ᓂᐢᑕᑦ ᑭᐦᒋ ᐅᑭᒫᐊᐧᐠ 1 - ᑲᓈᒋ ᑭᐦᒋ ᒪᓯᓈᐦᐃᑲᐣ1 ᐁᑲᐧ ᒫᑲ ᑭᐦᒋ ᐅᑭᒫᐤ ᑌᐱᐟ ᑭ ᑭᓭᔮᑎᓯᐤ ᒥᓇ ᑭ ᓀᓱᐃᐧᑭᐦᑳᐤ; ᐁᑯᓯ ᑭ ᐊᑲᐧᓇᐁᐧᐊᐧᐠ ᓂᐹᑲᓇ ᐅᐦᒋ ᒫᑲ ᓇᒪᐃᐧᔭ ᑭ ᑭᓱᓯᐤ. 2 ᐁᐊᐧᑯ ᐅᐦᒋ ᐅᐟ ᐊᑐᐢᑫᔮᑲᓇ ᑭ ᐃᑎᐠ, ᑭᔮᒼ ᑭᑕ ᓇᑐᓈᒫᐊᐧ ᓂᐟ ᐅᑭᒫᒼ ᑭᐦᒋ ᐅᑭᒫᐤ ᐅᐢᑭᓂᑭᐢᑫᐧᐊᐧ; ᑭᑕ ᓂᐸᐃᐧᐢᑖᑯᐟ ᑭᐦᒋ ᐅᑭᒫᐤ ᒥᓇ ᑭᑕ ᐸᒥᐦᐃᑯᐟ; ᒥᓇ ᑭᔮᒼ ᑭᑕ ᐱᒥᓯᐣ ᑭ ᐱᔪᒧᐃᐧᓂᕽ, ᓂᐟ ᐅᑭᒫᒼ ᑭᐦᒋ ᐅᑭᒫᐤ ᑭᑕ ᑭᓱᓯᐟ. 3 ᐁᑯᓯ ᒫᑲ ᑭ ᓇᓈᑐᓇᐁᐧᐊᐧᐠ ᐁ ᑲᑕᐊᐧᓯᓯᔨᐟ ᐅᐢᑭᓂᑭᐢᑫᐧᐊᐧ ᒥᓯᐁᐧ ᐃᐢᑯ ᐁ ᐅᐟ ᐊᐢᑭᔨᐟ ᐃᐢᕒᐁᐃᓬ, ᑭ ᒥᐢᑲᐁᐧᐊᐧᐠ ᒫᑲ ᐋᐱᓵᐠ ᐊᓇ ᓱᓇᒪᐃᐟ, ᐁᑯᓯ ᑭ ᐯᑕᒪᐁᐧᐊᐧᐠ ᑭᐦᒋ ᐅᑭᒫᐊᐧ. 4 ᐊᓇ ᒫᑲ ᐅᐢᑭᓂᑭᐢᑫᐧᐤ ᐊᔨᐋᐧᐠ ᑭ ᑲᑕᐊᐧᓯᓯᐤ; ᐁᑯᓯ ᑭ ᐸᒥᐁᐤ ᑭᐦᒋ ᐅᑭᒫᐊᐧ, ᒥᓇ ᑭ ᐊᑐᐢᑲᐁᐧᐤ; ᒫᑲ ᑭᐦᒋ ᐅᑭᒫᐤ ᓇᒪᐃᐧᔭ ᑭᐢᑫᔨᒣᐤ. 5 ᐁᑲᐧ ᐋᑕᓇᐃᒐ ᐅᑯᓯᓴ ᐦᐋᑭᐦᐟ ᑭ ᑭᐢᑌᔨᑖᑯᐃᓱ ᐁ ᐃᑌᐧᐟ, ᓂ ᑲ ᑭᐦᒋ ᐅᑭᒫᐃᐧᐣ; ᑭ ᐊᐧᐁᐧᔨᐁᐤ ᒫᑲ ᑎᑎᐱᑖᐹᓇᐢᑲᐧ ᒥᓇ ᐅᑌᑕᐱᐊᐧ ᒥᓇ ᓂᔮᓇᓄᒥᑕᓇᐤ ᓈᐯᐊᐧ ᑭᑕ ᓂᑳᓂᐸᑖᔨᐟ. 6 ᐅᑖᐃᐧᔭ ᒫᑲ ᓇᒪᐃᐧᔭ ᐃᐧᑳᐨ ᐅᐦᒋ ᓇᔦᐦᑖᐃᐧᔭᐁᐧᐃᐠ, ᓈᐣᑕᐤ ᐃᔨᑯᕽ ᑭᑕ ᐃᑎᑯᐟ, ᑖᓀᐦᑭ ᐅᒪ ᑳ ᐃᑐᑕᒪᐣ? ᒥᓇ ᒥᑐᓂ ᑭ ᑕᑲᐦᑳᐯᐃᐧᐤ; ᑭ ᐊᐢᑯᐃᐧᐢᑲᐁᐧᐤ ᒫᑲ ᐋᑊᓴᓬᐊᒪ. 7 ᐁᑯᓯ ᑭ ᐃᐧᒋᐱᑭᐢᑫᐧᒣᐤ ᒍᐋᐸ ᐅᑯᓯᓴ ᓯᕒᔪᐋᔭ, ᒥᓇ ᐊᐹᔭᑕᕒ ᐊᔭᒥᐦᐁᐃᐧᔨᓂᐤ; ᐁᑯᓯ ᐁᐊᐧᑯᓂᐠ ᐁ ᐱᒥᑎᓴᐋᒋᐠ ᐋᑕᓇᐃᒐᐊᐧ ᑭ ᐃᐧᒉᐁᐊᐧᐠ. 8 ᒫᑲ ᓭᑖᐠ ᐊᔭᒥᐦᐁᐃᐧᔨᓂᐤ, ᒥᓇ ᐱᓈᔭ ᐅᑯᓯᓴ ᒋᐦᐋᔭᑕ, ᒥᓇ ᓀᐦᑖᐣ ᐊᓇ ᐅᑭᐢᑭᐁᐧᐦᐃᑫᐤ, ᒥᓇ ᓯᒥᐊᐩ, ᒥᓇ ᕒᐃᐊᐩ ᒥᓇ ᐅᑭᐦᒋᐦᑖᐊᐧ ᑌᐱᐟ ᑳ ᐊᔮᐋᐧᐟ, ᓇᒪᐃᐧᔭ ᐃᐧᒉᐁᐧᐊᐧᐠ ᐋᑕᓇᐃᒐᐊᐧ. 9 ᐁᑯᓯ ᐋᑕᓇᐃᒐ ᑭ ᓂᐸᐁᐤ ᒫᔭᑎᐦᑲᐧ ᒥᓇ ᒧᐢᑐᓴᐧ ᒥᓇ ᑖᒋᐳᐋᑲᓇ ᐁᑯᑕ ᓯᐦᐋᕒᐁᐟ ᐊᓯᓂᕽ, ᑭᓯᐋᐧᐠ ᐁᐣᕒᐋᑫᓬ ᑳ ᐊᔮᐠ; ᑭ ᓇᑐᒣᐤ ᒫᑲ ᑲᐦᑭᔭᐤ ᐅᒋᐋᐧᒪ ᑭᐦᒋ ᐅᑭᒫᐤ ᐅᑯᓯᓴ, ᒥᓇ ᑲᐦᑭᔭᐤ ᒍᑕ ᐊᔨᓯᔨᓂᐊ ᑭᐦᒋ ᐅᑭᒫᐤ ᐅᐟ ᐊᑐᐢᑫᔮᑲᓇ; 10 ᒫᑲ ᓀᐦᑖᓇ ᐅᑭᐢᑭᐁᐧᐦᐃᑫᐃᐧᔨᓂᐊᐧ ᒥᓇ ᐱᓈᔭᐊᐧ, ᒥᓇ ᐊᓂᐦᐃ ᐅᑭᐦᒋᐦᑖᐊᐧ, ᒥᓇ ᓵᓬᐊᒪᓇ ᐅᒋᐋᐧᒪ, ᓇᒪᐃᐧᔭ ᓇᑐᒣᐤ. 11 ᐁᑲᐧ ᓀᐦᑖᐣ ᑭ ᐊᔭᒥᐦᐁᐤ ᐹᐦᐟᓯᐸᐊᐧ ᐅᑳᐃᐧᔨᐊᐧ ᓵᓬᐊᒪᐣ, ᐁ ᐃᑌᐧᐟ, ᓇᒪ ᒋ ᑯᐦ ᐯᐦᑌᐣ ᐋᑕᓇᐃᒐ ᐅᑯᓯᓴ ᐦᐋᑭᐦᐟ ᐁ ᑭᐦᒋ ᐅᑭᒫᐃᐧᐟ, ᐁᑯᓯ ᑌᐱᐟ ᑭᐟ ᐅᑭᒫᒥᓇᐤ ᐁᑳ ᐁ ᑭᐢᑫᔨᑕᕽ? 12 ᐁᑲᐧ ᒫᑲ ᑭ ᐸᑯᓭᔨᒥᑎᐣ ᑭᔮᒼ ᑭ ᑲ ᑲᑫᐢᑭᒥᑎᐣ, ᑭᑕ ᐱᒫᒋᐦᑖᔮᐣ ᑎᐱᔭᐤ ᑭ ᐱᒫᑎᓯᐃᐧᐣ ᒥᓇ ᐅ ᐱᒫᑎᓯᐃᐧᐣ ᑭᑯᓯᐢ ᓵᓬᐊᒪᐣ. 13 ᓇᑕᐃᐧ ᐱᑐᑲᐤ ᑭᐦᒋ ᐅᑭᒫᐤ ᑌᐱᐟ, ᐅᒥᓯ ᒫᑲ ᑭ ᑲ ᐃᑖᐤ, ᓇᒪ ᒋ ᑭᔭ ᓂᐟ ᐅᑭᒫᒼ ᑭᐦᒋ ᐅᑭᒫᐤ ᑭ ᑭ ᑭᐦᒋᐃᑖᐤ ᑭᐟ ᐊᑐᐢᑫᔮᑲᓂᐢᑫᐧᒼ, ᐁ ᐃᑌᐧᔭᐣ, ᑫᐦᒋᓈ ᓵᓬᐊᒪᐣ ᑭᑯᓯᐢ ᓂ ᑲ ᐋᓂᐢᑫᐢᑲᒫᐠ ᑭᐦᒋ ᐅᑭᒫᐃᐧᐃᐧᐣ, ᐁᑯᓯ ᑭᑕ ᑌᐦᑕᐱᐤ ᓂ ᑭᐦᒋ ᐅᑭᒫᐊᐧᐱᐃᐧᐣ? ᑖᓀᐦᑭ ᒫᑲ ᐋᑕᓇᐃᒐ ᑳ ᑭᐦᒋ ᐅᑭᒫᐃᐧᐟ? 14 ᒫᑎᑲ, ᒣᑳᐧᐨ ᑫᔮᐱᐨ ᐊᔭᒥᐦᐊᒋ ᑭᐦᒋ ᐅᑭᒫᐤ, ᓂᐢᑕ ᓂ ᑲ ᐊᑎ ᓈᐊᐧᔪ ᐱᑐᑳᐣ, ᐁᑯᓯ ᓂ ᑲ ᐋᔮᑕᐢᑖᐣ ᑭᐟ ᐃᑌᐧᐃᐧᓇ. 15 ᐹᐦᐟᓯᐸ ᒪᑳ ᑭ ᐱᑐᑲᐁᐧᐤ ᑭᐦᒋ ᐅᑭᒫᐊᐧ ᓂᐯᐃᐧᑲᒥᑯᕽ; ᒥᐢᑕᐦᐃ ᒫᑲ ᑭᓭᔨᓂᐃᐧᐤ ᑭᐦᒋ ᐅᑭᒫᐤ; ᐁᑯᓯ ᐋᐱᓵᐠ ᐊᓇ ᓱᓇᒪᐃᐟ ᑭ ᐸᒥᐁᐤ ᑭᐦᒋ ᐅᑭᒫᐊᐧ. 16 ᐹᐦᐟᓯᐸ ᒫᑲ ᑭ ᓇᐊᐧᑭᐤ ᒥᓇ ᑭ ᐊᑕᒥᐢᑲᐁᐧᐤ ᑭᐦᒋ ᐅᑭᒫᐊᐧ. ᑭᐦᒋ ᐅᑭᒫᐤ ᒫᑲ ᑭ ᐃᑌᐧᐤ, ᑫᑲᐧᐩ ᓀᑕᐁᐧᔨᑕᒪᐣ? 17 ᑭ ᐃᑌᐤ ᒫᑲ, ᑭ ᑭ ᑭᐦᒋᐃᑖᐤ ᑭᐟ ᐊᑐᐢᑫᔮᑲᓂᐢᑫᐧᒼ ᑳ ᑎᐯᔨᐦᒋᑫᐟ ᑭ ᑭᓭᒪᓂᑐᒼ ᐁ ᐊᐢᐱᒧᔭᐣ, ᑫᐦᒋᓈ ᓵᓬᐊᒪᐣ ᑭᑯᓯᐢ ᓂ ᑲ ᐋᓂᐢᑫᐢᑲᒫᐠ ᑭᐦᒋ ᐅᑭᒫᐃᐧᐃᐧᐣ ᐁᑯᓯ ᑭᑕ ᑌᐦᑕᐱᐤ ᓂ ᑭᐦᒋ ᐅᑭᒫᐊᐧᐱᐃᐧᐣ. 18 ᐁᑲᐧ ᒫᑲ ᒫᑎᑲ, ᐋᑕᓇᐃᒐ ᑭᐦᒋ ᐅᑭᒫᐃᐧᐤ; ᐁᑯᓯ ᑭᔭ ᓂᐟ ᐅᑭᒫᒼ ᑭᐦᒋ ᐅᑭᒫᐤ ᐁᑳ ᐁ ᑭᐢᑫᔨᑕᒪᐣ; 19 ᑭ ᓂᐸᐁᐤ ᒫᑲ ᒧᐢᑐᓴᐧ ᒥᓇ ᑖᐦᒋᐳᐋᑲᓇ, ᒥᓇ ᒫᔭᑎᐦᑲᐧ ᓈᐢᐱᐨ ᒥᐦᒉᐟ, ᒥᓇ ᑭ ᓇᑐᒣᐤ ᑲᐦᑭᔭᐤ ᑭᐦᒋ ᐅᑭᒫᐊᐧ ᐅᑯᓯᓯᔨᐊᐧ, ᒥᓇ ᐊᐹᔭᑕᕒᐊ ᐊᔭᒥᐦᐁᐃᐧᔨᓂᐊᐧ, ᒥᓇ ᒍᐋᐸ ᑳᑭᐦᒋᓯᒫᑲᓂᓯᐃᐧᑭᒫᐃᐧᐟ; ᒫᑲ ᓵᓬᐊᒪᓇ ᑭᐟ ᐊᑐᐢᑫᔮᑲᓇ ᓇᒪᐃᐧᔭ ᐅᐦᒋ ᓇᑐᒣᐤ. 20 ᐁᑯᓯ ᑭᔭ ᓂᐟ ᐅᑭᒫᒼ ᑭᐦᒋ ᐅᑭᒫᐤ, ᑲᐦᑭᔭᐤ ᐃᐢᕒᐁᐃᓬ ᑭ ᑲᓇᐊᐧᐸᒥᑲᐧᐠ, ᑭᑕ ᐃᐧᐦᑕᒪᐊᐧᒋᐠ ᐊᐁᐧᓇ ᑫ ᐊᐱᐟ ᐅ ᑭᐦᒋ ᐅᑭᒫᐊᐧᐱᐃᐧᓂᕽ ᓂᐟ ᐅᑭᒫᒼ ᑭᐦᒋ ᐅᑭᒫᐤ ᑭᑕ ᐋᓂᐢᑫᐢᑲᒫᑯᐟ. 21 ᑭᐢᐱᐣ ᐁᑳ, ᑭᑕ ᑭ ᐊᔨᑭᐣ ᐃᐢᐱ ᓂᐟ ᐅᑭᒫᒼ ᑭᐦᒋ ᐅᑭᒫᐤ ᐃᐧᒋᓂᐹᒫᒋ ᐅᑖᐃᐧᔭ ᓂᔭ ᒥᓇ ᓂᑯᓯᐢ ᓵᓬᐊᒪᐣ ᐅᐊᐧᓂᑐᑕᒧᐊᐧᐠ ᓂ ᑲ ᐃᑕᑭᒥᑲᐃᐧᓈᐣ. 22 ᐁᑯᓯ ᒫᑎᑲ, ᒣᑳᐧᐨ ᑫᔮᐱᐨ ᐁ ᐊᔭᒥᐦᐋᐟ ᑭᐦᒋ ᐅᑭᒫᐊᐧ, ᓀᐦᑖᐣ ᐅᑭᐢᑭᐁᐧᐦᐃᑫᐤ ᑭ ᐯ ᐱᐦᑐᑫᐤ. 23 ᐁᑯᓯ ᑭ ᐃᐧᐦᑕᒪᐁᐧᐊᐧᐠ ᑭᐦᒋᐅᑭᒪᐊᐧ, ᐁ ᐃᑌᐧᒋᐠ, ᒫᑎᑭ ᓀᐦᑖᐣ ᐅᑭᐢᑭᐁᐧᐦᐃᑫᐤ. ᐃᐢᐱ ᒫᑲ ᑳ ᐱᑐᑲᐋᐧᐟ ᑭᐦᒋ ᐅᑭᒫᐊᐧ, ᑭ ᓈᒥᐢᑫᐧᔨᐤ ᐅᐦᑎᐢᑲᐤ ᑭᐦᒋ ᐅᑭᒫᐊᐧ ᒧᒋᕽ ᐁ ᐃᑎᐢᑫᐧᔨᐟ. 24 ᓀᐦᑖᐣ ᒫᑲ ᑭ ᐃᑌᐧᐤ, ᓂᐟ ᐅᑭᒫᒼ ᑭᐦᒋᐅᑭᒪᐤ, ᑭ ᑭ ᐃᑖᐧᐣ ᒋ, ᐋᑕᓇᐃᒐ ᓂ ᑲ ᐋᓂᐢᑫᐢᑲᒫᐠ ᑭᑕ ᑭᐦᒋ ᐅᑭᒫᐃᐧᐟ, ᐁᑯᓯ ᑭᑕ ᐊᐱᐤ ᓂ ᑭᐦᒋ ᐅᑭᒫᐊᐧᐱᐃᐧᓂᕽ? 25 ᒋᑫᒫ ᑭ ᐃᑐᐦᑌᐤ ᐊᓄᐦᐨ ᑳ ᑭᓯᑳᔨᐠ, ᐁᑯᓯ ᑭ ᓂᐸᐁᐤ ᒧᐢᑐᓴᐧ ᒥᓇ ᑖᐦᒋᐳᐋᑲᓇ ᒥᓇ ᒫᔭᑎᐦᑲᐧ ᓈᐢᐱᐨ ᒥᐦᒉᐟ, ᑭ ᓇᑐᒣᐤ ᒫᑲ ᑲᐦᑭᔭᐤ ᑭᐦᒋ ᐅᑭᒫᐊᐧ ᐅᑯᓯᓯᔨᐊᐧ, ᒥᓇ ᓯᒫᑲᓂᓯᐃᐧᑭᒫᐊᐧ, ᒥᓇ ᐊᐹᔭᑕᕒᐊ ᐊᔭᒥᐦᐁᐃᐧᔨᓂᐊᐧ; ᒋᐢᐟ ᒫᑲ ᒥᒋᓱᐊᐧᐠ ᒥᓇ ᒥᓂᐦᑫᐧᐊᐧᐠ ᐁᑖᐢᑕᒪᐱᔨᐟ, ᒥᓇ ᐃᑌᐧᐊᐧᐠ, ᑭᑕ ᐃᐧ ᐱᒫᑎᓯᐤ ᑭᐦᒋ ᐅᑭᒫᐤ ᐋᑕᓇᐃᒐ. 26 ᒫᑲ ᓂᔭ, ᓂᔭ ᐅᑎ ᑭᐟ ᐊᑐᐢᑫᔮᑲᐣ, ᒥᓇ ᓭᑖᐠ ᐊᔭᒥᐦᐁᐃᐧᔨᓂᐤ, ᒥᓇ ᐱᓈᔭ ᐅᑯᓯᓴ ᒋᐦᐋᔭᑕ, ᒥᓇ ᑭᐟ ᐊᑐᐢᑫᔮᑲᐣ ᓵᓬᐊᒪᐣ, ᐁᐊᐧᑯᓂ ᓇᒪᐃᐧᔭ ᐅᐦᒋ ᓇᑐᒣᐤ. 27 ᐃᐧᔭ ᒋ ᐅᒪ ᑳ ᑐᑕᕽ ᓂᐟ ᐅᑭᒫᒼ ᑭᐦᒋ ᐅᑭᒫᐤ, ᐁᑯᓯ ᐁᑳ ᐁ ᑭ ᐅᐦᒋ ᐋᐧᐸᐦᑕᐊᒋᐠ ᑭᐟ ᐊᑐᐢᑫᔮᑲᓇᐠ ᐊᐁᐧᓇ ᐊᓂᐢᑫ ᑫ ᐊᐱᐟ ᐅ ᑭᐦᒋ ᐅᑭᒫᐊᐧᐱᐃᐧᓂᕽ ᓂᐟ ᐅᑭᒫᒼ ᑭᐦᒋ ᐅᑭᒫᐤ ᑭᑕ ᐋᓂᐢᑫᐢᑲᒫᑯᐟ? 28 ᐁᑲᐧ ᑭᐦᒋ ᐅᑭᒫᐤ ᑌᐱᐟ ᑭ ᓇᐢᑫᐧᐊᐧᓯᒣᐤ, ᓇᑐᒥᕽ ᐹᐦᐟᓯᐸ. ᑭ ᐯ ᐱᐦᑐᑫᐤ ᒫᑲ ᑭᐦᒋ ᐅᑭᒫᐊᐧ ᐃᑕ ᐁ ᐊᔮᔨᐟ, ᒥᓇ ᑭ ᐅᐦᑎᐢᑲᐃᐧᑳᐸᐃᐧᐢᑕᐁᐧᐤ ᑭᐦᒋ ᐅᑭᒫᐊᐧ. 29 ᑭᐦᒋ ᐅᑭᒫᐤ ᒫᑲ ᑭ ᑭᐦᒋᐃᑌᐧᐤ ᒥᓇ ᑭ ᐃᑌᐧᐤ, ᐁ ᐱᒫᑎᓯᐟ ᑳ ᑎᐯᔨᐦᒋᑫᐟ ᑳ ᑭ ᐃᐧᑲᐧᒋᐋᐟ ᓂᐟ ᐊᐦᒑᐦᑲᐧ ᑲᐦᑭᔭᐤ ᐋᔨᒥᓯᐃᐧᓂᕽ ᐅᐦᒋ, 30 ᑖᐯᐧ ᑳ ᑭ ᐃᓯ ᑭᐦᒋᐃᑎᑖᐣ ᐁ ᐊᐢᐱᒧᔮᐣ ᑳ ᑎᐯᔨᐦᒋᑫᐟ ᐅ ᑭᓭᒪᓂᑐᒪ ᐃᐢᕒᐁᐃᓬ, ᐁ ᐃᑌᐧᔮᐣ, ᑫᐦᒋᓈ ᓵᓬᐊᒪᐣ ᑭᑯᓯᐢ ᑭᑕ ᑭᐦᒋ ᐅᑭᒫᐃᐧᐤ ᐁ ᐋᓂᐢᑫᐢᑲᒪᐃᐧᐟ, ᐁᑯᓯ ᑭᑕ ᐊᐱᐤ ᓂ ᑭᐦᒋ ᐅᑭᒫᐊᐧᐱᐃᐧᓂᕽ ᐁ ᑖᐱᐢᑲᒪᐃᐧᐟ; ᑖᐯᐧ ᐁᑯᓯ ᑫ ᐃᑐᑕᒫᐣ ᐊᓄᐦᐨ ᑳ ᑭᓯᑳᐠ, 31 ᐁᑲᐧ ᐹᐦᐟᓯᐸ ᑭ ᓈᒥᐢᑫᐧᔨᐤ ᒧᐦᒋᕽ ᐃᓯ, ᒥᓇ ᑭ ᐊᑕᒥᐢᑲᐁᐧᐤ ᑭᐦᒋ ᐅᑭᒫᐊᐧ, ᒥᓇ ᑭ ᐃᑌᐧᐤ, ᓂᐟ ᐅᑭᒫᒼ ᑭᐦᒋ ᐅᑭᒫᐤ ᑌᐱᐟ ᑳᑭᑫ ᑭᑕ ᐃᐧ ᐱᒫᑎᓯᐤ. 32 ᑭᐦᒋ ᐅᑭᒫᐤ ᑌᐱᐟ ᒫᑲ ᑭ ᐃᑌᐧᐤ, ᓇᑐᒥᕽ ᓭᑖᐠ ᐊᔭᒥᐦᐁᐃᐧᔨᓂᐤ, ᒥᓇ ᓀᐦᑖᐣ ᐅᑭᐢᑭᐁᐧᐦᐃᑫᐤ, ᒥᓇ ᐱᓈᔭ ᐅᑯᓯᓴ ᒋᐦᐋᔭᑕ. ᑭ ᐯ ᐅᐦᑌᐢᑲᐃᐧᐢᑲᐁᐧᐊᐧᐠ ᒫᑲ ᑭᐦᒋ ᐅᑭᒫᐊᐧ. 33 ᑭᐦᒋᑭᒫᐤ ᒫᑲ ᑭ ᐃᑌᐤ, ᐅᑎᓂᒫᕽ ᐅᐟ ᐊᑐᐢᑫᔮᑲᓇ ᑭᐟ ᐅᑭᒫᒥᐋᐧᐤ, ᑌᐦᑕᐱᐃᕽ ᒫᑲ ᓵᓬᐊᒪᐣ ᓂᑯᓯᐢ ᑎᐱᔭᐤ ᓂᔭ ᓂᓱᓱᒥᐢᑕᑎᒧᒪ, ᐁᑯᓯ ᑲᐃᐦᐊᐣ ᐃᑐᑕᐦᐃᕽ; 34 ᑭᔮᒼ ᒫᑲ ᓭᑖᐠ ᐊᔭᒥᐦᐁᐃᐧᔨᓂᐤ ᒥᓇ ᓀᐦᑖᐣ ᐅᑭᐢᑭᐁᐧᐦᐃᑫᐤ ᑭᑕ ᑐᒥᓀᐊᐧᐠ ᐁᑯᑕ ᑭᑕ ᑭᐦᒋ ᐅᑭᒫᑲᑕᐋᐧᔨᐟ ᐃᐢᕒᐁᐃᓬᐊ; ᐁᑯᓯ ᐳᑖᑕᒧᐠ ᐱᐱᑲᐧᐣ, ᒥᓇ ᐃᑌᐧᐠ, ᑭᑕ ᐃᐧ ᐱᒫᑎᓯᐤ ᑭᐦᒋ ᐅᑭᒫᐤ ᓵᓬᐊᒪᐣ. 35 ᐁᑲᐧ ᑭ ᑲ ᐯᓈᐊᐧᔪᐢᑲᐋᐧᐋᐧᐤ, ᒥᓇ ᑭᑕ ᐯ ᓇᑕᐃᐧ ᐊᐱᐤ ᓂ ᑭᐦᒋ ᐅᑭᒫᐊᐧᐱᐃᐧᓂᕽ; ᒋᑫᒫ ᑭᑕ ᑭᐦᒋ ᐅᑭᒫᐃᐧᐤ ᐁ ᑖᐱᐢᑲᒪᐃᐧᐟ; ᐁᑯᓯ ᓂ ᑭ ᐅᔭᑭᒫᐤ ᑭᑕ ᐅᑭᒫᑲᑕᐋᐧᐟ ᐃᐢᕒᐁᐃᓬ ᒥᓇ ᒍᑕ. 36 ᐁᑯᓯ ᐱᓈᔭ ᐅᑯᓯᓴ ᒋᐦᐋᔭᑕ ᑭ ᓇᐢᑫᐧᐊᐧᓯᒣᐤ ᑭᐦᒋ ᐅᑭᒫᐊᐧ, ᒥᓇ ᑭ ᐃᑌᐤ, ᐋᒣᐣ; ᑳ ᑎᐯᔨᐦᒋᑫᐟ ᐅ ᑭᓭᒪᓂᑐᒪ ᓂᐟ ᐅᑭᒫᒼ ᑭᐦᒋ ᐅᑭᒫᐤ ᐁᑯᓯ ᑭᑖ ᐃᐧ ᐃᑌᐧᐤ. 37 ᑳ ᑎᐯᔨᐦᒋᑫᐟ ᑳ ᑭ ᐃᓯ ᐃᐧᒉᐋᐧᐟ ᓂᐟ ᐅᑭᒫᒪ ᑭᐦᒋ ᐅᑭᒫᐊᐧ, ᐁᑯᓯ ᑭᑕ ᐃᐧ ᐃᓯ ᐃᐧᒉᐁᐧᐤ ᓵᓬᐊᒪᓇ, ᒥᓇ ᑭᑕ ᐃᐧ ᐊᔨᐋᐧᐠ ᑭᐢᑌᔨᑖᑯᑖᐁᐧᐤ ᐅ ᑭᐦᒋ ᐅᑭᒫᐊᐧᐱᐃᐧᓂᔨᐤ ᐃᔨᑯᕽ ᐅ ᑭᐦᒋ ᐅᑭᒫᐊᐧᐱᐃᐧᐣ ᓂᐟ ᐅᑭᒫᒼ ᑭᐦᒋ ᐅᑭᒫᐤ ᑌᐱᐟ. 38 ᐁᑯᓯ ᓭᑖᐠ ᐊᔭᒥᐦᐁᐃᐧᔨᓂᐤ, ᒥᓇ ᓀᐦᑖᐣ ᐅᑭᐢᑭᐁᐧᐦᐃᑫᐤ, ᒥᓇ ᐱᓈᔭ ᐅᑯᓯᓴ ᒋᐦᐋᔭᑕ, ᒥᓇ ᐊᓂᑭ ᑫᕒᐃᑕᐃᑕᐠ ᒥᓇ ᐯᓬᐃᑕᐃᑕᐠ, ᑭ ᐃᑐᐦᑌᐊᐧᐠ, ᐁᑯᓯ ᑭ ᑌᐦᑕᐱᐁᐊᐧᐠ ᓵᓬᐊᒪᓇ ᑭᐦᒋ ᐅᑭᒫᐊᐧ ᑌᐱᑕ ᐅ ᓱᓱᒥᐢᑕᑎᒧᒥᔨᐊᐧ, ᐁᑯᓯ ᑭ ᐯᓯᐁᐧᐊᐧᐠ ᑲᐃᐦᐊᓂᕽ. 39 ᓭᑖᐠ ᒫᑲ ᐊᔭᒥᐦᐁᐃᐧᔨᓂᐤ ᑭ ᐅᑌᓇᒼ ᐱᒥᐊᐧᓯᐊᐧᒋᑲᓂᐢ ᒥᑭᐋᐧᐱᕽ ᐅᐦᒋ, ᐁᑯᓯ ᑭ ᑐᒥᓀᐤ ᓵᓬᐊᒪᓇ. ᑭ ᐳᑖᑕᒪᐧᐠ ᒫᑲ ᐱᐱᑲᐧᐣ; ᐁᑯᓯ ᑲᐦᑭᔭᐤ ᐊᔨᓯᔨᓂᐊᐧᐠ ᑭ ᐃᑌᐧᐊᐧᐠ, ᑭᑕ ᐃᐧ ᐱᒫᑎᓯᐤ ᑭᐦᒋ ᐅᑭᒫᐤ ᓵᓬᐊᒪᐣ. 40 ᑲᐦᑭᔭᐤ ᒫᑲ ᐊᔨᓯᔨᓂᐊᐧᐠ ᑭ ᐯ ᓈᐊᐧᔪᐢᑳᐠ, ᐁᑯᓯ ᐊᔨᓯᔨᓂᐊᐧᐠ ᑭ ᐳᑖᑕᒪᐧᐠ ᑭᑐᐦᑖᑲᓂᓴ, ᒥᓇ ᑭ ᑭᐦᒋ ᒥᔭᐋᐧᑕᒪᐧᐠ, ᐁᑯᓯ ᐊᐢᑭ ᑭ ᓇᓇᒥᐸᔨᐤ ᐁ ᐃᓯ ᑭᓯᐁᐧᑖᒋᐠ. 41 ᐁᑯᓯ ᐋᑕᓇᐃᒐ ᒥᓇ ᐊᓂᐦᐃ ᑳ ᑭ ᐃᐧᑯᒫᐟ ᑭ ᐯᐦᑕᒪᐧᐠ ᐁ ᑭ ᐳᓂ ᒥᒋᓱᒋᐠ. ᐃᐢᐱ ᒫᑲ ᒍᐋᑊ ᐱᔦᐦᑕᕽ ᐁ ᐯᑖᑲᐧᓂᔨᐠ ᐱᐱᑲᐧᐣ, ᑭ ᐃᑌᐧᐤ, ᑫᑲᐧᐩ ᐅᒪ ᑳ ᐯᑖᑲᐧᕽ ᐅᑌᓈᕽ ᐁ ᒪᑌᐧ ᓈᐣᑕᐤ ᐃᑕᑲᒥᑲᕽ? 42 ᒣᑳᐧᐨ ᑫᔮᐱᐨ ᐁ ᐱᑭᐢᑫᐧᐟ, ᐳᑎ ᒑᓇᐦᑕᐣ ᐅᑯᓯᓴ ᐊᐹᔭᑕᕒ ᐊᔭᒥᐦᐁᐃᐧᔨᓂᐤ ᑭ ᑕᑯᓯᐣ; ᐁᑯᓯ ᐋᑕᓇᐃᒐ ᑭ ᐃᑌᐧᐤ, ᐯ ᐱᐦᑐᑫ; ᒋᑫᒫ ᑭ ᑭᐦᒋ ᐊᔨᓯᔨᓂᐃᐧᐣ, ᒥᓇ ᑭ ᐯᑖᐣ ᒥᔪ ᐋᒋᒧᐃᐧᐣ. 43 ᒑᓇᐦᑕᐣ ᒫᑲ ᑭ ᓇᐢᑫᐧᐊᐧᓯᐁᐤ ᒥᓇ ᑭ ᐃᑌᐤ ᐋᑕᓇᐃᒐᐊᐧ, ᑖᐯᐧ ᑯᑭᒫᒥᓇᐤ ᑭᐦᒋ ᐅᑭᒫᐤ ᑌᐱᐟ ᑭ ᑭᐦᒋ ᐅᑭᒫᑫᐤ ᓵᓬᐊᒪᓇ; 44 ᒥᓇ ᑭᐦᒋ ᐅᑭᒫᐤ ᑭ ᐊᓯᒋ ᐃᓯᑎᓴᐁᐧᐤ ᓭᑖᑲ ᐊᔭᒥᐦᐁᐃᐧᔭᓂᐊᐧ, ᒥᓇ ᓀᐦᑖᐣ ᐅᑭᐢᑭᐁᐧᐦᐃᑫᐊᐧ, ᒥᓇ ᐱᓈᔭ ᐅᑯᓯᓴ ᒋᐦᐋᔭᑕ, ᒥᓇ ᑫᕒᐃᑕᐃᑕ ᒥᓇ ᐯᓬᐃᑕᐃᑕ, ᐁᑯᓯ ᑭ ᑌᐦᑕᐱᐁᐊᐧᐠ ᑭᐦᒋ ᐅᑭᒫᐊᐧ ᐅ ᓱᓱᒥᐢᑕᑎᒧᒥᔨᐊᐧ; 45 ᓭᑖᐠ ᒫᑲ ᐊᔭᒥᐦᐁᐃᐧᔨᓂᐤ ᒥᓇ ᓀᐦᑖᐣ ᐅᑭᐢᑭᐁᐧᐦᐃᑫᐤ ᑭ ᑐᒥᓀᐊᐧᐠ ᐁ ᑭᐦᒋ ᐅᑭᒫᑫᒋᐠ ᑲᐃᐦᐊᓂᕽ; ᐁᑯᑕ ᒫᑲ ᐯ ᐅᐦᑐᑌᐊᐧᐠ ᐁ ᒥᔭᐋᐧᑕᐦᑭᐠ, ᐁᑯᓯ ᐅᑌᓇᐤ ᐱᑭᐧᔨᑯᕽ ᐯᐦᑖᑲᐧᐣ. ᐁᐊᐧᑯᒪ ᐁ ᐯᐦᑖᑲᐧᕽ ᑳ ᑭ ᐯᐦᑕᒣᐠ. 46 ᓵᓬᐊᒪᐣ ᒫᑲ ᐊᐱᐤ ᑭᐦᒋ ᐅᑭᒫᐊᐧᐱᐃᐧᓂᕽ ᑭᐦᒋ ᐅᑭᒫᐃᐧᐃᐧᓂᕽ, 47 ᒥᓇ ᒫᑲ ᑭᐦᒋ ᐅᑭᒫᐤ ᐅᐟ ᐊᑐᐢᑫᔮᑲᓇ ᑭ ᐯ ᓇᑕᐃᐧ ᐊᑕᒥᐢᑲᐁᐧᐊᐧᐠ ᑯᑭᒫᒥᓇᐊᐧ ᑭᐦᒋ ᐅᑭᒫᐤ ᑌᐱᐟ, ᐁ ᐃᑌᐧᒋᐠ, ᑭᓭᒪᓂᑐ ᓇᐊᐧᐨ ᑭᑕ ᐃᐧ ᐊᔨᐋᐧᑫᔨᑖᑯᑖᐁᐧᐤ ᐅ ᐃᐧᔪᐃᐧᓂᔨᐤ ᓵᓬᐊᒪᓇ ᐃᔨᑯᕽ ᑭᔭ ᑭ ᐃᐧᔪᐃᐧᐣ, ᒥᓇ ᐅ ᑭᐦᒋ ᐅᑭᒫᐊᐧᐱᐃᐧᓂᔨᐤ ᐃᔨᑯᕽ ᑭᔭ ᑭ ᑭᐦᒋ ᐅᑭᒫᐊᐧᐱᐃᐧᐣ; ᐁᑯᓯ ᑭᐦᒋ ᐅᑭᒫᐤ ᑭ ᓈᒥᐢᑫᐧᔨᐤ ᓂᐯᐃᐧᓂᕽ. 48 ᒥᓇ ᐅᒥᓯ ᑭ ᐃᑌᐧᐤ ᑭᐦᒋ ᐅᑭᒫᐤ, ᑭᑕ ᓇᓈᐢᑯᒫᐤ ᑳ ᑎᐯᔨᐦᒋᑫᐟ ᐅ ᑭᓭᒪᓂᑐᒪ ᐃᐢᕒᐁᐃᓬ, ᑳ ᑭ ᒥᔨᐟ ᐊᐃᐧᔭ ᑭᑕ ᐊᐱᔨᐟ ᓂ ᑭᐦᒋᐊᐱᐃᐧᓂᕽ ᐊᓄᐦᐨ ᑳ ᑭᓯᑳᐠ, ᓂᐢᑭᓯᑯᕽ ᒥᓇ ᐁ ᐅᐦᒋ ᐋᐧᐸᐦᑕᒫᐣ. 49 ᑲᐦᑭᔭᐤ ᒫᑲ ᐋᑕᓇᐃᒐ ᐅ ᐃᐧᐦᑯᒫᑲᓇ ᑭ ᓭᑭᓯᐊᐧᐠ, ᐁᑯᓯ ᑭ ᐸᓯᑯᐊᐧᐠ ᒥᓇ ᑭ ᓵᓯᐯᐧᑌᐊᐧᐠ ᑲᐦᑭᔭᐤ ᐊᐃᐧᔭᐠ. 50 ᐋᑕᓇᐃᒐ ᒫᑲ ᑭ ᓭᑭᓯᐤ ᐁ ᑯᐢᑖᐟ ᓵᓬᐊᒪᓇ; ᐁᑯᓯ ᑭ ᐸᓯᑯ ᐁ ᑭ ᓇᑕᐃᐧ ᐅᑎᐦᑎᓇᕽ ᐁ ᐅᐟ ᐁᐢᑳᓂᐊᐧᕽ ᐸᑭᑎᓈᓱᐃᐧᓈᐱᐢᐠ. 51 ᑭ ᐃᐧᐦᑕᒪᐋᐧᐤ ᒫᑲ ᓵᓬᐊᒪᐣ ᐁ ᐃᑌᐧᕽ, ᒫᑎᑲ, ᐋᑕᓇᐃᒐ ᑯᐢᑌᐤ ᑭᐦᒋ ᐅᑭᒫᐊᐧ ᓵᓬᐊᒪᓇ; ᐊᔨᐢ, ᒋᐢᐟ ᑭ ᓇᑕᐃᐧ ᐅᑎᐦᑎᓇᒼ ᐁ ᐅᐟ ᐁᐢᑲᓂᐊᐧᕽ, ᐸᑭᑎᓈᓱᐃᐧᓈᐱᐢᐠ, ᐁ ᐃᑌᐧᐟ, ᑭᔮᒼ ᑭᐦᒋ ᐅᑭᒫᐤ ᓵᓬᐊᒪᐣ ᓂ ᑲ ᑭᐦᒋᐃᑎᐠ ᐊᓄᐦᐨ ᑳ ᑲᓯᑳᐠ ᐁᑳ ᑭᑕ ᓂᐸᐦᐋᐟ ᐅᐟ ᐊᑐᐢᑫᔮᑲᓇ ᐃᓴᐁᐧᐢᐠ ᐅᐦᒋ. 52 ᓵᓬᐊᒪᐣ ᒫᑲ ᑭ ᐃᑌᐧᐤ, ᑭᐢᐱᐣ ᐃᓯ ᓄᑯᐦᐃᓱᒋ ᐁ ᑌᐸᑫᔨᑖᑯᓯᐃᐧ ᐊᔨᓯᔨᓂᐃᐧᐟ, ᓇᒪᐋᐧᐨ ᐯᔭᐠ ᐁᐧᐢᑕᑲᐩ ᑭᑕ ᐸᐦᑭᑎᓂᔨᐤ ᐊᐢᑭᕽ; ᒫᑲ ᑭᐢᐱᐣ ᒪᒑᔨᐃᐧᐣ ᒥᐢᑭᑳᑌᑭ ᐁ ᑭᑭᐢᑳᑯᐟ ᑭᑕ ᓂᐱᐤ. 53 ᐁᑯᓯ ᒫᑲ ᑭᐦᒋ ᐅᑭᒫᐤ ᓵᓬᐊᒪᐣ ᑭ ᐃᓯᑎᓴᐦᐅᐁᐧᐤ ᑭ ᐯᓯᐁᐧᐊᐧᐠ ᒫᑲ ᐸᑭᑎᓈᓱᐃᐧᓈᐱᐢᑯᕽ ᐅᐦᒋ. ᐁᑯᓯ ᑭ ᐯ ᐃᑐᐦᑌᐤ ᑭ ᐊᑕᒥᐢᑲᐁᐧᐤ ᒫᑲ ᑭᐦᒋ ᐅᑭᒫᐊᐧ ᓵᓬᐊᒪᓇ; ᐁᑯᓯ ᓵᓬᐊᒪᐣ ᑭ ᐃᑌᐤ, ᑭᑭᕽ ᐃᓯ ᑭᐁᐧ. |
This Bible text is a corrected edition of the 1908 Western Cree Bible; it is in the public domain.
Canadian Bible Society