nihimāya 1 - Kanāci Kihci Masinahikan

¹ ot itwēwina nihimāya okosisa hākalāya. ki ayispayiw māka mēkwāc kislēp pisim, nisitanaw tahto aski ati, ē ayāyān ēkota sosān anima kihci okimāwikamik,

² hēnanay pēyak niciwām, ki takosin, wiya mina ātiht nāpēwak cota ohci; ni ki kakwēcimāwak māka ē isi ayāyit anihi cowa kā ki paspiyit, kā iskoihcik awakātikowinihk, mina ē isi ayāk cērosalam.

³ ni ki itikwak māka, kā ki iskoihcik awakātikowinihk ohci kā ayācik ēkota ē piskitakitēk aski mistahi kotakitāwak mina kitimaāwak; mēniskikēwin mina cērosalamihk pikonikātēw, mina kihciiskwātēma ēkota mēstikatēwa iskotēw ohci.

⁴ ki ayispayiw māka ispi ē pētamān ohi itwēwina, ni ki nahapin ē ki mātoyān, mina ni ki pikwēyitamiikon tāntahto kisikāw; ēkosi ni ki iyiwanisiison mina ni ki ayamihēstawāw kisēmanito kihcikisikohk ēyāt,

⁵ omisi ē ki itwēyān, ki pakosēyimitin tēpēyihcikēyan, kisēmanito kihcikisikohk kā ayāyan, kā kihcāyiwiyan mina kā kostātēyitākosiyan kisēmanito, kā tipitotamawāt asotamākēwin mina kisēwātisiwin anihi kā sākihikot mina kā mitimēyit oyasowēwina;

⁶ kiyām kihtawakay ēkwa kita natohtamomakan, mina tohkāpi, kita pētamwat ot ayamihāwin kit atoskēyākan, kā isi ayamihēstātān anohc oma, ē kisikāk mina ē tipiskāk, ē ayamihēstamawakik isrēil ot awāsimisa kit atoskēyākanak, asici ē ātotamwak o maciitiwiniwāwa isrēil ot awāsimisa, kā ki wanitotātāhk; ēhē, niya mina notāwi o wāskāhikanihk ni ki wanitotēnān.

⁷ mistahi ki ki nisiwanācitotātinān, mina namawiya noh mitimānān anihi oyasowēwina, mina kakēskwēwina, mina oyasowāsiwēwina, kā ki itasowātat kit atoskēyākan mosis.

⁸ kanokiskisi ki pakosēyimitin, anima itwēwin kā ki itasowātat kit atoskēyākan mosis, ē itwēyan, kispin wanitotamēko ki ka piwāmokātitināwāw nanātohk ayisiyinināhk;

⁹ māka kispin kwēskistawiyēko, mina mitimēyēko noyasowēwina mina itotamēko, āta awiyak kiyawāw ohci wayawiwēpinihcik kisipikīsikohk isi, ēyiwēhk ēkota ohci ni ka māwasakonāwak, mina ni ka pēsiwāwak ita kā ki nawasonamān ni wiyowin ēkota kita ayāk.

¹⁰ ēwakonik māka oko kit atoskēyākanak mina kit ayisiyinimak kā ki kispinatacik ki kihcimaskawisiwin ohci mina ki maskawicihcēwin.

¹¹ tēpēyihcikēyan, ki pakosēyimitin kiyām ēkwa natohtam ot ayamihāwin kit atoskēyākan. mina ot ayamihāwiniwāw kit atoskēyākanak kā miywēyitahkik kita kosikwēyitahkik ki wiyowin; mina nanahipayih, ki natotamātin, kit atoskēyākan anohc kā kisikāk, mina pakitēyitamaw kita kitimākinakot ohi nāpēwa. (niya māka kā tahkonamwak kihci okimāw o minikwākan.)