ᓭᐣᐟ ᒫᕒᐠ 1 - Kanāci Kihci Masinahikan

¹ ē mācipayiyik o miwācimowin cisas Christ, okosisa kisēmanito.

² mwēhci kā itasinahikēt āsāya okiskiwēhikēw, cist ki nikānitisaamātin nit itwēiwēm ana kē nikāni kwayācitamāsk ki mēskanaw;

³ matwē tēpwēw pēyak pikwataskihk, wawēyitāwāhk o mēskanaw kā tipēyihcikēt, kwayaskwamotāwāhk o mēskanawa;

⁴ cān ki pē itohtēw ē pāptaisiwikēt pikwataskihk mina ē kakēskimiwēt pāptaisiwikēwin kita ponēyicikātēki maci itiwina.

⁵ ēkota māka ki pē ohci wayawiyiwa ē pē nātikot kahkiyaw cotiya askihk, mina kahkiyaw cērosalamihk kā ayācik; ki pāptaisiwiikwak māka cārtan sipihk, ē wāwitakik o macitiwiniwāwa.

⁶ cān māka ki wiyātam opiskwāwikanēwipisiskiw opiwaya, mina pakēkinowi pakwatēhon ki pakwatēho, mina ki mowēw kwāskotisisa mina pikwaci amo sisipāskwat.

⁷ ki kakēskimiwēw māka, ē itwēt, pēyak pē takosin ē askowit awasimē ē kistēyitākosit ispi niya, o maskisinēyāpiya namawiya ni tēpakēyitākosin kita nawakiyān kita āpikonamwak.

⁸ niya wiya nipi ki ki ohci pāptaisiwihitināwāw; māka wiya kā kanātisiyit ahcāhkwa ki ka ohci pāptaisiwiikowāw.

⁹ ki ayikin māka ēkospi ē kakisikāk, cisas ki pē ototēw nāsarētihk kālali askihk, ēkosi ki pāptaisiwiik cāna cārtanihk.

¹⁰ sēmāk māka nipihk ē pē ohci kapāt, ki wāpahtam kisikwa ē tawipayiki, ēkosi ahcāhkwa omimihk ē isinākosiyit ē pē yasitotākot;

¹¹ kisikohk māka ki pē ohcipayiw itwēwin, kiya kā sākihitān nikosis nāspic kā nahiyawēiyan.

¹² sēmāk māka ahcāhkwa ki isiwiyik pakwataskihk.

¹³ ēkotē māka ki ayāw pikwataskihk nēmitanaw kisikāwa, ē kakwēcihikot sētana: ē wicēwāt pikwaci pisiskiwa; okisikowa māka ki pamiik.

¹⁴ ispi māka kā kipaoht cān, cisas ki pē takosin kālalihk, ē kakēskimiwēt kisēmanito o miwācimowin,

¹⁵ omisi māka ē itwēt, sāsay tipipayiw, mina kisēmanito ot otēnawiwin kisiwāk ayāyiw, kwēskātisik mina tāpwētamok miwācimowin.

¹⁶ ē pimāsakāmēt māka kālali sākahikanihk ki wāpamēw saimana mina antaroa ociwāmiyiwa saimana, ē pakitawāyit sākahikanihk: cikēmā ki onocikinosēwēwiwak.

¹⁷ cisas māka ki itēw, pē pimitisahok, ki ka isiitināwāw māka kita nocikinosēwātēkwāw ayisiyiniwak.

¹⁸ sēmāk māka ki nakatēwak ot ayapiwāwa ēkosi ē ki pimitisawācik.

¹⁹ ē ati yahki sipwētēt māka ki wāpamēw cēmisa okosisa sēpiti, mina cāna ociwāmiyiwa, osihk ē ayāyit ē misayapēyit.

²⁰ sēmāk māka ki natomēw; ki nakatēwak māka otāwiwāwa sēpitiwa osihk asici atoskēyākana, ē ki pimitisawācik māka.

²¹ ki itohtēwak māka kēparnēamihk, sēmāk māka ē ayamihēkisikāyik ki pihtokēw ayamihēwikamikohk ē ki kiskinohamākēt.

²² ki māmaskātamwēwak māka o kiskinohamākēwiniyiw; cikēmā ki isi kiskinohamākēw tāpiskoc awiyak ē ayāt tipēyihcikēwin, namawiya tāpisko masinahikēwiyiniwak.

²³ ēkota māka ot ayamihēwikamikowāk ayāw pēyak ayisiyiniw ē ayāwāt ēkā ē pēkisiyit ahcāhkwa; ki tēpwēw māka,

²⁴ omisi ē itwēt, kēkway niyanān kēnawāpamikoyāhk kiya ohci, kiya cisas nāsarētihk kohciyan? ki pē itohtān ci kita nisiwanāciiyāhk? ki kiskēyimitin awēna kiya, o kanātisima kisēmanito.

²⁵ cisas māka ki kitahamawēw, omisi ē itāt, ēkā kito, mina pēci wayawi ēkota ohci.

²⁶ ana māka ēkā kā pēkisit ahcāhk ē wisakipitāt, mina ē mistahi tēpwēt, ki pē wayawiw.

²⁷ kahkiyaw māka ki māmaskātamwak, ēkosi ēwako ohci ki kakwēcitowak, ē itwēcik, kēkway oma? kēko oski kiskinohamākēwin oma? cikēmā tāpiskoc ē tipēyimāt isi oyasowātēw ēkā ē pēkisiyit ahcāhkwa ēkosi nanaihtāk.

²⁸ ot ācimikowin māka misiwē ki pētākwaniyiw kālali askihk wāsakām.

²⁹ sēmāk māka ispi ayamihēwikamikohk kā pē ohci wayawicik, ki pihtokēwak o wāskāhikaniyihk saimana mina āntarowa asici cēmis mina cān.

³⁰ saiman māka wiwa okāwiyiwa ki pimisiniyiwa ē kisisowāspinēyit; sēmāk māka ki acimostawēwak:

³¹ ki pē itohtēw māka, ē ki sakicicēnāt, mina ki opinēw; sēmāk māka kisisowin ki nakatikoyiwa, ēkosi ki pamiikwak.

³² ispi māka ēti otākosik, sāsay ē ki pahkisimok, ki pētamawēwak kahkiyaw kā ākosiyit mina kā wiyawiskākoyit maci ahcāhkwa.

³³ kahkiyaw māka otēnāhk kā ayācik ki māwaciitowak iskwātēmihk

³⁴ ki iyinikahēw māka mihcēt kā ākosiyit nanātohk ē itāspinēyit, mina mihcēt maci ahcāhkwa ki wayawiwēpinēw, namawiya māka ki iyinamawēw maci ahcāhkwa kita ayamiyit cikēmā ki kiskēyimik.

³⁵ ispi māka kiyēkisēpāyāk, ē mwayē mosciwak wapaniyik ki waniskāw mina ki wayawiw, ē ki itohtēt ita ē nisikatowēyitākwaniyik, ēkota ē ayamihāt.

³⁶ saiman māka mina aniki kā wicēwācik ki pimitisawēwak.

³⁷ ispi māka kā miskawācik omisi ki itēwak, kahkiyaw ayisiyiniwak ki nanātonākwak.

³⁸ omisi māka ki itēw, māhti itotētāk kotak otēnāhk, ēkota mina kita kakēskimiwēyān; cikēmā ēwako ohci kā pē itohtēyān.

³⁹ ēkosi māka ki kakēskimiwēw ot ayamihēwikamikoyihk misiwē kālalihk, mina ē ki wayawiwēpināt maci ahcāhkwa.

⁴⁰ ēkota māka ki pē nātik omacāspinēa, ē kākisimototākot, mina ē ocihcihkwanapistākot, omisi ē itikot, kispin itēyitamani ki ka ki pēkihin.

⁴¹ cisas māka, ē kitimākinawāt, ki sowiniskēyiw, mina ē ki sāmināt, omisi ē itāt, nit itēyitēn, ki ka wi pēkiikawin.

⁴² sēmāk māka macāspinēwin ki nakatik ēkosi ki pēkiāw.

⁴³ ki ayākwāmimēw māka sēmāk mina ki sipwētisawēw;

⁴⁴ omisi ē itāt, mēyākwām ēkāwiya nāntaw isi awiyak ayisiyiniw, māka sipwēhtē, natawi wāpatiyisostaw ayamihēwiyiniw, mina ki pēkiikowin ohci pakitināso anihi kēkwaya mosis kā ki itasowēt, kita ohci kiskēyitamoacik.

⁴⁵ māka ki wayawiw, ēkosi ē ki sipwēātotahk, mina misiwē ē ki kiskēyitamoiwēt anima kā ki ikihk, ēwako māka ohci cisas namawiya mosis ki pihtokēw otēnāhk, māka nikotwāw pikwataskamikāhk ki ayāw; ki pē nātāw māka misiwē itē ohci.