Ruth 1 - Kanāci Kihci Masinahikan

¹ ki ayikin māka ēkospi ē kakisikāk mēkwāc oyasowēwiyiniwak ē oyasowēcik, nohtēkatēwin ki ayāw askihk. ēkosi pēyak nāpēw pētliam cota ohci ki natawi ayāw moāp askihk, wiya, mina wiwa mina ē isi nisiyit okosisa.

² ana māka nāpēw ilimilik ki isiyihkāso, anihi wiwa māka nēomay ki isiyihkāsoyiwa, ēkosi anihi ē nisiyit okosisa mālan mina kiliyan ki isiyihkāsoyiwa, ēparataitak pētliam cota ohci. ki pē itohtēwak māka moāp askihk ēkota māka ki ayāwak.

³ ilimilik māka nēomay o nāpēma ki poni pimātisiyiwa; ēkosi isi ki nakatāw, mina ē nisiyit okosisa.

⁴ ki otinēwak māka kita wiwicik moāp iskwēwa; pēyak ana ārpa ki isiyihkāso ēkosi ana kotak roht ki isiyihkāso; ēkota māka ki ayāwak nāntaw mitātaht aski.

⁵ mālan māka mina kiliyan tāpiskoc ki poni pimātisiwak; ēkosi ana iskwēw ki nakatik ē nisiyit ot awāsimisa mina onāpēma.

⁶ ēkwa māka ki pasiko asici ostima kita kiwēt moāp askihk ohci; cikēmā ki pēhtam moāp askihk kā tipēyihcikēt ē ki isi natawapēnawat ot ayisiyinima ē miyāt pahkwēsikana.

⁷ ki sipwētēw māka ita anima kā ki ayāt, ēkosi ē nisiyit ostima ē wicēwikot; ki ati pimohtēwak māka ē wi isi kiwēcik cota askihk.

⁸ ēkosi nēomay ki itēw ē isi nisiyit ostima, niyāk, kiyām kikāwiwāwak wikiwāhk kiwēk; kā tipēyihcikēt ki ka wi isi kisēwātotākowāw kā ki isi miyototawāyēkok kā ki poni pimātisicik mina niya.

⁹ kā tipēyihcikēt ki ka wi isi pakitēyitamākowāw kita miskamēk pēyatakiayāwin, ē isi nisiyēk o wāskāhikaniyihk o nāpēma. ēkwa māka ki wayocēmēw; ki pēhtākosiwak māka ē mātocik.

¹⁰ ki itik māka, namawiya, kiyām ki ka kiwē wicēwitinān ita ē ayācik kit ayisiyinimak.

¹¹ nēomay māka ki itwēw, kiwēk nitānisitik; kēkway ohci kē wicēwiyēk? kēyāpic ci kita okosisiyān ni kikiskawāwak kita onāpēmiyēk?

¹² kiwēk kāwi nitānisitik, sipwētēk; cikēmā osām ni kisēyiniwin kita ki onāpēmiyān. kispin itwēyān, kēyāpic nit itatēyitēn, kispin ahpo onāpēmiyān anohc kā tipiskāk, mina kispin okosisiyān;

¹³ ki ka ki pēhonāwāw ci iyikohk kita kisinitāwikicik? ki ka nakināwāw ci kita onāpēmiyēk? namawiya, nitānisitik; cikēmā mistahi ni mihtātēn kiyawāw ohci, ayis māka ocihci kā tipēyihcikēt nit itotākowān.

¹⁴ ēkosi ki pēhtākosiwak mina ē mātocik; ārpa māka ki ocēmēw osikosa; māka roht ki miciminēw.

¹⁵ ki itēw māka, mātika, kiciwāmiskwēm kiwēw ita ē ayāyit ot ayisiyinima mina o manitoma; kista kiwē pimitisa kiciwāmiskwēm.

¹⁶ māka roht ki itwēw, ēkāwiya kihkimin kita nakatitān, mina kita poni pimitisaotān; cikēmā piko itē ē itohtēyan nista ni ka itohtān; mina ita ē ot ihtāwiniyan nista ni ka ot ihtāwinin; kit ayisiyinimak ni ka ot ayisiyinimin, mina ki manitom ni ka o manitomin;

¹⁷ ita ē poni pimātēsiyan ni ka poni pimātisin, mina ēkota ni ka nainikawin; kā tipēyihcikēt ēkosi ni ka wi itotāk mina ayiwāk ahpo, kispin nāntaw kēkway piko nipowin ohci paskēwiyitāni.

¹⁸ ispi māka wiyāpahtahk ē āyātēyitamiyit ē wi wicēwikot ki poni pikiskwātēw.

¹⁹ ēkosi ē isi nisicik ki ati pimohtēwak piyis ē takosihkik pētliamihk. ki ihkin māka ispi tēkosikik pētliamihk, misiwē otēnaw ki waskawimakan wiyawāw ohci, ēkosi iskwēwak ki itwēwak, ēwako ci awa nēomay?

²⁰ ki itwēw māka, ēkāwiya nēomay isiyihkāsik, māra isiyihkāsik; cikēmā māmawēyas siyokātisit nāspic ni ki wisakahok.

²¹ ni ki moskinān kā sipwētēyān, ēkosi ē pisisikosiyān kā tipēyihcikēt kā pē kiwētait; tānēhki nēomay kā isiyihkāsiyēk, wiya miyāmāy kā tipēyihcikēt ē ki ācimit, mina māmawēyas siyokātisit ē ki kotakihit?

²² ēkosi nēomay ki isi pē kiwēw, mina roht ana moāp iskwēw, ostima, ē wicēwikot, kā ki pē wicēwikot moāp askihk ohci; ki takosinwak māka pētliamihk mēkwāc ē māci manisikēhk iskwēsisikān.