ēksatas 1 - Kanāci Kihci Masinahikan

¹ ēwakoni ohi o wiyowiniwāwa okosisa isrēil, aniki iciptihk kā ki takosihkik; kahkiyaw oki nāpēwak mina wikiwāhk kā ayāyit ki pē wicēwēwak cēkapa.

² ropin, simiyan, lipay, mina cota;

³ isākar, sēpyolan, mina pēnciman;

⁴ tān mina nāptalay, kāt mina āsar.

⁵ kahkiyaw māka ahcāhkwak cēkap wiyawihk kā ki ohciyit tēpakohpomitanaw ki ihtasiwak; cosip māka wiya sāsay iciptihk ki ayāw.

⁶ ēkosi cosip ki poni pimātisiw, mina kahkiyaw ociwāma, mina kahkiyaw ēwakonik kā wicihispitisimitocik.

⁷ aniki māka isrēil ot awāsimisa ki nihtāwikiwak, mina ākwāskam ki ati mihcētiwak, mina ē ki ati osāmēyaticik, mina ākwāskam ki ati sokēyitākosiwak; ki tēpiskamātowak māka aski.

⁸ oski kihci okimāw māka ēkwa ki tipēyihtam icipt, ēkā ē kiskēyimāt cosipa.

⁹ omisi māka ki itēw ot iyinima, mātika, aniki ayisiyiniwa isrēil ot awāsimisa, awasimē mihcētiwak, mina ayiwāk sokēyitākosiwak iyikohk kiyānaw.

¹⁰ haw māhti iyinisikatawātānik; ēkā awasimē kita ati mihcēticik, ēkosi nāntaw ayikihki, natopayiwin ispayiki, kita wiciēwak ki notinākaninawa, mina kita notinikoyakok, ēkosi kita nakatahkik oma aski.

¹¹ ēwako ohci māka ki oyakitamawēwak otatoskēiwēwa kita kotakihikoyit nayacikēwin ohci. ki osihtamawēwak māka pērowa astāsowini otēnawa, paitam mina rēāmsis.

¹² māka awasimē ē ati kotakoācik awasimē ki ati mihcētiyiwa mina ki yahkiayāyiwa. ki mihciyawēsiwak māka isrēil ot awāsimisā ohci.

¹³ aniki māka icipt ayisiyiniwak ki kotaki atoskaēwak isrēil ot awāsimisa.

¹⁴ ki ākotāwēwak māka o pimātisiwiniyiw ē sohkatoskahācik, kaskāpatoniskahikana, mina pasakwāpisk, mina nanātohk isi atoskēwin kistikānihk; kahkiyaw anima kā isi atoskawācik ki kotaki atoskaēwak.

¹⁵ icipt kihci okimāw māka ki kitotēw hiparowi okanawēyimiwēwa, pēyak ana sipra ki isiyihkāso, ēkosi ana kotak piwa.

¹⁶ ki itēw māka, ispi ētotamēko atoskēwin ē kanawēyi māyēkok hiparowi iskwēwak, mina wiyāpamāyēkwāwi nihtāwikiāwasotwāwi, kispin niyāpēwici ēkosi kē nipahāyēk; māka kispin iskwēwici ki ka pimācihāwāw.

¹⁷ māka aniki okanawēyimiwēwak ki kostēwak kisēmanitowa mina namawiya ki itotamwak kā itasowātikocik kihci okimāwa, māka ki pimācihēwak anihi ē nāpēwiyit awāsisa.

¹⁸ ana māka icipt kihci okimāw ki natomēw anihi okanawēyimiwēwa omisi ē ki itāt, tānēhki oma kā ki itotamēk, ē ki pimācihāyēkok kā nāpēwicik awāsisak?

¹⁹ aniki māka okanawēyimiwēwak omisi ki itēwak pērowa, cikēmā hiparowi iskwēwak namawiya ihtiwak tāpiskoc icipt iskwēwak kā ihticik, māka kakāyawisiwak, mina nihtāwikihāwasowak mwayēs pihtokēyit okanawēyimiwēwa.

²⁰ ēwako māka ohci kisēmanito ki mamiyo ayitotawēw okanawēyimiwēwa; aniki māka ayisiyiniwak ki ati mihcētiwak mina ātoskēm nāspic ki ati sokēyitākosiwak.

²¹ ki ayikin māka, cikēmā aniki okanawēyimiwēwak ē kosikwēyimācik kisēmanitowa, ki owikikēmowinikawēw.

²² pēro māka ki ayākwāmimēw kahkiyaw ot ayisiyinima, omisi ē itwēt, tahto nāpēsis kē nihtāwikit ki ka pakastawēwēpināwāw sipihk, kahkiyaw māka wiya ē iskwēsisiwicik ki ka pimācihāwāwak.