ᓃᓵᐧᐤ ᑭᐦᒋ ᐅᑭᒫᐊᐧᐠ 1 - ᑲᓈᒋ ᑭᐦᒋ ᒪᓯᓈᐦᐃᑲᐣ1 ᒧᐋᑊ ᒫᑲ ᑭ ᐸᓯᑯᐢᑕᐁᐧᐤ ᐃᐢᕒᐁᐃᓬᐊ ᐃᐢᐱ ᐁ ᑭ ᐳᓂ ᐱᒫᑎᓯᐟ ᐁᐦᐋᑊ. 2 ᐁᐦᐋᓵᔭ ᒫᑲ ᑭ ᐳᐦᒋᐸᔨᐤ ᐁ ᑕᐊᐧᑯᑌᔨᐠ ᐃᐢᐱᒥᕽ ᐅ ᐱᐢᑭᒋᑲᒥᐠ ᓴᒣᕒᐃᔭᐃᕽ, ᐁᑯᓯ ᑭ ᐃᐧᓴᑫᔨᑕᒼ; ᑭ ᐃᓯᑎᓴᐁᐧᐤ ᒫᑲ ᐃᑌᐧᐦᐋᑲᓇ, ᐁᑯᓯ ᑭ ᐃᑌᐤ, ᓂᔮᐠ, ᓇᑕᐃᐧ ᑲᑫᐧᒋᒥᕽ ᐯᐊᓬᓯᐸᑊ ᐅ ᒪᓂᑐᒥᐋᐧᐊᐧ ᐁᑲᕒᐊᐣ, ᒫᐦᑎ ᑫ ᒥᔪᐊᔮᐋᐧᓀ ᐅᒪ ᐃᐧᓴᑫᔨᑕᒧᐃᐧᐣ. 3 ᒫᑲ ᐅᑭᓯᑯ ᑳ ᑎᐯᔨᐦᒋᑫᐟ ᐅᐦᒋ ᑭ ᐃᑌᐤ ᐃᓬᐊᐃᒐᐊᐧ ᐊᓇ ᑎᐢᐸᐃᐟ, ᐸᓯᑯ, ᓇᑕᐃᐧ ᓇᑭᐢᑳᒼ ᐅᐟ ᐃᑌᐧᐦᐋᑲᓇ ᓴᒣᕒᐃᔭ ᑭᐦᒋ ᐅᑭᒫᐤ, ᐃᓯᐠ ᒫᑲ, ᐁᑳ ᒋ ᐁ ᐃᐦᑖᐟ ᑭᓭᒪᓂᑐ ᐃᐢᕒᐁᐃᓬᐃᕽ, ᑳ ᐅᐦᒋ ᓇᑕᐃᐧ ᑲᑫᐧᒋᒫᔦᐠ ᐯᐊᓬᓯᐸᑊ ᐅ ᒪᓂᑐᒥᐋᐧᐊᐧ ᐁᑲᕒᐊᐣ? 4 ᐁᑲᐧ ᒫᑲ ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ, ᓇᒪᐃᐧᔭ ᑭ ᑲ ᔮᓵᑕᐃᐧᐣ ᑭ ᓂᐯᐃᐧᓂᕽ ᐅᐦᒋ ᐊᓂᒪ ᑳ ᑭ ᓇᐦᐃᓯᓂᔭᐣ, ᒫᑲ ᑫᐦᒋᓈ ᑭ ᑲ ᓂᐱᐣ. ᐁᑯᓯ ᐃᓬᐊᐃᒐ ᑭ ᓯᐯᐧᑌᐤ. 5 ᐃᑌᐧᐦᐋᑲᓇ ᒫᑲ ᑳᐃᐧ ᑭ ᐯ ᓈᑎᐠ, ᐁᑯᓯ ᑭ ᐃᑌᐤ, ᑖᓀᐦᑭ ᑳ ᐯ ᑭᐁᐧᔦᐠ? 6 ᐁᑯᓯ ᑭ ᐃᑎᐠ, ᓂ ᑭ ᐯ ᓇᑕᐃᐧ ᓇᑭᐢᑳᑯᓈᐣ ᓈᐯᐤ, ᐁᑯᓯ ᓂ ᑭ ᐃᑎᑯᓈᐣ, ᓂᔮᐠ, ᑳᐃᐧ ᒥᓇ ᓈᑎᕽ ᐊᓇ ᑭᐦᒋ ᐅᑭᒫᐤ ᑳ ᑭ ᐯ ᐃᓯᑎᓴᐦᐅᑯᔦᐠ, ᐅᒥᓯ ᒫᑲ ᐃᑖᐦᑫᐠ, ᐁᑳ ᒋ ᑭᓭᒪᓂᑐ ᐁ ᐃᐦᑖᐟ ᐃᐢᕒᐁᐃᓬᐃᕽ, ᑳ ᓇᑕᐃᐧ ᑲᑫᐧᒋᒪᐟ ᐯᐊᓬᓯᐸᑊ ᐅ ᒪᓂᑐᒥᐋᐧᐊᐧ ᐁᑲᕒᐊᐣ? ᐁᐊᐧᑯ ᐅᐦᒋ ᓇᒪᐃᐧᔭ ᑭ ᑲ ᓂᓵᑕᐃᐧᐣ ᑭ ᓂᐯᐃᐧᓂᕽ ᐅᐦᒋ ᐃᑕ ᑳ ᑭ ᓇᐃᓯᓂᔭᐣ, ᒫᑲ ᑫᐦᒋᓈ ᑭ ᑲ ᓂᐱᐣ. 7 ᑭ ᐃᑌᐤ ᒫᑲ, ᑖᓂᑐᐃᐧ ᐊᔨᓯᔨᓂᐤ ᐊᓇ ᑳ ᑭ ᐯ ᓇᑕᐃᐧ ᓇᑭᐢᑳᑯᔦᐠ, ᒥᓇ ᑳ ᑭ ᐃᐧᐦᑕᒫᑯᔦᐠ ᐅᐦᐃ ᐃᑌᐧᐃᐧᓇ? 8 ᑭ ᓇᐢᑫᐧᐊᐧᓯᒥᐠ ᒫᑲ, ᒥᐦᔭᐁᐧᓯᐤ ᐊᓇ ᓈᐯᐤ, ᐁᑯᓯ ᐸᑫᑭᓄᐃᐧ ᐸᑲᐧᑌᐦᐅᐣ ᐋᐱᑐᓯᔭᐤ ᐸᑲᐧᑌᐦᐅ. ᐁᑲᐧ ᑭ ᐃᑌᐧᐤ, ᐁᐊᐧᑳᐧᓇ ᐃᓬᐊᐃᒐ ᐊᓇ ᑎᐢᐸᐃᐟ. 9 ᐁᑲᐧ ᑭᐦᒋ ᐅᑭᒫᐤ ᑭ ᐃᓯᑎᓴᐦᐊᒪᐁᐧᐤ ᓯᒫᑲᓂᓯᐃᐧᑭᒫᐊᐧ ᑳ ᑎᐯᔨᒫᔨᐟ ᓂᔮᓇᓄᒥᑕᓇᐤ ᐁ ᑭᑭᔨᐟ ᐊᓂᐦᐃ ᓂᔮᓇᓄᒥᑕᓈᐤ. ᑭ ᐊᑎ ᓈᑎᐠ ᒫᑲ ᐃᓬᐊᐃᒐ; ᐁᑯᓯ ᐳᑎ ᑭ ᐊᐱᐤ ᑕᐦᑯᑖᒪᑎᐣ ᐊᐧᒋᕽ. ᑭ ᐃᑎᐠ ᒫᑲ, ᑭᔭ ᑭᓭᒪᓂᑐ ᐅᐟ ᐊᔨᓯᔨᓂᒪ, ᑭᐦᒋ ᐅᑭᒫᐤ ᑭ ᐃᑌᐧᐤ, ᐯ ᓂᐦᑕᒋᐁᐧ. 10 ᐃᓬᐊᐃᒐ ᒫᑲ ᑭ ᓇᐢᑫᐧᐊᐧᓯᒣᐤ ᒥᓇ ᑭ ᐃᑌᐤ ᐊᓂᐦᐃ ᓯᒫᑲᓂᓯᐃᐧᑭᒫᐊᐧ ᓂᔮᓇᓄᒥᑕᓇᐤ ᑳ ᑎᐯᔨᒫᔨᐟ, ᑭᐢᐱᐣ ᑖᐯᐧ ᓂᔭ ᑭᓭᒪᓂᑐ ᐅᐟ ᐊᔨᓯᔨᓂᒪ, ᑭᔮᒼ ᐃᐢᑯᑌᐤ ᑭᓯᑯᕽ ᑭᑕ ᐯ ᐅᐦᒋ ᔮᓯᐸᔨᐤ ᑭᑕ ᒣᐢᑎᑲᓱᑯᔭᐣ ᑭᔭ ᐊᓯᒋ ᑳ ᐃᐧᒉᐊᐧᒋᐠ ᓂᔮᓇᓄᒥᑕᓇᐤ. ᑭ ᐯ ᔮᓯᐸᔨᐤ ᒫᑲ ᐃᐢᑯᑌᐤ ᑭᓯᑯᕽ ᐅᐦᒋ ᒥᓇ ᑭ ᒣᐢᑎᑲᓱᐠ ᐃᐧᔭ ᒥᓇ ᐊᓂᐦᐃ ᓂᔮᓇᓄᒥᑕᓇᐤ. 11 ᐁᑲᐧ ᒥᓇ ᑭ ᐃᓯᑎᓴᐦᐊᒫᐠ ᑯᑕᑲ ᓯᒫᑲᓂᓯᐃᐧᑭᒫᐊᐧ ᓂᔮᓇᓄᒥᑕᓇᐤ ᑳ ᑎᐯᔨᒫᔨᐟ ᐊᓯᒋ ᐊᓂᐦᐃ ᓂᔮᓇᓄᒥᑕᓇᐤ. ᑭ ᓇᐢᑫᐧᐊᐧᓯᒥᐠ ᒫᑲ ᒥᓇ ᑭ ᐃᑎᐠ, ᑭᔭ ᑭᓭᒪᓂᑐ ᐅᐟ ᐊᔨᓯᔨᓂᒪ, ᐅᒥᓯ ᑭ ᐃᑌᐧᐤ ᑭᐦᒋ ᐅᑭᒫᐤ, ᑭᔨᐸ ᐯ ᓂᑖᒪᒋᐁᐧ. 12 ᐃᓬᐊᐃᒐ ᒫᑲ ᑭ ᓇᐢᑫᐧᐊᐧᓯᒣᐤ ᒥᓇ ᑭ ᐃᑌᐤ, ᑭᐢᐱᐣ ᓂᔭ ᑭᓭᒪᓂᑐ ᐅᐟ ᐊᔨᓯᔨᓂᒪ ᑭᔮᒼ ᐃᐢᑯᑌᐤ ᑭᓯᑯᕽ ᑭᑕ ᐯ ᐅᐦᒋ ᔮᓯᐸᔨᐤ ᑭᑕ ᒣᐢᑎᑲᓱᑯᔭᐣ ᑭᔭ ᒥᓇ ᐊᓂᑭ ᓂᔮᓇᓄᒥᑕᓇᐤ ᑳ ᐊᔮᐊᐧᒋᐠ. ᐁᑯᓯ ᐅᐟ ᐃᐢᑯᑌᒼ ᑭᓭᒪᓂᑐ ᑭᓯᑯᕽ ᑭ ᐯ ᐅᐦᒋ ᔮᓯᐸᔨᐤ ᒥᓇ ᑭ ᒣᐢᑎᑲᓱᐠ ᐃᐧᔭ ᒥᓇ ᐊᓂᐦᐃ ᓂᔮᓇᓄᒥᑕᓇᐤ ᑳ ᐊᔮᐋᐧᐟ. 13 ᒥᓇ ᒫᑲ ᑭ ᐃᓯᑎᓴᐁᐧᐤ ᓯᒫᑲᓂᓯᐃᐧᑭᒫᐊᐧ, ᐁᑲᐧ ᓂᐢᑖᐧᐤ, ᐁ ᑎᐯᔨᒫᔨᐟ ᓂᔮᓇᓄᒥᑕᓇᐤ ᑭᑭ ᐊᓂᐦᐃ ᓂᔮᓇᓄᒥᑕᓇᐤ. ᐊᓇ ᒫᑲ ᓂᐢᑐ ᓯᒫᑲᓂᓯᐃᐧᑭᒫᐤ ᐁ ᑎᐯᔨᒫᐟ ᓂᔮᓇᓄᒥᑕᓇᐤ, ᑭ ᐃᑐᐦᑌᐤ, ᐁᑯᓯ ᑭ ᐯ ᓇᑕᐃᐧ ᐅᐦᑎᐢᑲᐃᐧ ᐅᒋᐦᒋᐦᑲᐧᓇᐱᐢᑕᐁᐧᐤ ᐃᓬᐊᐃᒐᐊᐧ, ᑭ ᑳᑭᓯᒧᑐᑕᐁᐧᐤ ᒫᑲ, ᐁ ᐃᑖᐟ, ᑭᔭ ᑭᓭᒪᓂᑐ ᐅᐟ ᐊᔨᓯᔨᓂᒪ, ᑭ ᓇᑐᑕᒪᑎᐣ, ᑭᔮᒼ ᓂ ᐱᒫᑎᓯᐃᐧᐣ ᒥᓇ ᐅ ᐱᒫᑎᓯᐃᐧᓂᐋᐧᐤ ᐅᑭ ᓂᔮᓇᓄᒥᑕᓇᐤ ᑭᐟ ᐊᑐᐢᑫᔮᑲᓇᐠ ᑭᑕ ᐃᐧ ᐊᐦᑲᐧᑭᑌᐤ ᐁ ᐃᑖᐱᓯᓂᔭᐣ. 14 ᒫᑎᑲ, ᐃᐢᑯᑌᐤ ᑭ ᐯ ᔮᓯᐸᔨᐤ ᑭᓯᑯᕽ ᐅᐦᒋ, ᒥᓇ ᑭ ᒣᐢᑎᑲᓱᑲᐧᐠ ᐊᓂᑭ ᓂᐢᑕᒼ ᓯᒫᑲᓂᓯᐃᐧᑭᒫᐊᐧᐠ ᓂᔮᓇᓄᒥᑕᓇᐤ ᑳ ᑎᐯᔨᒫᒋᐠ ᑭᑭ ᐊᓂᐦᐃ ᓂᔮᓇᓄᒥᑕᐤ; ᒫᑲ ᐁᑲᐧ ᑭᔮᒼ ᓂ ᐱᒫᑎᓯᐃᐧᐣ ᑭᑕ ᐃᐧ ᐋᐦᑲᐧᑭᑌᐤ ᐁ ᐃᑖᐱᓯᓂᔨᐣ. 15 ᐅᑭᓯᑯᐊᐧ ᒫᑲ ᑳ ᑎᐯᔨᐦᒋᑫᐟ ᐅᐦᒋ ᑭ ᐃᑎᐠ ᐃᓬᐊᐃᒐ, ᑭᔮᒼ ᐃᐧᒉᐤ, ᐁᑳᐃᐧᔭ ᑭ ᑲ ᑯᐢᑖᐤ. ᑭ ᐸᓯᑯ ᒫᑲ ᐁᑯᓯ ᑭ ᐃᐧᒉᐁᐧᐤ ᐁ ᓇᑕᐋᐧᐸᒫᐟ ᑭᐦᒋ ᐅᑭᒫᐊᐧ. 16 ᑭ ᐃᑌᐤ ᒫᑲ ᑭᐦᒋ ᐅᑭᒫᐊᐧ, ᐅᒥᓯ ᐃᑌᐧᐤ ᑳ ᑎᐯᔨᐦᒋᑫᐟ, ᒋᑫᒫ ᐁ ᑭ ᐃᓯᑎᓴᐦᐊᐧᒋᐠ ᐃᑌᐧᐦᐋᑲᓇᐠ ᑭᑕ ᑲᑫᐧᒋᒫᒋᐠ ᐯᐊᓬᓯᐸᐸ ᐅ ᒪᓂᑐᒥᐋᐧᐊᐧ ᐁᑲᕒᐊᐣ, ᐁᑳ ᒋ ᐁ ᐃᐦᑖᐟ ᑭᓭᒪᓂᑐ ᐃᐢᕒᐁᐃᓬᐃᕽ ᑭᑕ ᑭ ᑲᑫᐧᒋᒪᐟ ᐅᐟ ᐃᑌᐧᐃᐧᐣ? ᐁᐊᐧᑯ ᐅᐦᒋ ᓇᒪᐃᐧᔭ ᑭ ᑲ ᓂᓵᑕᐃᐧᐣ ᑭ ᓂᐯᐃᐧᓂᕽ ᐅᐦᒋ ᐃᑕ ᑳ ᓇᐦᐃᓯᓂᔭᐣ, ᒫᑲ ᑫᐦᒋᓈ ᑭ ᑲ ᓂᐱᐣ. 17 ᐁᑯᓯ ᑖᐯᐧ ᑭ ᓂᐱᐤ, ᐁ ᐃᑕᐢᑌᔨᐠ ᐅᐟ ᐃᑌᐧᐃᐧᐣ ᑳ ᑎᐯᔨᐦᒋᑫᐟ ᐃᓬᐊᐃᒐ ᑳ ᑭ ᐃᐧᐦᑕᕽ, ᒋᐦᐋᕒᐋᒼ ᒫᑲ ᑭ ᒫᒋ ᑭᐦᒋᐅᑭᒪᐃᐧᐤ ᐁ ᒥᐢᑯᑎᐢᑲᒪᐋᐧᐟ, ᓂᓱ ᐊᐢᑭ ᐁ ᐊᑎ ᐊᔮᐟ ᒋᐦᐋᕒᐋᒼ ᐅᑯᓯᓴ ᒋᐦᐋᓴᐹᐟ, ᒍᑕ ᑭᐦᒋ ᐅᑭᒫᐤ; ᐊᔨᐢ ᓇᒪᐃᐧᔭ ᑭ ᐅᑯᓯᓯᐤ. 18 ᑯᑕᑲ ᒫᑲ ᐅᐟ ᐃᓯᐦᒋᑫᐃᐧᓇ ᐁᐦᐋᓵᔭ ᑳ ᑭ ᐃᑐᑕᕽ, ᓇᒪ ᒋ ᒪᓯᓇᐃᑳᑌᐊᐧ ᒪᓯᓇᐦᐃᑲᓂᕽ ᐁ ᐊᑭᓀ ᐋᒋᒥᐦᒋᐠ ᐃᐢᕒᐁᐃᓬ ᑭᐦᒋ ᐅᑭᒫᐊᐧᐠ? |
This Bible text is a corrected edition of the 1908 Western Cree Bible; it is in the public domain.
Canadian Bible Society