ᐃᑭᓬᐃᓯᔮᐢᑎᐢ 1 - Kanāci Kihci Masinahikan

¹ ot itwēwina okakēskimiwēw, okosisa tēpit, kihci okimāw cērosalamihk.

² pikonata tāpwē pikonata, itwēw okakēskimiwēw; pikonata tāpwē pikonata, kahkiyaw pikonata.

³ kēkway wēhtisit ayisiyiniw kahkiyaw ot atoskēwin kā atoskātahk sipā pisimohk?

⁴ pēyakwayak otāyāniskēpimātisak sipwētēwak, mina kotakak otāyāniskēpimātisak takosinwak; māka aski kākikē ihtakwan.

⁵ pisim mina sākotēw, ēkosi pahkisimo mina kiyipa ispayiw itē kā ohci sākāstēk.

⁶ ohtin sāwanotāhk ispayiw, ēkosi kwēskiyowēw kiwētinotāhk isi; tahkinē kākwēskitin, ēkosi kāwi mina takotēw ohtin itē kā isi wāskātēk.

⁷ kahkiyaw sipiya kihcikamihk isiciwanwa, ēyiwēhk kihcikami namawiya moskinēw; ita sipiya kā ki ohcipayiki kāwi mina ēkotē ispayiwa.

⁸ kahkiyaw kēkway ayiskoiwēw; ayisiyiniw namawiya kita ki wihtam; miskisik namawiya tēpi wāpahtamomakan, mina mihtawakay namawiya tēpi pēhtamomakan.

⁹ kā ki pē ikihk ēwakwānima kē ikihk; mina anima kā ki itocikātēk ēwakwānima kē itocikātēk; namatakwan māka oski kēkway sipāpisimohk.

¹⁰ ihtakwan ci kēkway kita ki ohci itwēcik ayisiyiniwak, mātika, ēwakoma oski kēkway? kayahtē sāsay ki ayāw, kā ki pē askiwahk mwayēs ayāyahk.

¹¹ namawiya kanokiskisināniwan kayahtē kā ki ayāki; namawiya mina kita kanokiskisināniwan mwēstas ati anihi kē ati ayāki, nētē nikān ati āyātwāwi.

¹² niya okakēskimiwēw ni ki kihci okimākatawāwak isrēil cērosalamihk.

¹³ ēkosi ni ki itastān nitēh kita natonamān mina kita kakwē kiskēyitamān iyinisiwin ohci kahkiyaw kā itocikātēk sipā kisikohk; mistahi āyimisiwin kisēmanito kā ki miyāt ayisiyiniwikosisāna kita atoskēikocik.

¹⁴ ni ki wāpahtēn kahkiyaw atoskēwina kā itocikātēki sipā pisimohk; ēkosi poti kahkiyaw pikonata mina ē pimitisahamihk yotin.

¹⁵ anima kā wākāk namawiya kita ki kwayaskotāniwan; mina anima kā nohtēpayik namawiya kita ki akihcikātēk.

¹⁶ ni ki māmitonēyitēn nitēhihk, ē itwēyān, mātika, mistahi ni ki kāhcitinēn iyinisiwin iyikohk kahkiyaw kā ki nikānotawicik cērosalamihk; ēhē, nitēh mistahi ki kotēyitamomakan iyinisiwin mina nisitohtamowin.

¹⁷ ni ki itastān māka nitēh kita kiskēyitamān iyinisiwin mina kita kiskēyitamān kiskwēwin mina kakēpātisiwin; ni nisitawinēn māka oma mina ē pimitisahamahk yotin.

¹⁸ cikēmā ē misāk iyinisiwin misāw pikwēyitamowin; mina ana kā yakitāt kiskēyitamowin yakitāw mikoskātēyitamowin.