James 1 - Kanāci Kihci Masinahikan

¹ cēmis ot atoskēyākana kisēmanito mina kā tipēyihcikēt cisas Christ, aniki mitātat nisosāp kā itatoskānēsicik papāmi kā ayācik, ē atamiskawakik.

² mamahtākosiwin itakitamok niciwāmitik nanātohk kotēyimikowinihk ēsi pahkisiniyēko;

³ ē kiskēyitamēk oma ē kotēyitākwahk ki tāpwēyēyitamowiniwāw atoskātamomakan sipēyitamowin.

⁴ kiyām māka sipēyitamowin mitoni kita atoskēmakan kita mamitoni ayāyēk mina kita kakisiyēk ēkā kēkway ē kwitamāyēk.

⁵ māka kispin awiyak kiyawāw kwitamāci iyinisiwin kiyām kita natotamawēw kisēmanitowa, ana kā wēyoci miyāt kahkiyaw awiya ēkā māka ē ācistawēyitahk; ēkosi kita miyāw.

⁶ māka kiyām kita natotam tāpwēyēyitamowinihk ēkā ē asiwēyitahk; cikēmā ana kā asiwēyitahk itēyitākosiw tāpiskoc ē mikoskātākamāskāk kihcikami ē mistahi yotihk ēkosi ē māmakāahk.

⁷ cikēmā ēkāwiya ēwako ayisiyiniw kita itēyitam nāntaw kēkway kita miyikot kā tipēyihcikēyit;

⁸ niswayak kā itēyitahk ayisiyiniw namawiya āyātēyitākosiw nāntaw ot isihcikēwinihk.

⁹ kiyām māka ana ociwāmimāw kā tapatēyitākosit kita mamahtākosiw ē kistēyitākosit;

¹⁰ ēkosi ana kā wēyotisit anima ē tapatēyitākohiht; cikēmā tāpiskoc wāpikwaniya maskosihk ēkosi kē isi poni itāt.

¹¹ cikēmā pisim ispimihk ē ati itāt asici ē kisatāmotēk ē yotihk ati nipowi ayāw maskosi; ēkosi ē wāpikwaniwahk pakihtin mina ē isi katawasisik nisiwanātan; ēkosi isi mina kā wēyotisit nāpēw kē isi ati poni itāt ot isihcikēwinihk.

¹² sawēyitākosiw ana ayisiyiniw kā sipēyitahk kotēyimikowin; cikēmā ispi ki kotēyimihci kita miyāw pimātisiwini kihci okimāwastotin, kā tipēyihcikēt kā ki asotamawāt anihi kā sākihikot.

¹³ ēkāwiya awiya ayisiyiniw ispi ē kotēyimiht kita itwēw kisēmanito ni kotēyimik; cikēmā namawiya kisēmanito kita ki kotēyimiwēt maci kikwaya wiya ohci, ēkosi wiya namawikāc awiya kotēyimēw;

¹⁴ māka kahkiyaw ayisiyiniw kotēyimikowisiw kispin wiya o maci mostawēyitamowin ē wēpiikot ēkosi ē sihkiwiyikot.

¹⁵ ēkwa māka maci mostawēyitamowin kispin ē kikiskamomakahk nihtāwikitāmakan macitiwin; anima māka macitiwin ē kisinitāwikihk nihtāwikitāmakan nipowin.

¹⁶ ēkāwiya ki ka wi wayēsiikawināwāw kā sākihitakok niciwāmitik.

¹⁷ kahkiyaw miyo mēkiwin mina ē mamitonicikātēk mēkiwin ispimihk ohcipayiw ē pē yāsitisaahk ana kā otāwiskahk wāstēwa, ana ēkā kā kikiskākot pitos isi ayāwin ahpo ē cikāstētihk kwēskiwin.

¹⁸ wiya ot itēyitamowin ohci ki ki nihtāwikiikonaw tāpwēwini itwēwin ohci kiyānaw kita isi ayāyahk tāpiskoc nistam ē minisiwiyit osihcikana.

¹⁹ oma ki kiskēyitēnāwāw kā sākihitakok niciwāmitik. māka kiyām kahkiyaw ayisiyiniw kita kisiskāyēyitam kita natohtahk, kita pēkikātisiw kita pikiskwēt, kita pēkikātisiw kita kisiwāsit;

²⁰ cikēmā o kisiwāsiwin ayisiyiniw namawiya atoskātamomakaniyiw o kwayaskitātisiwin kisēmanito.

²¹ ēkosi māka ohpimē ē astāyēk kahkiyaw kā winēyitākwahk mina kā ayiwākēyitākwahk macitiwin, otinamok yoskātisiwinihk anima kā nihtāwikihk itwēwin anima kē ki pimāciikoyēk kit ahcāhkowāhk.

²² māka itotamok itwēwin ēkāwiya piko natohtamok ē wayēsihisoyēk.

²³ cikēmā kispin awiyak natohtahki itwēwin ēkā māka itotahki isinākocikēw tāpiskoc ayisiyiniw ē kanawāpamisot okwākanihk wāpamonihk;

²⁴ cikēmā kanowāpamiso ēkosi sipwētēw sēmāk wanikiskisiw tānisi kā isinākosit.

²⁵ māka ana kā kanawāpahtahk kā mamitonimakahk oyasowēwin, anima tipēyimisowi oyasowēwin, ēkosi māka isi pimitisahaki ēwako kā natohtahki ēkā kā wanikiskisit māka ē itotahk atoskēwinihk, ēwako awa ayisiyiniw kita miywakimāw ot itotamowinihk.

²⁶ kispin awiyak ayisiyiniw nit ayamihāwātisin itēyitaki ēkosi ēkā ē kitēyitahk otēyani māka ē kayēsitāt otēh awa ayisiyiniw ot ayamihāwin pikonata itēyitākwaniyiw.

²⁷ ē pēkahk ayamihāwin mina ēkā ē wiyipitāhk ē isi kitāpatahk ki kisēmanitominaw mina kotāwinaw ēwakoma, kita kiokāhcik kā kiwātisicik mina sikāwiskwēwak ot ayimisiwiniwāhk mina kita kanawēyimisohk ēkā kita wiyipiiwēk aski.