tāniēl 1 - Kanāci Kihci Masinahikan

¹ nisto aski ati ē kihci okimāwit cihāyakim cota kihci okimāw ki pē itohtēw nēpyokātnēsar pāpilan kihci okimāw cērosalamihk, mina ki kipotēwēskam.

² kā tipēyihcikēt māka ki pakitinēw cihāyakima cota kihci okimāwa ocihciyihk, asici ātiht asiwacikana o wāskāhikanihk kisēmanito; ki itotatāw māka sāinar askihk o wāskāhikaniyihk o manitoma ēkosi ki pitokatāw anihi asiwacikana o māwacisoniyāwēwikamikoyihk o manitoma.

³ ēkosi māka kihci okimāw ki ayamihēw āspināsa kā tipēyimāyit yonaka, kita pitokaāt ātiht isrēil ot awāsimisa, anihi oti kihci okimāwikosisāna mina okimāwa ohci;

⁴ oskinikisak ēkā nāntaw ē isi nayēhtāwi ayācik, māka ē miyonākosicik, mina ē nahicik kahkiyaw iyinisiwinihk, mina ē kakētāsicik kiskēyitamowinihk, mina ē nisitohtamiyit kiskinohamākēwina, anihi towa kē kaskitāyit kita nipawiyit kihci okimāwikamikohk; mina kita kiskinohamawāt o kiskinohamākēwiniyiw mina o pikiskwēwiniyiw kāltiyana.

⁵ kihci okimāw māka ki oyakitamawēw tahtokisikāw kē miciyit kihci okimāw o miciwin ohci, mina anima somināpo kā minihkwēt, ēkosi nisto aski kita kanawēyimihcik; ēwako ē ponipayik kita ohtiskawikāpawistawācik kihci okimāwa.

⁶ ēkota māka ki wicihiwēwak ot awāsimisa cota ohci, tāniēl, hēnānāya, misēil, mina āsarāya.

⁷ ēwakoni māka aniki yonakak okimāmiwāwa ki wiyēw; tāniēla pēltisāsar ki isi wiyēw; mina hēnānāyawa sētarāk; mina misēila misāk; mina āsarāyawa apētniko.

⁸ māka wiya tāniēl ki kisēyitam otēhihk ēkā kita wiyipiisot kihci okimāwa o miciwiniyiw ohci, ahpo anima somināpo kā minihkwēyit; ēwako ohci ki kakwēcimēw anihi kā tipēyimāyit yonaka ēkā kita wiyipiisot.

⁹ kisēmanitowa māka ki isi miyik awa tāniēl kita miyokanawāpamikot mina kita kitimākinākot anihi kā tipēyimāyit yonaka.

¹⁰ ēkosi ana kā tipēyimāt yonaka ki itēw tāniēla, ni kostāw nit okimām kihci okimāw, kā ki oyakitahk ki miciwiniwāw mina ki minihkwēwiniwāw; cikēmā kēkway ohci kē pitotāpisihk kihci okimāw kiyawāw ē isinākosiyēk mina ē isinākosicik kā wicihispitisimāyēkok? ēkosi kē isi mamisitāyēk nistikwān kihci okimānāhk.

¹¹ ēkwa tāniēl ki itēw opamitāsowa, anihi kā tipēyimāyit yonaka kā ki oyakimāyit kita pamiikocik tāniēl, hēnānāya, misēil, mina āsarāya;

¹² māhti kiyām kociik kit atoskēyākanak mitāhtokisikāw; kiyām māka ni ka miyikonanak kā nihtāwikiki kita miciyāhk, mina nipi kita minihkwēyāhk.

¹³ ēkwa māka kiyām ki ka wāpaminān, kē isinākosiyāhk, mina kē isinākosicik aniki kē micicik kihci okimāwa o miciwiniyiw; ē isi wāpahtaman māka ki ka itotawāwak kit atoskēyākanak.

¹⁴ ēkosi māka ki naskomēw oma kā isi natawēyitamākot, mina ki kocihēw mitāhtokisikāw.

¹⁵ ē poni mitāhtokisikāyik māka ayiwāk wiyawāw ki miyonākosiwak, mina ki tāhcipowak iyikohk kahkiyaw aniki oskinikisa kā miciyit kihci okimāwa o miciwiniyiw.

¹⁶ ēkosi ana opamitāso ki otinam anima o miciwiniyiw mina anima somināpo kita ki minihkwēyit, ēkosi ki miyēw kā nihtāwikiniyiki.

¹⁷ māka wiya oki nēw oskinikisak, kisēmanitowa ki miyikwak kiskēyitamowin mina nahiwin kahkiyaw kiskinohamātowinihk mina iyinisiwinihk; ēkosi tāniēl ki nisitohtam kahkiyaw isinamowina mina pawāmiwina.

¹⁸ ispi māka ē ponipayiki kisikāwa kihci okimāw kā ki oyakitāhk kita pihtokahihcik, ana kā tipēyimāt yonaka ki pihtokahēw kita ohtiskawiskawāyit nēpyokātnēsar.

¹⁹ ēkosi kihci okimāw ki ayayamiēw; namawāc māka ē ihtasiyit ki miskawēw tāpiskoc tāniēl, hēnānāya, misēil, mina āsarāya; ēwako ohci ki ohtiskawikāpawistawēwak kihci okimāwa.

²⁰ kahkiyaw māka kēkway iyinisiwin mina nisitohtamowin kihci okimāw kā kakwēcimāt, miskam mitātatwāw iyikohk awasimē ē kiskēyitamiyit ispic kahkiyaw anihi okosāpatamowa mina kā mamātāwisikāsoyit kā ayāyit misiwē ot askihk.

²¹ tāniēl māka ki ayāw piyis anima nistam aski kā ati tipēyihtahk kihci okimāw sairas.