ᓂᐢᑕᒼ ᑲᕒᐃᐣᑎᔭᓇ 1 - ᑲᓈᒋ ᑭᐦᒋ ᒪᓯᓈᐦᐃᑲᐣ

¹ ᐹᓬ ᑳ ᑭ ᓇᑐᒥᐦᐟ ᑭᑕ ᐅᐟ ᐊᐹᐢᑎᓬᐃᒥᐟ ᒋᓴᐢ ᙭ ᐁ ᐃᑌᔨᑕᕽ ᑭᓭᒪᓂᑐ, ᒥᓇ ᓵᐢᑎᓂᐢ ᑭᒋᐋᐧᒥᓇᐤ,

² ᑳ ᐅᑕᔭᒥᐋᐃᐧᔨᓂᒥᐟ ᑭᓭᒪᓂᑐ ᐊᓂᑕ ᑳᕒᐃᐣᐟ ᑳ ᐊᔮᔨᐟ, ᐊᓂᑭ ᐅᑎ ᑳ ᑲᓈᒋᐃᐦᒋᐠ ᙭ ᒋᓴᓯᕽ, ᐅᑲᓈᑎᓯᐊᐧᐠ ᑳ ᐃᓯᐃᐦᒋᐠ, ᐊᓯᒋ ᑲᐦᑭᔭᐤ ᑳ ᒪᐃᐧᒧᐢᑕᒫᐧᒋᐠ ᐅ ᐃᐧᔪᐃᐧᓂᔨᐤ ᑳ ᑎᐯᔨᒥᑯᔭᕽ ᒋᓴᐢ ᙭ ᒥᓯᐁᐧ ᐃᑕ, ᐃᐧᔭᐋᐧᐤ ᒥᓇ ᑭᔮᓇᐤ ᑳ ᑎᐯᔨᒥᑯᔭᕽ:

³ ᓂᓱᑲᒫᑯᐃᐧᐣ ᒥᓇ ᐯᔭᑕᑫᔨᒧᐃᐧᐣ ᑭ ᑲ ᐃᐧ ᐅᐦᒋᐢᑕᒫᑯᐋᐧᐤ ᑭᓭᒪᓂᑐ ᑯᑖᐃᐧᓇᐤ ᒥᓇ ᑳ ᑎᐯᔨᒥᑯᔭᕽ ᒋᓴᐢ ᙭.

⁴ ᓂ ᓇᓈᐢᑯᒫᐤ ᓂ ᑭᓭᒪᓂᑐᒼ ᑳᑭᑫ ᑭᔭᐋᐧᐤ ᐅᐦᒋ, ᐅ ᓂᓱᑲᒫᑫᐃᐧᐣ ᐅᐦᒋ ᑭᓭᒪᓂᑐ ᑳ ᑭ ᒥᔨᑲᐃᐧᔦᐠ ᙭ ᒋᓴᐢ ᐁ ᐃᐧᒉᐋᐧᔦᐠ;

⁵ ᑲᐦᑭᔭᐤ ᑫᑲᐧᐩ ᐁ ᑭ ᐃᓯ ᐁᐧᔪᒋ ᐅᐦᑎᓇᒫᑯᔦᐠ, ᑲᐦᑭᔭᐤ ᐱᑭᐢᑫᐧᐃᐧᓂᕽ ᒥᓇ ᑲᐦᑭᔭᐤ ᑭᐢᑫᔨᑕᒧᐃᐧᓂᕽ;

⁶ ᐁᑯᓯ ᐅᐟ ᐋᒋᒧᐃᐧᐣ ᙭ ᑳ ᑭ ᐃᓯ ᓱᑲᐢᑕᒫᑲᐃᐧᔦᐠ:

⁷ ᐁᑯᓯ ᓇᒪ ᓈᐣᑕᐤ ᒣᑭᐃᐧᐣ ᑭ ᓄᑌᐸᔨᓈᐋᐧᐤ; ᐁ ᐯᑖᐋᐧᔦᐠ ᐅ ᑭᐢᑫᔨᐦᑖᑯᐦᑫᐃᐧᐣ ᑳ ᑎᐯᔨᒥᑯᔭᕽ ᒋᓴᐢ ᙭;

⁸ ᐁᐊᐧᑯ ᒥᓇ ᑫ ᐋᔮᒋᐃᑯᔦᐠ ᐱᔨᐢ ᑭᓯᐸᓄᕽ, ᐁᑳ ᑭᑖ ᐋᓀᐧᔨᑖᑯᓯᔦᐠ ᐃᐢᐱ ᐅ ᑭᓯᑳᒥᒋ ᑳ ᑎᐯᔨᒥᑯᔭᕽ ᒋᓴᐢ ᙭.

⁹ ᑭᓭᒪᓂᑐ ᑖᐯᐧᐤ, ᑳ ᑭ ᐃᓯ ᓇᑐᒥᑯᔦᐠ ᐅ ᐃᐧᒉᐋᐧᑲᓂᑳᐃᐧᓂᔨᕽ ᐅᑯᓯᓴ ᒋᓴᐢ ᙭ ᑳ ᑎᐯᔨᒥᑯᔭᕽ.

¹⁰ ᐁᑲᐧ ᒫᑲ ᑭ ᐸᑯᓭᔨᒥᑎᓈᐋᐧᐤ, ᓂᒋᐋᐧᒥᑎᐠ, ᐅ ᐃᐧᔪᐃᐧᓂᕽ ᑳ ᑎᐯᔨᒥᑯᔭᕽ ᒋᓴᐢ ᙭, ᑲᐦᑭᔭᐤ ᑭᑕ ᐯᔭᑯᑖᔦᐠ ᐁ ᐃᑌᐧᔦᐠ, ᒥᓇ ᐁᑳ ᐸᐢᑫᐃᐧᐦᐃᑐᐃᐧᓇ ᑭᑕ ᐊᔮᔦᐠ; ᒫᑲ ᑭᑕ ᒫᒪᐃᐧ ᒪᒥᑐᓂᐃᑲᐃᐧᔦᐠ ᐯᔭᐠ ᒪᒥᑐᓀᔨᒋᑲᓂᕽ ᒥᓇ ᐯᔭᐠ ᐅᔭᓱᐋᐧᓯᐁᐧᐃᐧᓂᕽ.

¹¹ ᒋᑫᒫ ᓂ ᑭ ᐋᒋᒧᐢᑖᑲᐧᐠ ᑭᔭᐋᐧᐤ ᐅᐦᒋ, ᓂᒋᐋᐧᒥᑎᐠ, ᐊᓂᑭ ᐃᐧᑭᕽ ᑲᓬᐅᐃ ᑳ ᐅᐦᒋᒋᐠ, ᒫᔨ ᐃᐧᒉᑐᐃᐧᓇ ᐁ ᐊᔮᔦᐠ.

¹² ᐁᐊᐧᑯ ᐅᒪ ᑳ ᐃᑕᒫᐣ, ᐁ ᐃᑕᓯᐟ ᐊᔨᓯᔨᓂᐤ ᐹᐱᑐᐢ ᑭᐟ ᐃᑖᐧᓈᐋᐧᐤ, ᓂᔭ ᐹᓬ ᓂ ᐃᐧᒉᐋᐧᐤ; ᐁᑲᐧ ᓂᔭ ᐊᐹᓬᐊᐢ ᓂ ᐃᐧᒉᐋᐧᐤ; ᐁᑲᐧ ᓂᔭ ᓯᐹᐢ ᓂ ᐃᐧᒉᐋᐧᐤ; ᐁᑲᐧ ᓂᔭ ᙭ ᓂ ᐃᐧᒉᐋᐧᐤ.

¹³ ᓇᓈᓂᐢᒋ ᐊᔮᐤ ᒋ ᙭? ᐹᓬ ᒋ ᑳ ᑭ ᒋᐢᑕᐦᐋᐢᑳᐧᑎᐦᐟ ᑭᔭᐋᐧᐤ ᐅᐦᒋ? ᐊᐦᐳ ᒋ ᐹᓬ ᐅ ᐃᐧᔪᐃᐧᓂᕽ ᑳ ᑭ ᐹᑊᑕᐃᓯᐃᐧᐃᑲᐃᐧᔦᐠ?

¹⁴ ᓂ ᓇᓈᐢᑯᒫᐤ ᑭᓭᒪᓂᑐ ᓇᒪᐋᐧᐨ ᐊᐃᐧᔭᐠ ᑯᐦᒋ ᐹᑊᑕᐃᓯᐃᐧᐦᐃᑎᓈᐋᐧᐤ, ᐱᑯ ᑲᕒᐃᐢᐸᐢ ᒥᓇ ᑫᔭᐢ;

¹⁵ ᐁᑳ ᓈᐣᑕᐤ ᐊᔨᓯᔨᓂᐤ ᑭᑕ ᑭ ᐃᑌᐧᐟ ᐁ ᑭ ᐸᑊᑕᐃᓯᐃᐧᐃᑲᐃᐧᔦᐠ ᓂᔭ ᓂ ᐃᐧᔪᐃᐧᓂᕽ.

¹⁶ ᒥᓇ ᓂ ᑭ ᐹᑊᑕᐃᓯᐃᐧᐃᒫᐊᐧ ᐁ ᐃᐦᑕᓯᔨᐟ ᐃᐧᑭᕽ ᐃᐢᑎᐸᓈᐢ: ᐊᔨᐋᐧᐠ, ᓇᒪᐃᐧᔭ ᓂ ᑭᐢᑫᔨᑌᐣ ᑳ ᐹᑊᑕᐃᓯᐃᐧᐋᐊᐧᑫ ᐊᐃᐧᔭᐠ ᑯᑕᐠ.

¹⁷ ᒋᑫᒫ ᓇᒪᐃᐧᔭ ᑭᑕ ᐹᑊᑕᐃᓯᐃᐧᐃᐁᐧᔮᐣ ᑳ ᑭ ᐯ ᐃᓯᑎᓴᐦᐅᐟ ᙭. ᒫᑲ ᑭᑕ ᑲᑫᐢᑭᑫᒧᔮᐣ ᒥᔮᐧᒋᒧᐃᐧᐣ: ᓇᒪᐃᐧᔭ ᒥᓇ ᐃᔨᓂᓯᐃᐧ ᐊᔭᒥᐃᐧᓇ ᐅᐦᒋ, ᐁᑳ ᐅ ᐱᒥᑖᐢᑯᐃᑲᐣ ᙭ ᑭᑕ ᓄᑕᐤ ᐃᑕᑭᑌᐠ.

¹⁸ ᒋᑫᒫ ᐁ ᑕᓯᑕᒥᕽ ᐱᒥᑖᐢᑯᐃᑲᐣ ᐱᑯᓇᑕ ᐃᑎᑕᒪᐧᐠ ᑳ ᓂᓯᐊᐧᓈᒋᐦᐅᒋᐠ; ᒫᑲ ᐃᐧᔭ ᑭᔮᓇᐤ ᑳ ᐱᒫᒋᐃᑲᐃᐧᔭᕽ ᐁᐊᐧᑯ ᐅ ᒪᐢᑲᐃᐧᓯᐃᐧᐣ ᑭᓭᒪᓂᑐ.

¹⁹ ᒋᑫᒫ ᐃᑕᓯᓇᐦᐃᑳᑌᐤ, ᓂ ᑲ ᓂᓯᐊᐧᓈᒋᑖᐋᐧᐣ ᐅᐟ ᐃᔨᓂᓯᐃᐧᐣ ᑳ ᐃᔨᓂᓯᐟ, ᒥᓇ ᐅᐟ ᐊᔮᑳᐧᒥᓯᐃᐧᐣ ᑳ ᐊᔮᑳᐧᒥᓯᐟ ᓂ ᑲ ᐋᑕᐁᐧᔨᑕᒫᐧᐣ.

²⁰ ᑖᓂᐋᐧ ᑳ ᐃᔨᓂᓯᐟ? ᑖᓂᐋᐧ ᒪᓯᓇᐦᐃᑫᐃᐧᔨᓂᐤ? ᑖᓂᐋᐧ ᑳ ᐋᔮᓯᑌᒥᐁᐧᐟ ᐅᑕ ᐊᐢᑭᕽ? ᓇᒪ ᒋ ᑭᓭᒪᓂᑐ ᑭ ᐃᑕᑭᑕᒼ ᐱᑯᓇᑕ ᐊᐢᑭᐃᐧ ᐃᔨᓂᓯᐃᐧᐣ?

²¹ ᒋᑫᒫ ᐁ ᐋᐧᐸᐦᑕᒥᕽ ᐅᐟ ᐃᔨᓂᓯᐃᐧᓂᕽ ᑭᓭᒪᓂᑐ ᐊᐢᑭ ᐁ ᐃᔨᓂᓯᒪᑲᕽ ᐅᐦᒋ ᓇᒪᐃᐧᔭ ᑭ ᑭᐢᑫᔨᒥᐠ ᑭᓭᒪᓂᑐ, ᑭ ᐃᓯ ᒥᔦᐧᔨᑕᒼ ᑭᓭᒪᓂᑐ ᐁ ᐃᓯ ᐁᑳ ᐃᔨᓂᓯᐃᐧᓂᐋᐧᕽ ᑲᑫᐢᑫᐧᐃᐧᐣ ᑭᑕ ᐱᒫᒋᐦᐋᐟ ᐊᓂᐦᐃ ᑳ ᑖᐯᐧᑕᒥᔨᐟ.

²² ᒋᑫᒫ ᒍᐊᐧᐠ ᓇᑕᐁᐧᔨᑕᒪᐧᐠ ᑭᐢᑭᓇᐋᐧᒋ ᐋᐧᐸᐦᑕᐦᐃᐁᐧᐃᐧᓇ, ᒥᓇ ᑲᕒᐃᑲᐠ ᓇᑐᓇᒪᐧᐠ ᐃᔨᓂᓯᐃᐧᐣ:

²³ ᒫᑲ ᓂ ᑲᑫᐢᑭᒥᐋᐧᓈᐣ ᙭ ᑳ ᑭ ᒋᐢᑕᐦᐋᐢᑳᐧᑎᐦᐟ, ᒍᐊᐧᐠ ᐃᐧᔭ ᐁᐊᐧᑫᐧᔨᐤ ᐱᓱᑫᓯᓄᐃᐧᐣ, ᐁᑯᓯ ᒉᐣᑕᐃᓬᐊᐠ ᐃᐧᔭ ᐁᑳ ᑳ ᐃᔨᓂᓯᐊᐧᑫᔨᑕᐦᑭᐠ;

²⁴ ᒫᑲ ᐃᐧᔭ ᐊᓂᑭ ᑳ ᓇᑐᒥᐦᒋᐠ, ᑖᐱᐢᑯᐨ ᒍᐊᐧᐠ ᒥᓇ ᑲᕒᐃᑲᐠ, ᙭ ᐅ ᒪᐢᑲᐃᐧᓯᐃᐧᐣ ᑭᓭᒪᓂᑐ ᒥᓇ ᐅᐟ ᐃᔨᓂᓯᐃᐧᐣ ᑭᓭᒪᓂᑐ.

²⁵ ᒋᑫᒫ ᐊᓂᒪ ᐁᑳ ᑳ ᐃᔨᓂᓯᐊᐧᑫᔨᒥᐦᐟ ᑭᓭᒪᓂᑐ ᐊᐊᐧᓯᒣ ᐃᔨᓂᓯᐤ ᐃᔨᑯᕽ ᐊᔨᓯᔨᓂᐤ; ᒥᓇ ᐅ ᓀᓱᐃᐧᓯᐃᐧᐣ ᑭᓭᒪᓂᑐ ᐊᐊᐧᓯᒣ ᒪᐢᑲᐃᐧᓯᒪᑲᓂᔨᐤ ᐃᔨᑯᕽ ᐊᔨᓯᔨᓂᐊᐧᐠ.

²⁶ ᒋᑫᒫ ᐋᐧᐸᐦᑕᒧᐠ ᑳ ᐃᓯ ᓇᑐᒥᑲᐃᐧᔦᐠ, ᓂᒋᐋᐧᒥᑎᐠ, ᐊᓂᒪ ᐁᑳ ᒥᐦᒉᐟ ᑳ ᐃᔨᓂᓯᒋᐠ ᐃᐧᔮᓯᐃᐧᓂᕽ ᐃᓯ, ᐁᑳ ᒥᐦᒉᐟ ᐁ ᑭᐦᒑᔨᐃᐧᒋᐠ, ᐁᑳ ᒥᐦᒉᐟ ᐁ ᐅᑭᒫᐁᐧᔨᑖᑯᓯᒋᐠ, ᑳ ᓇᑐᒥᐦᒋᐠ:

²⁷ ᒫᑲ ᑭᓭᒪᓂᑐ ᑭ ᓇᐊᐧᓱᓇᒼ ᐁᑳ ᑳ ᐃᔨᓂᓯᐊᐧᑫᔨᑕᒥᕽ ᐊᐢᑭᕽ, ᑭᑕ ᓇᓀᐯᐃᐧᑖᐟ ᐊᓂᐦᐃ ᑳ ᐃᔨᓂᓯᒪᑲᑭ; ᒥᓇ ᑭᓭᒪᓂᑐ ᑭ ᓇᐊᐧᓱᓇᒼ ᑳ ᓀᓱᐊᐧᑭ ᐊᐢᑭᕽ, ᑭᑕ ᑭ ᓇᓀᐯᐃᐧᑕᐟ ᐊᓂᐦᐃ ᑳ ᒪᐢᑲᐃᐧᓯᒪᑲᑭ;

²⁸ ᒥᓇ ᓄᑕᐤ ᑳ ᐃᑕᑭᑌᑭ ᐅᑕ ᐊᐢᑭᕽ, ᒥᓇ ᐊᓂᐦᐃ ᑳ ᐱᐁᐧᔨᑖᑲᐧᑭ, ᑭᓭᒪᓂᑐ ᑭ ᓇᐊᐧᓱᓇᒼ, ᒥᓇ ᐊᐦᐳ ᐊᓂᐦᐃ ᐁᑳ ᑳ ᐊᔮᑭ, ᐁᑳ ᑭᑕ ᐃᑕᑲᐧᑭ ᐊᓂᐦᐃ ᑳ ᑭ ᐊᔮᑭ:

²⁹ ᐁᑳ ᐊᐃᐧᔭᐠ ᑳ ᐅ ᐃᐧᔮᓯᐟ ᑭᑕ ᒪᒥᐦᒋᒧᐟ ᐁ ᐃᓯ ᑭᑖᐸᑕᕽ ᑭᓭᒪᓂᑐ.

³⁰ ᒫᑲ ᐁᐊᐧᑯ ᐅᐦᒋ ᑭᐟ ᐊᔮᓈᐋᐧᐤ ᙭ ᒋᓴᓯᕽ, ᐊᓇ ᑳ ᑭ ᐃᓯᐃᑯᐟ ᑭᓭᒪᓂᑐᐊᐧ ᑭᔮᓇᐤ ᐅᐦᒋ ᐃᔨᓂᓯᐃᐧᐣ, ᒥᓇ ᑲᐧᔭᐢᑭᑖᑎᓯᐃᐧᐣ ᒥᓇ ᑲᓈᑎᓯᐃᐧᐣ, ᒥᓇ ᑎᐸᐦᐃᑫᐢᑕᒫᑫᐃᐧᐣ:

³¹ ᐁᑯᓯ ᒫᑲ, ᑳ ᐃᑕᓯᓇᐦᐃᑳᑌᐠ, ᐊᓇ ᑳ ᒪᒥᒋᒧᐟ, ᑭᔮᒼ ᑳ ᑎᐯᔨᐦᒋᑫᔨᐟ ᑭᑕ ᒪᒥᐦᒋᒣᐤ.