ᓃᓵᐧᐤ ᑲᕒᐃᐣᑎᔭᓇ 1 - ᑲᓈᒋ ᑭᐦᒋ ᒪᓯᓈᐦᐃᑲᐣ

¹ ᐹᓬ, ᐅᐟ ᐊᐹᐢᑎᓬᐃᒪ ᙭ ᒋᓴᐢ ᐁ ᐃᑌᔨᑕᕽ ᑭᓭᒪᓂᑐ, ᒥᓇ ᑎᒪᑏ ᑭᒋᐋᐧᒥᓇᐤ, ᐁ ᒪᓯᓇᐦᐊᒪᐋᐧᐟ ᐅᑕᔭᒥᐦᐋᐊᐧ ᑳ ᐊᔭᒥᐦᐁᐢᑕᐋᐧᒋᐠ ᑭᓭᒪᓂᑐᐊᐧ ᐊᓂᑕ ᑳᕒᐃᐣᐟ, ᐊᓯᒋ ᑲᐦᑭᔭᐤ ᐅᑲᓈᑎᓯᐊᐧᐠ ᒥᓯᐁᐧ ᐋᑫᐃᔭ ᑳ ᐊᔮᒋᐠ:

² ᓂᓱᑲᒫᑯᐃᐧᐣ ᒥᓇ ᐯᔭᑕᑫᔨᒧᐃᐧᐣ ᑭ ᑲ ᐃᐧ ᐅᐦᒋᐢᑕᒫᑯᐋ ᑭᓭᒪᓂᑐ ᑯᑖᐃᐧᓇᐤ ᒥᓇ ᑳ ᑎᐯᔨᐦᒋᑫᐟ ᒋᓴᐢ ᙭.

³ ᑭᑕ ᑭ ᓇᓈᐢᑯᒥᐦᐟ ᐅ ᑭᓭᒪᓂᑐᒪ ᒥᓇ ᐅᑖᐃᐧᔭ ᑳ ᑎᐯᔨᒥᑯᔭᕽ ᒋᓴᐢ ᙭, ᑳ ᐅᔪᑖᐃᐧᐢᑳᑯᐟ ᑭᓭᐋᐧᑎᓯᐃᐧᓇ ᒥᓇ ᑭᓭᒪᓂᑐ ᑲᐦᑭᔭᐤ ᑳ ᐅᐦᒋ ᒥᔪᑌᐁᕽ;

⁴ ᑳ ᒥᔪᑌᐁᐃᑯᔭᕽ ᑲᐦᑭᔭᐤ ᑭᐟ ᐋᔨᒥᓯᐃᐧᓂᓈᕽ, ᑭᑕ ᑭ ᒥᔪᑌᐁᐋᔭᑯᐠ ᒥᓇ ᐊᓂᑭ ᓈᐣᑕᐤ ᐋᔨᒥᓯᐃᐧᓂᕽ ᑳ ᐊᔮᒋᐠ, ᐊᓂᒪ ᒥᔪᑌᐁᐃᑯᐃᐧᐣ ᐅᐦᒋ ᑭᔮᓇᐤ ᑳ ᒥᔪᑌᐁᐃᑯᔮᕽ ᑭᓭᒪᓂᑐ.

⁵ ᒋᑫᒫ ᑳ ᐃᓯ ᐁᐧᔪᑎᓇᒫᑲᐃᐧᔭᕽ ᐅ ᑯᑕᑭᑖᐃᐧᓇᓇ ᙭, ᐁᑯᓯ ᒥᓇ ᑭ ᒥᔪᑌᐁᐃᑯᐃᐧᓂᓇᐤ ᐁᐧᔪᒋ ᐊᔮᐤ ᐃᐧᔭ ᐅᐦᒋ ᙭.

⁶ ᑭᐢᐱᐣ ᒫᑲ ᓂ ᑯᑕᑭᐦᐃᑲᐃᐧᓈᐣ, ᑭᔭᐋᐧᐤ ᑭ ᒥᔪᑌᐁᐃᑲᐃᐧᓈᐣ, ᑭᔭᐋᐧᐤ ᑭ ᒥᔪᑌᐁᐃᑯᐃᐧᓂᐋᐧᐤ ᐅᐦᒋ, ᑳ ᐊᑐᐢᑫᒪᑲᕽ ᐁ ᓯᐯᔨᑕᒧᐃᐧ ᐅᑎᓇᒣᐠ ᐊᓂᐦᐃ ᑯᑕᑭᑖᐃᐧᓇ ᓂᔭᓈᐣ ᒥᓇ ᑳ ᐃᓯ ᑯᑕᑭᑖᔮᕽ:

⁷ ᐁᑯᓯ ᐋᔮᑕᐣ ᐊᓂᒪ ᐁ ᐃᑕᑌᔨᑕᒫᑖᕽ; ᐁ ᑭᐢᑫᔨᑕᒫᕽ ᐅᒪ, ᑳ ᐃᓯ ᐃᐧᒋᐃᐁᐧᔦᐠ ᑯᑕᑭᑖᐃᐧᓂᕽ, ᐁᑯᓯ ᒥᓇ ᑫ ᐃᓯ ᐃᐧᒋᐃᐁᐧᔦᐠ ᒥᔪᑌᐁᐃᑯᐃᐧᓂᕽ.

⁸ ᐃᐧᔭ ᐁᑳ ᐁ ᓇᑕᐁᐧᔨᑕᒫᕽ ᑭᑕ ᐊᐧᓀᔨᑕᒣᐠ, ᓂᒋᐋᐧᒥᑎᐠ, ᐊᓂᒪ ᑳ ᑭ ᐃᓯ ᐋᔨᒥᓯᔮᕽ ᐁᓯᔭᐃᕽ, ᑳ ᑭ ᐃᓯ ᒫᑫᐧᔨᑕᒧᐃᑲᐃᐧᔮᕽ ᒥᐢᑕᐦᐃ, ᐊᐊᐧᓯᒣ ᐁ ᐃᐢᐱᓯᔮᕽ, ᐃᔨᑯᕽ ᐱᔨᐢ ᐁᑳ ᐁ ᐃᑕᑌᔨᑕᒫᕽ ᑭᑕ ᑭ ᐱᒫᑎᓯᔮᕽ:

⁹ ᐁᐦᐁ, ᓂᐟ ᐃᓯ ᑭᑭᐢᑳᑯᓈᐣ ᑖᐱᐢᑯᐨ ᐁ ᐅᔭᓱᐋᐧᑎᑲᐃᐧᔮᕽ ᓂᐳᐃᐧᓂᕽ, ᐁᑳ ᑭᑕ ᒪᒥᓯᑐᑖᓱᔮᕽ, ᒫᑲ ᑭᓭᒪᓂᑐ ᑭᑕ ᒪᒥᓯᑐᑕᐋᐧᔮᕽ ᑳ ᐊᐧᓂᐢᑳᓈᐟ ᐅᓂᐱᐊᐧ:

¹⁰ ᑳ ᑭ ᐸᐢᐱᐃᑯᔮᕽ ᐃᔨᑯᕽ ᑭᐦᒋ ᓂᐳᐃᐧᓂᕽ ᐅᐦᒋ, ᐁᑯᓯ ᑫ ᐸᐢᐱᐃᑯᔮᕽ: ᐁᐊᐧᑯ ᒥᓇ ᑳ ᐊᐢᐯᔨᒧᑐᑕᐋᐧᔮᕽ ᑫᔮᐱᐨ ᑭᑕ ᐸᐢᐱᐃᑯᔮᕽ;

¹¹ ᑭᔭᐋᐧᐤ ᒥᓇ ᐁ ᓂᓱᑲᒫᑫᔦᐠ ᐁ ᐊᔭᒥᐦᐁᐢᑕᒪᐃᐧᔮᕽ; ᐊᓂᒪ, ᑳ ᐃᓯ ᒥᔨᑯᐃᐧᓯᔮᕽ ᒥᐦᒉᐟ ᐅᐦᒋ, ᒥᐦᒉᐟ ᒥᓇ ᑭᑕ ᓇᓈᐢᑯᒧᐢᑕᒫᑯᔮᐦᑭᐠ.

¹² ᒋᑫᒫ ᓂ ᑲᑭᒋᒧᐃᐧᓂᓈᐣ ᐁᐊᐧᑯᒪ, ᐁ ᐋᒋᒧᐢᑖᑯᔮᕽ ᓂ ᑭᐢᑫᔨᒥᓱᐃᐧᓂᓈᐣ, ᑲᓈᑎᓯᐃᐧᓂᕽ ᒥᓇ ᐁᑳ ᐁ ᑲᔦᓯᐋᔮᕽ ᑭᓭᒪᓂᑐ, ᓇᒪᐃᐧᔭ ᐃᐧᔮᓯᐃᐧ ᐃᔨᓂᓯᐃᐧᓂᕽ ᒫᑲ ᐅ ᓂᓱᑲᒫᑫᐃᐧᓂᕽ ᑭᓭᒪᓂᑐ, ᓂ ᑭ ᐃᑖᐸᒥᓈᑯᒋᑳᓈᐣ ᐊᐢᑭᕽ, ᐅᓵᒼ ᒫᑲ ᑭᔭᐋᐧᐤ ᐃᓯ.

¹³ ᒋᑫᒫ ᓇᒪᐃᐧᔭ ᐱᑐᐢ ᑫᑲᐧᐩ ᑭ ᒪᓯᓇᐦᐊᒫᑎᓈᐣ, ᐱᑯ ᐊᓂᒪ ᑳ ᐊᔭᒥᑖᔦᐠ ᐊᐦᐳ ᑳ ᐃᑕᒣᐠ, ᒥᓇ ᑳ ᐃᓯ ᐸᑯᓭᔨᒧᔮᐣ ᑭᑕ ᑖᐯᐧᑕᒣᐠ ᐱᔨᐢ ᐃᐢᑳᐧᔮᐨ:

¹⁴ ᑖᐱᐢᑯᐨ ᐋᑎᐦᐟ ᑳ ᑭ ᐃᓯ ᓇᐢᑯᒥᔮᕽ, ᓂᔭᓈᐣ ᐁ ᐅᐦᒋ ᒪᒪᐦᑖᑯᓯᔦᐠ, ᑖᐱᐢᑯᐨ ᒥᓇ ᑭᔭᐋᐧᐤ ᑫ ᐅᐦᒋ ᒪᒪᐦᑖᑯᓯᔮᕽ, ᐅ ᑭᓯᑳᒥᒋ ᑳ ᑎᐯᔨᒥᑯᔭᕽ ᒋᓴᐢ.

¹⁵ ᐅᒪ ᒫᑲ ᐁ ᐃᓯ ᐋᔮᑌᔨᑕᒫᐣ ᓵᓴᐩ ᑭ ᑭ ᐃᐧ ᐯ ᓇᑕᐋᐧᐸᒥᑎᓈᐋᐧᐤ, ᑭᑖᐧᒼ ᑭᑕ ᑭ ᐋᐸᒋᐃᑯᔦᐠ;

¹⁶ ᐁᑯᓯ ᑭᔭᐋᐧᐤ ᐅᐦᒋ ᑭᑕ ᐊᑎ ᐃᑐᐦᑌᔮᐣ ᒫᓯᑖᓂᔭᐃᕽ, ᒥᓇ ᒫᓯᑖᓂᔭᐃᕽ ᐅᐦᒋ ᑭᑕ ᐯ ᓈᑎᑕᑯᐠ, ᑭᔭᐋᐧᐤ ᑭᑕ ᓄᒪᑫ ᐃᐧᒋᐃᔦᐠ ᒫᑲ ᓯᐯᐧᔪᑌᐅᔮᓂ ᒍᑎᔭᐃᕽ ᐃᓯ.

¹⁷ ᐃᐢᐱ ᒫᑲ ᐅᒪ ᑳ ᐃᑌᔨᑕᒫᐣ, ᐁ ᐱᑭᐢᑳᓯᐠ ᒋ ᒫᒥᑐᓀᔨᒋᑲᐣ ᓂ ᑭ ᓄᑯᑖᐣ? ᐊᐦᐳ ᐊᓂᐦᐃ ᑳ ᐅᔦᔨᑕᒫᐣ, ᓄᔦᔨᑌᐣ ᒋ ᐃᐧᔮᓯᐃᐧᓂᕽ ᐃᓯ, ᓂᔭ ᐅᐦᒋ ᑭᑕ ᐃᑌᐧᔮᐣ ᐁᐦᐁ, ᐁᐦᐁ, ᐊᐦᐳ, ᓇᒪᐃᐧᔭ, ᓇᒪᐃᐧᔭ?

¹⁸ ᒫᑲ ᐁ ᐃᓯ ᑖᐯᐧᐃᐧᓂᐃᐧᐟ ᑭᓭᒪᓂᑐ, ᓂᐟ ᐃᑌᐧᐃᐧᓂᓈᐣ ᑳ ᐃᑎᑖᕽ ᓇᒪᔦᐤ ᐁᐦᐁ ᒥᓇ ᓇᒪᐃᐧᔭ.

¹⁹ ᒋᑫᒫ ᐊᓇ ᑭᓭᒪᓂᑐ ᐅᑯᓯᓴ, ᒋᓴᐢ ᙭, ᑳ ᑭ ᐃᓯ ᑲᑫᐢᑭᒥᑖᕽ ᓂᔭᓈᐣ, ᓂᔭ ᐅᑎ ᒥᓇ ᓯᓬᐯᓇᐢ ᒥᓇ ᑎᒪᑏ, ᓇᒪᔦᐤ ᐁᐦᐁ ᒥᓇ ᓇᒪᐃᐧᔭ, ᒫᑲ ᐁᐊᐧᑯ ᐁᐦᐁ.

²⁰ ᒋᑫᒫ ᑖᓂᔨᑯᕽ ᐁ ᐃᑕᑎᓂᔨᑭ ᐅᐟ ᐊᓱᑕᒫᑫᐃᐧᓇ ᑭᓭᒪᓂᑐ, ᐃᐧᔭ ᑳ ᑭᑭᐢᑳᑯᐟ ᐁᐦᐁ: ᐁᑯᓯ ᒥᓇ ᐃᐧᔭ ᐅᐦᒋ ᐋᒣᐣ, ᐅ ᑭᐢᑌᔨᑖᑯᓯᐃᐧᓂᕽ ᐃᓯ ᑭᓭᒪᓂᑐ ᓂᔭᓈᐣ ᐅᐦᒋ.

²¹ ᐁᑲᐧ ᒫᑲ ᐊᓇ ᑳ ᐋᔮᒋᐃᑯᔭᕽ ᙭ ᐃᓯ ᒥᓇ ᑳ ᐅᔭᑭᒥᑯᔭᕽ, ᐁᐊᐧᑯ ᑭᓭᒪᓂᑐ;

²² ᑳ ᑭ ᒥᓇ ᑭᐢᑭᓇᐋᐧᒋᐃᑯᔭᕽ ᒥᓇ ᑳ ᑭ ᒥᔨᑯᔭᕽ ᐅ ᑫᒋᓈᐃᐁᐧᐃᐧᐣ ᐊᐦᒑᕽ ᑭᑌᐃᓈᕽ.

²³ ᓂ ᓇᓈᑐᒫᐤ ᒫᑲ ᑭᓭᒪᓂᑐ ᑭᑕ ᐋᒋᒧᐢᑕᒪᐃᐧᐟ ᓂᐟ ᐊᐦᒑᑯᕽ, ᐁ ᒪᓈᒋᐃᑕᑯᐠ ᑳ ᐅᐦᒋ ᐁᑳ ᐯ ᐃᑐᐦᑌᔮᐣ ᑳᕒᐃᐣᑎᕽ.

²⁴ ᓇᒪᐃᐧᔭ ᒫᑲ ᐁ ᑎᐯᔨᑕᒫᕽ ᑭ ᑖᐯᐧᔦᔨᑕᒧᐃᐧᓂᐋᐧᐤ, ᒫᑲ ᐁ ᐃᐧᒋᑖᔮᕽ ᑭ ᒪᒪᐦᑖᑯᓯᐃᐧᓂᐋᐧᐤ: ᒋᑫᒫ ᑖᐯᐧᔦᔨᑕᒧᐃᐧᐣ ᐅᐦᒋ ᑳ ᓂᐸᐃᐧᔦᐠ.