ᓂᑲᒧᓇ ᐅ ᓂᑲᒧᐣ 1 - Kanāci Kihci Masinahikan

¹ nikamona o nikamon ēwakwēyiw sālaman.

² kiyām ni ka ocēmik ocēhtowina otonihk ohci; cikēmā ki sākihiwēwin nawac iyikohk somināpo.

³ ki tamaskowina miywāpahtēpayiwa; ki wiyowin tāpiskoc tamaskowin ē sikinikātēk ēwako ohci oskinikiskwēwak ki sākihikwak.

⁴ otāpikēnin; ki ka pimitisaotinān; kihci okimāw ni ki pitokaik o piskihcikamikohk; ni ka mamahtākosinān mina ni ka miyawātēnān kiya ohci, ni ka māmiskotēnān ki sākihiwēwin awasimē iyikohk somināpo; kwayask kā sākihiskik.

⁵ ni kaskitēsin māka ni miyonākosin kiyawāw cērosalam otānisimātik, tāpiskoc kitar mikiāpa, tāpiskoc ot ākoyēkahikana sālaman.

⁶ ēkāwiya kanawāpamik, cikēmā ē atisoyān, wiya pisim ē ki atisot. nikāwi okosisa ni ki kisistākwak, sominikistikāna ni ki kanawēyitamoikwak; māka niya ni sominikistikān namawiya noh kanawēyitēn.

⁷ wihtamawin kiya kā sākihisk nit ahcāhk, tānita kā asamacik ki māyatihkomak, ita kā aywēpiacik iyāpitākisikāki; cikēmā kēkway ohci kē isi ayāyān tāpiskoc awiyak kā akwanākwēhot ciki o māyatihkomiwāwa ki wicēwākanak?

⁸ kispin ēkā kēskēyitamowanē, kiya kā māwaci katawasisiyan iskwēnāhk, ati isi sipwēhtē kā ati isiskanawēcik māyatihkwak, mina asamik ki wāpatikosisimak ciki okanawimāyatihkwēwak wikiwāhk.

⁹ ki ki āwēitin kā sākihitān, tāpiskoc mistatim pēro o titipitāpānāskohk.

¹⁰ kanowaya miyonākwanwa ē apikātēki kistakaya, kikwayaw ē nipitēyāpisaikātēki osāwisoniyāwāpisk wawēsiowina.

¹¹ ki ka apihkātamātinān osāwisoniyāw wāpiskisoniyāw ati āyāpīs.

¹² kihci okimāw ē apit o micisowinātikohk, spaiknārt kā tamaskoyān ki sipwē wihkimākwan.

¹³ kā sākihak nit itēyimāw tāpiskoc mar ē asapitēk, ē astēk nāskikanihk.

¹⁴ kā sākihak nit itēyimāw tāpiskoc hēna wāpikoniya ēnkitay sominikistikānihk.

¹⁵ mātika, ki katawasisin kā sākihitān; mātika ki katawasisin; kiskisikwa tāpiskoc omihmiwa.

¹⁶ mātika, ki katawāsisin kā sākihitān, ēhē, ki miywēyitākosin; mina ki nipēwininaw askitakwāw.

¹⁷ māsikisk pimitakocikana ki wāskāhikanināhk, mina apakwānātikwa oskātik.