ᐹᐃᓬᐃᒪᐣ 1 - Kanāci Kihci Masinahikan

¹ pāl kā kipahokawiyān Christ cisas ohci, mina timatī kiciwāminaw ē masinahamātāhk pāiliman kā sākihitāhk ni wici atoskēmākaninā,

² mina āpāya nitawēmānān, mina ārkipas ni wici notinikēmākaninān, mina otayamihāwak kikihk kā ayācik;

³ kisēwātotākowin mina pēyatakēyimowin ki ka wi ohcistamākowāw kisēmanito kotāwinaw mina kā tipēyihcikēt cisas Christ.

⁴ ni nanāskomaw ni kisēmanitom kākikē ē māmiskomitān nit ayamihāwinihk,

⁵ ē pētamān ē ātotākwahk ki sākihiwēwin mina ki tāpwēyēyitamowin kā isi wāpahtaat kā tipēyihcikēt cisas mina kā isi wāpahtaacik kahkiyaw okanātisiwak;

⁶ anima ē isi o wicēwākanitohk ki tāpwēyēyitamowinihk kita ki kaskiiwēk, ē kiskēyitākwahk kahkiyaw miyo kēkway kā kikiskākoyan, Christ isi.

⁷ cikēmā mistahi mamahtākosiwin mina miyotiēwin ni ki ayān ki sākihiwēwin ohci cikēmā otēhiwāwa okanātisiwak ki ki minawi maskawisitāwān niciwā.

⁸ ēkosi māka āta ē ayāyān ēkoyikohk sokēyimowin Christ isi kita sikimitān anima kā naipayik,

⁹ ēyiwēhk sākihiwēwin ohci nawac ki kākisimototātin cikēmā niya pāl ē kisēyiniwiyān mina ēkwa ē kipaikāsoyān Christ cisas ohci;

¹⁰ ki kākisimototātin nit awāsimis ohci kā ki nihtāwikiak ē mēkwā mamācikwapisoyān, ānēsimas,

¹¹ ana kayās ēkā nāntaw kā ki itāpaciisk māka ēkwa kā āpaciikoyahk tāpiskoc kiya mina niya;

¹² ana kā sipwētisawak kāwi kita nātisk wiya kēhciwāk ēwako mwēmohc nitēh;

¹³ ēwako ni ki nohtē kanawēyimāw kita atoskēstamāsk ē pamiit oma mamācikwapisowinihk miywācimowin ohci:

¹⁴ māka namawiya kēkway ni wi itotēn ēkā kiya ē kiskēyitaman; ki miyototamowin ēkā kita isinākwahk tāpiskoc ayisāc, māka mitoni tēpēyimowinihk.

¹⁵ cikēmā māskoc ēwako ohci aciyaw kā ki paskēwiyisk kita ayāwat kākikē;

¹⁶ namawiya māka ēkwa tāpiskoc atoskēyākan māka ayiwāk iyikohk wiya atoskēyākan, ē ociwāmihk kā sākihiht, niya oti osām, māka wāwis kiya wiyāsihk isi mina kā tipēyihcikēt isi.

¹⁷ kispin māka ni wicēwākan kit itakimin, otin tāpiskoc niya ē otiniyan.

¹⁸ māka kispin nāntaw ki ki isi wanitotāk ahpo nāntaw kēkway ki masinahamāk niya ēwako akitamawin;

¹⁹ niya pāl ni masinahēn nicihci ohci, ni ka tipaēn; ātawiya māka kita ki itwēyān kiya ki masinahamawin kiya kēhciwāk kā isi ayāyan.

²⁰ ēhē niciwā, kiyām mamatākohin kā tipēyihcikēt isi; miyotēhēhin Christ isi.

²¹ ēkā ē asiwēyitamān ki nanaitamowin ki masinahamātin ē kiskēyitamān kita itotaman ayiwāk iyikohk anima kā itwēyān.

²² māka mina kwayācitamain ita kita wikiyān; cikēmā nit isi pakosēyimon kit ayamihāwiniwāwa ohci kita pakitinikawiyān kita wāpamitakok.

²³ ēpaprās kā kiki kipaikāsoyān Christ cisas isi kit atamiskāk;

²⁴ ēkosi mina mārk, āristārkas, timās, lok, ni wici atoskēmākanak.

²⁵ o kisēwātisiwin kā tipēyimikoyahk cisas Christ ki ka wi wicēikowān kit ahcāhkohk. āmēn.