ᐃᓯᐦᒋᑫᐃᐧᓂᐋᐧᐊᐧ 1 - Kanāci Kihci Masinahikan

¹ nistam masinahikan ni ki ositān ā tiāpilas, ē ātotamān kahkiyaw anima cisas kā ki māci itotahk mina kā ki kiskinaamākēt,

² piyis anima ē kisikāk kā ki otiniht ispi kā wawēyasowātāk kā kanātisiyit ahcāhkwa ohci, anihi apāstila kā ki nawasonāt:

³ ēwakwani mina kā ponipayiyik o kotakitāwin kā ki wāpatiyisostawāt ē pimātisit micētwayak ē isi kēcināyēyitamiāt, nēmitanaw kisikāwa ē ki wāpamikot, mina ē tasitahk anihi kā akitēki kisēmanito ot otēnawiwinihk:

⁴ ēkosi māka ē māmawi māwaciitocik, ki ayākwāmimēw ēkā kita sipwētēyit cērosalamihk ohci, māka kita pētāwācik ot asotamākēwiniyi wēyotāwihk, ēwako, ki itēw, ki ki pētawināwāw:

⁵ cikēmā cān tāpwē ki paptaisiwiiwēw nipi ohci; māka kiyawā ki ka pāptaisiwiikawināwāw kā kanātisit ahcāhk ohci namawiya micēto kisikāw nikān otē.

⁶ wiyawāw māka, ispi ē māmawi ayācik, ki kakwēcimēwak, ē itwēcik, tēpēyihcikēyan, anohc oma kā ikihk ki ka miyāwak ci isrēil kihci okimāwiwin?

⁷ ki itēw māka, namawiya kiyawāw kita kiskēyitamēk kisikāwa mina ē āispitāyawahk, wēyotāwihk wiya kā tipēyitahk.

⁸ māka ki ka miyikawināwāw kaskihēwisiwin, ispi kā kanātisit ahcāhk otihtikoyēko: ēkosi ki ka ācimināwāw cērosalamihk, mina misiwē cotiyaihk mina samēriyaihk, mina ē kākisipaskamikāk aski.

⁹ ispi māka ohi kā ayitwēt, ē mēkwā kitāpamācik, ispimihk ki isi otināw; ēkosi waskohk ē ati ākopayiyit namawiya wāpamēwak.

¹⁰ mēkwāc māka kisikohk soki ē itāpicik ē ati opiskāyit, mātika, niso nāpēwa ki wicikāpawistākwak ē wāpiskioyit;

¹¹ ēwakwani mina kā itikocik kiyawāw kāliliwiyinitik, tānēki kā nipawiyēt kisikohk ē itāpiyēk? awa cisas, kā nakatikoyēk kihci kisikohk ē isi otiniht, ēkosi mina kē isi takosihk kā ki isi wāpamāyēt kisikohk ē itohtēt.

¹² ēkwa māka ki pē kiwēwak cērosalamihk anita wacihk ohci ālipēt kā isiyihkātēk, ēwako kisiwāk cērosalamihk kā ayāk, pēyak ayamihēkisikāw pimipiciwin iyikohk.

¹³ ispi māka piyitokēcik, ki iskwātawiwak ispimihk wāskāhikanihk, ita anima ē ayācik, pitar mina cān mina cēmis mina āntaro, pilip mina tāmas, pārtālamo mina mātyo, cēmis okosisa ālpiyas, mina sāiman silāt kā itiht, mina cotas okosisa cēmis.

¹⁴ kahkiyaw oki ki māmawi ākamēyimoat ē ayamihācik, asici anihi iskwēwa mina mēri okāwiya cisas, mina ociwāma.

¹⁵ ēkospi māka ē kakisikāk pitar ki nipawiw mēkwā ayihk ita ē ayācik kociwāmitocik ēkosi ki itwēw (mihcēt ayisiyiniwak māka ki māwaciitowak, nāntaw mitātahtomitanaw nisitanaw ayiwāk),

¹⁶ niciwāmitik, ki itastēw kita tipipayik kihci masinahikēwin, kā kanātisit ahcāhk kayās kā ki itwēt otoniyihk ohci tēpita, kā ki itāt cotasa, kā kiskinotaāt anihi kā ki otināyit cisasa.

¹⁷ cikēmā ki asitakicikāso kiyānaw, mina ki miyāw pahki oma atoskēwin.

¹⁸ (awa māka nāpēw ki ātāwēw kistikāniyiw ē otisit o maciitiwin; ēkosi ē acici pahkisihk, āpitaw ki poskopayiw ēkosi otatāmiyawa ki kwayakopayiyiwa.

¹⁹ ki kiskēyitamwak māka kahkiyaw kā ayācik cērosalamihk; ēkosi wiyawāw o pikiskwēwiniwāhk ēwako kistikān ākēltima ki isiyihkātēw, ēwakwānima, mihkowi kistikān.)

²⁰ cikēmā itasinahikātēw nikamo māsinaikanihk, kiyām ot itāwin kita pisisikwastēyiw, mina ēkāwiya ayisiyiniw ēkota kita wikiw: mina, ot itapiwin kiyām kotaka kita otinamiyiwa.

²¹ aniki nāpēwak māka ohci kā ki wicēwikoyakok tahkinē mēkwāc kā tipēyihcikēt cisas ē papitokēt mina ē wawayawi wicēwikoyahk,

²² o pāptāisiwihiwēwin cān ohci, piyis anima ē kisikāk kā ki nakatikoyahk ispimihk ē isi otiniht, piko kita otiniht pēyak ēkota ohci kita ki ātotahk wista ot āpisisinowiniyiw.

²³ niso māka ki nikānayēwak, cosip pārsāpas kā itiht, castas kā isi aspiyikāsot, mina mātāyas.

²⁴ ki ayamihāwak māka, ēkosi ki itwēwak, kiya, tēpēyihcikēyan, kā kiskēyitamwat otēiwāwa kahkiyaw ayisiyiniwak, wāpahtahiwē oki kā isi nisicik tānāna kāh nawasonat,

²⁵ kita otinahk itapiwin oma atoskēwinihk mina apastiliwiwinihk, ita ohci cotas kā ki pahkisihk, kita itohtē wiya ot itāwinihk.

²⁶ ēkwa māka ki wēpinikēwak; poti māka mātāyas ki otināw; ēkosi ki asitakimāw anihi mitātat pēyakosāp apāstila.