hāpākak 1 - Kanāci Kihci Masinahikan

¹ tēpwātikowin hāpākak okiskiwēhikēw kā ki wāpahtahk.

² tēpēyihcikēyan, tāniyikohk kinwēs kē mātoyān, ēkā māka ē wi natohtawiyan? macitotātowinihk kohci mawimostātin, ēkosi namawiya ki wi pimācihiwān.

³ tānēhki kā wāpahtahiyan maciitiwin, mina kā kanawāpahtaman kā nayētāwahk? cikēmā nisiwanāciitowin mina maskatwēwin notiskawiskākon; mina ihtakwan notinitowin mina kihkātowin pasikomakan.

⁴ ēwako ohci ēkā kā sāpahk oyasowēwin, mina oyasowāsiwēwin namawikāc sipwēpayiw; cikēmā kā macāyiwit wāskāskawēw kā kwayaskitātisiyit; ēwako māka ohci maci oyasowāsiwēwin kā ihtakwahk.

⁵ kitāpatamok mēkwāc nanātokoskānēsināhk, mina nākatēyitamok, mina mistahi māmaskātamok; cikēmā ni ka atoskātēn atoskēwin mēkwāc ē pimātisiyēk, anima ēkā kita tāpwētamēk āta wihtamākawiyēk.

⁶ cikēmā, mātika, ni ka pasikonāwak kāltiyanak, aniki kā āhkwātisicik mina kā kakēyipiwisicik ayisiyiniwak; kā natopayicik ē ispitayakaskāk aski, kita ayācik ihtāwina ēkā kā tipiyawēwisicik.

⁷ āyimisiwak mina kostātēyitākosiwak; oyasowēwiniwāw mina o kistēyitākosiwiniwāw wiyawāw kēhciwāk ohtinamāsowak.

⁸ o mistatimomiwāwa mina awasimē kisipatāyiwa iyikohk misipisiwak, mina awasimē āhkwātisiyiwa iyikohk otākosi maikanak; ēkosi otēhtapiwak misitēpayiwak; ēhē, kā tēhtapiyit wāyaw pē ohcipayiyiwa; pimiyāyiwa tāpiskoc mikisiw kā āsikēyimot kita micisot.

⁹ kahkiyaw pē itohtēwak ēkā kita manācihiwēcik; āsikiskwēyiwak tāpiskoc ē wāpaniyotihk; mina māwasakonēwak awakāna tāpiskoc yēkaw.

¹⁰ ēhē, māyēyimēw kihci okimāwa, mina kā okimākatamiyit pāhpiēw; pāhpitāw kahkiyaw sokāyawikamikwa; cikēmā wistikēstāw asiski ēkosi otinam.

¹¹ ēkwa kita pimipayiw tāpiskoc ē pimiyotihk, ēkosi kita pimipayiw mina kita māyitotam; ana oti o maskawisiwin kā o manitomit.

¹² nama ci kiya kākikē kohcin, kā tipēyihcikēyan, ni kisēmanitom, nokanātisim? namawiya ni ka nipinān. kā tipēyihcikēyan, ki ki oyakimāw oyasowāsiwēwin ohci; mina kiya kistāpisk, ki ki āyātayāw kakēskimohikowin ohci.

¹³ kiya osām kā pēkahki kiskisikwa kita kanawāpahtaman kā māyātahk, mina ēkā kā ki kanawāpahtaman māyitotamowin, tānēhki kā kanawāpamacik aniki kā kakayēyisiwi isihcikēcik, mina ēkā nāntaw kā itwēyan kā macāyiwit ē kitamwāt anihi ayisiyiniwa awasimē kā kwayaskitātisiyit iyikohk wiya;

¹⁴ ēkosi tāpiskoc kinosēwak kihcikamihk kā ayācik ē isiacik ayisiyiniwak, tāpiskoc anihi kā waskawimakahki, ēkā awiya kā tipēyimikocik?

¹⁵ kwāskwēpicikanihk ohci otinēw kahkiyaw ēwakoni, otawāyiwa ot ayapihk, mina māwasakopitēw ē ocipitāt ot ayapiya; ēwako ohci miyawātam mina mamahtākosiw.

¹⁶ ēwako ohci macostēamawēw ot ayapiya, mina wikimāsamawēw ocipicikanayapiya; cikēmā ēwakoni ohci wiyinowaniyiw o miyikowin, mina o miciwin wēyotaniyiw.

¹⁷ ēkosi ci māka kē isi mēstināt ot ayapiya, ēkosi ēkā kita manā nipahācik nanātokoskān ayisiyiniwa tahkinē?