ᓂᐢᑕᒼ ᓵᒼᔪᐃᓬ 1 - ᑲᓈᒋ ᑭᐦᒋ ᒪᓯᓈᐦᐃᑲᐣ

¹ ᑭ ᐃᐦᑖᐤ ᒫᑲ ᓈᐯᐤ ᕒᐁᒪᑌᔨᒼ ᓵᐱᒼ ᐅᐦᒋ ᐁᓬᑫᓇ ᒫᑲ ᑭ ᐃᓯᔨᐦᑳᓱ, ᐅᑯᓯᓴ ᒉᕒᐋᐦᐋᒼ, ᐅᑯᓯᓴ ᐃᓬᐋᔪ ᐅᑯᓯᓴ ᑐᐦᔪ, ᐅᑯᓯᓴ ᓴᐦᑊ, ᐃᐸᕒᐁᐃᒪᐃᐟ.

² ᑭ ᓂᓱᐢᑫᐧᐁᐧᐤ ᒫᑲ, ᐯᔭᐠ ᐦᐋᓇ ᑭ ᐃᓯᔨᐦᑳᓱᔨᐊᐧ, ᐁᑯᓯ ᑯᑕᑲ ᐱᓂᓇ ᑭ ᐃᓯᔨᐦᑳᓱᔨᐊᐧ; ᐱᓂᓇ ᒫᑲ ᑭ ᐅᐟ ᐊᐋᐧᓯᒥᓯᐤ, ᒫᑲ ᐦᐋᓇ ᓇᒪᐃᐧᔭ ᐅᐟ ᐊᐋᐧᓯᒥᓯᐤ.

³ ᐊᐊᐧ ᒫᑲ ᓈᐯᐤ ᑭ ᓯᐯᐧᐦᑌᐤ ᒫᓇ ᐅᐟ ᐅᑌᓈᕽ ᐅᐦᒋ ᑕᐦᑐ ᐊᐢᑭ ᑭᑕ ᓇᑕᐃᐧ ᐊᔭᒥᐦᐋᐟ ᒥᓇ ᑭᑕ ᐸᑭᑎᓈᓱᐢᑕᐋᐧᐟ ᑳ ᑎᐯᔨᐦᒋᑫᔨᐟ ᒫᒪᐁᐧᔭᐢ ᓯᔪᐦᑳᑎᓯᔨᐟ ᓴᐃᓬᐆᐃᕽ. ᐊᓂᐦᐃ ᒫᑲ ᐁ ᓂᓯᔨᐟ ᐃᓬᐋᐩ ᐅᑯᓯᓴ, ᐦᐋᑊᓇᐩ ᒥᓇ ᐱᓂᔮᐢ, ᑳ ᑎᐯᔨᐦᒋᑫᐟ ᐅᐟ ᐊᔭᒥᐦᐁᐃᐧᔨᓂᒪ ᐁᑯᑕ ᑭ ᐊᔮᔨᐊᐧ.

⁴ ᐃᐢᐱ ᒫᑲ ᑭᓯᑳᐤ ᐁᐧᑎᐦᒋᐸᔨᐠ ᐃᑕ ᐁᓬᑫᓇ ᑳ ᐸᑭᑎᓈᓱᐟ ᑭ ᒥᔦᐤ ᐃᐧᐊᐧ ᐱᓂᓇᐊᐧ ᒥᓇ ᑲᐦᑭᔭᐤ ᐅᑯᓯᓯᔨᐊᐧ ᒥᓇ ᐅᑖᓂᓯᔨᐊᐧ ᒫᑎᓇᒫᑫᐃᐧᓇ;

⁵ ᒫᑲ ᐃᐧᔭ ᐦᐋᓇᐊᐧ ᒥᔦᐤ ᓂᓵᐧᐤ ᐃᔨᑯᕽ, ᒋᑫᒫ ᓵᑭᐦᐁᐤ ᐦᐋᓇᐊᐧ, ᒫᑲ ᑳ ᑎᐯᔨᐦᒋᑫᔨᐟ ᓇᒪᐃᐧᔭ ᑭ ᐸᑭᑎᓇᒫᑯᔨᐊᐧ ᐊᐋᐧᓯᓴ ᑭᑕ ᐊᔮᐋᐧᔨᐟ.

⁶ ᐦᐋᓇ ᒫᑲ ᐃᐧᐢᑲᐧ ᑭ ᓇᑐᓇᒥᔨᐊᐧ ᑭᑕ ᐃᓯ ᐱᑫᐧᔨᑕᒥᐃᑯᐟ ᐊᓂᒪ ᐅᐦᒋ ᐁᑳ ᐁ ᐸᑭᑎᓇᒫᑯᐟ ᑳ ᑎᐯᔨᐦᒋᑫᔨᐟ ᑭᑕ ᐅᐟ ᐊᐋᐧᓯᒥᓯᐟ.

⁷ ᐅᒥᓯ ᒫᑲ ᐁ ᐃᐦᑐᑖᑯᐟ ᐅ ᓈᐯᒪ ᑕᐦᑐ ᐊᐢᑭ ᐁᑐᐦᑌᒋ ᐅ ᐋᐧᐢᑳᐦᐃᑲᓂᔨᕽ ᑳ ᑎᐯᔨᐦᒋᑫᔨᐟ, ᐁᑯᓯ ᐃᓯ ᑭ ᐱᑫᐧᔨᑕᒥᐦᐃᐠ; ᑭ ᒫᑐ ᒫᑲ, ᒥᓇ ᓇᒪᐃᐧᔭ ᒥᒋᓱ.

⁸ ᐁᑲᐧ ᒫᑲ ᐅ ᓈᐯᒪ ᐁᓬᑫᓇᐊᐧ ᑭ ᐃᑎᐠ, ᐦᐋᓇ, ᑖᓀᑭ ᑳ ᒫᑐᔭᐣ? ᑖᓀᐦᑭ ᒥᓇ ᐁᑳ ᑳ ᒥᒋᓱᔭᐣ? ᒥᓇ ᑖᓀᐦᑭ ᑳ ᐃᐧᓴᑭᑌᐦᐁᔭᐣ? ᓇᒪ ᒋ ᓇᐊᐧᐨ ᓂᔭ ᑭ ᒥᔪ ᑐᑖᑎᐣ ᐃᔨᑯᕽ ᐋᑕ ᒥᑖᑕᓯᒋᐠ ᑭᑯᓯᓴᐠ?

⁹ ᐦᐋᓇ ᒫᑲ ᑭ ᐸᓯᑯ ᐃᐢᐱ ᑳ ᒥᒋᓱᒋᐠ ᐁᑯᑕ ᐊᓂᒪ ᓴᐃᓬᐆ, ᒥᓇ ᐃᐢᐱ ᑳ ᒥᓂᐦᑫᐧᒋᐠ. ᐃᓬᐋᔭ ᒫᑲ ᐊᔭᒥᐦᐁᐃᐧᔨᓂᐊᐧ ᑭ ᐊᐱᔨᐊᐧ ᐊᐱᐃᐧᓂᕽ ᒋᑭ ᒋᒪᒋᑲᓂᕽ ᐅ ᑭᐦᒋᐊᔭᒥᐦᐁᐃᐧᑲᒥᑯᔨᕽ ᑳ ᑎᐯᔨᐦᒋᑫᔨᐟ.

¹⁰ ᑭ ᐃᐧᓴᑭ ᑲᐢᑫᔨᑕᒼ ᒫᑲ ᐅᐟ ᐊᐦᒑᐦᑯᕽ, ᐁᑯᓯ ᑭ ᐊᔭᒥᐦᐁᐢᑕᐁᐧᐤ ᑳ ᑎᐯᔨᐦᒋᑫᔨᐟ ᒥᓇ ᒥᐢᑕᐦᐃ ᑭ ᒫᑐ.

¹¹ ᑭ ᑭᐦᒋᐃᑌᐧᐤ ᒫᑲ ᑭᐦᒋᐃᑌᐧᐃᐧᐣ, ᐅᒥᓯ ᐁ ᑭ ᐃᑌᐧᐟ, ᑌᐯᔨᐦᒋᑫᔭᐣ ᒫᒪᐁᐧᔭᐢ ᓯᔪᑳᑎᓯᔭᐣ ᑭᐢᐱᐣ ᑖᐯᐧ ᑫ ᑲᓇᐋᐧᐸᐦᑕᒫᐧᐊᐧᑌ ᐅ ᑲᐢᑫᔨᐦᑕᒧᐃᐧᐣ ᑭᐟ ᐊᑐᐢᑫᔮᑲᓂᐢᑫᐧᒼ, ᒥᓇ ᑫ ᑭᐢᑭᓯᑐᑕᐃᐧᐊᐧᓀ, ᒥᓇ ᐁᑳ ᐊᐧᓂᑭᐢᑭᓯᑐᑕᐊᐧᒋ ᑭᐟ ᐊᑐᐢᑫᔮᑲᓂᐢᑫᐧᒼ ᒫᑲ ᒥᔭᒋ ᑭᐟ ᐊᑐᐢᑫᔮᑲᓂᐢᑫᐧᒼ ᓈᐯᐤ ᐊᐋᐧᓯᓴ, ᓂ ᑲ ᐸᑭᑎᓇᐤ ᑭᑕ ᐊᑐᐢᑲᐋᐧᐟ ᑳ ᑎᐯᔨᐦᒋᑫᔨᐟ ᐃᔨᑯᕽ ᑫ ᐱᒫᑎᓯᑫᐧ ᒥᓇ ᓇᒪᐃᐧᔭ ᑳᐢᑭᐹᓱᐣ ᑲᑕ ᓵᒥᑎᓂᔨᐤ ᐅᐢᑎᑲᐧᓂᕽ.

¹² ᑭ ᐃᐢᐸᔨᐤ ᒫᑲ ᐅᒪ ᐁ ᐃᑕᓯ ᐊᔭᒥᐦᐁᐢᑕᐋᐧᐟ ᑳ ᑎᐯᔨᐦᒋᑫᔨᐟ ᐃᓬᐋᔭ ᑭ ᐱᓯᐢᑳᐸᐦᑕᒣᐧᐤ ᐅ ᑐᓂᔨᐤ.

¹³ ᐦᐋᓇ ᒫᑲ ᐅ ᑌᐦᐃᕽ ᐊᔭᒥᐤ; ᐱᑯ ᐁ ᐊᐧᐢᑲᐃᐧᑐᓀᐸᔨᐟ, ᐁᑳ ᒫᑲ ᐁ ᐯᐦᑖᑯᓯᐟ; ᐁᐊᐧᑯ ᐅᐦᒋ ᐃᓬᐋᔭ ᑭᐢᑫᐧᐯᐤ ᑭ ᐃᑌᔨᒥᐠ.

¹⁴ ᐃᓬᐋᔭ ᒫᑲ ᑭ ᐃᑎᐠ, ᑖᓂᔨᑯᕽ ᑫ ᐃᐦᑕᓯ ᑭᐢᑫᐧᐯᔭᐣ. ᐃᑲᑌᐢᑖ ᑭ ᓱᒥᓈᐳᒼ.

¹⁵ ᐦᐋᓇ ᒫᑲ ᑭ ᓇᐢᑫᐧᐊᐧᓯᒣᐤ ᐁ ᑭ ᐃᑖᐟ, ᓇᒪᐃᐧᔭ, ᓄᑭᒫᒼ, ᓂᔭ ᐅᒪ ᐃᐢᑫᐧᐤ ᑳ ᐅ ᒥᑯᐢᑳᑌᔨᑕᒧᐃᐧᓂᐟ; ᓇᒪᐃᐧᔭ ᓄᐦ ᒥᓂᑳᐧᐣ ᓱᒥᓈᐳ ᐊᐦᐳ ᐁ ᒪᐢᑲᐋᐧᐠ ᒥᓂᐦᑫᐧᐃᐧᐣ, ᒫᑲ ᓂ ᑭ ᓯᑭᓇᒪᐋᐧᐤ ᑳ ᑎᐯᔨᐦᒋᑫᐟ ᐁ ᐃᓯ ᒧᐢᑭᓀᔨᐟ ᓂᐟ ᐊᐦᒑᐦᑲᐧ.

¹⁶ ᐁᑳᐃᐧᔭ ᒪᒋ ᐃᐢᑫᐧᐤ ᐃᑕᑭᒥᐣ ᑭᐟ ᐊᑐᐢᑫᔮᑲᓂᐢᑫᐧᒼ ᒋᑫᒫ ᐁ ᐃᓯ ᐅᓵᒥ ᐊᔮᐠ ᓂ ᒪᐃᐧᒧᐢᒋᑫᐃᐧᐣ ᒥᓇ ᓂ ᒥᑯᐢᑳᑌᔨᑕᒥᐦᐃᑯᐃᐧᐣ ᑳ ᑭ ᐅᐦᒋ ᐊᔭᒥᔮᐣ.

¹⁷ ᐃᓬᐋᐩ ᒫᑲ ᑭ ᓇᐢᑫᐧᐊᐧᓯᒣᐤ ᐁ ᑭ ᐃᑌᐧᐟ, ᐯᔭᐦᑕᑫᔨᒧᐃᐧᓂᕽ ᓯᐯᐧᐦᑌ; ᐅ ᑭᓭᒪᓂᑐᒪ ᐃᐢᕒᐁᐃᓬ ᑭ ᑲ ᐃᐧ ᐸᑭᑌᔨᑕᒫᐠ ᑭ ᓇᑐᑕᒫᑫᐃᐧᐣ ᑳ ᑭ ᑲᑫᐧᒋᒪᐟ.

¹⁸ ᐃᐧᔭ ᒫᑲ ᑭ ᐃᑌᐧᐤ, ᑭᔮᒼ ᑭ ᑲ ᐃᐧ ᒥᔪ ᑭᑖᐸᒫᐤ ᑭᐟ ᐊᑐᐢᑫᔮᑲᓂᐢᑫᐧᒼ. ᐁᑯᓯ ᒫᑲ ᐊᓇ ᐃᐢᑫᐧᐤ ᑭ ᓯᐯᐧᐦᑌᐤ, ᑭ ᒥᒋᓱ ᒫᑲ, ᐁᑯᓯ ᓇᒪᐃᐧᔭ ᐁᑲᐧ ᑳᒫᐧᒋᓈᑯᓯᐤ.

¹⁹ ᐃᐧᐸᐨ ᒫᑲ ᑫᑭᓭᐹ ᑭ ᐊᐧᓂᐢᑳᐊᐧᐠ, ᐁᑯᓯ ᑭ ᐊᔭᒥᐦᐁᐢᑕᐁᐧᐊᐧᐠ ᑳ ᑎᐯᔨᐦᒋᑫᔨᐟ, ᐁᑲᐧ ᑭ ᑭᐁᐧᐊᐧᐠ, ᒥᓇ ᑭ ᐊᑎ ᑕᑯᓯᓇᐧᐠ ᐃᐧᑭᐊᐧᕽ ᕒᐁᒪᐃᕽ: ᐁᓬᑫᓇ ᒫᑲ ᑭ ᑭᐢᑫᔨᒣᐤ ᐦᐋᓇᐊᐧ ᐃᐧᐊᐧ; ᐁᑯᓯ ᑳ ᑎᐯᔨᐦᒋᑫᔨᐟ ᑭ ᑭᐢᑭᓯᑐᑖᑯᔨᐊᐧ.

²⁰ ᑭ ᐊᔨᑭᐣ ᒫᑲ ᐃᐢᐱ ᑳ ᐅᑎᐦᒋᐸᔨᐠ ᐦᐋᓇ ᐁ ᑭᑭᐢᑲᐋᐧᐟ ᐊᐋᐧᓯᓴ, ᑭ ᓄᑯᓯᔨᐊᐧ ᐅᑯᓯᓴ, ᐁᑯᓯ ᓵᒼᔪᐃᓬ ᑭ ᐃᓯᔨᑳᑌᐤ, ᐁ ᐃᑌᐧᐟ, ᒋᑫᒫ ᓂ ᑭ ᓇᑐᑕᒪᐋᐤ ᑳ ᑎᐯᔨᐦᒋᑫᐟ.

²¹ ᐊᓇ ᒫᑲ ᓈᐯᐤ ᐁᓬᑫᓇ ᒥᓇ ᑲᐦᑭᔭᐤ ᐃᐧᑭᕽ ᐁ ᐊᔮᔨᐟ, ᑭ ᐃᑐᐦᑌᐊᐧᐠ ᑭᑕ ᐸᑭᑎᓇᒪᐋᐧᒋᐠ ᑳ ᑎᐯᔨᐦᒋᑫᔨᐟ ᑕᐦᑐ ᐊᐢᑭ ᐸᑭᑎᓈᓱᐃᐧᐣ ᒥᓇ ᑳ ᑭ ᑭᐦᒋᐃᑌᐧᐟ.

²² ᒫᑲ ᐦᐋᓇ ᓇᒪᐃᐧᔭ ᑭ ᐃᑐᐦᑌᐤ, ᒋᑫᒫ ᑭ ᐃᑌᐤ ᐅ ᓈᐯᒪ, ᓇᒪᐃᐧᔭ ᓂ ᑲ ᐃᑐᐦᑖᐣ ᐹᑎᒫ ᐃᔨᑯᕽ ᐳᓂ ᓄᓂᒋ, ᐁᑲᐧ ᓂ ᑲ ᐃᑐᐦᑕᐋᐤ ᐁᑯᑕ ᑭᑕ ᐋᐧᐸᒥᑯᐟ ᑳ ᑎᐯᔨᐦᒋᑫᔨᐟ ᒥᓇ ᐁᑯᑕ ᑭᑕ ᐊᔮᐟ ᑳᑭᑫ.

²³ ᐅ ᓈᐯᒪ ᒫᑲ ᐁᓬᑫᓇᐊᐧ ᑭ ᐃᑎᐠ, ᐁ ᐃᓯ ᒥᔦᐧᔨᐦᑕᒪᐣ ᐃᐦᑐᑕ; ᑭᔮᒼ ᐅᑕ ᐊᔮ ᐃᐢᑯ ᑭᑕ ᐳᓂ ᓄᓂᐟ, ᑌᐱᔮᕽ ᑳ ᑎᐯᔨᐦᒋᑫᐟ ᐋᔮᑕᐢᑖᒋ ᐅᐟ ᐃᑌᐧᐃᐧᐣ. ᐁᑯᓯ ᐊᐊᐧ ᐃᐢᑫᐧᐤ ᑭ ᐊᐱᐤ, ᒥᓇ ᐁ ᑭ ᓄᐦᔮᐟ ᐅᑯᓯᓴ ᐱᔨᐢ ᐁ ᐳᓂ ᓄᓂᔨᐟ.

²⁴ ᐃᐢᐱ ᒫᑲ ᑳ ᐳᓂ ᓄᐦᔮᐟ, ᑭ ᐃᑐᐦᑕᐁᐤ, ᐁᑯᓯ ᑭ ᑭᑭ ᐃᑐᐦᑕᐁᐤ ᓂᐢᑐ ᔮᐯᓯᓴ, ᒥᓇ ᐯᔭᐠ ᐃᐦᐸ ᐃᔨᑯᕽ ᐸᐦᑫᐧᓯᑲᓇ, ᒥᓇ ᐯᔭᐠ ᐊᓯᐊᐧᒋᑲᐣ ᓱᒥᓈᐳ, ᑭ ᐱᐦᑐᑲᐦᐁᐤ ᒫᑲ ᐅᑯᓯᓴ ᐅ ᐋᐧᐢᑳᐦᐃᑲᓂᔨᕽ ᑳ ᑎᐯᔨᐦᒋᑫᔨᐟ ᓴᐃᓬᐆᐃᕽ: ᐅᐢᑳᑎᓯᐤ ᒫᑲ ᐊᓇ ᐊᐋᐧᓯᐢ.

²⁵ ᐁᑯᓯ ᑭ ᓂᐸᐁᐊᐧᐠ ᔮᐯᓯᓴ, ᒥᓇ ᑭ ᐃᑐᐦᑕᐁᐊᐧᐠ ᐊᓂᐦᐃ ᐊᐋᐧᓯᓴ ᐃᑕ ᐁ ᐊᔮᔨᐟ ᐃᓬᐋᔭ.

²⁶ ᐅᒥᓯ ᒫᑲ ᑭ ᐃᑌᐧᐤ ᐦᐋᓇ, ᐋ ᓂᐟ ᐅᑭᒫᒼ, ᐁ ᐃᓯ ᑫᐦᒋᓈ ᐱᒫᑎᓯᐟ ᑭᐟ ᐊᐦᒑᕽ, ᓂᐟ ᐅᑭᒫᒼ, ᓂᔭ ᐁᐊᐧᑯ ᐊᓇ ᐃᐢᑫᐧᐤ ᐆᑕ ᑳ ᑭᐦ ᓂᐸᐃᐧᐢᑖᑖᐣ ᐁ ᐊᔭᒥᐦᐁᐢᑕᐊᐧᐠ ᑳ ᑎᐯᔨᐦᒋᑫᐟ.

²⁷ ᐊᐊᐧ ᐊᐋᐧᓯᐢ ᑳ ᑭ ᓇᑐᑕᒫᔮᐣ; ᑳ ᑎᐯᔨᐦᒋᑫᐟ ᒫᑲ ᓂ ᑭ ᒥᔨᐠ ᓂ ᓇᑐᑕᒫᐊᐧᑎᐦᑎᓱᐃᐧᐣ ᑳ ᑭ ᐃᓯ ᑲᑫᐧᒋᒪᐠ.

²⁸ ᐁᐊᐧᑯ ᐅᐦᒋ ᒫᑲ ᓂ ᑭ ᐊᐃᐧᐦᐋᐤ ᑳ ᑎᐯᔨᐦᒋᑫᐟ; ᐃᐢᑯ ᑫ ᐱᒫᑎᓯᑫᐧ ᑲᑕ ᐊᐃᐧᐦᐋᐤ ᑳ ᑎᐯᔨᐦᒋᑫᐟ. ᑭ ᐊᔭᒥᐦᐁᐢᑕᐁᐧᐤ ᒫᑲ ᐁᑯᑕ ᑳ ᑎᐯᔨᐦᒋᑫᔨᐟ.