coil 1 - Kanāci Kihci Masinahikan

¹ ot itwēwin kā tipēyihcikēt kā ki otihtikot coil okosisa pētyoil.

² natohtamok oma, kiyawāw kisēiyinitik, mina pisicitamok kahkiyaw kiyawāw askihk kā ot ihtāwiniyēk. ki ayikin ci oma aspin kā pimātisiyēk, ahpo mēkwāc ē pimātisicik kotāwiwāwak?

³ wihtamākok kit awāsimisiwāwak, mina kiyām kit awāsimisiwāwak kita wihtamawēwak ot awāsimisiwāwa, ēkosi ot awāsimisiwāwa kita wihtamawēyiwa kotaka ē ayāniskēpimātisiyit.

⁴ anima pamar manicos kā ki iskwastahk kwāskotisis ki miciw; mina anima kwāskotisis kā ki iskwastahk kānkar manicos ki miciw; mina anima kānkar manicos kā ki iskwastahk omwāpakwēw ki miciw.

⁵ koskoskāk kiyawāw okiskwēpēwak, mina mātok; mina mawimok kahkiyaw kiyawāw kā minihkwēyēk somināpo, anima ē wikasik somināpo ohci; cikēmā ki maskamikawināwāw kitoniwāhk ohci.

⁶ cikēmā ē piskitaskānēsicik ayisiyiniwak pē takosinwak niso askihk, ē maskawisicik mina ē osāmēyaticik; wipita tāpiskoc mistahkēsiw wipita, mina ayāw o kistāpitāniyiwa kihcimistakēsiwa.

⁷ ki nisiwanāciēw ni sominātikoma, ki poyakayakēskowēw ni minisātikoma; mitoni ki poyakipitēw, mina ki wēpinēw; ē paskētikwanakisiyit ki wāpiskipitēw.

⁸ mihtātwēwēmok tāpiskoc oskinikiskwēw ē pakwatēhot asisiwēkin ē mihtātāt kā ki onāpēmit oskātisiwinihk.

⁹ pahkwēsikani pakitināsowin mina minihkwēwi pakitināsowin kisipipayitāniwan o wāskahikanihk kā tipēyihcikēt; ayamihēwiyiniwak, kā tipēyihcikēt ot atoskēyākana, mātowak.

¹⁰ nisiwanātan kistikān, aski mātomakan; cikēmā pahkwēsikanikān nisiwanātisiw, oski somināpo namatakwan, pimi nohtēpayiw.

¹¹ nanēpēwisik kiyawāw kistikēwiyinitik, mawimokēk, kiyawāw kā pamiāyēkok sominātikwak, pahkwēsikanikān mina iskwēsisikān ohci; cikēmā manisikēwin kistikānihk nisiwanātan.

¹² sominātik pāso, mina minisāhtik miyowātikowiw; notimiminātik, pāmātik mina, asici misiminātik, kahkiyaw ēsa piko mistikwak kistikānihk nipowātikowiwak; cikēmā miyawātamowin nipomakan ayisiyiniwikosisānināhk.

¹³ pakwatēhototamok asisiwēkin mina mihtātwēwēmok, kiyawāw ayamihēwiyinitik; mawimokēk, kiyawāw kā atoskēyākaniwiyēk pakitināsowināpiskohk; āstamitik, kapētipisk asisiwēkinohk pimisinik, kiyawāw ot atoskēyākana ni kisēmanitom; cikēmā pahkwēsikani pakitināsowin mina minihkwēwi pakitināsowin kipitinikātēw o wāskāhikanihk ki kisēmanitomiwāw.

¹⁴ kanācihtāk iyiwanisiisowin, natohkēmok ē ayākwāmēyitākwahk māwacihitowin, māwacihikok kisēiyiniwak mina kahkiyaw kā ot ihtāwinicik askihk o wāskāhikanihk kā tipēyihcikēt ki kisēmanitomiwāw, mina mawimostāhk kā tipēyihcikēt.

¹⁵ hāy ēwako kisikāw! cikēmā okisikām kisiwāk ayāyiw, ēkosi tāpiskoc nisiwanācihiwēwin māmawēyas siyokātisit ohci kita pē isi takosinamakan.

¹⁶ nama ci miciwin kipicipayitāniwan ē wāpahtamahk, ēhē, miyawātamowin mina mamahtākosiwin o wāskāhikanihk ohci ki kisēmanitominaw?

¹⁷ kistikāna pikiskatatinwa ita kā ki yikwaskamikahikātēki; māwacicikēwikamikwa sikawaskacikātēwa, astāsonikamikwa pikonikātēwa; cikēmā pahkwēsikanikān nipowipayiw.

¹⁸ tāniyikohk mamāpinēwak pisiskiwak! wawānēyitamwak ē ayasēyaticik mostoswak wawānēyitamwak, cikēmā namawiya ayāwak ita kita mamicisocik; ēhē, kā āhasēyaticik māyatihkwak sikawaskatāwak.

¹⁹ kā tipēyihcikēyan, kiya ki mawimostātin; cikēmā iskotēw ki mēstikasam micisowina pikwataskamikāhk, mina ē kwākotēk ki kisisowak kahkiyaw mistikwak kistikānihk.

²⁰ ēhē, pisiskiwak pikwacāyihk ki yēhyēsototākwak; cikēmā sipisisa pāstēwa, mina iskotēw ki mēstikasam micisowina pikwataskamikāhk.