ᓬᐃᐱᑎᑲᐢ 1 - Kanāci Kihci Masinahikan

¹ kā tipēyihcikēt māka ki tēpwātēw mosisa mina ki ayamihēw māwacihitowi mikiwāpihk ohci ē itwēt,

² pikiskwāsik isrēil ot awāsimisa mina omisi ki ka itāwak, kispin awiyak ayisiyiniw kā itasiyēk pētamawāci pakitināsowin kā tipēyihcikēyit, ki ka pēsiwāwāw ki pakitināsowiniāw awakānak ohci, mostoswak mina māyatihkwak ohci.

³ kispin o pakitināsowin macostēhamākēwin mostoswa ohci, kita pakitinēw yāpēwaya ēkā ē māskisiyit; kita pakitinēw iskwātēmihk māwacihitowi mikiwāpihk, kita miyo otinamākot kā tipēyihcikēyit.

⁴ ēkosi kita astāw ocihci ostikwāniyihk o macostēhamākēwina; ēkosi kita otinamawāw kita tipahikēstamākot.

⁵ kita nipaēw māka anihi yāpēmostoswa ohtiskaw kā tipēyihcikēyit; ēkosi ēran okosisa āyamiēwiyiniwak kita pakitinikēstamāk anima mihko, ēkosi kita siswēpēkinamwak mihko wāskā tāhkoc anima pakitināsowināpisk kā ayak ē iskwātēmiwahk māwacihitowi mikiwāp.

⁶ ēkosi māka kita ahkonēw anihi macostēhamākēwina, mina kita nanānis cisāwatēw.

⁷ okosisa ēran māka ayamihēwiyiniw kita astāwak iskotēw pakitināsowināpiskohk, mina kita oyastāwak mihta iskotēhk.

⁸ ēran māka okosisa, ayamihēwiyiniwak, kita oyastāwak nanānis cisāwācikana, ostikwān mina wiyin, ē oyastācik mihtihk iskotēhk kā ayāk pakitināsowināpiskohk.

⁹ māka wiya ot atāmiyawa mina oskāta kita kisipēkinam nipihk; ēkosi ayamihēwiyiniw kita mēstikasam kahkiyaw pakitināsowināpiskohk, ēwako macostēhamākēwin iskotēwi pakitināsowin, anima kē wihkimāsamāht kā tipēyihcikēt.

¹⁰ māka kispin o pakitināsowin māyatihkonāhk ohtinaki, nikotwā māyatihkwa ahpo wāpatikwa ē wi macostēhamākēt; kita pakitinēw yāpēwaya ēkā ē māskisiyit.

¹¹ kita nipaēw māka kiwētinohk itēhkē pakitināsowināpiskohk ohtiskaw kā tipēyihcikēyit; ēkosi ēran okosisa, ayamihēwiyiniwak kita siswēpēkinamwak o mihkoyiw pakitināsowināpiskohk wāskā.

¹² kita nanānis cisāwātēw māka, asici ostikwān mina wiyin; ēkosi ayamihēwiyiniw kita oyastāw mihtihk iskotēhk kā ayāyik pakitināsowināpiskohk.

¹³ māka ot atāmiyawa mina oskāta kita kisipēkinam nipihk; ēkosi ayamihēwiyiniw kita pakitinam kahkiyaw, mina kita mēstikasam pakitināsowināpiskohk; ēwakwānima macostēhamākēwin, pakitinasowin iskotēw ohci, ē wihkimāsamāht kā tipēyihcikēt.

¹⁴ kispin māka o pakitināsowin piyēsisa kā wi pakitinamawāt kā tipēyihcikēyit, ēkwa kita pakitinēw ē pakitināsot tāpiskākani omihmiwa ahpo omihmisisa.

¹⁵ ayamihēwiyiniw māka kita pē itotaēw pakitināsowināpiskohk ēkosi kita kiskikwēpitēw, mina kita mēstikaswēw pakitināsowināpiskohk; ē mihkowiyit māka kita pāpakikawaniyiw ohpimē pakitināsowināpiskohk.

¹⁶ kita manipitamwēw māka wamotāyiw asici ēkā kā pēkahk kā asiwatēk, mina kita isiwēpinam ciki pakitināsowināpiskohk wāpanotāhk itēhkē, ita pikotēw kā astēk.

¹⁷ kita tāskipitiw māka otatakwaniyihk ohci, māka namawiya kita nisotāpitēw; ēkosi ayamihēwiyiniw kita mēstikaswēw pakitināsowināpiskohk, mihtihk iskotēhk kā tēhtastēk; ēwakwānima macostēhamākēwin, pakitināsowin iskotēw ohci, ē wihkimāsamāht kā tipēyihcikēt.