ᓃᓵᐧᐤ ᐱᑕᕒ 1 - Kanāci Kihci Masinahikan

¹ sāiman pitar ot atoskēyākana mina ot apāstilima cisas Christ ē masinahamawakik aniki kā ki miyihcik tāpiskoc niyanān ē isi kihcēyitākwahk kā tāpwēyēyitamwāyahk o kwayaskwātisiwin ki kisēmanitominaw mina kopimācihiwēminaw cisas Christ;

² kisēwātotākowin mina pēyatakēyimowin ki ka wi yakitwākawināwāw ē kiskēyimāyēk kisēmanito mina cisas kā tipēyimikoyahk;

³ cikēmā o manitowi kaskihēwisiwin ki ki pakitinamākonānaw kahkiyaw kēkway kā āpacihiwēk pimātisiwinihk mina manitowātisiwinihk, ē kiskēyimāyahk ana kā ki natomikoyahk wiya o kistēyitākosiwin mina o miywātisiwin ohci;

⁴ kā ohci miyikoyahk mistahi kā itēyitākwaniyiki mina ayiwāk kā kihcēyitākwaniyiki ot asotamākēwina; ēwakoni kita ki ohci wiciiwēyēk kā manitowahk isi ayāwin ē ki paspiyēk nisiwanācihowin askihk kā ayāk maci mostawēyitamowin ohci.

⁵ ēhē, oma māka ohci ākamēyimok kita yaki ayāyēk, ki tāpwēyēyitamowinawāhk takotāk miywātisiwin; ēkosi ki miywātisiwiniwāhk kiskēyitamowin;

⁶ ēkosi ki kiskēyitamowiniwāhk naiyikokwātisiwin; ēkosi ki naiyikokwātisiwiniwāhk sipēyitamowin; ēkosi ki sipēyitamowiniwāhk ayamihāwātisiwin;

⁷ ēkosi ayamihāwātisiwinihk ē sākihāyēkok ociwāmimāwak; ēkosi ē sākihāyēkok ociwāmimāwak kisēwātisiwin.

⁸ cikēmā kispin ohi kikiskākoyēko mina wēyoci ayāyēko ki ka isiikonāwāw ēkā kita kitimiyēk ahpo kita ēkā minisiwiyēk o kiskēyitamowinihk kā tipēyimikoyahk cisas Christ.

⁹ cikēmā ana kā kwitamāt ohi namawiya wawiyawāpiw ē wāpahtahk piko anima kisiwāk kā ayāyik, ēkā ē kiskisit kā ki pēkiiht kayās o maciitiwina ohci.

¹⁰ ēkosi māka niciwāmitik, awasimē ākamēyimok kita kēcinātāyēk ki natomikowiniwāw mina ki nawasonikowiniwāw; cikēmā kispin ohi itotamēko namawikāc ki ka pahkisinināwāw;

¹¹ ēkosi isi māka ki ka wēyoci ohtinamākawināwāw kita pihtokēyēk kākikē kā ayāyit ot otēnawiwin kā tipēyimikoyahk mina kopimācihiwēminaw cisas Christ.

¹² ēkosi māka namawiya ni ka ācistawēyitēn kita miskawāsomitakok ohi ātawiya ē kiskēyitamēk mina ē āyāci ayāyēk anima tāpwēwin kā kiki ayāyēk.

¹³ kwayask māka nit itēyitēn, isko ē ayāyān oma nikihk kita ospawēitakok ē miskawāsomitakok;

¹⁴ ē kiskēyitamān wipac ēkwa kita kēcikoskamān oma niki, wiya ēkosi ē ki isi kiskēyitamoit kā tipēyimakoyahk cisas Christ.

¹⁵ ēkosi māka ni ka ākamēyimon sakinē kita kaskitāyēk ki poni pimātisiyāni ohi mina kita kiskisomisoyēk.

¹⁶ cikēmā namawiya nohci pimitisaēnān ē kakayēyisiwi osicikātēki ātayokāna ispi kā kiskēyitamoitāhk o maskawisiwin mina o takosinowin kā tipēyimikoyahk cisas Christ, māka ni ki wāpahtamwānān niskisikonāhk ohci o kicāyiwiwin.

¹⁷ ki miyik māka kisēmanitowa wēyotāwihk kistakimikowin mina kistēyitākosiwin ispi kā otihtikot itwēwin kā ayiwākēyitākwahk kihcāyiwiwinihk ohci, ēwako awa kā sākihak nikosis, nāspic kā nahiyawēhit;

¹⁸ oma māka itwēwin kihci kisikohk ohci ni ki pētēnān, ē wicēwāyāhk kā kanātēyitākwahk waci.

¹⁹ ēkosi kit ayānaw mina kiskiwēhikēwi ayamiwin ayiwāk ē kēcinātāhk; ēwako ki miyototēnāwāw ē ayākwāmēyitamēk, tāpiskoc wāsaskotēnikan ē wāstēk wanitipiskāhk, piyis kita pētāpahk ēkosi wāpanacahk kita sākotēt kitēhiwāhk;

²⁰ ē kiskēyitamahk oma nikān ēkā nantaw kiskiwēhikēwin kihci masinahikēwinihk ē piskici itwēstamawātēmihk.

²¹ cikēmā namawikāc ki takosinomakan kiskiwēhikēwin ot itēyitamowinihk ayisiyiniw ohci; māka ayisiyiniwak ki pikiskwēwak kisēmanitowa ohci, ē itwēikocik kā kanātisiyit ahcāhkwa.