ēmās 1 - Kanāci Kihci Masinahikan

¹ ot itwēwina ēmās, ana kā ki wicēwāt okanawipisiskiwēwa tikāa ohci, kā ki wāpahtahk isrēila ohci mēkwāc ē ayāt asāya cota kihci okimāw, mina mēkwāc ē ayāt cērapoam okosisa coās isrēil kihci okimāw, niso aski mwayēs kikwahk.

² ki itwēw māka, kā tipēyihcikēt sāyanihk kita ohci pēhtākosiw, mina cērosalamihk kita ohci tēpwēw; ēkosi kā mamiywaskāyik okanawimāyatihkwēwak kita mātomakanwa mina tahkotāmatin kārmil kita nipomakan.

³ omisi itwēw kā tipēyihcikēt; nisto o wanitotamowina tamāskas ohci, ēhē, nēw ohci, namawiya ni ka ikatēnamawāwak o kakēskimohikowiniwāw; cikēmā ki pawawēwak kiliyata ē āpacihtācik piwāpisko pawaikākana;

⁴ māka ni ka isitisaēn iskotēw o wāskāhikanihk hēsēil, ēkosi kita mēstikasamomakan o kihci okimāwikamikwa pēnhētāt.

⁵ ni ka pikonamwān māka ot ātāskoikan tamāskas, mina ni ka kiskiwēpawāw kā ot ihtāwinit ēpin wayatināhk, mina ana kā miciminahk tipēyicikākan o wāskāhikanihk itin ohci; ēkosi siriya ayisiyiniwak kita itohtēwak awakātikowinihk anita kar, itwēw kā tipēyihcikēt.

⁶ omisi itwēw kā tipēyihcikēt; nisto o wanitotamowina kēsa ohci, ēhē, nēw ohci, namawiya ni ka ikatēnamwān o kakēskimohikowin; cikēmā ki sipwēhtahēwak ē awakātācik māmawi ayisiyiniwa, kita pakitinamawācik itama;

⁷ māka iskotēw ni ka isitisaēn kēsa mēniskikēwinihk ēkosi kita mēstikasamomakan kihci okimāwikamikwa ēkota;

⁸ ni ka kiskiwēpawāw māka kā ot ihtāwinit āstātihk, mina ana kā miciminahk tipēyicikākan āskilan ohci; ni ka kwēskicihcēyistēn māka ēkaran, ēkosi kā iskoihcik pilistinak kita nisiwanātisiwak, itwēw kā tipēyihcikēt kisēmanito.

⁹ omisi itwēw kā tipēyihcikēt; nisto o wanitotamowina tāyar ohci, ēhē, nēw ohci, namawiya ni ka ikatēnamwān o kakēskimohikowin; cikēmā ki pakitinamawēwak itama māmaw ayisiyiniwa, mina namawiya ki kiskisitotamwak ociwāmitowi wicihisicikēmitowin;

¹⁰ māka ni ka isitisaēn iskotēw tāyar mēniskikēwinihk, ēkosi kita mēstikasamomakan kihci okimāwikamikwa ēkota.

¹¹ omisi itwēw kā tipēyihcikēt; nisto o wanitotamowina itam ohci, ēhē, nēw ohci, namawiya ni ka ikatēnamwān o kakēskimohikowin; cikēmā ki nawaswātēw ociwāma isawēsk ohci ēkosi ki wēpinam kahkiyaw sawitēhēwin, mina o kisiwāsiwin tahkinē ē yāyikipicikēmakaniyik, ēkosi ē ki kanawēyitahk o nayētāwēyitamowin kākikē;

¹² māka iskotēw ni ka isitisahamawāw timan, mina kita mēstikasamomakan pāsara kihci okimāwikamikwa.

¹³ omisi itwēw kā tipēyihcikēt; nisto o wanitotamowiniwāwa āman ot awāsimisa ohci, ēhē, nēw ohci, namawiya ni ka ikatēnamwān o kakēskimohikowin; cikēmā ē ki tātosāwātācik iskwēwa kā kikosēyit ēkota kiliyat, kita isi yakitācik ot askiwāw;

¹⁴ māka ni ka kwākotēnēn iskotēw rāpa mēniskikēwinihk, ēkosi kita mēstikasamomakan kihci okimāwikamikwa ēkota, kiki ē sākowēhk notinitowikisikāki, kiki ē kistihk pisicosiwi kisikāki;

¹⁵ o kihci okimāmiwāwa māka kita itohtēyiwa awakātikowinihk, wiya mina okimāma asici, itwēw kā tipēyihcikēt.