ᓃᓵᐧᐤ ᐱᑕᕒ 1 - ᑲᓈᒋ ᑭᐦᒋ ᒪᓯᓈᐦᐃᑲᐣ

¹ ᓵᐃᒪᐣ ᐱᑕᕒ ᐅᐟ ᐊᑐᐢᑫᔮᑲᓇ ᒥᓇ ᐅᐟ ᐊᐹᐢᑎᓬᐃᒪ ᒋᓴᐢ ᙭ ᐁ ᒪᓯᓇᐦᐊᒪᐊᐧᑭᐠ ᐊᓂᑭ ᑳ ᑭ ᒥᔨᐦᒋᐠ ᑖᐱᐢᑯᐨ ᓂᔭᓈᐣ ᐁ ᐃᓯ ᑭᐦᒉᔨᑖᑲᐧᕽ ᑳ ᑖᐯᐧᔦᔨᑕᒫᐧᔭᕽ ᐅ ᑲᐧᔭᐢᑳᐧᑎᓯᐃᐧᐣ ᑭ ᑭᓭᒪᓂᑐᒥᓇᐤ ᒥᓇ ᑯᐱᒫᒋᐦᐃᐁᐧᒥᓇᐤ ᒋᓴᐢ ᙭;

² ᑭᓭᐋᐧᑐᑖᑯᐃᐧᐣ ᒥᓇ ᐯᔭᑕᑫᔨᒧᐃᐧᐣ ᑭ ᑲ ᐃᐧ ᔭᑭᑖᐧᑲᐃᐧᓈᐋᐧᐤ ᐁ ᑭᐢᑫᔨᒫᔦᐠ ᑭᓭᒪᓂᑐ ᒥᓇ ᒋᓴᐢ ᑳ ᑎᐯᔨᒥᑯᔭᕽ;

³ ᒋᑫᒫ ᐅ ᒪᓂᑐᐃᐧ ᑲᐢᑭᐦᐁᐃᐧᓯᐃᐧᐣ ᑭ ᑭ ᐸᑭᑎᓇᒫᑯᓈᓇᐤ ᑲᐦᑭᔭᐤ ᑫᑲᐧᐩ ᑳ ᐋᐸᒋᐦᐃᐁᐧᐠ ᐱᒫᑎᓯᐃᐧᓂᕽ ᒥᓇ ᒪᓂᑐᐋᐧᑎᓯᐃᐧᓂᕽ, ᐁ ᑭᐢᑫᔨᒫᔭᕽ ᐊᓇ ᑳ ᑭ ᓇᑐᒥᑯᔭᕽ ᐃᐧᔭ ᐅ ᑭᐢᑌᔨᑖᑯᓯᐃᐧᐣ ᒥᓇ ᐅ ᒥᔮᐧᑎᓯᐃᐧᐣ ᐅᐦᒋ;

⁴ ᑳ ᐅᐦᒋ ᒥᔨᑯᔭᕽ ᒥᐢᑕᐦᐃ ᑳ ᐃᑌᔨᑖᑲᐧᓂᔨᑭ ᒥᓇ ᐊᔨᐋᐧᐠ ᑳ ᑭᐦᒉᔨᑖᑲᐧᓂᔨᑭ ᐅᐟ ᐊᓱᑕᒫᑫᐃᐧᓇ; ᐁᐊᐧᑯᓂ ᑭᑕ ᑭ ᐅᐦᒋ ᐃᐧᒋᐃᐁᐧᔦᐠ ᑳ ᒪᓂᑐᐊᐧᕽ ᐃᓯ ᐊᔮᐃᐧᐣ ᐁ ᑭ ᐸᐢᐱᔦᐠ ᓂᓯᐊᐧᓈᒋᐦᐅᐃᐧᐣ ᐊᐢᑭᕽ ᑳ ᐊᔮᐠ ᒪᒋ ᒧᐢᑕᐁᐧᔨᑕᒧᐃᐧᐣ ᐅᐦᒋ.

⁵ ᐁᐦᐁ, ᐅᒪ ᒫᑲ ᐅᐦᒋ ᐋᑲᒣᔨᒧᐠ ᑭᑕ ᔭᑭ ᐊᔮᔦᐠ, ᑭ ᑖᐯᐧᔦᔨᑕᒧᐃᐧᓇᐋᐧᕽ ᑕᑯᑖᐠ ᒥᔮᐧᑎᓯᐃᐧᐣ; ᐁᑯᓯ ᑭ ᒥᔮᐧᑎᓯᐃᐧᓂᐋᐧᕽ ᑭᐢᑫᔨᑕᒧᐃᐧᐣ;

⁶ ᐁᑯᓯ ᑭ ᑭᐢᑫᔨᑕᒧᐃᐧᓂᐋᐧᕽ ᓇᐃᔨᑯᑳᐧᑎᓯᐃᐧᐣ; ᐁᑯᓯ ᑭ ᓇᐃᔨᑯᑳᐧᑎᓯᐃᐧᓂᐋᐧᕽ ᓯᐯᔨᑕᒧᐃᐧᐣ; ᐁᑯᓯ ᑭ ᓯᐯᔨᑕᒧᐃᐧᓂᐋᐧᕽ ᐊᔭᒥᐦᐋᐋᐧᑎᓯᐃᐧᐣ;

⁷ ᐁᑯᓯ ᐊᔭᒥᐦᐋᐋᐧᑎᓯᐃᐧᓂᕽ ᐁ ᓵᑭᐦᐋᔦᑯᐠ ᐅᒋᐋᐧᒥᒫᐊᐧᐠ; ᐁᑯᓯ ᐁ ᓵᑭᐦᐋᔦᑯᐠ ᐅᒋᐋᐧᒥᒫᐊᐧᐠ ᑭᓭᐋᐧᑎᓯᐃᐧᐣ.

⁸ ᒋᑫᒫ ᑭᐢᐱᐣ ᐅᐦᐃ ᑭᑭᐢᑳᑯᔦᑯ ᒥᓇ ᐁᐧᔪᒋ ᐊᔮᔦᑯ ᑭ ᑲ ᐃᓯᐃᑯᓈᐋᐧᐤ ᐁᑳ ᑭᑕ ᑭᑎᒥᔦᐠ ᐊᐦᐳ ᑭᑕ ᐁᑳ ᒥᓂᓯᐃᐧᔦᐠ ᐅ ᑭᐢᑫᔨᑕᒧᐃᐧᓂᕽ ᑳ ᑎᐯᔨᒥᑯᔭᕽ ᒋᓴᐢ ᙭.

⁹ ᒋᑫᒫ ᐊᓇ ᑳ ᑭᐧᑕᒫᐟ ᐅᐦᐃ ᓇᒪᐃᐧᔭ ᐊᐧᐃᐧᔭᐋᐧᐱᐤ ᐁ ᐋᐧᐸᐦᑕᕽ ᐱᑯ ᐊᓂᒪ ᑭᓯᐋᐧᐠ ᑳ ᐊᔮᔨᐠ, ᐁᑳ ᐁ ᑭᐢᑭᓯᐟ ᑳ ᑭ ᐯᑭᐃᐦᐟ ᑲᔮᐢ ᐅ ᒪᒋᐃᑎᐃᐧᓇ ᐅᐦᒋ.

¹⁰ ᐁᑯᓯ ᒫᑲ ᓂᒋᐋᐧᒥᑎᐠ, ᐊᐊᐧᓯᒣ ᐋᑲᒣᔨᒧᐠ ᑭᑕ ᑫᒋᓈᑖᔦᐠ ᑭ ᓇᑐᒥᑯᐃᐧᓂᐋᐧᐤ ᒥᓇ ᑭ ᓇᐊᐧᓱᓂᑯᐃᐧᓂᐋᐧᐤ; ᒋᑫᒫ ᑭᐢᐱᐣ ᐅᐦᐃ ᐃᑐᑕᒣᑯ ᓇᒪᐃᐧᑳᐨ ᑭ ᑲ ᐸᐦᑭᓯᓂᓈᐋᐧᐤ;

¹¹ ᐁᑯᓯ ᐃᓯ ᒫᑲ ᑭ ᑲ ᐁᐧᔪᒋ ᐅᐦᑎᓇᒫᑲᐃᐧᓈᐋᐧᐤ ᑭᑕ ᐱᐦᑐᑫᔦᐠ ᑳᑭᑫ ᑳ ᐊᔮᔨᐟ ᐅᐟ ᐅᑌᓇᐃᐧᐃᐧᐣ ᑳ ᑎᐯᔨᒥᑯᔭᕽ ᒥᓇ ᑯᐱᒫᒋᐦᐃᐁᐧᒥᓇᐤ ᒋᓴᐢ ᙭.

¹² ᐁᑯᓯ ᒫᑲ ᓇᒪᐃᐧᔭ ᓂ ᑲ ᐋᒋᐢᑕᐁᐧᔨᑌᐣ ᑭᑕ ᒥᐢᑲᐋᐧᓱᒥᑕᑯᐠ ᐅᐦᐃ ᐋᑕᐃᐧᔭ ᐁ ᑭᐢᑫᔨᑕᒣᐠ ᒥᓇ ᐁ ᐋᔮᒋ ᐊᔮᔦᐠ ᐊᓂᒪ ᑖᐯᐧᐃᐧᐣ ᑳ ᑭᑭ ᐊᔮᔦᐠ.

¹³ ᑲᐧᔭᐢᐠ ᒫᑲ ᓂᐟ ᐃᑌᔨᑌᐣ, ᐃᐢᑯ ᐁ ᐊᔮᔮᐣ ᐅᒪ ᓂᑭᕽ ᑭᑕ ᐅᐢᐸᐁᐧᐃᑕᑯᐠ ᐁ ᒥᐢᑲᐋᐧᓱᒥᑕᑯᐠ;

¹⁴ ᐁ ᑭᐢᑫᔨᑕᒫᐣ ᐃᐧᐸᐨ ᐁᑲᐧ ᑭᑕ ᑫᒋᑯᐢᑲᒫᐣ ᐅᒪ ᓂᑭ, ᐃᐧᔭ ᐁᑯᓯ ᐁ ᑭ ᐃᓯ ᑭᐢᑫᔨᑕᒧᐃᐟ ᑳ ᑎᐯᔨᒪᑯᔭᕽ ᒋᓴᐢ ᙭.

¹⁵ ᐁᑯᓯ ᒫᑲ ᓂ ᑲ ᐋᑲᒣᔨᒧᐣ ᓴᑭᓀ ᑭᑕ ᑲᐢᑭᑖᔦᐠ ᑭ ᐳᓂ ᐱᒫᑎᓯᔮᓂ ᐅᐦᐃ ᒥᓇ ᑭᑕ ᑭᐢᑭᓱᒥᓱᔦᐠ.

¹⁶ ᒋᑫᒫ ᓇᒪᐃᐧᔭ ᓄᐦᒋ ᐱᒥᑎᓴᐁᓈᐣ ᐁ ᑲᑲᔦᔨᓯᐃᐧ ᐅᓯᒋᑳᑌᑭ ᐋᑕᔪᑳᓇ ᐃᐢᐱ ᑳ ᑭᐢᑫᔨᑕᒧᐃᑖᕽ ᐅ ᒪᐢᑲᐃᐧᓯᐃᐧᐣ ᒥᓇ ᐅ ᑕᑯᓯᓄᐃᐧᐣ ᑳ ᑎᐯᔨᒥᑯᔭᕽ ᒋᓴᐢ ᙭, ᒫᑲ ᓂ ᑭ ᐋᐧᐸᐦᑕᒫᐧᓈᐣ ᓂᐢᑭᓯᑯᓈᕽ ᐅᐦᒋ ᐅ ᑭᒑᔨᐃᐧᐃᐧᐣ.

¹⁷ ᑭ ᒥᔨᐠ ᒫᑲ ᑭᓭᒪᓂᑐᐊᐧ ᐁᐧᔪᑖᐃᐧᕽ ᑭᐢᑕᑭᒥᑯᐃᐧᐣ ᒥᓇ ᑭᐢᑌᔨᑖᑯᓯᐃᐧᐣ ᐃᐢᐱ ᑳ ᐅᑎᐦᑎᑯᐟ ᐃᑌᐧᐃᐧᐣ ᑳ ᐊᔨᐋᐧᑫᔨᑖᑲᐧᕽ ᑭᐦᒑᔨᐃᐧᐃᐧᓂᕽ ᐅᐦᒋ, ᐁᐊᐧᑯ ᐊᐊᐧ ᑳ ᓵᑭᐦᐊᐠ ᓂᑯᓯᐢ, ᓈᐢᐱᐨ ᑳ ᓇᐦᐃᔭᐁᐧᐦᐃᐟ;

¹⁸ ᐅᒪ ᒫᑲ ᐃᑌᐧᐃᐧᐣ ᑭᐦᒋ ᑭᓯᑯᕽ ᐅᐦᒋ ᓂ ᑭ ᐯᑌᓈᐣ, ᐁ ᐃᐧᒉᐋᐧᔮᕽ ᑳ ᑲᓈᑌᔨᑖᑲᐧᕽ ᐊᐧᒋ.

¹⁹ ᐁᑯᓯ ᑭᐟ ᐊᔮᓇᐤ ᒥᓇ ᑭᐢᑭᐁᐧᐦᐃᑫᐃᐧ ᐊᔭᒥᐃᐧᐣ ᐊᔨᐋᐧᐠ ᐁ ᑫᒋᓈᑖᕽ; ᐁᐊᐧᑯ ᑭ ᒥᔪᑐᑌᓈᐋᐧᐤ ᐁ ᐊᔮᑳᐧᒣᔨᑕᒣᐠ, ᑖᐱᐢᑯᐨ ᐋᐧᓴᐢᑯᑌᓂᑲᐣ ᐁ ᐋᐧᐢᑌᐠ ᐊᐧᓂᑎᐱᐢᑳᕽ, ᐱᔨᐢ ᑭᑕ ᐯᑖᐸᕽ ᐁᑯᓯ ᐋᐧᐸᓇᒐᕽ ᑭᑕ ᓵᑯᑌᐟ ᑭᑌᐦᐃᐋᐧᕽ;

²⁰ ᐁ ᑭᐢᑫᔨᑕᒪᕽ ᐅᒪ ᓂᑳᐣ ᐁᑳ ᓇᐣᑕᐤ ᑭᐢᑭᐁᐧᐦᐃᑫᐃᐧᐣ ᑭᐦᒋ ᒪᓯᓇᐦᐃᑫᐃᐧᓂᕽ ᐁ ᐱᐢᑭᒋ ᐃᑌᐧᐢᑕᒪᐋᐧᑌᒥᕽ.

²¹ ᒋᑫᒫ ᓇᒪᐃᐧᑳᐨ ᑭ ᑕᑯᓯᓄᒪᑲᐣ ᑭᐢᑭᐁᐧᐦᐃᑫᐃᐧᐣ ᐅᐟ ᐃᑌᔨᑕᒧᐃᐧᓂᕽ ᐊᔨᓯᔨᓂᐤ ᐅᐦᒋ; ᒫᑲ ᐊᔨᓯᔨᓂᐊᐧᐠ ᑭ ᐱᑭᐢᑫᐧᐊᐧᐠ ᑭᓭᒪᓂᑐᐊᐧ ᐅᐦᒋ, ᐁ ᐃᑌᐧᐃᑯᒋᐠ ᑳ ᑲᓈᑎᓯᔨᐟ ᐊᐦᒑᐦᑲᐧ.