ᑲᓬᐋᓯᔭᓇ 1 - Kanāci Kihci Masinahikan

¹ pāl, ot apāstilima Christ cisas ot itēyitamowin ohci kisēmanito, mina timatī kiciwāminaw,

² ē masinahamawācik okanātisiwa mina kā ayākwāmisiyit ociwāmimāwa Christ isi kalāsi kā ayācik: kisēwātotākowin mina pēyatakēyimowin ki ka wi ocistamākowāw kisēmanito kotāwinaw.

³ ni nanāskomānān kisēmanito otāwiya kā tipēyimikoyahk cisas Christ, mosak ē ayamihēstamātāhk,

⁴ ē ki pētamāhk ē isi tāpwēyēyimāyēk Christ cisas, mina ē isi sākihāyēkwāw kahkiyaw okanātisiwak,

⁵ anima ē itatēyitamēk kā kwayātastamākawiyēk kihci kisikohk, kā ki pēhtamēk kayatē ē tāpwēmakahk itwēwin miywācimowinihk,

⁶ kiyawāw kā otihtikoyēk; kā isi otihtikocik misiwēskamik ē minisiwāhk mina ē yakiomakahk, tāpiskoc kā ikihk kiyawāw mina, aspin anima ē kisikāk kā ki pēhtamēk mina kā kiskēyitamēk tāpwē o kisēwātisiwin kisēmanito;

⁷ tāpiskoc kā ki isi kiskēyitamoikoyēk ēpaprās kā sākihāyāhk ni wici atoskēmākaninān, kiyānaw māka wiya ohci ē ayākwāmisiyit Christ opamistākēma,

⁸ kā ki mina wihtamākoyāhk ki sākihiwēwiniwāw ahcāhkohk.

⁹ ēwako oma māka ohci niyanān mina, aspin anima ē kisikāk kā ki pētamāhk, namawiya ni ponitānān ē ayamihēstamātāhk mina natotēstamātāhk, kita moskinēskākoyēk ē kiskēyitamwāyēk ot itēyitamowin misiwē ahcāhkowi iyinisiwinihk mina nisitohtamowinihk,

¹⁰ ē isi pimohtēyēk kita tēpakēyitākosistawāyēk kā tipēyihcikēt misiwē isi ē nahiyawēāyēk, kita minisiwiyēk kahkiyaw miyo atoskēwinihk, mina ē yahki kiskēyimāyēk kisēmanito;

¹¹ kita maskawisiskākoyēk kahkiyaw kaskihēwisiwin, ē isi sokāyawaniyik o kistēyitākosiwin, misiwē sipiyawēsiwinihk mina sipēyitamowinihk kiki mamahtākosiwinihk;

¹² ē nanāskomāyēk wēyotāwihk, kā ki isiikoyahk kita wici tipēyitamomāyakok okanātisiwak wāstēhk;

¹³ kā ki paspiikoyahk ē maskawi miciminikoyahk wanitipiskāw, ēkosi ē ki ahcipakitinikoyahk ot otēnawiwiniyihk okosisa kā sākihāt;

¹⁴ ana kā ohci ayāyahk ki pimāciikowininaw, ē ponēyitamākawiyahk ki maciitiwininawa:

¹⁵ ana kā ayāt ot isinākosiwiniyiw ēkā kā nokosiyit kisēmanitowa, kā nistam nihtāwikit kahkiyaw osihcikan;

¹⁶ cikēmā wiya ohci kahkiyaw kēkway ki osicikātēw, anihi kisikohk kā ayāki mina waskitaskamik kā ayāki, anihi kā nokwaki mina ēkā kā nokwaki, kispin kihci okimāwapiwina ahpo tipēyihcikēwina ahpo okimāwiwina ahpo kaskihēwisiwina; kahkiyaw kēkway wiya ohci ki osicikātēwa, mina wiya isi;

¹⁷ ēkosi wiya nikāniskam kahkiyaw kēkwaya, mina wiya kā ohci ihtakwaniyiki.

¹⁸ wiya māka kā ostikwāniskahk miyaw, ayamihēwikamik oti: ana micimāc ohci kā ayāt, kā nistami nihtāwikit nipowinihk ohci; misiwē isi kita ayiwākēyitākosit.

¹⁹ cikēmā ki miyo itēyitam wēyotāwihk kahkiyaw māmawēyitākosiwin kita kikiskākoyit;

²⁰ ēkosi ēwakoni ohci kita wicēwākanitahk kahkiyaw kēkwaya, ē ki ositāyit witaskitowin o mihko ohci pimitāskoikanihk; ēwakoni ohci, nit itwān, kispin anihi askihk kā ayāki, ahpo anihi kisikohk kā ayāki.

²¹ kiyawāw māka, ē ki pē pitosisiyēk mina ē ki pakwātāyēk ki mitonēyicikaniwāhk ki maci isihcikēwiniwāhk, ēyiwēhk ēkwa ki wicēwākanitaikowāw

²² wiyawihk o wiyāsihk nipowin ohci, kanātisiwinihk mina mamitoniwinihk mina ēkā ē ānwēyitākosiyēk kita otiskaw ayikawiyēk:

²³ kispin tahki tāpwēyēyitamowinihk kit ayānāwāw, ē āyāci ayāyēk mina ē maskawi ayāyēk, ēkā ohpimē ē itotaikawiyēk, ē isi aspēyimoiwēk miyācimowin kā ki pēhtamēk, kā ki wihtamāht kahkiyaw awiyak kā ki osiiht sipā kisikohk; ēwako niya pāl opamistākēw kā ki ohci isiikawiyān.

²⁴ ēkwa māka ni mamahtākosin ni kotakitāwinihk kiyawāw ohci, ēkosi ni tipaskinatān niya anihi kā notēpayiki o kotakitāwina ni wiyāsihk wiyaw ohci, ēwako ayamihēwikamik;

²⁵ ita opamistākēw kā itayikawiyān, ē itastēyik o paminikēiwēwin kisēmanito kā ki miyikawiyān kiyawāw ohci, kita tipipayitāyān kisēmanito ot itwēwin,

²⁶ anima oti kā mamātāwahk ēkā kā ki nokwahk ē pē askiwahk mina ē pē āyāniskē pimātisihk: māka ēkwa kā ki nokotwāmiht okanātisima,

²⁷ anihi kisēmanito kā ki isi miywēyitahk kita kiskēyitamoāt ē isi wēyotahk ē kistēyitākwahk oma kā mamātāwahk mēkwāc cēntailinahk, ēwako Christ ē kikiskākoyēk, ē itatēyitamāsohk kistēyitākosiwin:

²⁸ ana kā ācimāyāhk, ē sikimāyāhk mina ē kiskinohamawāyāhk kahkiyaw ayisiyiniw misiwē iyinisiwinihk, kita ki pakitināyāhk kahkiyaw ayisiyiniw ē mamitonit Christ isi;

²⁹ ēkotē māka nista kā isi atoskēyān, ē wikoyān ot atoskēiwēwinihk, kā maskawi atoskēikoyān.