ēstar 1 - Kanāci Kihci Masinahikan

¹ ki ayispayiw māka mēkwāc ēhāsyoiras kā tipēyihtahk (ēwako awa ēhāsyoiras kā ki kihci okimāwit, intiya ohci ihtiyāpiya isko, ē tipēyihtahk mitātahtomitanaw ayiwāk nisitanaw tēpakosāp ē papēskitakitēk aski);

² ēwakānima ē kakisikāk, kihci okimāw ēhāsyoiras ē apit kihci okimāwapiwinihk o kihci okimāwiwinihk, ēkota sosān kihci okimāwikamikohk,

³ nisto aski ati ē kihciokimawit, ki wihkomēw kahkiyaw okimāma mina ot atoskēyākana; kā sokēyitākosicik parsiyaihk mina mitiyaihk, kā kistēyitākosicik mina kā okimākatakik ē papēskitakitēk aski, ē wāpamāt;

⁴ ēkospi ki nokotāw ēsi wēyotaniyik o kihcitipēyihcikēwin, mina ē isi kistēyitākwaniyik o kihci okimāwiwin mihcētokisikāw, mitātahtomitanaw ayinānēmitanaw ayiwāk tahto kisikāw.

⁵ ispi māka ēwakonii kisikāwa ē tipipayiki, kihci okimāw ki wihkomēw kahkiyaw ayisiyiniwa kā ayāyit ēkota sosānihk kihci okimāwikamikohk, kā kihcēyitākosiyik mina kā apistēyitākosiyit, tēpakop kisikāw, pihci wāskāhikawinihk kistikānihk kihci okimāwikamikohk;

⁶ ki ayakotēw wāpiskēkin mina askitakwēkin, mina cipētakwēkin, kā miywāsik wāpiskēkin mina cipētakwēkin ē pimastēikātēk ēwako ē ohci sakapitēk wāpiskisoniyāwi sāpotawēyāpiskohk mina maskawasiniwi cimacikanihk; apiwina ki osāwisoniyāwanwa mina wāpiskisoniyāw, anāskanihk ē mihkosit, mina ē wāpiskisit, mina ē osāwisit, mina ē kaskitēsit maskawasini.

⁷ ki minaēwak māka osāwisoniyāwi minikwākanihk (anihi minikwākana ē papitosinākwaki), ēkosi kihci okimāwi somināpo misakamik, ē isi wēyocihtāt kihci okimāw.

⁸ ki minikwāniwan māka ē itastēk oyasowēwin; namawiya awiyak ayisāc; cikēmā ēkosi kihci okimāw kā itasowātāt kahkiyaw kā pamihiwēyit o wāskahikanihk, kita itotahkik kahkiyaw awiya ē isi natawēyitamiyit.

⁹ ēkosi mina pāstay kihci okimāskwēw ki wihkomēw iskwēwa kihci okimāwikamikohk kā ayāyit kihci okimāwa ēhāsyoiras.

¹⁰ tēpakop ē ati tahtokisikāk, ē miyawātikotēhēt kihci okimāw somināpo ohci, ki itasowātēw mihamān, pista, hārpāna, pikta, mina āpākta, sihtār, mina kārkās, anihi tēpakop nipēwinikamikowiyiniwa kā pamihikot ēhāsyoiras kihci okimāw,

¹¹ kita pēsiwāyit pāstay kihci okimāskwēwa ohtiskaw kihci okimāwa, ē kikiskamiyit kihci okimāskwēwastotin, kita wāpahtaāt ayisiyiniwa mina okimāwa ē isi katawasisiyit; cikēmā ki miyonākosiw.

¹² māka kihci okimāskwēw pāstay ki ānwētam kita pē itohtēt kihci okimāwa ē natomikot anihi nipēwinikamikowiyiniwa ohci; ēwako ohci ki mistahi kisiwāsiw kihci okimāw, mina o kisiwāsiwin ki pasiyawēskāk.

¹³ ēkwa kihci okimāw ki itēw kā iyinisiyit ayisiyiniwa, kā kiskēyitamiyit ē āyispayiyik (cikēmā ēkosi kihci okimāw kā ayitotawāt kahkiyaw kā kiskēyitamiyit oyasowēwin mina oyasowāsiwēwin;

¹⁴ anihi māka kā askowiskākot ēwakoni kārsina, sihtār, ātmāhta, tārsis, miris, mārsina, mina mēmyokan, tēpakop okimāwak parsiya mina mitiya ohci, kā kanawāpamācik kihci okimāwa, mina kā nistamapicik kihci okimāwiwinihk;)

¹⁵ tānisi kē totawāyahk kihci okimāskwēw pāstay ē itastēk oyasowēwin, anima ēkā ē ki ohci itotahk kā itasowātikot kihci okimāwa ēhāsyoirasa anihi nipēwinikamikowiyiniwa ohci?

¹⁶ mēmyokan māka ki naskwēwasimēw kihci okimāwa mina okimāwa, pāstay kihci okimāskwēw namawiya piko kihci okimāwa kā wanitotawāt, māka kahkiyaw okimāwa, mina kahkiyaw ayisiyiniwa kā ayāyit kahkiyaw ē isi papēskitakitēyik ot aski kihci okimāw ēhāsyoiras.

¹⁷ cikēmā oma ot itotamowin kihci okimāskwēw kita ācimostawāwak kahkiyaw iskwēwak, kita piwēyimācik o nāpēmiwāwa, ispi ātotakwaki, kihci okimāw ēhāsyoiras ki itasowēw kihci okimāskwēwa pāstaya kita pē pihtokahimiht kita wāpamāt, māka namawiya pē itohtēyiwa.

¹⁸ ēkosi anohc kā kisikāk okimāskwēwak parsiya mina mitiya kā ki pēhtahkik kā itotamiyit kihci okimāskwēwa ēkosi kē itācik kahkiyaw kihci okimāwa okimāmiyiwa, ēkosi māka kē isi pasikomakahk mistahi māyēyihcikēwin mina kisiwāsiwin.

¹⁹ kispin nahēyitaki kihci okimāw, kiyām kihci okimāwi oyasowēwin kita sipwētisaham, mina kiyām kita masinahikātēw, oyasowēwiniwāhk parsiyanak mina mitak, ēkā kita āhtastāhk, ēkā mina wikāc pāstay kita pitokawāt kihci okimāwa ēhāsyoirasa; kiyām māka kihci okimāw kita miyēw o kihci okimāskwēwiwiniyiw kotaka nawac ē miywātisiyit iyikohk wiya.

²⁰ ispi māka anima kihci okimāw oyasowēwin kē osihtāt misiwē itē isitisaikātēki o kihci okimāwiwinihk (cikēmā misāyiw), kahkiyaw iskwēwak kita kistēyimēwak o nāpēmiwāwa, kā kihcēyitākosicik mina kā apistēyitākosicik.

²¹ ki nahimāwak māka kihciokimaw mina okimāwak; ēkosi kihci okimāw ki itotam kā ki itwēyit mēmyokana;

²² ki isitisaham māka masinahamātowina misiwē kihciokimaw ē papēskitakitēyik ot aski, kahkiyaw ē papēskitakitēk aski ē isi masinahikēhk, mina kahkiyaw ayisiyiniw ē isi o pikiskwēwinēt, kahkiyaw nāpēw kita tipēyihtahk wiya o wāskāhikwan, mina kita wihcikātēk kā ayisikiswēyit kahkiyaw ot ayisiyinima.