦᒑᐱᐃᐧ ᓂᑲᒧᐣ; ᒫᑎᑲ ᒪᓯᓇᐦᐃᑳᑌᐤ ᒑᓴᕒ ᒪᓯᓇᐦᐃᑲᓂᕽ. 19 ᑭ ᑭᐢᑌᔨᑖᑯᓯᐃᐧᐣ ᐃᐢᕒᐁᐃᓬ ᓂᐸᑖᓂᐊᐧᐣ ᐃᑕ ᐁ ᐋᐃᐢᐹᔭᐃᐧᑖᔭᐣ! ᑖᓂᔨᑯᕽ ᐸᐦᑭᓯᓇᐧᐠ ᑳ ᓱᑳᔭᐃᐧᓯᒋᐠ! 20 ᐁᑳᐃᐧᔭ ᐃᐧᑕᒧᐠ ᐊᓂᑕ ᑳᐦᐟ, ᐁᑳᐃᐧᔭ ᐋᑐᑕᒧᐠ ᐊᓂᑕ ᐋᐢᑭᓬᐊᐣ ᐱᒧᐦᑌᐢᑲᓈᕽ! ᐁᑳ ᐅᑖᓂᓯᐋᐧᐊᐧ ᐱᓬᐃᐢᑎᓇᐠ ᑭᑕ ᒥᔭᐋᐧᑕᐦᑭᐠ, ᐁᑳ ᐅᑖᓂᓯᐋᐧᐊᐧ ᐁᑳ ᑳ ᓴᕒᑲᒼᓴᐃᓯᐃᐧᒋᐠ ᑭᑕ ᑲᑭᐦᒋᒧᔨᐟ. 21 ᑭᔭᐋᐧᐤ ᑭᓬᐳᐊ ᐊᐧᒋᔭ, ᐁᑳᐃᐧᔭ ᐁ ᓂᐱᐊᐧᐢᑳᐠ ᐊᐦᐳ ᑭᒥᐊᐧᐣ ᑭ ᑲ ᐅᑎᐦᑎᑯᓈᐋᐧᐤ, ᐊᐦᐳ ᑭᐢᑎᑳᓂ ᐸᑭᑎᓈᓱᐃᐧᓇ; ᐊᔨᐢ ᐁᑯᑕ ᐅ ᐸᐸᐊᑳᐧᓇ ᑳ ᓱᑲᔭᐃᐧᓯᐟ ᑭ ᐃᐧᔭᑭ ᐁᐧᐱᓂᒫᐊᐧ, ᐅ ᐸᐸᐊᑳᐧᓇ ᓵᓬ ᑖᐱᐢᑯᐨ ᐁᑳ ᐁ ᑭ ᐅᐦᒋ ᑐᒥᓂᐦᐟ ᐱᒥ ᐅᐦᒋ. 22 ᐅ ᒥᐦᑯᐋᐤ ᐅᐦᒋ ᓂᐸᑖᑲᓇᐠ ᐅ ᐃᐧᔨᓄᐋᐧᐤ ᐅᐦᒋ ᑳ ᓱᑳᔭᐃᐧᓯᒋᐠ, ᐅᐟ ᐊᒑᐱᔭ ᒑᓇᐦᑕᐣ ᓇᒪᐃᐧᔭ ᑫᐧᐢᑭᔨᐊᐧ, ᒥᓇ ᐅᐟ ᐃᓴᐁᐧᑯᒫᐣ ᓵᓬ ᓇᒪᐃᐧᔭ ᐱᓯᓯᐠ ᑭᐁᐧᔨᐊᐧ. 23 ᓵᓬ ᒥᓇ ᒑᓇᐦᑕᐣ ᑭ ᑲᑕᐊᐧᓯᓯᐊᐧᐠ ᒥᓇ ᑭ ᒥᔦᐧᔨᐦᑖᑯᓯᐊᐧᐠ ᐁ ᐱᒫᑎᓯᒋᐠ, ᐁᑯᓯ ᐁ ᓂᐱᒋᐠ ᓇᒪᐃᐧᔭ ᐸᐢᑫᐃᐧᔨᑐᐊᐧᐠ; ᑭ ᒥᐦᑲᐃᐧᑭᐊᐧᐠ ᐊᔨᐋᐧᐠ ᐃᔨᑯᕽ ᒥᑭᓯᐊᐧᐠ, ᐊᔨᐋᐧᐠ ᑭ ᒪᐢᑲᐃᐧᓯᐊᐧᐠ ᐃᔨᑯᕽ ᒥᐢᑕᐦᑫᓯᐊᐧᐠ. 24 ᑭᔭᐋᐧᐤ ᐃᐢᕒᐁᐃᓬ ᐅᑖᓂᓯᒫᐊᐧᐠ, ᒪᐃᐧᑳᑎᕽ ᓵᓬ, ᑳ ᑭ ᒥᔪᐃᐧᔮᑕᐃᑯᔦᐠ ᒥᐦᑫᐧᑭᓄᕽ, ᑳ ᑭ ᐊᐢᑖᐟ ᐅᓵᐃᐧᓱᓂᔮᐃᐧ ᐋᐧᐁᐧᓯᐅᐃᐧᓇ ᑭ ᑭᑭᐢᑳᒋᑲᓂᐋᐧᕽ. 25 ᑖᓂᔨᑯᕽ ᐸᐦᑭᓯᓇᐧᐠ ᑳ ᓱᑳᔭᐃᐧᓯᒋᐠ ᒣᑳᐧ ᓄᑎᓂᑐᐃᐧᓂᕽ; ᒑᓇᐦᑕᐣ ᓂᐸᐦᐋᐤ ᐃᑕ ᑳ ᐃᐢᐹᔭᐃᐧᑖᔭᐣ. 26 ᓂ ᐱᑫᐧᔨᑌᐣ ᑭᔭ ᐅᐦᒋ ᓂᒋᐋᐧᒼ ᒑᓇᐦᑕᐣ; ᒥᐢᑕᐦᐃ ᑭ ᑭ ᒥᔪᑐᑕᐃᐧᐣ; ᒫᒪᐢᑳᐨ ᑳ ᑭ ᐃᓯ ᓵᑭᐦᐃᔭᐣ, ᐊᔨᐋᐧᐠ ᐃᔨᑯᕽ ᐃᐢᑫᐧᐤ ᐅ ᓵᑭᐦᐃᐁᐧᐃᐧᐣ. 27 ᑖᓂᔨᑯᕽ ᐸᐦᑭᓯᓇᐧᐠ ᑳ ᓱᑳᔭᐃᐧᓯᒋᐠ, ᒥᓇ ᓇᑐᐸᔨᐃᐧ ᐋᐸᒋᐦᒋᑲᓇ ᓂᓯᐊᐧᓈᑕᓇᐧ! |
This Bible text is a corrected edition of the 1908 Western Cree Bible; it is in the public domain.
Canadian Bible Society