ᑭᐢᑫᔨᐦᑖᑯᐦᑫᐃᐧᐣ 1 - Kanāci Kihci Masinahikan

¹ o kiskēyihtākohkēwin cisas Christ, kisēmanitowa kā ki miyikot kita wāpahtaāt ot atoskēyākana, anihi oti wipac kē ayikiki; ēkosi okisikoma ohci ki isitisaam mina ki kiskēyitamoēw ot atoskēyākana cāna;

² ēwako māka ki ātotam ot itwēwiniyiw kisēmanitowa, mina ot ācimowiniyiw cisas Christa, kahkiyaw oti kēkway kā ki wāpahtahk.

³ sawēyitākosiw ana kā ayamitāt mina aniki kā pēhtahkik itwēwina oma kiskiwēhikēwin, mina kā kanawēyihtahkik anihi ēkota kā masinaikātēki; cikēmā kisiwāk ēkwa kita otihcipayik.

⁴ cān ē masinahamawāt tēpakop ayamihēwikamikwa ēsiyaihk kā ayāki; kisēwātotākowin mina pēyatakēyimowin ki ka wi ohcistamākowāw ana kā ayāt mina kā ki ayāt mina kē ayāt; mina aniki tēpakop ahcāhkwa kā otiskawiskamiyit o kihci apiwin;

⁵ mina cisas Christ ohci ana kā ayākwāmisit otācimo, ana onistaminitāwikiw nipowinihk ohci, mina kā tipēyimāt kihci okimāwa askihk kā ayāyit. ana kā sākihikoyahk mina o mihko kā ki ohci āpikonikoyahk ēkā kita micimapitikoyahk macitiwin,

⁶ ēkosi kā ki isiikoyahk kita otēnawitāyahk kita ayamihēwiyinistāmāyahk o kisēmanitoma mina otāwiya; ēwako kita ayāw kistēyitākosiwin mina tipēyihcikēwin kākikē mina kākikē. āmēn.

⁷ cist, pē itohtēw waskohk mina kahkiyaw miskisik kita wāpamik, aniki mina kā ki tahkamācik; ēkosi kahkiyaw kā itatoskānēsicik ayisiyiniwak askihk kita mātowak ēwakoni ohci. ēkosāni isi, āmēn.

⁸ niya ana ālpā mina ana āmika, itwēw kā tipēyihcikēt kisēmanito, kā ayāt kā ki ayāt mina kē ayāt, māmawēyas siyokātisit.

⁹ niya cān, kiciwāmiwāw mina kā wici ayāmikoyēk āyimisiwinihk mina otēnawiwinihk mina sipēyitamowinihk cisas isi, ni ki ayān ministikohk pātmas kā isiyihkātēk, ot itwēwin kisēmanito ohci mina ot ācimowin cisas.

¹⁰ ahcāhkohk ni ki ayān kā tipēyihcikēt o kisikāmihk, ēkosi nispiskwanihk isi poti ni pētēn ē kihci kisiwēk itwēwin tāpiskoc pipikwan

¹¹ ē itikoyān, kēkway kā wāpahtaman masinaha masinahikanihk, mina isitisaa tēpakop ayamihēwikamikohk; ēpisas, mina ismarna, mina parkamam, mina tāiatāira, mina sārtis, mina pilatēlpiya, mina lēatisiya.

¹² ēkosi ni kwēskikāpawin kita wāpahtamān anima itwēwin kā kitotikoyān ēkosi ē ki kwēskikāpawiyān poti ni wāpatēn tēpakop osāwisoniyāwi wāsaskotēnikanātikwa;

¹³ mēkwāc māka wāsaskotēnikanātikohk awiyak tāpiskoc ayisiyiniwikosisān, ē kikasākēt miskotākay ositihk ē iskēikaniyik mina ē pakwatēhot wāskikanihk osāwisoniyāwi pakwatēhon.

¹⁴ ēkosi ostikwān mina wēstakaya ki wāpiskāyiwa tāpiskoc wāpiski māyatihkopiwaya, tāpiskoc kona; ēkosi oskisikwa tāpiskoc ē kwākotēk iskotēw;

¹⁵ ēkosi osita tāpiskoc ē ki wāsikwakaikātēk osāwāpisk, tāpiskoc ē ki mamitonicikātēk tikāpiskisikanihk; ēkosi ot ititākosiwin tāpiskoc ē pētākwaki mihcēt nipiya.

¹⁶ o kihciniskihk māka miciminēw tēpakop acahkosa; ēkosi otonihk ohcipayiyiw ē kāsisiniyik ē niswāpitakāyik isawēsk; okwākan māka tāpiskoc pisim ē kihci wāsēyāsikēt.

¹⁷ ispi māka wiyāpamak ni ki pahkisinowān ositihk tāpiskoc awiyak ē nipit. ēkosi māka o kihcinisk ohci ni ki sāminik ē itwēt, ēkāwiya sēkisi; niya ana nistam mina ana iskwāyāc,

¹⁸ mina ana opimātisiw; ēkosi ni ki nipin māka cist, ni pimātisin nāspici mina nit ayān āpikokaikana nipowinihk mina hētisihk.

¹⁹ masinaha māka anihi kā ki wāpahtaman mina anihi kā ayāki mina anihi mwēstas iyikohk kē tipipayiki;

²⁰ anima mamātāw tēpakop acahkosak kā ki wāpamacik ni kihciniskihk, mina anihi tēpakop osāwisoniyāwi wāsaskotēnikanātikwa. aniki tēpakop acahkosak ēwakoni okisikomiwāwa anihi tēpakop ayamihēwikamikwa; ēkosi anihi tēpakop wāsaskotēnikanātikwa ēwakoni tēpakop ayamihēwikamikwa.