ᓃᓵᐧᐤ ᑎᒪᑏ 1 - Kanāci Kihci Masinahikan

¹ pāl ot apāstilima cisas Christ ē itēyitahk kisēmanito ē isi asotamākawiyahk anima pimātisiwin Christ cisas kā ayāt,

² ē masinahamātān timatī kā sākihitān nikosis; kisēwātotākowin kitimākinākowin mīna pēyatakēyimowin ki ka wi ohcistamāk kisēmanito wēyotāwihk mina Christ cisas kā tipēyimikoyahk.

³ ni nanāskomāw kisēmanito kā atoskawak kayās notāwiyak ohci pēhki kiskēyimisowinihk tāniyikohk ēkā ē poni kiskisitotātān ni mawimoscikēwinihk ē tipiskāk mina ē kisikāk

⁴ ē notē wāpamitān ē kiskisitotamān kocikawāpiwina kita ki moskinēskākoyān mamahtākosiwin;

⁵ ē ki miskawāsomikawiyān ēkā kā kayēsahk tāpwēyēyitamowin kā kikiskākoyan; nikān kā ki kikiskākot kohkom rāis mina kikāwi yonisi; ēkosi nit isi kēcināon kista ē kikiskākoyan.

⁶ ēwako ohci māka ki miskawāsomitin kita ākamitāyan o mēkiwin kisēmanito kā kikiskākoyan ni sāminiwēwin ohci.

⁷ cikēmā kisēmanito ki ki miyikonaw namawiya astāsiwi ahcāhkwa; māka maskawisiwin mina sākihiwēwin mina ayākwāmisiwin.

⁸ ēkāwiya māka ki ka wi nanēpēwiikon ot ācimowin kā tipēyimikoyahk ahpo niya kā kipaikāsoyān wiya ohci; māka kista kotēyita kotakitāwina miywācimowinihk ē itastēyik o kaskihēwisiwin kisēmanito;

⁹ kā ki pimāciikoyahk mina kā ki natomikoyahk kanāci natokēmowinihk namawiya ē itastēki kit isihcikēwininawa māka ē itastēyik wiya o wawēyēyitamowin mina o kisēwātisiwin kā ki isi miyikawiyahk Christ cisas isi micimāc ohci,

¹⁰ māka ēkwa kā ki nokotāniwahk ē ki nokosit kopimācihiwēminaw Christ cisas kā ki mēhcitāt nipowin mina kā ki wāsaskotēnahk pimātisiwin mina kākikē pimātisiwin miywācimowin ohci,

¹¹ ēwako kā ki oyakimikawiyān kita kakēskikēmoyān mina kita apāstiliwiyān mina kita kiskinohamākēyān.

¹² ēwako ohci oma kā isi kotakitāyān; māka namawiya ni nanēpēwisin; cikēmā ni kiskēyimāw ana kā ki tāpwētawak mina ni kēcināon ē kaskitāt kita kanawēyitahk anima kā ki kanawēyitamoak piyis ēwako kisikāki.

¹³ micimina ē isi wāpahtahiwēki kā pimātisiskākēki itwēwina kā ki pētaman ē wihtamān tāpwēyēyitamowinihk mina sākihiwēwinihk kā ayāt Christ cisas.

¹⁴ anima miyo kēkway kā ki pakitinamākawiyan kanawēyita kā kanātisit ahcāhk ohci kā kikiskākoyak.

¹⁵ oma ki kiskēyitēn kahkiyaw aniki ēsiyaihk kā ayācik ni ki nakatikwak; ēwakonik ohci picēlas mina harmācinis.

¹⁶ kā tipēyihcikēt kita wi kitimākinawēw ē ihtasiyit wikihk ānēsipāras; cikēmā micētwāw ni ki wiciik mina namawiya ohci nanēpēwiik ni takopisowināsk;

¹⁷ māka mēkwāc romihk ē ayāt ki ākamēyimo ē natonawit mina ni ki miskāk

¹⁸ (kā tipēyihcikēyit kita wi pakitēyitamāk kita kitimākinakot kā tipēyihcikēyit ēwako kisikāki); mina tāna tahto kēkway kā ki isi pamihiwēt ēpisasihk mitoni ki kiskēyitēn.