ᑎᔪᑕᕒᐊᓇᒥ 1 - Kanāci Kihci Masinahikan

¹ ēwakoni ohi itwēwina mosis kā ki witamawāt kahkiyaw isrēil akāmihk cārtan pikwataskihk anita ārapa tipiskoc sahp, tastawāyihk pērān, mina tāhpil, mina lēpān, mina hāsarāht, mina tisahāp.

² mitātaht pēyakosāp tahto kisikwēyāw ē pimohtēohk hārip ohci siyar wacihk kā itamok mēskanaw isko kētis pārniya.

³ ki ayikin māka nēmitanaw ē tahto askiwahk, mitātaht pēyakosāp pisim, ē mātakimiht pisim, mosis ki ayamihēw isrēil ot awāsimisa, ē itastēyik kahkiyaw kā tipēyihcikēt kā ki itasowātikot kita wihtamawat;

⁴ mwēstas iyikohk ē ki nipahāt anihi sihān, āmaraitak o kihci okimāmiwāwa, kā ki ot ihtāwinit hēspanihk, mina āk, pēsān kihci okimāw, kā ki ot ihtāwinit astērot, anita ētariay:

⁵ akāmihk cārtan, moāp askihk, mosis ki māci wihtamawēw oma oyasowēwin, ē itwēt,

⁶ kā tipēyihcikēt ki kisēmanitominaw ki ki ayamiikonaw anita hārip, ē itwēt, ēkoyikohk kinwēs ki ki ayānāwāw ota wacihk.

⁷ kwēskik ēkwa mina sipwēpicik, mina itohtēk ita kā waciwaniyik ot askiwāw āmaraitak, mina misiwē kisiwak ēkota, anita ārapa, wacihk mina nitatin mina sāwanotāhk, mina ciki kihcikamihk, ot askiwāw kēnanaitak, mina lēpinan isko anima kihci sipi, yoparētis sipi.

⁸ mātika, ki ki otiskawastwātināwāw aski; natawi pihtokēk mina tipēyihtamok anima aski kā tipēyihcikēt kā ki kihciitāt kotāwiwāwa ēprēām, āisak, mina cēkap, kita miyāt mina o nihtāwikihākaniyiwa kē āniskēskamākoyit.

⁹ ēkosi ki ki ayamiitināwāw ēkospi ē itwēyān, namawiya ni kaskitān kita pēyako pimotahitakok.

¹⁰ kā tipēyihcikēt ki kisēmanitomiwāw ki ki mihcētoikowāw, ēkosi, mātika, anohc kā kisikāk kit isi ayānāwāw tāpiskoc acahkosak kisikohk ē isi mihcētiyēk.

¹¹ kā tipēyihcikēt o kisēmanitomiwāwa kotāwiwāwak kihcimitahtomitanawēwāw ki ka wi ayiwāk mihcētoikowāw kā itasiyēk, mina ki ka wi sawēyimikowāw, kā ki isi asotamākoyēk!

¹² tānisi wiya niya kē ki isi pēyako nayatamān kit ākwēpisiwiniwāw, mina ki nayacikaniwāw, mina ki nayētawēyitamowiniwāwa?

¹³ otinikok ē iyinisicik ayisiyiniwak, mina ē o nisitohtamowinicik, mina ē kiskēyitākosicik, ē āyitahtotēwisiyēk, ēkosi ni ka oyakimawak kita nikaniskamākoyēkok.

¹⁴ ēkosi ki ki naskwēwasimināwāw, mina ki ki itwānāwāw, anima kā ki itwēyan miywāsin kita itotamāhk.

¹⁵ ēkosi māka ni ki otināwāk kā nikānēyitākosicik ē itahtotēwisiyēk, ē iyinisicik ayisiyiniwak, mina ē kiskēyitākosicik, ni ki oyakimāwak māka kita tipēyimikoyēkok kita tipēyimācik kihcimitāhtomitanaw, mina kita tipēyimācik māmitāhtomitanaw, mina kita tipēyimācik nāniyānanomitanaw, mina kita tipēyimācik māmitātaht, mina okimāwak ē āitahtotēwisiyēk.

¹⁶ ēkosi ni ki ayākwāmimāwak koyasowēwiyinimiwāwak ēkospi, ē itwēyān, natohtākok ē itwēcik āyitaw kiciwāmiwāwak, ēkosi kwayāsk oyasowātihk ayisiyiniw mina ociwāma, mina anihi mānitēwa kā wiciayāmikot.

¹⁷ namawiya ki ka kosikwēyimāwāw ayisiyiniw ē oyasowēyēk; māka ki ka natohtawawāw kā apistēyitākosit mina kā kistēyitākosit tāpiskoc; namawiya ki ka kostawāw ayisiyiniw ē isi kanawāpamikoyēk; cikēmā oyasowāsiwēwin wiya kisēmanito ayāw; ēkosi anima kiyawāw osam āyiman kā itēyitamēk ki ka pētamawināwāw ēkosi niya ni ka pēhtēn.

¹⁸ ēkosi ki ki itasowātitināwāw ēkospi kahkiyaw anihi kē itotamēk.

¹⁹ ki ki sipwēpicinānaw māka hārip ohci, ēkosi sāpo ki ki pimotānānaw anima kā misāk mina kā kostātēyitākwahk pikwataski kā ki wāpahtamēk, ē ati itohtēyahk kā waciwaniyik ot askiwāw āmaraitak, kā tipēyihcikēt ki kisēmanitominaw kā ki itasowātikoyahk; ēkosi ki ki otitēnānaw kētis pārniya.

²⁰ ēkosi ki ki ititināwāw, kotihtēnāwāw kā waciwaniyik ot askiwāw āmaraitak, kā tipēyihcikēt ki kisēmanitominaw kā miyikoyahk.

²¹ mātika, kā tipēyihcikēt ki kisēmanitom ki ki ohtiskawastwāk aski; itohtē, natawi otina, kā ki itisk kā tipēyihcikēt o kisēmanitomiwāwa kotāwiyak; ēkāwiya sēkisi mina ēkāwiya sākwēyimo.

²² ēkosi kisiwāk ki ki pē nāsināwāw kahkiyaw ē itasiyēk, mina ki ki itwānāwāw, kiyām nikān isitisawātānik nāpēwak kita natawātācik aski kiyānaw ohci, ēkosi kāwi kita pē wihtamākoyakok tānitē kē ati itohtēyahk, mina otēnawa kē ati otitamahk.

²³ anima māka kā itwēyēk ni ki miywēyitēn, ēkosi ni ki otināwāk mitātaht nisosāp nāpēwak kiyawāw ohci, pēyak nāpēw pēyak piskitotēwisiwin ohci.

²⁴ ki kwēskiwak māka ēkosi ki ati āmaciwēwak waci, ki otihtamwak māka wāyāmatināw ēskal, mina ki natawātāwak.

²⁵ ki otinamwak māka ē isi minisiwaniyik aski ocihciwāhk ēkosi ē ki pētamākoyakok, mina ki itwēwak, miywāsin anima aski kā tipēyihcikēt ki kisēmanitominaw kā ki miyikoyahk.

²⁶ ēyiwēhk māka namawiya ki wi itohtānāwāw, māka ki ki ātawēyitamwānāwāw ot itasowēwin kā tipēyihcikēt ki kisēmanitomiwāw.

²⁷ ki ki ayotwēwētānāwāw māka kikiwahk, omisi ē itwēyēk, cikēmā kā tipēyihcikēt ē pakwātikoyahk, kā ki ohci pē sipwētaikoyahk icipt askihk, kita pakitinikoyahk ocihciyihk āmaraita kita nisiwanācihikowāyahk.

²⁸ tānitē oma kā wi itohtēyahk? kiciwāminawak ki sākotēhēikonawak, ē itwēcik, aniki ayisiyiniwak awasimē misikitiwak mina awasimē kinokāpawiwak iyikohk kiyānaw; otēnawa misāwa mina mēniskikatēwa kisikohk isi; ēkosi mina ni ki wāpamimānāna okosisiwāwa aniki ēnākim ēkota.

²⁹ ēkwa māka ki ki ititināwāw, ēkāwiya sākwēyimok mina ēkāwiya kostikok.

³⁰ kā tipēyihcikēt ki kisēmanitomiwāw kā nikānotākoyēk, ki ka notinikēstamākowāw, tāpiskoc kahkiyaw kā ki ayitotamākoyēk iciptihk ē wāpahtamēk;

³¹ mina pikwataskihk, ita kā ki wāpahtaman kā tipēyihcikēt ki kisēmanitom ē isi pimotaisk, tāpiskoc ayisiyiniw kā isi pimotaāt okosisa itē kā ki papā ayitotēyēk piyis ota ē otitamēk.

³² ēyiwēhk māka oma ohci namawiya ki ki tāpwētawāwāw kā tipēyihcikēt ki kisēmanitomiwāw;

³³ ana kā ki nikānotākoyēk itē ē itohtēyēk kita natonahk ita kita kapēsiyēk, iskotēw ohci ē tipiskāk, kita wāpahtahikoyēk itē kita itohtēyēk, mina wasko ohci ē kisikāk.

³⁴ kā tipēyihcikēt māka ki pētam kā ayitwēyēk, ēkosi ki kisiwāsiw, mina ki kihciitwēw, omisi ē itwēt,

³⁵ kēhcinā namawāc pēyak oki ayisiyiniwak kā macāyiwicik anohc kā pimātisicik kita wāpahtamwak anima miyo aski, kā ki kihciitwēyān kita miyakik kotāwiwāwak,

³⁶ piko kēlip okosisa cēpani, ēwako kita wāpahtam; mina ēwako ni ka miyaw anima aski kā ki tātakoskātahk. asici ot awāsimisa; cikēmā mitoni ē ki pimitisawāt kā tipēyihcikēyit.

³⁷ ēkosi kā tipēyihcikēt nista ni ki kisistāk kiyawāw ohci, ē itwēt, kista namawiya ēkotē ki ka itohtān;

³⁸ cāsyoa okosisa nan kā ohtiskawikāpawistāsk, ēwako kita pihtokēw ēkota; sihkiskaw ēwako; cikēmā ēwako kē tipēyihtamoāt isrēila anima aski.

³⁹ ēkosi mina koskawāsisimiwāwak kā ki itwēyēk kita manawakātihcik, mina kit awāsimisiwāwak anohc kā kisikāk ēkā kā kiskēyitahkik kā miywāsik mina kā māyātahk, ēwakonik ēkotē kita pihtokēwak, ēkosi ēwakonik ni ka miyāwak ēwakonik māka kita ayāwak.

⁴⁰ māka wiya kiyawāw, kwēskik, mina ispicik mihkwākamiwi winipēkohk isi.

⁴¹ ēkwa ki ki naskwēwasimināwāw mina ki ki itwānāwāw, ni ki wanitotawānān kā tipēyihcikēt, ni ka natawi notinikānān, ē itastēk kahkiyaw kā tipēyihcikēt ni kisēmanitominān kā ki itasowatikoyāhk. ki ki pakwatēhototēnāwāw māka kahkiyaw kā itasiyēk kit asowiniwāwa kā notinikākēyēk, ēkosi ki ki cikēyimonāwān kita āmaciwēyēk.

⁴² kā tipēyihcikēt māka ni ki itik, omisi ki ka itāwak, ēkāwiya āmaciwēk, mina ēkāwiya notinikēk; cikēmā namawiya ki wicēwitināwāw; ēkā kita nipahikoyēkok ki notinākaniwāwak.

⁴³ ēkosi ki ki wihtamātināwāw, māka namawiya ki ki natohtēnāwāw; ēkosi ki ki ātawēyitamwānāwāw ot itasowēwin kā tipēyihcikēt, mina ki ki ayiwēskēnāwāw, ēkosi ki ki itohtānāwāw wacihk.

⁴⁴ aniki māka āmaraitak, kā ki ot ihtāwinicik ēkota wacihk ki ki pē mawinēokowāwak mina ē ki nawaswātikoyēkok tāpiskoc āmowak kā totahkik, ēkosi ē ki nisiwanācihikoyēkok ēkota anima siyar piyis hārma isko.

⁴⁵ ki ki pē kiwānāwāw māka ēkosi ē ki mātoyēk ohtiskaw kā tipēyihcikēt; māka kā tipēyihcikēt namawiya wi natohtam kā itwēyēk, ahpo namawiya ki wi natohtākowāw.

⁴⁶ ēkosi māka mihcētokisikāw ki ki ayānāwāw anita kētis, ē ispayiki kisikāwa ēkota kā ki ayāyēk.