ᓂᐢᑕᒼ ᑎᒪᑏ 1 - ᑲᓈᒋ ᑭᐦᒋ ᒪᓯᓈᐦᐃᑲᐣ

¹ ᐹᓬ ᐅᐟ ᐊᐹᐢᑎᓬᐃᒪ ᒋᓴᐢ ᙭ ᐁ ᐃᑕᐢᑌᔨᐠ ᐅᔭᓱᐁᐧᐃᐧᐣ ᑭᓭᒪᓂᑐ ᑯᐱᒫᒋᐦᐃᐁᐧᒥᓇᐤ ᒥᓇ ᙭ ᒋᓴᐢ ᑭᐟ ᐊᐢᐯᔨᒧᐃᐧᓂᓇᐤ;

² ᐁ ᒪᓯᓇᐦᐊᒫᑖᐣ ᑎᒪᑏ ᑖᐯᐧ ᓂᐟ ᐊᐋᐧᓯᒥᐢ ᑖᐯᐧᔦᔨᑕᒧᐃᐧᓂᕽ; ᑭᓭᐋᐧᑐᑖᑯᐃᐧᐣ, ᑭᑎᒫᑭᓈᑯᐃᐧᐣ, ᒥᓇ ᐯᔭᑕᑫᔨᒧᐃᐧᐣ ᑭ ᑲ ᐃᐧ ᐅᐦᒋᐢᑕᒫᐠ ᑭᓭᒪᓂᑐ ᐁᐧᔪᑖᐃᐧᕽ ᒥᓇ ᙭ ᒋᓴᐢ ᑳ ᑎᐯᔨᒥᑯᔭᕽ.

³ ᑳ ᑭ ᐃᓯ ᓯᑭᒥᑖᐣ ᑫᔮᐱᐨ ᑭᑕ ᐊᔮᔭᐣ ᐁᐱᓴᓯᕽ ᒣᑳᐧᐨ ᒫᓯᑖᓂᔭᐃᕽ ᐁ ᐃᑐᐦᑌᔮᐣ, ᑭᑕ ᐊᔮᑳᐧᒥᒪᒋᐠ ᐋᑎᐦᐟ ᐊᔨᓯᔨᓂᐊᐧᐠ ᐁᑳ ᑭᑕ ᑭᐢᑭᓄᐦᐊᒫᑫᒋᐠ ᐱᑐᐢ ᑭᐢᑭᓄᐦᐊᒫᑫᐃᐧᐣ,

⁴ ᒥᓇ ᐁᑳ ᑭᑕ ᐱᓯᐢᑫᔨᑕᐦᑭᐠ ᐋᑕᔪᑲᓇ ᒥᓇ ᐁᑳ ᑳ ᑭᓯᐱᐸᔨᑭ ᐋᔮᓂᐢᑫ ᐋᒋᒧᐃᐧᓇ, ᐁᐊᐧᑯᓂ ᑳ ᐅᐦᒋ ᐸᓯᑯᒪᑲᑭ ᑲᑫᐧᒋᑐᐃᐧᓇ ᐃᔨᑯᕽ ᐃᐧᔭ ᑳ ᐃᓯ ᐸᑭᑎᓇᒫᑫᐟ ᑭᓭᒪᓂᑐ ᑖᐯᐧᔦᔨᑕᒧᐃᐧᓇᕽ ᑳ ᐊᔮᐠ; ᐁᑯᓯ ᐃᑐᑕ.

⁵ ᒫᑲ ᐁ ᑭᓯᐱ ᐊᔮᐠ ᐊᔮᑳᐧᒥᒥᐁᐧᐃᐧᐣ ᐁᐊᐧᑯ ᓵᑭᐦᐃᐁᐧᐃᐧᐣ ᐁ ᐯᑲᕽ ᒥᑌᐦ ᐅᐦᒋ ᒥᓇ ᐁ ᒥᔮᐧᓯᐠ ᑭᐢᑫᔨᒥᓱᐃᐧᐣ ᒥᓇ ᑖᐯᐧᔦᔨᑕᒧᐃᐧᐣ ᐁᑳ ᐁ ᑲᔦᓴᕽ;

⁶ ᐁᐊᐧᑯᓂ ᐋᑎᐦᐟ ᐁ ᑭ ᐸᑕᐊᑭᐠ ᑭ ᐸᐢᑫᐊᐧᐠ ᐱᑯᓇᑕ ᐱᑭᐢᑫᐧᐃᐧᓂᕽ;

⁷ ᐁ ᓄᐦᑌ ᑭᐢᑭᓄᐦᐊᒫᑫᒋᐠ ᐅᔭᓱᐁᐧᐃᐧᐣ, ᐋᑕ ᐁᑳ ᐁ ᓂᓯᑐᐦᑕᐦᑭᐠ ᐊᓂᒪ ᑳ ᑕᓯᑕᑭᐠ ᐊᐦᐳ ᑳ ᐃᓯ ᑫᒋᓈᐅᐃᐧ ᐃᑌᐧᒋᐠ.

⁸ ᒫᑲ ᑭ ᑭᐢᑫᔨᑌᓈᓇᐤ ᐁ ᒥᔮᐧᓯᐠ ᐅᔭᓱᐁᐧᐃᐧᐣ ᑭᐢᐱᐣ ᐊᔨᓯᔨᓂᐤ ᑲᐧᔭᐢᐠ ᐃᓯ ᐊᐸᒋᑖᒋ,

⁹ ᐁ ᑭᐢᑫᔨᑕᒪᕽ ᐅᒪ ᓇᒪᐃᐧᔭ ᐁ ᑲᐧᔭᐢᑭᑖᑎᓯᐟ ᓈᐯᐤ ᑳ ᐅᓯᑖᐧᐦᐟ ᐅᔭᓱᐁᐧᐃᐧᐣ, ᒫᑲ ᐁᑳ ᑳ ᓈᑲᑐᑫᒋᐠ ᐅᔭᓱᐁᐧᐃᐧᐣ ᒥᓇ ᑳ ᓴᓯᐱᑕᑭᐠ, ᐁᑳ ᑳ ᐊᔭᒥᐦᐋᐋᐧᑎᓯᒋᐠ ᒥᓇ ᑳ ᒪᒑᑎᓯᒋᐠ, ᐁᑳ ᑳ ᐯᑳᑎᓯᒋᐠ ᒥᓇ ᑳ ᒪᒋ ᐃᑌᐧᐢᑭᒋᐠ, ᑳ ᐸᑲᒪᐋᐧᒋᐠ ᐅᑖᐃᐧᐋᐧᐊᐧ ᒥᓇ ᑳ ᐸᑲᒪᐋᐧᒋᐠ ᐅᑲᐃᐧᐋᐧᐊᐧ, ᐊᔨᓯᔨᓂᐊᐧ ᑳ ᓂᐸᐦᐋᒋᐠ,

¹⁰ ᐅᐱᓯᑳᐧᑎᓯᐊᐧᐠ ᒥᓇ ᐃᐧᒋ ᐊᔨᓯᔨᓂᐋᐧᐊᐧ ᑳ ᑭᑭ ᓂᓯᐊᐧᓈᒋᐃᓱᒋᐠ, ᐊᔨᓯᔨᓂᐊᐧ ᑳ ᑭᒧᑎᒋᐠ, ᐅᑭᔮᐢᑭᐢᑲᐠ, ᑳ ᑭᔮᐢᑭᐃᐧ ᑭᐦᒋ ᐃᑌᐧᒋᐠ, ᒥᓇ ᑭᐢᐱᐣ ᓈᐣᑕᐤ ᑯᑕᐠ ᑫᑲᐧᐩ ᐁᑕᑲᐧᓄᑫᐧ ᐁ ᓇᐢᐹᑕᐢᑌᐠ ᑲᐧᔭᐢᐠ ᑭᐢᑭᓄᐦᐊᒫᑫᐃᐧᐣ;

¹¹ ᑳ ᐃᑕᐢᑌᐠ ᐁ ᒥᔮᐧᒋᒧᐃᐧᓂᐊᐧᓂᔨᐠ ᐅ ᑭᐢᑌᔨᑖᑯᓯᐃᐧᐣ ᑳ ᒪᒥᒋᒥᑯᐃᐧᓯᐟ ᑭᓭᒪᓂᑐ, ᐁᐊᐧᑯ ᒥᔮᐧᒋᒧᐃᐧᐣ ᑳ ᑭ ᐸᒥᓇᒧᐃᑲᐃᐧᔮᐣ.

¹² ᓂ ᓇᓈᐢᑯᒫᐤ ᒫᑲ ᑳ ᑭ ᒥᔨᐟ ᑭᑕ ᐃᓯ ᑲᐢᑭᑖᔮᐣ, ᒋᓴᐢ ᙭ ᐅᑎ ᑳ ᑎᐯᔨᒥᑯᔭᕽ, ᒋᑫᒫ ᐊᔮᑳᐧᒥᓯᐤ ᓂ ᑭ ᐃᑕᑭᒥᐠ, ᐁ ᐅᔭᑭᒥᐟ ᑭᑕ ᐊᑐᐢᑲᐊᐧᐠ;

¹³ ᐋᑕ ᓂᔭ ᑲᔮᐢ ᐁ ᑭ ᐹᐢᑖᒧᐃᐧ ᐱᑭᐢᑫᐧᐢᑭᔮᐣ, ᒥᓇ ᐁ ᑭ ᑯᑕᑭᐦᐃᐁᐧᔮᐣ, ᒥᓇ ᐁ ᑭ ᓂᓯᐊᐧᓈᒋᒋᑫᐢᑭᔮᐣ; ᒫᑲ ᓂ ᑭ ᑭᑌᒫᑭᓈᑲᐃᐧᐣ ᒋᑫᒫ ᓂ ᑭ ᐃᑐᑌᐣ ᐁᑳ ᐁ ᑭᐢᑫᔨᑕᒫᐣ ᐃᐧᔭ ᐁᑳ ᐁ ᑖᐯᐧᑕᒫᐣ;

¹⁴ ᐁᑯᓯ ᐅ ᑭᓭᐊᐧᑎᓯᐃᐧᐣ ᑳ ᑎᐯᔨᒥᑯᔭᕽ ᐊᔨᐋᐧᐠ ᓂ ᑭ ᐁᐧᔪᑌᓇᒫᑲᐃᐧᐣ ᑭᑭ ᑖᐯᐧᔦᔨᑕᒧᐃᐧᐣ ᒥᓇ ᓵᑭᐦᐃᐁᐧᐃᐧᐣ ᙭ ᒋᓴᐢ ᑳ ᐊᔮᐟ.

¹⁵ ᑖᐯᐧᒪᑲᐣ ᐅᒪ ᐃᑌᐧᐃᐧᐣ ᒥᓇ ᑌᐸᑫᔨᑖᑲᐧᐣ ᑲᐦᑭᔭᐤ ᐊᐃᐧᔭᐠ ᑭᑕ ᐅᑎᓈᕽ, ᙭ ᒋᓴᐢ ᐁ ᑭ ᐯ ᐃᑐᐦᑌᐟ ᐊᐢᑭᕽ ᑭᑕ ᐱᒫᒋᐦᐋᐟ ᐅᒫᒑᑎᓴ; ᓂᔭ ᒫᑲ ᑳ ᓂᑳᓀᔨᑖᑯᓯᔮᐣ ᐁᑯᑐᐊᐧ;

¹⁶ ᐁᔨᐁᐧᕽ ᒫᑲ ᐅᒪ ᐅᐦᒋ ᓂ ᑭ ᑭᑎᒫᑭᓈᑲᐃᐧᐣ, ᓂᔭ ᐁ ᐊᔨᐋᐧᑫᔨᑖᑯᓯᔭᐣ ᒋᓴᐢ ᙭ ᑭᑕ ᐋᐧᐸᐦᑕᐦᐃᐁᐧᐟ ᑲᐦᑭᔭᐤ ᐅ ᓯᐯᔨᑕᒧᐃᐧᐣ ᑭᑕ ᐋᐧᐸᐦᑕᐦᐃᑯᒋᐠ ᐊᓂᑭ ᒣᐧᐢᑕᐢ ᐃᔨᑯᕽ ᑫ ᑖᐯᐧᑕᐋᐧᒋᐠ ᑳᑭᑫ ᐱᒫᑎᓯᐃᐧᓂᕽ ᐃᓯ.

¹⁷ ᐁᑲᐧ ᒫᑲ ᐊᓇ ᑭᐦᒋ ᐅᑭᒫᐤ ᑳᑭᑫ ᑳ ᐊᔮᐟ, ᐁᑳ ᑳ ᓂᓯᐊᐧᓈᑎᓯᐟ ᐁᑳ ᑳ ᐋᐧᐸᒥᐦᐟ ᐊᓇ ᐱᑯ ᑭᓭᒪᓂᑐ, ᑭᑕ ᐃᐧ ᑭᐢᑕᑭᒫᐤ ᒥᓇ ᑭᐢᑌᔨᑖᑯᐊᐤ ᑳᑭᑫ ᒥᓇ ᑳᑭᑫ. ᐋᒣᐣ.

¹⁸ ᐁᐊᐧᑯ ᐅᒪ ᐊᔮᑳᐧᒥᒥᐁᐧᐃᐧᐣ ᐯᑭᑎᓇᒫᑖᐣ ᓂᑯᓭ ᑎᒪᑏ ᐁ ᐃᑕᐢᑌᑭ ᑭᐢᑭᐁᐧᐦᐃᑫᐃᐧᓇ ᑳ ᑭ ᓂᑳᓂᐢᑳᑯᔭᐣ ᐁᐊᐧᑯᓂ ᑭᑕ ᐅᐦᒋ ᓄᑎᓂᑫᔭᐣ ᒥᔪ ᓄᑎᓂᑫᐃᐧᓂᕽ;

¹⁹ ᐁ ᒥᒋᒥᓇᒪᐣ ᑖᐯᐧᔦᔨᑕᒧᐃᐧᐣ ᒥᓇ ᒥᔪ ᑭᐢᑫᔨᒥᓱᐃᐧᐣ; ᐁᐊᐧᑫᐧᔨᐤ ᐋᑎᐦᐟ ᐁ ᑭ ᒥᑖᑫᐧᓇᒫᓱᒋᐠ ᑭ ᓂᓯᐊᐧᓈᒋᒋᑫᐊᐧᐠ ᑖᐯᐧᔦᔨᑕᒧᐃᐧᓂᕽ ᐃᓯ;

²⁰ ᐁᐊᐧᑯᓂᐠ ᑖᐱᐢᑯᐨ ᐦᐋᐃᒥᓂᔭᐢ ᒥᓇ ᐋᓬᐃᐠᓵᐣᑕᕒ; ᑳ ᑭ ᐸᑭᑎᓇᒪᐊᐧᐠ ᓭᑕᐣ ᑭᑕ ᑲᑫᐢᑭᒥᑯᐃᐧᓯᒋᐠ ᐁᑳ ᑭᑕ ᐹᐢᑖᒧᒋᐠ.