ᓭᐣᐟ ᓬᐅᐠ 1 - Kanāci Kihci Masinahikan

¹ cikēmā mihcēt ē ki otinamāsocik kita oyastācik wihtamakēwinihk anihi kēkwaya kā mitoni tipipayicikātēki ita ēyāyahk,

² anihi kā ki isi pakitinamakoyakok wiyawāw, nistam kā ki wāpahtahkik mina kā ki pamitācik ayamiwin,

³ ni ki naiskākon nista mitoni, ē ki nisitawēyitamān nistam ohci kahkiyaw kēkwaya kwayask, kita masinahamātan kiya māmawi, kēstēyitākosiyan tiopilas;

⁴ kita kiskēyitaman ēsi kēcināyēyitākwaki anihi kēkwaya kā ki kiskēyitamoikawiyan.

⁵ ki ayāw ē mēkwa o kisikāmit ērat, cotia kihci okimāw, pēyak ayamihēwiyiniw sākarāyas, ē isiyihkāsot, ē wicēwāt apaicawa, wiwa māka ē ki ohtaskanēsiyit ēran otānisiyiwa, ilisēpit māka ē ki isiyihkāsot.

⁶ tāpiskoc māka ki ayamiēwatisiwak ē isi wāpamikocik kisēmanitowa, kwayask mitoni ē pimotatakik kahkiyaw o sikimiwēwiniyiwa mina oyasowēwiniyiwa kā tipēyihcikēt.

⁷ māka namawiya ki ayawēwak awasisa, wiya ilisēpit ēkā ē ki ot awāsimisit, ēsi nisicik māka ki kisēyatisiwak.

⁸ ēkwa māka ki otihcipayiw, mēkwāc ē tipipayitāt ayamihēwiyiniw ot atoskēwin ot itāstamowiniyihk kisēmanitowa, ispi ē ispayiyik wiya kita totahk,

⁹ anima kā ki isi pakitinamāht ispi pihtokwēci ot ayamihēwikamikoyihk kā tipēyihcikēt, kita wikimasikēt.

¹⁰ kahkiyaw māka ē mamowēyaticik ayisiyiniwak ē ki ayamihācik wayawitimayihk ispi ē wikimasikēt.

¹¹ ki nokoototak okisikoma kā tipēyihcikēt ē nipawiyit kihciniskihk itēkē wikimasikani pakitinasowināpisk.

¹² ispi māka sākarāyas wiyāpamāt ki mikoskatēyitam, mina sēkisiwin ki pakamiskāk.

¹³ māka okisikowa ki itik, ēkāwiya sēkisi, sākarāyas: cikēmā kit ayamihāwin pēhcikatēw, mina kiwa ilisēpit kita okosisiw, cān māka ki ka isiyihkātāw.

¹⁴ mina māka ki ka ayān miyowatamowin mina miwēyitamowin; mihcēt māka kita miyowātamak nihtāwikici.

¹⁵ cikēmā kita kihcāyiwiw ē isi kanawāpamikot kā tipēyihcikēyit, mina namawiya kita minikwēw sominapayiw ahpo kā maskawāk minikwēwin; mina kita sākaskinēskāk kā kanātisiyit ahcāhkwa, okāwiya ē kikiskākot ohci.

¹⁶ mihcēt māka ot awāsimisiyiwa isrēil kita kwēskinēw kā tipēyihcikēyit o manitomiyiwa isi.

¹⁷ ēkosi māka kita nikānotawēw, ot acākoyihk mina o maskawisiwiniyihk ilaicawa kita isi kwēskitēēnat, otawimawa ot awāsimisiyiwa mina kā sasipitamiyit kita pimohtēyit ot iyinisiwiniyihk kā kwayaskwātisiyit; kita kwayācitamawāt kā tipēyihcikēyit ayisiyiniwa ē kwayāciyit.

¹⁸ sākarāyas māka okisikowa ki itēw, tānisi oma kē isi kiskēyitamān? wiya ē kisēyiniwiyān mina ni wikimākan mitoni ē kisēyātisit.

¹⁹ okisiko māka ē naskwēwasimat ki itēw, niya kēprial, kā nipawiyān otitastamiwinihk kisēmanito; mina māka ni ki isitisahokawin kita ayamiitan, mina kita wāpahtahitān ohi kā miywēyitākwaki ācimowina.

²⁰ cist māka, namawiya ki ka okitowinin, mina namawiya ki ka kaskitān kita pikiskwēyan iyikohk anima kisikāw kē tipipayiki ohi kēkwaya, cikēmā ēkā ē ki tāpwētaman nit ayamiwina, anihi kē tipipayiki ispi otihcipayiki.

²¹ ayisiyiniwak māka ki pēēwak sākarāyasa, mina ki māmaskātamwak kinwēs ē ki ayāyit kihci ayamihēwikamikohk.

²² ispi māka kā pē wayawit, namawiya ki kaskitāw kita kitotāt; mina ki nisitawinamwak ē ki mamaskātāpisiniyit kihci ayamihēwikamikohk ki ayitinikēstawēw māka, ēkā ē ki pikiskwēt.

²³ ki otihcipayiw māka, mayaw kā kisitat anihi o pamihiwēwikisikāma, wikihk ē ki isi kiwēt.

²⁴ kā ponipayiki māka ēwakwani kisikāwa, wiwa ilisēpit ki kikiskawawasoyiwa ki kāso māka niyānan pisim, ē itwēt,

²⁵ ēkosi oma kā tipēyihcikēt kā totawit anima ē kisikāyik ita kā ki kanawāpamit, kita otinahk ni nēpēwimikowin ayisiyinināhk ohci.

²⁶ ispi māka ē nikotwāsopisimowahk okisiko kēprial kisēmanitowa ki isitisahok otēnāhk kālalihk, nāsarit ē isiyihkātēk,

²⁷ kita nātat oskinikiskwēwa kā ki asotamawāt kita wicēwāt, nāpēwa cosip ē isiyihkāsoyit, tēpita ē otaskanēsiyit; oskinikiskwēw māka mēri ki isiyihkāso.

²⁸ ēkosi ki pitokawēw, mina ki itēw, kit atamiskātin, kiya mistahi kā nikānēyitākosiyan, ki miyo kanawapamikowisin iskwēnahk, kā tipēyihcikēt ki wicēwik.

²⁹ māka ki mikoskātēyitamiik ot itwēwiniyiw, mina ki māmitonēyitam kēko atamiskākēwin ē itēyitahk.

³⁰ ēkosi okisikowa ki itik, ēkāwiya sēkisi, mēri: cikēmā ki ki miskamwān o miyokwēstakēwin kisēmanito.

³¹ mina cist, ki ka kikiskawāwason, ēkosi ki ka nihtāwikiaw kē okosisiyan, cisas māka ki ka isiyihkātaw.

³² kita kihci itēyitākosiw māka, okosisa mamawēyas kā kihcayiwit kita isiyihkātāw: mina kā tipēyihcikēt kisēmanito kita miyik o kihci okimāwapiwiniyiw tēpita otāwiya:

³³ kita kihci okimakatam māka o wāskāhikaniyiw cēkapa kākikē; mina o kihci okimawiwin namawiya wikac kita ponipayiyiw.

³⁴ ēkosi mēri ki itēw okisikowa, tānisi oma kē ki isi ispayik, wiya ēkā ē kiskēyimak nāpēw?

³⁵ ēkosi okisikowa ki naskwēwasimik ē itikot, kā kanātisit acāhk ki ka otihtik, mina o maskawisiwin māwaci kā kihcāyiwit ki ka akawastēskākon; ēkosi māka anima kā kanātahk kē nihtāwikitāyan kisēmanito okosisa kita isiyihkātāw.

³⁶ ēkosi cist, ilisēpit ki wakomakan, wista kikiskawāwaso ē kayatēyātisit; ēkwa oma nikotwāsopisim ana namawiya nitāosēw kā ki itit.

³⁷ cikēmā namawiya nāntaw kēkway kisēmanito kā itwēt ēkā kita kaskiēwaniyik.

³⁸ ēkosi mēri ki itwēw, cist ot atoskēyākaniskwēma kā tipēyihcikēt kiyām ni ka ispayiikon anima kā itwēyan. ēkosi okisikowa ki nakatik.

³⁹ ēkosi mēri ki pasiko ēkospi mina ē ki itohtēt ita ē ayapatinayik ē kakwēyāot otēnāhk cotaihk.

⁴⁰ mina ē ki pihtokēt sākarāyas wikiyihk ēkosi ilisēpita ē ki atamiskawāt.

⁴¹ ēkosi ki ihkin ispi ilisēpit ē ki pēhtahk ot atamiskakēwiniyiw mēriwa awasisa ki waskawiyiwa wiyawihk mina ilisēpit ki sakaskinēskak kanaci ahcāhkwa

⁴² soki māka ē ki pikiskwēt mina ē ki itwēt, ki sawēyitākosin ita ē ayācik iskwēwak mina sawēyitakwan anima kē nihtāwikitāyan.

⁴³ mina tānēki oma wēci otihtikoyān okāwiya ni tipēyihcikēm kā otisit.

⁴⁴ wiya sēmāk ispi ē pētakwak kit atamiskākēwin nitawikāhk awasis ki waskawipayiho niyawihk miyawatamowin ohci.

⁴⁵ mina māka sawēyitākosiw ana kā ki tāpwētahk, cikēmā kita tipipayiwa anihi kēkwaya kā ki tasitamāht kā tipēyihcikēt ohci.

⁴⁶ ēkosi mēri ki itwēw, nit acāhk mamicimēw kā tipēyihcikēyit,

⁴⁷ mina nit acāhk ki miyawātēw kisēmanitowa nopimaciiwēma.

⁴⁸ wiya ē ki kanawāpahtamwāt o tapahtēyitākosiwiniyiw ot atoskēyākaniskwēma: wiya mātika, anohc ohci, kahkiyaw kē aniskē pimātisicik miyoitakimikowisiw ni ka itikwak.

⁴⁹ cikēmā ana kā kihcāyiwit kihci kēkwaya ni ki totamāk mina owiyowin kanātaniyiw.

⁵⁰ mina o kisēwatisiwin ayāyiwa anihi kā kosikwēyimikot kē ati ayāniskē pimātisiyit.

⁵¹ ki wāpahtahiwēw maskawisiwin ospiton ohci, ki siswētisawēw kā kistēyimoyit ē isi nākatawēyitamiyit o tēiyihk.

⁵² ot apiwiniyihk ohci ki nitinēw kihci okimāwa mina ki kistēyitākoēw kā tapahtēyitākosiyit.

⁵³ miyo kēkwaya ohci ki kispoēw kā notēkatēyit; māka kā wēyotisiyit pisisik ki sipwētisawēw.

⁵⁴ ki wiciēw isrēila ot atoskēyākana, ē kiskisitotahk anima o kisēwatisiwin.

⁵⁵ kā ki isi kitotat kotawinawa ēprēama asici ot awāsimisiyiwa kakikē.

⁵⁶ ēkosi mēri ki wici ayamēw nāntaw nisto pisim, mina wikihk ki isi kiwēw.

⁵⁷ ēkwa ilisēpit o kisikam ki otihcipayiyiw kita wāpamāwasot ēkosi ki nihtāwikihēw okosisa.

⁵⁸ ēkosi ototēma mina o wakomakana ki pētamiyiwa, tānisi kā tipēyihcikēt ē ki isi wāpahtaāt kihci kisēwatisiwin; ki wici miyowatamomēwak māka.

⁵⁹ ki ayikihk māka ispi ē ayinanēokisikak, ki pē itohtēwak kita kiskinawacisawatacik awāsisa; ēkosi sakārāyas ki wi isiyihkātēwak kā isiyihkāsoyit otāwiya.

⁶⁰ ēkosi māka okāwiya ki naskwēwasiikwak ē itwēyit, namawiya; māka cān kita isiyihkāso.

⁶¹ ēkosi ki itēwak, namawiya awiyak ki wakomakanak ēkosi isiyihkāso.

⁶² ki ayitinamawēwak māka otawiyiwa, tānisi kē natawēyimakwē kita isiyihkāsoyit.

⁶³ ēkosi ki natotam masinahikēwinātit mina ki masinahikēw ē itwēt cān isiyihkāsow. ēkosi kākiyaw ki mamaskātamwak.

⁶⁴ ēkosi oton sēmāk ki paskitēnikātēyiw, mina otēyani ki āpaikātēyiw, ēkosi māka ki pikiskwēw, mina ē ki mamicimāt kisēmanitowa.

⁶⁵ sēkisiwin māka ki otihtikwak kahkiyaw wasakam ēkota kā ki ayācik: mina kahkiyaw ohi pikiskwēwina ki pētakwanwa misiwē anita ayapatināwi askihk cotaihk.

⁶⁶ kahkiyaw māka kā ki pēhtahkik ki naastāwak otēiwahk, ē itwēcik, tānisi oma kē towikaniwit awa awāsis? ocihciyiw māka kā tipēyihcikēyit ki wicēwik.

⁶⁷ ēkosi otawiya sakārāyasa ki sakaskinēskākoyiwa kanaci ahcāhkwa ēkosi māka ē ki kiskiwēhikēt, ē itwēt,

⁶⁸ kita miyo kiswataw kā tipēyihcikēt, o kisēmanitoma isrēil, cikēmā ki kiokawēw mina ki tipahikēstamawēw ot ayisiyinima,

⁶⁹ mina ki ki pasikonomākonaw pimaciikowisiwin o waskaikāniyihk ot atoskēyākana tēpita.

⁷⁰ kā ki isi pikiskwēt o kanaci kiskiwēhikēma otoniyihk ohci kā ki pē ayikiniyik aspin kā pē askiwahk,

⁷¹ ki notinakāninawak ohci kita pimaciikawiyahk, mina ocihciwāhk aniki kahkiyaw kā pakwatikoyakok;

⁷² kita tipipayitamawāt kitimākinākēwin kotāwinawa mina kita kiskisitotahk o kānaci kiskitowin;

⁷³ anima kihci itwēwin kā ki kihci itāt ēprēāma kotawinawa,

⁷⁴ kita isi pakitinamākoyahk ē ki pimāciikoyahk ki notinākaninawak ohci kita atoskawayak ēkā kita astāsiyahk,

⁷⁵ kanātisiwinihk mina kwayaskwātisiwinihk ētastamit kahkiyaw ki kisikaminahk.

⁷⁶ ēha kiya māka, awāsis. ki ka isiyihkātikawin okiskiwēhikēma māwaci kā kihcāyiwit: cikēmā ki ka nikānotawāw kā tipēyihcikēt, kita kwayācitamawat o mēskanāma:

⁷⁷ ot ayisiyinima pimātisiwin kita kiskēyitamoāt ēponēyitamāmit o maciitiwiniyiwa.

⁷⁸ cikēmā ē isi kitimakēyimiwēmakaniyik, o kisēwātisiwin ki kisēmanitominaw, kē otihtikoyahk, ē kisikānākwahk ispimihk ohci,

⁷⁹ kita miyāt wāstēw anihi kā apiyit kaskitipiskahk mina ita kā akawastēskākēmakahk nipowin; kita kiskinotatāt kisitinawa pēyatakēyimowinihk isi.

⁸⁰ ēkosi ana awāsis ki opikiw mina ki ati maskawisiw ot acāhkohk, mina ki ayāw pikwataskihk pātimā anima kisikāw ē nokohisostawāt isrēila.