ᑲᑫᐦᑖᐁᐧᐃᐧᓇ 1 - Kanāci Kihci Masinahikan

¹ o kakētāwēwina sālaman okosisa tēpit, isrēil kihci okimāw;

² kita kiskēyitamihk iyinisiwin mina kiskinohamātowin; kita nisitawinamihk nisitohtamowi itwēwina;

³ kita otinamihk kiskinohamātowin iyinisiwi isihcikēwinihk, kwayaskitātisiwinihk, mina kwayask mitonēyicikanihk mina kwayaskitiwinihk;

⁴ kita miyikot iyinisiwin ana kā wēcihot, oskinikiw kiskēyitamowin mina ayākwāmisiwin;

⁵ kā iyinisit ayisiyiniw kita pēhtahk ēkosi kita yahki kiskinohamākowisit mina ayisiyiniw kā o nisitohtamowinit kita otitahk kā sokastēki māminomiwēwina;

⁶ kita nisitohtamihk kakētāwēwin, mina ē itwēmakahk; ot ayamiwiniwāwa kā iyinisicik, mina kā ākawāyiki ot itwēwiniwāwa.

⁷ kā kosikwēyimiht kā tipēyihcikēt ēwako ē mācipayik kiskēyitamowin; māka ēkā kā iyinisit ātawēyitam iyinisiwin mina kiskinohamākēwin.

⁸ nikosē, natohtam o kiskinohamākēwin kotāwi, mina ēkāwiya nakatam oyasowēwin kikāwi;

⁹ cikēmā ki ka miyo wawēsiowākān kistikwānihk, mina kikwayāhk tāpiskākanēyāpisa.

¹⁰ nikosē, kispin omacātisiwak wisāmiskwāwi, ēkāwiya naskomo.

¹¹ kispin itwētwāwi, pē wicēwinān, māhti asoatāk mihko, kimoci askamawātak kā miywātisit pikonata;

¹² ē mēkwā pimātisicik kohcipayiātānik tāpiskoc cipayaski, mina misiwē, tāpiskoc wātikānihk kā itohtēcik;

¹³ ki ka miskēnānaw kahkiyaw kā ayiwākēyitākwahki kēkwaya, ki ka moskinatānānaw kikinawa maniwatēwin;

¹⁴ ki ka o wicēwākanitonānaw; kita pēyakwan ki soniyāwiwatinaw;

¹⁵ nikosē, ēkāwiya wicēwik mēskanāhk; ēkāwiya pimotātotam o mēskanāwāw;

¹⁶ cikēmā macāyiwinihk ispatāwak, mina kakwēyāhowak kita sikinakik mihko.

¹⁷ cikēmā pikonata ayapi kā taswēkākotiht ē wāpahtahk pikwāna piyēsis;

¹⁸ oko māka wiyawāw o mihkowāw kā asoakik, kimoci askamawātamwak wiyawāw o pimātisiwiniwāw.

¹⁹ ēkosi ēsiwēpisit kahkiyaw awiyak kā kāsakātisit kaskicikēwin; kā otinamwāt o pimātisiwiniyiw anihi kā ayāyit.

²⁰ iyinisiwin tēpwēw pimohtēskanāhk, pēhtākosiw ita ē tēnisawi ayāk;

²¹ tēpwēw ita kihci kā māwacihitohk; ē ati pihtokēhk kihciiskwātēmihk, otēnāhk, pēhtākotāw ot itwēwina;

²² tāniyikohk kinwēs, kiyawāw kā wēcihoyēk kē sākihtāyēk wēcihowin? mina māyēyihcikēskak kē miywēyitahkik māyēyihcikēwin, mina ēkā kā iyinisicik kē pakwātakik kiskēyitamowin?

²³ kwēskik ē kitotitakok; mātika, ki ka sikinamātināwāw nit ahcāhk, ki ka kiskēyitamoitināwāw nit itwēwina.

²⁴ cikēmā ē ki tēpwēyān, ēkosi ēkā ē tāpwētamēk; ē ki sowiniskēyiyān ēkā māka awiyak ē nākatokēt;

²⁵ māka ē ki māyēyitamēk ni māminomiwēwin, mina ē ātawēyitamēk ni kakētaamākēwin;

²⁶ niya mina ni ka pāhpin ki nisiwanācihowiniwāhk; ni ka mētawākātēn ki sēkisiwiniwāw takopayiki;

²⁷ ispi ki sēkisiwiniwāw takopayiki tāpiskoc ē kistihk, mina ki nisiwanācihowiniwāw takopayiki tāpiskoc ē pisicosiwahk; ispi wawānēyitamowin mina kotakitāwin otihtikoyēko.

²⁸ ēkwa kē mawimostawicik, māka namawiya ni ka naskwēwasimāwak; ni ka āhkami nanātonākwak māka namawiya ni ka miskākwak;

²⁹ cikēmā ē ki pakwātakik kiskēyitamowin, mina ēkā ē nawasonakik o kosikwēyimikowiniyiw kā tipēyihcikēyit;

³⁰ namawiya ki natawēyitamwak ni māminomiwēwin; ki ātawēyitamwak kahkiyaw ni kakētaamākēwin.

³¹ ēwako ohci kita miciwak ē isi minisiwaniyik wiyawāw ot itātisiwiniwāw, mina kita kispototamwak wiyawāw ot isihcikēwiniwāwa.

³² cikēmā ot asēpayiwiniyiw owēcihowa kita nipaikwak, mina o nanahipayiwiniyiw ēkā kā iyinisiyit kita nisiwanāciikwak.

³³ māka awiyak natohtawici nama kēkway kita astāhik, mina kita pēyataki ayāw ēkā māyikēkway ē astāhikot.